ਅੱਜ ਦੇਵ ਭੂਮੀ ਹਿਮਾਚਲ ਪ੍ਰਦੇਸ਼ ਦੇ ਸਮੂੰਹ ਸ਼ਕਤੀ ਪੀਠਾਂ ਤੇ ਸਾਉਣ ਅਸ਼ਟਮੀ ਦੇ ਨਰਾਤੇ ਪੂਰੇ ਜੋਸ਼ ਤੇ ਉਤਸਾਹ ਦੇ ਨਾਲ ਸ਼ੁਰੂ ਹੋ ਗਏ। ਅੱਜ ਸਾਉਣ ਅਸ਼ਟਮੀ ਦੇ ਪਹਿਲੇ ਨਰਾਤੇ ਵਾਲੇ ਦਿਨ ਭਾਰੀ ਮੀਂਹ ਤੇ ਧੁੰਦ ਦੇ ਬਾਵਯੂਦ ਵੀ ਸ਼ਰਧਾਲੂਆਂ ਦੇ ਉਤਸਾਹ ਵਿੱਚ ਕੋਈ ਕਮੀ ਨਜ਼ਰ ਨਾ ਆਈ ਜਦਕਿ ਮੰਦਿਰਾਂ ‘ਚ ਸ਼ਰਧਾਲੂਆਂ ਆਪਣੇ ਹੱਥਾਂ ‘ਚ ਛਤਰੀਆਂ ਤੇ ਤਰਪਾਲਾਂ ਲੈ ਕੇ ਮੱਥਾ ਟੇਕਣ ਵਾਸਤੇ ਲੰਬੀਆਂ ਕਤਾਰਾਂ ਵਿੱਚ ਖੜੇ ਨਜ਼ਰ ਆਏ।ਝੇਕਰ ਗੱਲ ਉੱਤਰ ਭਾਰਤ ਦੇ ਪ੍ਰਸਿੱਧ ਸ਼ਕਤੀ ਪੀਠ ਮਾਤਾ ਨੈਣਾ ਦੇਵੀ ਦੀ ਕੀਤੀ ਜਾਵੇ ਤਾਂ ਅੱਜ ਸਾਉਣ ਅਸ਼ਟਮੀ ਦੇ ਪਹਿਲੇ ਨਰਾਤੇ ਵਾਲੇ ਦਿਨ ਜਿੱਥੇ ਭਾਰੀ ਬਰਸਾਤ ਵੇਖਣ ਨੂੰ ਮਿਲੀ ਉੱਥੇ ਹੀ ਸ਼ਰਧਾਲੂਆਂ ਦੀ ਆਮਦ ‘ਚ ਕੋਈ ਕਮੀ ਨਹੀਂ ਆਈ। ਬੇਸ਼ੱਕ ਸ਼ਰਧਾਲੂਆਂ ਨੂੰ ਮਾਤਾ ਦੇ ਦਰਬਾਰ ਤੱਕ ਪਹੁੰਚਣ ‘ਚ ਕੁਝ ਮੁਸ਼ਕਿਲਾਂ ਦਾ ਸਾਹਮਣਾ ਤਾਂ ਕਰਨਾ ਪਿਆ ਪਰ ਹੱਥਾਂ ਵਿੱਚ ਛਤਰੀਆਂ ਲਈ ਤੇ ਤਰਪਾਲਾਂ ਨਾਲ ਮੀਂਹ ਤੋਂ ਬਚਾਉਂਦੇ ਹੋਏ ਸ਼ਰਧਾਲੂ ਆਪਣੇ ਪਰਿਵਾਰਾਂ ਦੇ ਨਾਲ ਮਾਤਾ ਦੇ ਦਰਬਾਰ ਵਿੱਚ ਹਾਜ਼ਰੀ ਲਗਾਉਣ ਲਈ ਮਾਤਾ ਦੇ ਜੈਕਰਾਏ ਲਗਾਉਂਦੇ ਅੱਗੇ ਵੱਧਦੇ ਹੋਏ ਤੇ ਲੰਬੀਆਂ ਕਤਾਰਾਂ ਦੇ ਵਿੱਚ ਖੜੇ ਨਜ਼ਰ ਆਏ।ਮਾਂ ਦੇ ਦਰਬਾਰ ਵਿੱਚ ਨਤਮਸਤਕ ਹੋਣ ਦੇ ਲਈ ਅੱਜ ਪੰਜਾਬ, ਹਰਿਆਣਾ, ਹਿਮਾਚਲ, ਦਿੱਲੀ, ਉੱਤਰ ਪ੍ਰਦੇਸ਼, ਬਿਹਾਰ ਅਤੇ ਉੱਤਰਾਖੰਡ ਆਦਿ ਸਣੇ ਵਿਦੇਸ਼ੀ ਸ਼ਰਧਾਲੂਆਂ ਦੀ ਆਮਦ ਵੀ ਬਰਕਰਾਰ ਰਹੀ। ਅੱਜ ਸਵੇਰ ਦੀ ਆਰਤੀ ਤੋਂ ਬਾਅਦ ਝੰਡਾ ਚੜ੍ਹਾਉਣ ਦੀ ਰਸਮ ਦੇ ਨਾਲ ਸਾਉਣ ਅਸ਼ਟਮੀ ਦੇ ਨਰਾਤਿਆਂ ਦਾ ਆਗਾਜ਼ ਹੋਣ ਉਪਰੰਤ ਲਗਾਤਾਰ ਮਾਤਾ ਦੇ ਭਗਤ ਪੂਜਾ ਅਰਚਨਾ ਕਰਦੇ ਹੋਏ ਨਜ਼ਰ ਆਏ।