ਮਹਾਰਾਜਾ ਰਣਜੀਤ ਸਿੰਘ ਆਰਮਡ ਫੋਰਸਿਜ਼ ਪ੍ਰੈਪਰੇਟਰੀ ਇੰਸਟੀਚਿਊਟ, ਮੁਹਾਲੀ (ਏ.ਐਫ.ਪੀ.ਆਈ.) ਦੀਆਂ ਪ੍ਰਾਪਤੀਆਂ ਵਿੱਚ ਉਦੋਂ ਇਕ ਹੋਰ ਜ਼ਿਕਰਯੋਗ ਪ੍ਰਾਪਤੀ ਜੁੜ ਗਈ, ਜਦੋਂ ਇਸ ਸੰਸਥਾ ਦੇ 25 ਕੈਡੇਟ ਮੌਜੂਦਾ ਸਾਲ ਦੌਰਾਨ ਨੈਸ਼ਨਲ ਡਿਫੈਂਸ ਅਕੈਡਮੀ (ਐਨ.ਡੀ.ਏ.) ਅਤੇ ਇੰਡੀਅਨ ਮਿਲਟਰੀ ਅਕੈਡਮੀ (ਆਈ.ਐਮ.ਏ.) ਵਿੱਚ ਪੁੱਜ ਗਏ। ਇਨਾਂ ਕੈਡੇਟਾਂ ਨੂੰ ਅੱਜ ਇਸ ਸੰਸਥਾ ਵਿੱਚ ਕਰਵਾਏ ਪ੍ਰਭਾਵਸ਼ਾਲੀ ਸਮਾਰੋਹ ਦੌਰਾਨ ‘ਅਚੀਵਰਜ਼ ਐਵਾਰਡ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਸਨਮਾਨ ਸਮਾਰੋਹ ਦੇ ਮੁੱਖ ਮਹਿਮਾਨ ਏਅਰ ਮਾਰਸ਼ਲ ਜੀ.ਪੀ. ਸਿੰਘ (ਸੇਵਾਮੁਕਤ) ਸਨ।ਇਸ ਮੌਕੇ ਅਕਾਦਮਿਕਸ, ਖੇਡਾਂ ਤੇ ਹੋਰ ਖੇਤਰਾਂ ਵਿੱਚ ਕਾਬਲੇਗੌਰ ਪ੍ਰਾਪਤੀਆਂ ਕਰਨ ਵਾਲੇ ਕੈਡੇਟਾਂ ਨੂੰ ਵਿਸ਼ੇਸ਼ ਸਨਮਾਨ ਦਿੱਤਾ ਗਿਆ, ਜਿਨਾਂ ਵਿੱਚ ਅਕੈਡਮਿਕਸ ਟਰਾਫੀ ਬੀ.ਸੀ.ਏ. ਮਨਰਾਜ ਸਿੰਘ ਨੇ ਜਿੱਤੀ, ਜਦੋਂ ਕਿ ਗੁਣਾਂ ਪੱਖੋਂ ਬਿਹਤਰੀਨ ਅਫ਼ਸਰ ਦੀ ਟਰਾਫੀ ਸੀ.ਐਸ.ਐਮ. ਬਿਮਲਰੂਪ ਸਿੰਘ ਦੇ ਹਿੱਸੇ ਆਈ ਅਤੇ ਖੇਡਾਂ ਦੀ ਟਰਾਫੀ ਕੈਡੇਟ ਕੁਸ਼ਲ ਸ਼ਰਮਾ ਨੇ ਜਿੱਤੀ। ਸੱਤਵੇਂ ਕੋਰਸ ਦੇ ਸਾਰੇ ਗੇੜਾਂ ਵਿੱਚੋਂ ਬਿਹਤਰੀਨ ਕੈਡੇਟ ਦਾ ਸਨਮਾਨ ਬੀ.ਸੀ.ਸੀ. ਹਰਸ਼ਿਤ ਬਖ਼ਸ਼ੀ ਨੂੰ ਮਿਲਿਆ। ਇਸ ਤੋਂ ਇਲਾਵਾ ਅੱਠਵੇਂ ਤੇ ਸੰਸਥਾ ਵਿੱਚ ਮੌਜੂਦਾ ਸਮੇਂ ਚੱਲ ਰਹੇ ਨੌਵੇਂ ਕੋਰਸ ਦੇ ਕੈਡੇਟਾਂ ਨੂੰ ਪੀ.ਟੀ. ਬੈਜ ਵੀ ਦਿੱਤੇ ਗਏ।ਏਅਰ ਮਾਰਸ਼ਲ ਜੀ.