ਵਿਜੈ ਇੰਦਰ ਸਿੰਗਲਾ ਯਤਨਾਂ ਸਦਕਾ ਭਵਾਨੀਗੜ ਵਾਸੀਆਂ ਨੂੰ ਮਿਲਿਆ ਆਪਣੀ ਤਰਾਂ ਦਾ ਪਹਿਲਾ ‘ਬਾਇਓਡਾਇਵਰਸਿਟੀ’ ਪਾਰਕ
ਨਗਰ ਕੌਂਸਲ ਭਵਾਨੀਗੜ ਦੀ ਵਾਧੂ ਪਈ ਥਾਂ ’ਤੇ 1.18 ਕਰੋੜ ਰੁਪਏ ਦੀ ਲਾਗਤ ਨਾਲ ਤਿਆਰ ਕਰਵਾਇਆ ਗਿਆ ਪਾਰਕ: ਕੈਬਨਿਟ ਮੰਤਰੀ
Web Admin
5 Dariya News
ਭਵਾਨੀਗੜ , 05 Dec 2020
ਸਕੂਲ ਸਿੱਖਿਆ ਅਤੇ ਲੋਕ ਨਿਰਮਾਣ ਮੰਤਰੀ ਪੰਜਾਬ ਸ਼੍ਰੀ ਵਿਜੈ ਇੰਦਰ ਸਿੰਗਲਾ ਨੇ ਸੰਗਰੂਰ ਨੂੰ ਪੰਜਾਬ ਦਾ ਨੰਬਰ ਇੱਕ ਹਲਕਾ ਬਣਾਉਣ ਵੱਲ ਇੱਕ ਹੋਰ ਕਦਮ ਪੁੱਟਦਿਆਂ ਅੱਜ ਭਵਾਨੀਗੜ ਵਿਖੇ ਆਪਣੀ ਤਰਾਂ ਦੇ ਪਹਿਲੇ ‘ਬਾਇਓਡਾਇਵਰਸਿਟੀ’ ਪਾਰਕ ਦਾ ਉਦਘਾਟਨ ਕੀਤਾ। ਲਗਭਗ 2.2 ਏਕੜ ਰਕਬੇ ’ਤੇ ਫੈਲੇ ਇਸ ਪਾਰਕ ਨੂੰ ਸ਼੍ਰੀ ਵਿਜੈ ਇੰਦਰ ਸਿੰਗਲਾ ਦੀਆਂ ਹਦਾਇਤਾਂ ’ਤੇ ਜੰਗਲਾਤ ਵਿਭਾਗ ਦੀ ਸੰਗਰੂਰ ਡਵੀਜ਼ਨ ਵੱਲੋਂ 1.18 ਕਰੋੜ ਰੁਪਏ ਦੀ ਲਾਗਤ ਨਾਲ ਤਿਆਰ ਕੀਤਾ ਗਿਆ ਹੈ। ਸ਼੍ਰੀ ਸਿੰਗਲਾ ਨੇ ਦੱਸਿਆ ਕਿ ਜਿਸ ਜਗਾ ’ਤੇ ਪਾਰਕ ਤਿਆਰ ਕਰਵਾਇਆ ਗਿਆ ਹੈ, ਕਦੇ ਉਸ ਜਗਾ ’ਤੇ ਨਗਰ ਕੌਂਸਲ ਵੱਲੋਂ ਕੂੜਾ ਸੁੱਟਿਆ ਜਾਂਦਾ ਸੀ ਜਿਸ ਕਰਕੇ ਸ਼ਹਿਰ ਵਾਸੀਆਂ ਨੂੰ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈਂਦਾ ਸੀ ਪਰ ਹੁਣ ਇਸ ਜਗਾ ’ਤੇ ਨਮੂਨੇ ਦਾ ਪਾਰਕ ਬਣਨ ਨਾਲ ਸ਼ਹਿਰ ਦੀ ਸੁੰਦਰਤਾ ’ਚ ਵਾਧਾ ਹੋਇਆ ਹੈ। ਇਸ ਪਾਰਕ ਨੂੰ ਤਿਆਰ ਕਰਨ ਲਈ ਕੈਬਨਿਟ ਮੰਤਰੀ ਨੇ ਜੰਗਲਾਤ ਵਿਭਾਗ ’ਚ ਏ.ਸੀ.ਐਸ. ਰਵਨੀਤ ਕੌਰ ਅਤੇ ਪੀ.ਸੀ.ਸੀ.ਐਫ਼. ਜਿਤੇਂਦਰ ਸ਼ਰਮਾ ਨਾਲ ਲਗਾਤਾਰ ਰਾਬਤਾ ਰੱਖਿਆ ਤੇ ਉਨਾਂ ਦੀਆਂ ਕੋਸ਼ਿਸ਼ਾਂ ਸਦਕਾ ਹੀ ਇਹ ਪਾਰਕ ਭਵਾਨੀਗੜ ਸ਼ਹਿਰ ’ਚ ਬਣਿਆ।