ਸ਼੍ਰੋਮਣੀ ਅਕਾਲੀ ਦਲ- ਬਸਪਾ ਦੀ ਸਰਕਾਰ ਬਣਨ ਤੇ ਗਰੀਬ ਬੱਚਿਆਂ ਦੀ ਸਾਰੀ ਪੜਾਈ ਮੁਫ਼ਤ ਕਰਨ ਦੇ ਨਾਲ ਨਾਲ ਸਾਰੀਆਂ ਔਰਤਾਂ ਨੂੰ ਮਾਤਾ ਖੀਵੀ ਯੋਜਨਾ ਤਹਿਤ 2,000 ਹਜ਼ਾਰ ਰੁਪਏ ਮਹੀਨਾ, ਨੀਲਾ ਕਾਰਡ ਧਾਰਕ ਘਰ ਦੀ ਹਰ ਮਹਿਲਾ ਮੁਖੀ ਨੂੰ ਸਨਮਾਨ ਭੱਤਾ ਅਤੇ 800 ਯੂਨਿਟ ਬਿਜਲੀ ਵੀ ਮੁਫ਼ਤ ਦਿਤੀ ਜਾਵੇਗੀ। ਇਸ ਦੇ ਨਾਲ ਹੀ ਕਾਂਗਰਸੀ ਨੇਤਾਵਾਂ ਵੱਲੋਂ ਜਿਨ੍ਹਾਂ ਲੋਕਾਂ ਦੇ ਵੱਡੇ ਪੱਧਰ ਤੇ ਨੀਲੇ ਕਾਰਡ ਨਿੱਜੀ ਰਜਿੰਸ਼ ਦੇ ਚੱਲਦਿਆਂ ਕੱਟੇ ਗਏ ਹਨ ਉਹ ਵੀ ਦੁਬਾਰਾ ਬਣਾਏ ਜਾਣਗੇ। ਇਹ ਪ੍ਰਗਟਾਵਾ ਵਿਧਾਨ ਸਭਾ ਹਲਕਾ ਅਟਾਰੀ ਤੋਂ ਸ਼੍ਰੋਮਣੀ ਅਕਾਲੀ ਦਲ ਬਸਪਾ ਗੱਠਜੋੜ ਦੇ ਉਮੀਦਵਾਰ ਪਰਵਿੰਦਰ ਸਿੰਘ ਬੈਦਾਵਾਨ (ਸੋਹਾਣਾ) ਨੇ ਚੋਣ ਮੀਟਿੰਗ ਵਿਚ ਬੋਲਦੇ ਹੋਏ ਕਿਹਾ। ਪਰਵਿੰਦਰ ਸਿੰਘ ਨੇ ਸ਼ਹੀਦ ਉੱਧਮ ਸਿੰਘ ਕਾਲੋਨੀ, ਗੁਰੁ ਨਾਨਕ ਅਮਰ ਕਾਲੋਨੀ ਸਮੇਤ ਆਸ ਪਾਸ ਦੀਆਂ ਕਾਲੋਨੀਆਂ ਦਾ ਦੌਰਾ ਕਰਦੇ ਹੋਏ ਕਿਹਾ ਕਿ ਜਿਸ ਤਰਾਂ ਪਿਛਲੀ ਅਕਾਲੀ ਸਰਕਾਰ ਦੌਰਾਨ ਗ਼ਰੀਬਾਂ ਦਾ ਖ਼ਾਸ ਖਿਆਲ ਰੱਖਿਆਂ ਜਾਦਾ ਸੀ। ਉਸੇ ਤਰਾਂ ਇਸ ਵਾਰ ਵੀ ਅਕਾਲੀ ਬਸਪਾ ਸਰਕਾਰ ਆਉਣ ਤੇ ਗ਼ਰੀਬਾਂ ਅਤੇ ਮਹਿਲਾਵਾਂ ਲਈ ਖ਼ਾਸ ਧਿਆਨ ਰੱਖਿਆਂ ਜਾਵੇਗਾ। ਉਨ੍ਹਾਂ ਅਕਾਲੀ ਦਲ ਦੇ 13 ਨੁਕਾਤੀ ਪ੍ਰੋਗਰਾਮਾਂ ਬਾਰੇ ਲੋਕਾਂ ਨੂੰ ਵਿਸਥਾਰ ਸਹਿਤ ਜਾਣਕਾਰੀ ਦਿਤੀ। ਇਸ ਮੌਕੇ ਤੇ ਉਨ੍ਹਾਂ ਨਾਲ ਸ਼ਹੀਦ ਉੱਧਮ ਸਿੰਘ ਕਾਲੋਨੀ ਦੇ ਪ੍ਰਧਾਨ ਬੇਕ ਸਿੰਘ, ਗੁਰੁ ਨਾਨਕ ਅਮਰ ਕਾਲੋਨੀ ਦੇ ਪ੍ਰਧਾਨ ਗਿਆਨ ਪ੍ਰਕਾਸ਼, ਮੋਹਨ ਲਾਲ, ਰਾਮ ਕੁਮਾਰ, ਸ੍ਰੀ ਪਾਲ ਸਮੇਤ ਵੱਡੀ ਗਿਣਤੀ ਵਿਚ ਨਿਵਾਸੀਆਂ ਨੇ ਹਿੱਸਾ ਲਿਆ।