ਪੀ. ਸਿੰਘ ਨੇ ਮਹਾਰਾਜਾ ਰਣਜੀਤ ਸਿੰਘ ਆਰਮਡ ਫੋਰਸਜ਼ ਪ੍ਰੈਪਰੇਟਰੀ ਇੰਸਟੀਚਿਊਟ ਦੇ ਕੈਡੇਟਾਂ ਵੱਲੋਂ ਦਿਖਾਏ ਉਤਸ਼ਾਹ ਤੇ ਹੌਸਲੇ ਦੀ ਸ਼ਲਾਘਾ ਕੀਤੀ ਅਤੇ ਇਸ ਸੰਸਥਾ ਵੱਲੋਂ ਹਾਸਲ ਕੀਤੇ ਮਾਣਮੱਤੇ ਨਤੀਜਿਆਂ ਉਤੇ ਖ਼ੁਸ਼ੀ ਜ਼ਾਹਰ ਕੀਤੀ। ਉਨਾਂ ਕੈਡੇਟਾਂ ਨੂੰ ਕਿਹਾ ਕਿ ਉਹ ਇਸੇ ਤਰਾਂ ਮਿਹਨਤ ਕਰ ਕੇ ਇਸ ਸੰਸਥਾ ਦਾ ਨਾਮ ਉੱਚਾ ਰੱਖਣ। ਇਸ ਇੰਸਟੀਚਿਊਟ ਦੇ ਡਾਇਰੈਕਟਰ ਮੇਜਰ ਜਨਰਲ ਬੀ.ਐਸ. ਗਰੇਵਾਲ ਨੇ ਕੈਡੇਟਾਂ ਤੇ ਉਨਾਂ ਦੇ ਮਾਪਿਆਂ ਨੂੰ ਇਸ ਸ਼ਾਨਦਾਰ ਪ੍ਰਾਪਤੀ ਉਤੇ ਵਧਾਈ ਦਿੱਤੀ। ਉਨਾਂ ਉਮੀਦ ਜਤਾਈ ਕਿ ਇਸ ਸਮੇਂ ਇੰਸਟੀਚਿਊਟ ਵਿੱਚ ਤਿਆਰੀ ਕਰ ਰਹੇ ਕੈਡੇਟ ਇਸ ਪ੍ਰਾਪਤੀ ਤੋਂ ਪ੍ਰੇਰਨਾ ਲੈਣਗੇ ਅਤੇ ਇਸ ਤੋਂ ਵੀ ਵਧੀਆ ਨਤੀਜੇ ਹਾਸਲ ਕਰਨਗੇ।
ਜਨਰਲ ਗਰੇਵਾਲ ਨੇ ਇਸ ਇੰਸਟੀਚਿਊਟ ਵੱਲੋਂ ਸ਼ੁਰੂ ਕੀਤੇ ਨਵੇਂ ਉਪਰਾਲੇ ‘ਕੈਡੇਟ ਟਰੇਨਿੰਗ ਵਿੰਗਜ਼’ ਸਕੀਮ ਅਧੀਨ ਸਕੂਲਾਂ ਦੇ ਵਿਦਿਆਰਥੀਆਂ ਨੂੰ ਸਿਖਲਾਈ ਦੇਣ ਬਾਰੇ ਵੀ ਦੱਸਿਆ। ਉਨਾਂ ਕਿਹਾ ਕਿ ਇੰਸਟੀਚਿਊਟ ਦੇ ਟਰੇਨਰ ਚੁਣੇ ਗਏ ਸਕੂਲਾਂ ਦਾ ਦੌਰਾ ਕਰਨਗੇ ਅਤੇ ਉਥੇ ‘ਕੈਡੇਟ ਟਰੇਨਿੰਗ ਵਿੰਗਜ਼’ ਸਥਾਪਤ ਕਰ ਕੇ ਵਿਦਿਆਰਥੀਆਂ ਨੂੰ ਹਥਿਆਰਬੰਦ ਸੈਨਾਵਾਂ ਵਿੱਚ ਸ਼ਾਮਲ ਹੋਣ ਲਈ ਉਤਸ਼ਾਹਤ ਕਰਨ ਵਾਸਤੇ ਸਿਖਲਾਈ ਦੇਣਗੇ। ਪੰਜਾਬ ਸਰਕਾਰ ਨੇੜ ਭਵਿੱਖ ਵਿੱਚ ਇਕ ਅਜਿਹਾ ਇੰਸਟੀਚਿਊਟ ਹੁਸ਼ਿਆਰਪੁਰ ਵਿੱਚ ਵੀ ਖੋਲਣ ਦੀ ਯੋਜਨਾ ਬਣਾ ਰਹੀ ਹੈ। ਉਨਾਂ ਦੱਸਿਆ ਕਿ ਇਸ ਇੰਸਟੀਚਿਊਟ ਵਿੱਚ ਅਪਰੈਲ 2020 ਤੋਂ ਸ਼ੁਰੂ ਹੋ ਰਹੇ ਕੋਰਸ ਲਈ ਦਾਖ਼ਲਾ ਪ੍ਰਕਿਰਿਆ ਚੱਲ ਰਹੀ ਹੈ। ਚਾਹਵਾਨ ਉਮੀਦਵਾਰ ਪ੍ਰਵੇਸ਼ ਪ੍ਰੀਖਿਆ ਲਈ 3 ਜਨਵਰੀ ਤੱਕ ਬਿਨੈ ਕਰ ਸਕਦੇ ਹਨ ਅਤੇ ਪ੍ਰੀਖਿਆ 19 ਜਨਵਰੀ 2020 ਨੂੰ ਲਈ ਜਾਵੇਗੀ।