ਚੰਡੀਗੜ੍ਹ ਨਗਰ ਨਿਗਮ ਚੋਣਾਂ ਵਿਚ ਅਹਿਮ ਭੂਮੀਕਾ ਨਿਭਾਉਣ ਵਾਲੇ ਹਿਮਾਚਲੀ ਮੂਲ ਦੇ ਲੋਕਾਂ ਨੇ ਐਤਵਾਰ ਨੂੰ ਆਯੋਜਿਤ ਧਾਮ ਅਤੇ ਸੱਭਿਆਚਾਰਕ ਸਮਾਗਮ ਦੌਰਾਨ ਭਾਜਪਾ ਦੇ ਸਮਰਥਨ ਵਿਚ ਪੂਰੀ ਤਰ੍ਹਾਂ ਨਾਲ ਇਕਜੁੱਟਤਾ ਦਿਖਾਈ। ਭਾਜਪਾ ਦੇ ਹਿਮਾਚਲ ਸੈੱਲ ਵਲੋਂ ਆਯੋਜਿਤ ਇਸ ਸਮਾਗਮ ਦੌਰਾਨ ਹਿਮਾਚਲ ਦੇ ਮੰਡੀ, ਕਾਂਗੜਾ, ਹਮੀਰਪੁਰ ਅਤੇ ਬਿਲਾਸਪੁਰ ਦੇ ਧਾਮ ਦੇ ਮਿਸ਼ਰਣ ਦੇ ਰੂਪ ਵਿਚ ਮਿੱਠਾ, ਮਦਰਾ, ਸੇਪੁ ਵੜੀ, ਦਹੀ ਦੇ ਮਿਸ਼ਰਣ ਦੇ ਨਾਲ ਮਾਹਾਂ ਦੀ ਦਾਲ, ਪਹਾੜੀ ਕੜੀ, ਚਨੇ ਦਾ ਖੱਟਾ, ਪੱਤਲ ’ਤੇ ਪਰੋਸਿਆ ਗਿਆ। ਜਿਸਨੂੰ ਬਣਾਉਣ ਲਈ ਜੋਗਿੰਦਰ ਨਗਰ ਤੋਂ 16 ਲੋਕਾਂ ਦੀ ਟੀਮ ਇਥੇ ਇਕ ਦਿਨ ਪਹਿਲਾਂ ਹੀ ਪਹੁੰਚ ਗਈ ਸੀ। ਇਸ ਮੌਕੇ ਠੰਡ ਨੂੰ ਦੇਖਦਿਆਂ ਹਿਮਾਚਲੀ ਕਾਂਗੜਂ ਦੇ ਵਿਕਲਪ ਦੇ ਰੂਪ ਵਿਚ ਪ੍ਰਬੰਧਕਾਂ ਵਲੋਂ 25 ਗੈਸ ਹੀਟਰਾਂ ਤੋਂ ਇਲਾਵਾ ਕਈ ਥਾਂ ’ਤੇ ਵੱਖ ਵੱਖ ਪ੍ਰਬੰਧ ਕੀਤੇ ਗਏ ਸਨ।
ਸਮਾਗਮ ਦੌਰਾਨ ਮੰਡੀ ਕਲਿਆਣ ਸਭਾ, ਸਿਰਮੌਰ ਸਭਾ, ਹਿਮਾਚਲ ਮਹਾਸਭਾ, ਸਮੇਤ ਸ਼ਹਿਰ ਵਿਚ ਸਰਗਰਮ ਹਿਮਾਚਲ ਵਾਸੀਆਂ ਦੀਆਂ 17 ਸਭਾਵਾਂ ਦੇ ਨੁਮਾਇੰਦਿਆਂ ਨੇ ਭਾਗ ਲਿਆ। ਇਸ ਮੌਕੇ ਬੋਲਦਿਆਂ ਕੇਂਦਰੀ ਸੂਚਨਾ ਅਤੇ ਪ੍ਰਸਾਰਣ ਮੰਤਰੀ ਅਨੁਰਾਗ ਠਾਕੁਰ ਨੇ ਕਿਹਾ ਕਿ ਹਿਮਾਚਲ ਅਤੇ ਚੰਡੀਗੜ੍ਹ ਦੀ ਸੱਭਿਆਚਾਰਕ ਸਾਂਝ ਹੀ ਇਥੋਂ ਦੇ ਲੋਕਾਂ ਦੀ ਖਾਸੀਅਤ ਹੈ। ਸਮਾਗਮ ਦੌਰਾਨ ਭਾਜਪਾ ਪ੍ਰਧਾਨ ਅਰੁਣ ਸੂਦ, ਸਾਬਕਾ ਸੂਦਾ ਪ੍ਰਧਾਨ ਸੰਜੈ ਟੰਡਨ, ਭਾਰਤ ਦੇ ਐਡੀਸ਼ਨਲ ਸਾਲੀਸਟਰ ਜਨਰਲ ਸੱਤਪਾਲ ਜੈਨ, ਚੰਡੀਗੜ੍ਹ ਦੀ ਸਹਿ ਮੁਖੀ ਇੰਦੂਬਾਲਾ ਗੋਸਵਾਮੀ, ਚੰਡੀਗੜ੍ਹ ਦੇ ਮੇਅਰ ਰਵੀਕਾਂਤ ਸ਼ਰਮਾ, ਸੂਬਾ ਸਕੱਤਰ ਅਮਿਤ ਰਾਣਾ ਸਮੇਤ ਇਥੇ ਪਹੁੰਚੇ ਕਈ ਆਗੂਆਂ ਨੇ ਜ਼ਮੀਨ ’ਤੇ ਬੈਠ ਕੇ ਹਿਮਾਚਲੀ ਸਟਾਈਲ ਵਿਚ ਪੱਤਲ ’ਤੇ ਹੀ ਧਾਮ ਖਾਂਦੀ। ਇਸ ਮੌਕੇ ਹਿਮਾਚਲ ਦੇ ਪ੍ਰਸਿੱਧ ਲੋਕ ਗਾਇਕ ਕਰਨੈਲ ਰਾਣਾ ਨੇ ਕੈਸਾ ਲਗਾ ਗੋਰੀਏ ਪਹਾੜੇ ਦ ਬਸਣਾ, ਕਜੂ ਨੈਨ ਮਿਲਾਏ ਦਿਲਾ ਮੇਰਆ, ਬਿੰਦੂ ਨੀਲੂ ਦੋ ਸਖੀਆ, ਤੇਰੇ ਮੱਥੇ ਤੇ ਬਿੰਦੂ ਲਾਣਾ ਗੋਰੀਏ ਵਰਗੇ ਕਈ ਗੀਤਾਂ ਨਾਲ ਲੋਕਾਂ ਦਾ ਮਨੋਰੰਜਨ ਕੀਤਾ।