ਸੰਸਦ ਮੈਂਬਰ ਜਸਬੀਰ ਸਿੰਘ ਡਿੰਪਾ ਨੇ ਕਿਹਾ ਹੈ ਕਿ ਪੰਜਾਬ ਸਰਕਾਰ ਵਲੋਂ ਪਿੰਡਾਂ ਅੰਦਰ ਵੀ ਸ਼ਹਿਰਾਂ ਵਰਗੀਆਂ ਬੁਨਿਆਦੀ ਸਹੂਲਤਾਂ ਮੁਹੱਈਆ ਕਰਵਾਕੇ ਲੋਕਾਂ ਦਾ ਜੀਵਨ ਪੱਧਰ ਉੱਚਾ ਚੁੱਕਣ ਦੇ ਮਕਸਦ ਨਾਲ ਸ਼ੁਰੂ ਕੀਤੀ 'ਸਮਾਰਟ ਵਿਲੇਜ਼' ਮੁਹਿੰਮ ਨਾਲ ਪਿੰਡਾਂ ਵਿਚ ਵੀ ਸ਼ਹਿਰਾਂ ਵਰਗੀਆਂ ਬੁਨਿਆਦੀ ਸਹੂਲਤਾਂ ਮੁਹੱਈਆ ਹੋਣਗੀਆਂ ਜਿਸਦੇ ਨਤੀਜੇ ਵਜੋਂ ਪਿੰਡਾਂ ਤੋਂ ਸ਼ਹਿਰਾਂ ਵੱਲ ਨੂੰ ਪਲਾਇਨ ਦੀ ਰਫਤਾਰ ਮੱਠੀ ਕਰਨ ਵਿਚ ਸਫਲਤਾ ਮਿਲੇਗੀ।ਉਹ ਅੱਜ ਸਥਾਨਕ ਜਿਲਾ ਪ੍ਰਸ਼ਾਸ਼ਕੀ ਕੰਪਲੈਕਸ ਵਿਖੇ ਸਮਾਰਟ ਵਿਲੇਜ਼ ਮੁਹਿੰਮ ਦੇ ਦੂਜੇ ਪੜਾਅ ਦੀ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਤੇ ਕਾਂਗਰਸ ਦੇ ਸੰਸਦ ਮੈਂਬਰ ਤੇ ਸੀਨੀਅਰ ਆਗੂ ਸ੍ਰੀ ਰਾਹੁਲ ਗਾਂਧੀ ਵਲੋਂ ਆਨਲਾਇਨ ਸ਼ੁਰੂਆਤ ਕਰਨ ਸਬੰਧੀ ਸਮਾਗਮ ਵਿਚ ਪੁੱਜੇ ਸਨ। ਇਸ ਮੌਕੇ ਡਿਪਟੀ ਕਮਿਸ਼ਨਰ ਸ੍ਰੀਮਤੀ ਦੀਪਤੀ ਉੱਪਲ, ਐਸ ਐਸ ਪੀ ਜਸਪ੍ਰੀਤ ਸਿੰਘ ਸਿੱਧੂ ਵਲੋਂ ਵੀ ਸ਼ਿਰਕਤ ਕੀਤੀ ਗਈ, ਜਿਸ ਦੌਰਾਨ ਜਿਲ੍ਹੇ ਦੇ 62 ਪਿੰਡਾਂ ਅੰਦਰ ਵਿਕਾਸ ਕੰਮਾਂ ਦੀ ਆਨਲਾਇਨ ਸ਼ੁਰੂਆਤ ਕੀਤੀ ਗਈ।ਸੰਸਦ ਮੈਂਬਰ ਨੇ ਕਿਹਾ ਕਿ ਪੰਜਾਬ ਦੇ ਮੁੱਖ ਮੰਤਰੀ ਵਲੋਂ ਇਸ 2733 ਕਰੋੜ ਰੁਪੈ ਦੀ ਯੋਜਨਾ ਨਾਲ ਪਿੰਡਾਂ ਅੰਦਰ ਪੀਣ ਵਾਲੇ ਪਾਣੀ, ਸੀਵਰੇਜ਼, ਗਲੀਆਂ ਨਾਲੀਆਂ, ਸਟਰੀਟ ਲਾਇਟਾਂ ਤੇ ਖੇਡ ਸਟੇਡੀਅਮ ਬਣਾਉਣ ਨਾਲ ਬੁਨਿਆਦੀ ਢਾਂਚੇ ਨੂੰ 100 ਫੀਸਦੀ ਵਿਕਸਤ ਕੀਤਾ ਜਾ ਸਕੇਗਾ।
ਇਸ ਤੋਂ ਪਹਿਲਾਂ ਲਗਭਗ 873 ਕਰੋੜ ਰੁਪੈ ਨਾਲ ਪਹਿਲੇ ਪੜਾਅ ਤਹਿਤ ਜਿਲੇ ਦੇ ਹਰ ਬਲਾਕ ਅੰਦਰ 5-5 ਖੇਡ ਸਟੇਡੀਅਮ ਬਣਾਏ ਜਾਣ ਦੀ ਸ਼ੁਰੂਆਤ ਕੀਤੀ ਜਾ ਚੁੱਕੀ ਹੈ।ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਵਲੋਂ ਅਗਲੇ ਇਕ ਸਾਲ ਅੰਦਰ ਸਮਾਰਟ ਵਿਲੇਜ਼ ਯੋਜਨਾ ਦੇ ਦੂਜੇ ਪੜਾਅ ਨੂੰ ਮੁਕੰਮਲ ਕਰਕੇ ਤੀਜੇ ਪੜਾਅ ਦੀ ਸ਼ੁਰੂਆਤ ਕੀਤੀ ਜਾਵੇਗੀ, ਜਿਸ ਤਹਿਤ ਸੰਚਾਰ ਵਿਵਸਥਾ, ਸਿਹਤ, ਮੋਬਾਇਲ ਕਲੀਨਿਕ ਆਦਿ ਵੱਲ ਵਿਸ਼ੇਸ਼ ਤਵੱਜ਼ੋਂ ਦਿੱਤੀ ਜਾਵੇਗੀ।ਇਸ ਮੌਕੇ ਡਿਪਟੀ ਕਮਿਸ਼ਨਰ ਸ੍ਰੀਮਤੀ ਦੀਪਤੀ ਉੱਪਲ ਨੇ ਦੱਸਿਆ ਕਿ ਸਮਾਰਟ ਵਿਲੇਜ਼ ਤਹਿਤ ਜਿਲੇ ਦੀਆਂ 546 ਪੰਚਾਇਤਾਂ ਨੂੰ ਬੁਨਿਆਦੀ ਸਹੂਲਤਾਂ ਲਈ 2297 ਪ੍ਰਾਜੈਕਟਾਂ ਵਾਸਤੇ 93.51 ਕਰੋੜ ਰੁਪੈ ਜਾਰੀ ਕੀਤੇ ਗਏ ਹਨ।ਅੱਜ ਜਿਨਾਂ 62 ਪਿੰਡਾਂ ਅੰਦਰ ਵਿਕਾਸ ਕੰਮਾਂ ਦੀ ਸ਼ੁਰੂਆਤ ਕੀਤੀ ਗਈ ਹੈ, ਉਨਾਂ ਵਿਚ ਨੂਰਪੁਰ ਲੁਬਾਣਾ, ਉੱਚਾ, ਸੈਫਲਾਬਾਦ, ਸੁਰਖਪੁਰ, ਰਮੀਦੀ, ਲੱਖਣ ਕੇ ਪੱਡੇ, ਹਮੀਰਾ, ਫੱਤੂਢੀਂਗਾ, ਭੰਡਾਲ ਬੇਟ, ਬੂਹ, ਅਲਾਦੀਨਪੁਰ, ਭਵਾਨੀਪੁਰ, ਬਿਸ਼ਨਪੁਰ, ਭਾਣੋਲੰਗਾ, ਪਰਵੇਜ਼ ਨਗਰ, ਸੈਦੋਵਾਲ, ਖੀਰਾਂਵਾਲੀ, ਖਾਲੂ, ਦੂਲੋਵਾਲ, ਬਸਤੀ ਡੋਗਰਾਂਵਾਲ, ਲੱਖਣ ਕਲਾਂ, ਜਵਾਲਪੁਰ, ਕਾਹਲਵਾਂ, ਢੁੱਡੀਆਂਵਾਲ, ਕੜਾਲ ਕਲਾਂ, ਦੁਆਦਪੁਰ, ਇਬਰਾਹਿਮਵਾਲ, ਜੈਦ, ਬਜਾਜ, ਭਦਾਸ, ਖੱਸਣ, ਰਾਏਪੁਰ ਅਰਾਈਆਂ, ਮਕਸੂਦਪੁਰ, ਬਾਗੜੀਆਂ, ਨੰਗਲ ਲੁਬਾਣਾ, ਦੰਦੂਪੁਰ, ਬੂਸੋਵਾਲ, ਡਡਵਿੰਡੀ, ਡੱਲਾ, ਡੇਰਾ ਸੈਂਦਾਂ, ਕਬੀਰਪੁਰ, ਦੀਪੇਵਾਲ, ਜਬੋਵਾਲ, ਹੈਬਤਪੁਰ, ਮਸੀਤਾਂ, ਜੱਬੋਸੁਧਾਰ, ਸਰਾਏ ਜੱਟਾਂ, ਡੌਲਾ, ਸ਼ਾਲਾਪੁਰ ਬੇਟ, ਜਾਰਜਪੁਰ, ਰਾਮਪੁਰ ਸੁੰਨੜਾਂ, ਚੱਕ ਪ੍ਰੇਮਾ, ਅਠੌਲੀ, ਖਲਵਾੜਾ, ਚਹੇੜੂ, ਚੱਕ ਹਕੀਮ, ਜਗਤਪੁਰ ਜੱਟਾਂ, ਰਾਵਲਪਿੰਡੀ, ਸਾਹਨੀ ਤੇ ਮਹੇੜੂ ਸ਼ਾਮਿਲ ਹਨ।ਇਸ ਮੌਕੇ ਐਸ.ਡੀ.ਐਮ. ਕਪੂਰਥਲਾ ਵਰਿੰਦਰਪਾਲ ਸਿੰਘ ਬਾਜਵਾ, ਡੀ.ਡੀ.ਪੀ.ਓ. ਲਖਵਿੰਦਰ ਸਿੰਘ ਰੰਧਾਵਾ ਤੇ ਹੋਰ ਅਧਿਕਾਰੀ ਹਾਜ਼ਰ ਸਨ।