ਜ਼ਿਕਰਯੋਗ ਹੈ ਕਿ ਪੰਜਾਬ ਸਰਕਾਰ ਨੇ ਨੌਜਵਾਨਾਂ ਨੂੰ ਐਨ.ਡੀ.ਏ. ਰਾਹੀਂ ਹਥਿਆਰਬੰਦ ਦਸਤਿਆਂ ਵਿੱਚ ਸ਼ਾਮਲ ਹੋਣ ਲਈ ਸਿਖਲਾਈ ਦੇਣ ਵਾਸਤੇ ਇਹ ਸੰਸਥਾ ਸਥਾਪਤ ਕੀਤੀ ਸੀ, ਜਿਸ ਵਿੱਚ ਪਹਿਲਾ ਬੈਚ 2011 ਵਿੱਚ ਸ਼ੁਰੂ ਕੀਤਾ ਗਿਆ ਸੀ, ਜਿਸ ਦੀ ਸਿਖਲਾਈ 2013 ਵਿੱਚ ਮੁਕੰਮਲ ਹੋਈ। ਜਨਵਰੀ 2013 ਤੋਂ ਹੁਣ ਤੱਕ ਇਸ ਇੰਸਟੀਚਿਊਟ ਦੇ 134 ਕੈਡੇਟ ਐਨ.ਡੀ.ਏ. ਤੇ ਫੌਜ ਦੀਆਂ ਹੋਰ ਅਕੈਡਮੀਆਂ ਨਾਲ ਜੁੜ ਚੁੱਕੇ ਹਨ। ਇਹ ਸੰਸਥਾ ਐਨ.ਡੀ.ਏ./ਓ.ਟੀ.ਏ. ਲਈ ਆਲ ਇੰਡੀਆ ਮੈਰਿਟ ਸੂਚੀ ਵਿੱਚੋਂ ਤਿੰਨ ਵਾਰ ਪਹਿਲੇ ਸਥਾਨ ਉਤੇ ਰਹੀ। ਇਸ ਸਾਲ ਸੰਸਥਾ ਨੇ 25 ਕੈਡੇਟ ਐਨ.ਡੀ.ਏ. ਤੇ ਹੋਰ ਅਕੈਡਮੀਆਂ ਵਿੱਚ ਭੇਜੇ ਅਤੇ 23 ਕੈਡੇਟਾਂ ਨੂੰ ਆਰਮਡ ਫੋਰਸਜ਼ ਵਿੱਚ ਕਮਿਸ਼ਨ ਮਿਲਿਆ। ਇਸ ਹਿਸਾਬ ਨਾਲ ਹੁਣ ਤੱਕ ਪਹਿਲੇ ਤਿੰਨ ਬੈਚਾਂ ਦੇ ਕੁੱਲ 58 ਵਿਦਿਆਰਥੀ ਕਮਿਸ਼ਨਡ ਅਫ਼ਸਰ ਬਣ ਚੁੱਕੇ ਹਨ।ਜਨਰਲ ਗਰੇਵਾਲ ਨੇ ਦੱਸਿਆ ਕਿ ਸੰਸਥਾ ਵਿੱਚ ਮੌਜੂਦਾ ਸਮੇਂ ਚੱਲ ਰਹੇ ਅੱਠਵੇਂ ਕੋਰਸ ਦੇ 37 ਕੈਡੇਟ ਐਨ.ਡੀ.ਏ. ਲਈ ਯੂ.ਪੀ.ਐਸ.ਸੀ. ਦੀ ਪ੍ਰਵੇਸ਼ ਪ੍ਰੀਖਿਆ ਪਾਸ ਕਰ ਚੁੱਕੇ ਹਨ ਅਤੇ ਹੁਣ ਉਹ ਜਲਦੀ ਹੀ ਇੰਟਰਵਿਊ ਦੇ ਗੇੜ ਵਿੱਚੋਂ ਲੰਘਣਗੇ। ਇਸ ਵਿੱਚੋਂ ਸਫ਼ਲ ਹੋਣ ਵਾਲੇ ਵਿਦਿਆਰਥੀ ਸਾਲ 2020 ਜੂਨ ਵਿੱਚ ਐਨ.ਡੀ.ਏ. ਵਿੱਚ ਸ਼ਾਮਲ ਹੋਣਗੇ।