ਮੰਦਰ ਟਰੱਸਟਦੇ ਪ੍ਰਧਾਨ ਸੁਭਾਸ਼ ਗੌਤਮ ਨੇ ਦੱਸਿਆ ਕਿ ਸ਼ਰਧਾਲੂਆਂ ਦੀ ਸਹੂਲਤ ਨੂੰ ਮੁੱਖ ਤੌਰ ਤੇ ਧਿਆਨ ਵਿੱਚ ਰੱਖਿਆ ਜਾ ਰਿਹਾ ਹੈ। ਜਦਕਿ ਮੰਦਰ ਅਧਿਕਾਰੀ ਹੁਸਨ ਚੰਦ ਨੇ ਦੱਸਿਆ ਕਿ ਅਸੀਂ ਲਗਾਤਾਰ ਹਰ ਸਥਿਤੀ ‘ਤੇ ਨਜ਼ਰ ਬਣਾਈ ਹੋਈ ਹੈ ਤਾਂ ਜੋ ਸ਼ਰਧਾਲੂਆਂ ਨੂੰ ਮੱਥਾ ਟੇਕਣ ਜਾਂ ਆਉਣ ਜਾਣ ਵਿੱਚ ਕੋਈ ਦਿੱਕਤ ਨਾ ਆਵੇ।ਓਧਰ ਸਹਾਇਕ ਮੇਲਾ ਅਧਿਕਾਰੀ ਡੀ ਐਸ ਪੀ ਸੰਜੈ ਸ਼ਰਮਾ ਨੇ ਦੱਸਿਆ ਕਿ ਮੇਲਾ ਖੇਤਰ ਨੂੰ 9 ਸੈਕਟਰਾਂ ਵਿੱਚ ਵੰਡ ਕੇ 1200 ਪੁਲੀਸ ਮੁਲਾਜ਼ਮ ਤੈਨਾਤ ਕੀਤੇ ਗਏ ਹਨ ਜਦਕਿ ਜੇਬ ਕਤਰਿਆਂ ਆਦਿ ‘ਤੇ ਨਜ਼ਰ ਰੱਖਣ ਲਈ 85 ਕਲੋਜ਼ ਸਰਕਟ ਕੈਮਰੇ ਵੀ ਲਗਾਏ ਗਏ ਹਨ। ਇੱਥੇ ਇਹ ਦੱਸਣਯੋਗ ਹੈ ਕਿ ਪੰਜਾਬ ਵਾਲੇ ਪਾਸੇ ਸ੍ਰੀ ਆਨੰਦਪੁਰ ਸਾਹਿਬ ਤੋਂ ਕੋਲਾ ਵਾਲਾ ਟੋਭਾ ਤੱਕ ਆਉਣ ਵਾਲੇ ਵਾਹਨਾਂ ਵੱਲੋਂ ਸ਼ਰੇਆਮ ਟਰੈਫਿਕ ਨਿਯਮਾਂ ਦੀ ਉਲੰਘਣਾ ਕੀਤੀ ਜਾ ਰਹੀ ਹੈ ਅਤੇ ਸਵਾਰੀਆਂ ਨੂੰ ਬੱਸਾਂ ਅਤੇ ਹੋਰ ਵਾਹਨ ਛੱਤਾਂ ‘ਤੇ ਲੈ ਕੇ ਜਾ ਰਹੇ ਹਨ ਜੋ ਕਿ ਕਿਸੇ ਵੱਡੇ ਹਾਦਸੇ ਦਾ ਕਾਰਨ ਬਣ ਸਕਦੇ ਹਨ। ਵੇਖਣ ਵਿੱਚ ਇਹ ਵੀ ਆਇਆ ਕਿ ਇਸ ਰੂਟ ‘ਤੇ ਬੇਸ਼ੱਕ ਹਜ਼ਾਰਾਂ ਸ਼ਰਧਾਲੂ ਮਾਤਾ ਨੈਣਾ ਦੇਵੀ ਵੱਲ ਜਾ ਰਹੇ ਹਨ ਪਰ ਨਾ ਤਾਂ ਰਸਤੇ ਵਿੱਚ ਕੋਈ ਟਰੈਫਿਕ ਪੁਲੀਸ ਮੁਲਾਜ਼ਮ ਨਜ਼ਰ ਆਉਂਦਾ ਹੈ ਤੇ ਨਾ ਹੀ ਕੋਈ ਹੋਰ ਪੁਲੀਸ ਵਾਲ।