ਸ਼੍ਰੀ ਵਿਜੈ ਇੰਦਰ ਸਿੰਗਲਾ ਨੇ ਦੱਸਿਆ ਕਿ ਇਸ ਪਾਰਕ ’ਚ ਬੂਟਿਆਂ ਦੀਆਂ 165 ਤੋਂ ਵਧੇਰੇ ਕਿਸਮਾਂ ਲਗਾਈਆਂ ਗਈਆਂ ਹਨ ਜਿਨਾਂ ਨੂੰ 10 ਜ਼ੋਨਾਂ ’ਚ ਵੰਡਿਆ ਗਿਆ ਹੈ। ਉਨਾਂ ਕਿਹਾ ਕਿ ਇਨਾਂ 10 ਜ਼ੋਨਾਂ ’ਚ, 25 ਕਿਸਮਾਂ ਮੈਡੀਸੀਨਲ ਬੂਟਿਆਂ ਦੀਆਂ, 30 ਰਵਾਇਤੀ ਬੂਟੇ, 58 ਤਰਾਂ ਦਾ ਕੰਡਾਥੋਹਰ, 40 ਕਿਸਮਾਂ ਦੀਆਂ ਝਾੜੀਆਂ ਤੇ ਫ਼ੁੱਲਾਂ ਵਾਲੇ ਬੂਟੇ, 4 ਤਰਾਂ ਦੇ ਪਾਲਮ, 5 ਕਿਸਮਾਂ ਦੇ ਬਾਂਸ ਅਤੇ 3 ਕਿਸਮ ਦੀ ਚੀਲ ਲਗਾਈ ਗਈ ਹੈ।ਕੈਬਨਿਟ ਮੰਤਰੀ ਨੇ ਦੱਸਿਆ ਕਿ ਇਸ ਪਾਰਕ ’ਚ ਖ਼ਾਸ ਕਿਸਮਾਂ ਦੇ ਬੂਟਿਆਂ ਤੋਂ ਇਲਾਵਾ ਸੈਰਗਾਹ, ਓਪਨ ਜਿੰਮ, ਬੱਚਿਆਂ ਲਈ ਵੱਖਰਾ ਕੋਨਾ ਅਤੇ ਇਮਾਰਤਾਂ ਅੰਦਰ ਰੱਖੇ ਜਾ ਸਕਣ ਵਾਲੇ ਬੂਟਿਆਂ ਦੀ ਖ਼ਾਸ ਗੈਲਰੀ ਵੀ ਬਣਾਈ ਗਈ ਹੈ। ਉਨਾਂ ਕਿਹਾ ਕਿ ਇਸ ਪਾਰਕ ਨੂੰ ਤਿਆਰ ਕਰਵਾਉਣ ਦਾ ਮੁੱਖ ਮਕਸਦ ਸ਼ਹਿਰ ਦੀ ਸੁੰਦਰਤਾ ’ਚ ਵਾਧਾ ਕਰਨ ਦੇ ਨਾਲ-ਨਾਲ ਸ਼ਹਿਰ ਵਾਸੀਆਂ ਨੂੰ ਚੰਗੀ ਸਿਹਤ ਤੇ ਬੂਟਿਆਂ ਦੀ ਸੰਭਾਲ ਪ੍ਰਤੀ ਚੇਤੰਨ ਕਰਨਾ ਹੈ। ਉਨਾਂ ਕਿਹਾ ਕਿ ਹਾਲਾਂਕਿ ਇਹ ਪਾਰਕ ਜੰਗਲਾਤ ਵਿਭਾਗ ਵੱਲੋਂ ਤਿਆਰ ਕੀਤਾ ਗਿਆ ਹੈ ਪਰ ਹੁਣ ਇਸਦੀ ਸਾਂਭ ਸੰਭਾਲ ਦੀ ਜ਼ਿੰਮੇਵਾਰੀ ਨਗਰ ਕੌਂਸਲ ਨੂੰ ਹੀ ਦਿੱਤੀ ਜਾਵੇਗੀ।ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਐਸ.ਐਸ.ਪੀ. ਵਿਵੇਕ ਸ਼ੀਲ ਸੋਨੀ, ਡੀ.ਐਫ਼.ਓ. ਵਿੱਦਿਆ ਸਾਗਰੀ, ਵਧੀਕ ਡਿਪਟੀ ਕਮਿਸ਼ਨਰ ਅਨਮੋਲ ਸਿੰਘ ਧਾਲੀਵਾਲ, ਐਸ.ਡੀ.ਐਮ. ਭਵਾਨੀਗੜ ਡਾ. ਕਰਮਜੀਤ ਸਿੰਘ, ਚੇਅਰਪਰਸਨ ਜ਼ਿਲਾ ਪ੍ਰੀਸ਼ਦ ਜਸਵੀਰ ਕੌਰ ਅਤੇ ਚੇਅਰਮੈਨ ਬਲਾਕ ਸੰਮਤੀ ਵਰਿੰਦਰ ਪੰਨਵਾਂ ਵੀ ਹਾਜ਼ਰ ਸਨ।