ਚੋਣਕਾਰ ਅਫਸਰ-ਕਮ-ਡਿਪਟੀ ਕਮਿਸ਼ਨਰ ਸ੍ਰੀਮਤੀ ਅੰਮ੍ਰਿਤ ਕੌਰ ਗਿੱਲ ਨੇ ਭਾਰਤੀ ਚੋਣ ਕਮਿਸ਼ਨ ਦੀਆਂ ਹਦਾਇਤਾਂ ਅਨੁਸਾਰ ਵੋਟਰ ਸੂਚੀਆਂ ਦੀ ਸਪੈਸ਼ਲ ਸਰਸਰੀ ਸੁਧਾਈ ਉਪਰੰਤ ਵੋਟਰ ਸੂਚੀਆਂ ਦੀ ਸੀ.ਡੀਜ਼ ਅਤੇ ਵੋਟਰ ਸੂਚੀਆਂ ਰਾਜਨੀਤਿਕ ਪਾਰਟੀਆਂ ਦੇ ਨੁਮਾਇੰਦਿਆਂ ਨੂੰ ਸੌਂਪੀਆਂ।ਇਸ ਸਬੰਧੀ ਜ਼ਿਲਾ ਪ੍ਰਬੰਧਕੀ ਕੰਪਲੈਕਸ ਵਿਖੇ ਵੱਖ-ਵੱਖ ਸਿਆਸੀ ਪਾਰਟੀਆਂ ਦੇ ਨੁਮਾਇੰਦਿਆਂ ਨਾਲ ਮੀਟਿੰਗ ਕਰਦਿਆਂ ਡੀ.ਸੀ. ਨੇ ਇਨਾਂ ਨੁਮਾਂਇੰਦਿਆਂ ਨੂੰ ਆਪਣੀ- ਆਪਣੀ ਪਾਰਟੀ ਦੇ ਬੂਥ ਲੈਵਲ ਏਜੰਟ (ਬੀ.ਐਲ.ਏ) ਨਿਯੁਕਤ ਕਰਨ ਲਈ ਪ੍ਰੇਰਤ ਕੀਤਾ। ਉਨਾਂ ਰਾਜਸੀ ਪਾਰਟੀਆਂ ਦੇ ਨੁਮਾਂਇੰਦਿਆਂ ਨੂੰ ਕਿਹਾ ਕਿ ਜੇਕਰ ਕਿਸੇ ਪਿੰਡ ਜਾਂ ਵਾਰਡ ਵਿਚ ਬੂਥ ਬਣਨਾ ਰਹਿ ਗਿਆ ਹੈ ਜਾਂ ਬਣਾਇਆ ਜਾਣਾ ਹੈ, ਤਾਂ ਉਸ ਸਬੰਧੀ ਜ਼ਿਲਾ ਚੋਣ ਦਫਤਰ ਨੂੰ ਸੂਚਿਤ ਕੀਤਾ ਜਾਵੇ ਤਾਂ ਜ਼ੋ ਵਾਧੂ ਬੂਥ ਬਨਾਉਣ ਸਬੰਧੀ ਕਾਰਵਾਈ ਕੀਤੀ ਜਾ ਸਕੇ। ਉਨਾਂ ਇਹ ਵੀ ਕਿਹਾ ਕਿ ਜੇਕਰ ਕੋਈ ਬੂਥ ਢੁਕਵੇਂ ਸਥਾਨ ਤੇ ਨਹੀਂ ਬਣਿਆ ਹੋਇਆ ਤਾਂ ਉਸਦੀ ਤਬਦੀਲੀ ਸਬੰਧੀ ਆਪਣੇ ਸੁਝਾਅ ਲਿਖਤੀ ਰੂਪ ਵਿੱਚ ਦਿੱਤੇ ਜਾਣ । ਚੋਣਕਾਰ ਅਫਸਰ ਨੇ ਦੱਸਿਆ ਕਿ ਫ਼ਤਹਿਗੜ ਸਾਹਿਬ ਜ਼ਿਲੇ ਵਿੱਚ 04 ਲੱਖ 46 ਹਜ਼ਾਰ 050 ਵੋਟਰ ਹਨ, ਜਿਨ੍ਹਾਂ ਵਿੱਚੋਂ 02 ਲੱਖ 35 ਹਜ਼ਾਰ 061 ਮਰਦ ਵੋਟਰ ਅਤੇ 02 ਲੱਖ 10 ਹਜ਼ਾਰ 981 ਮਹਿਲਾ ਵੋਟਰ ਤੇ 08 ਅਦਰ ਵੋਟਰ ਹਨ। 054-ਬਸੀ ਪਠਾਣਾ ਹਲਕੇ ਵਿੱਚ ਕੁੱਲ 01 ਲੱਖ 46 ਹਜ਼ਾਰ 885 ਵੋਟਰ, 055-ਫ਼ਤਹਿਗੜ ਸਾਹਿਬ ਹਲਕੇ ਵਿੱਚ 01 ਲੱਖ 57 ਹਜ਼ਾਰ 318 ਵੋਟਰ ਤੇ 056-ਅਮਲੋਹ ਹਲਕੇ ਵਿੱਚ 01 ਲੱਖ 41 ਹਜ਼ਾਰ 847 ਵੋਟਰ ਹਨ। ਮੀਟਿੰਗ ਵਿੱਚ ਹਰਮਿੰਦਰ ਸੂਦ, ਜਸਵਿੰਦਰ ਸਿੰਘ, ਅਮਿਤ ਝਾਂਜੀ, ਅੰਕੁਰ ਸ਼ਰਮਾ, ਗੁਰਮੇਲ ਕੌਰ,ਸਮੇਤ ਹੋਰਨਾਂ ਪਾਰਟੀਆਂ ਦੇ ਨੁਮਾਇੰਦੇ ਅਤੇ ਵਿਭਾਗੀ ਅਧਿਕਾਰੀ ਵੀ ਸ਼ਾਮਲ ਸਨ।