ਡੇਰਾਬਸੀ ਦੀ ਪੁਲਿਸ ਨੇ ਪਿੰਡ ਖੇੜੀ ਗੁਜਰਾਂ ਦੇ ਰਹਿਣ ਵਾਲੇ ਲਖਵਿੰਦਰ ਉਰਫ ਲੱਖੀ 'ਤੇ ਕਾਤਲਾਨਾ ਹਮਲਾ ਕਰਨ ਵਾਲੇ 2 ਮੁੱਖ ਮੁਲਜ਼ਮਾਂ ਨੂੰ ਕਾਰ ਸਮੇਤ ਗ੍ਰਿਫਤਾਰ ਕਰਕੇ ਵਾਰਦਾਤ ਦੌਰਾਨ ਵਰਤਿਆ ਗਿਆ ਦੇਸੀ ਪਿਸਤੌਲ ਬਰਾਮਦ ਕਰ ਲਿਆ ਹੈ।ਜ਼ਿਲਾ ਪੁਲਿਸ ਮੁਖੀ ਐਸ. ਏ. ਐਸ. ਨਗਰ ਸ. ਹਰਚਰਨ ਸਿੰਘ ਭੁੱਲਰ ਨੇ ਇਸ ਮਾਮਲੇ ਸਬੰਧੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ 14 ਮਈ ਨੂੰ ਲਖਵਿੰਦਰ ਸਿੰਘ ਆਪਣੀ ਕਾਰ ਵਿੱਚ ਘਰ ਨੂੰ ਜਾ ਰਿਹਾ ਸੀ ਕਿ ਰਾਤ ਕਰੀਬ 10 ਵਜੇ ਰਸਤੇ ਵਿੱਚ ਪਿੰਡ ਮਾਹੀਵਾਲ ਕੋਲ ਮੋਟਰਸਾਈਕਲ 'ਤੇ ਸਵਾਰ ਹਮਲਾਵਰਾਂ ਨੇ ਉਸ ਉਪਰ ਫਾਇਰਿੰਗ ਕਰ ਦਿੱਤੀ, ਜਿਸ ਸਬੰਧੀ 15 ਮਈ ਨੂੰ ਅ/ਧ 307,506,148,149 ਹਿੰ:ਦੰ:, 25,27,54,59 ਅਸਲਾ ਐਕਟ ਤਹਿਤ ਥਾਣਾ ਡੇਰਾਬਸੀ ਵਿਖੇ ਵਰਿੰਦਰ ਕੁਮਾਰ ਉਰਫ ਬਿੱਟੂ ਪੁੱਤਰ ਰਾਜ ਕੁਮਾਰ, ਸੰਜੂ ਪੁੱਤਰ ਕਰਨ ਚੰਦ, ਗੀਤੂ ਪੁੱਤਰ ਮਾਮਰਾਜ, ਮਨੀਸ਼ ਕੁਮਾਰ ਉਰਫ ਬਿੱਟੂ ਪੁੱਤਰ ਸ਼ੇਰਾ ਰਾਮ ਵਾਸੀਆਨ ਪਿੰਡ ਖੇੜੀ ਗੁਜਰਾਂ ਅਤੇ ਮਿੰਟਾ ਪੁੱਤਰ ਤੇਜਾ ਰਾਮ ਵਾਸੀ ਪਿੰਡ ਮੁਕੰਦਪੁਰ ਖਿਲਾਫ ਮੁਕੱਦਮਾ ਦਰਜ ਹੋਇਆ ਸੀ।
ਇਸ ਮੁਕੱਦਮੇ ਦੇ ਦੋਸ਼ੀਆਂ ਨੂੰ ਜਲਦੀ ਗ੍ਰਿਫਤਾਰ ਕਰਨ ਲਈ ਡੀ.ਐਸ.ਪੀ. ਡੇਰਾਬਸੀ ਸ. ਸਿਮਰਨਜੀਤ ਸਿੰਘ ਅਤੇ ਮੁੱਖ ਅਫਸਰ ਥਾਣਾ ਡੇਰਾਬਸੀ ਇੰਸਪੈਕਟਰ ਸ. ਬਿਕਰਮਜੀਤ ਸਿੰਘ ਨੂੰ ਵਿਸ਼ੇਸ਼ ਹਦਾਇਤ ਕੀਤੀ ਗਈ ਸੀ, ਜਿਨਾਂ ਨੇ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਨ ਲਈ ਵੱਖ-ਵੱਖ ਪੁਲਿਸ ਪਾਰਟੀਆਂ ਲਾਈਆਂ ਸਨ, ਜਿਸ ਤਹਿਤ ਅੱਜ ਡੇਰਾਬਸੀ ਪੁਲਿਸ ਨੇ ਇਸ ਕਾਤਲਾਨਾ ਹਮਲੇ ਦੇ 2 ਮੁੱਖ ਮੁਲਜ਼ਮਾਂ ਮੁਨੀਸ਼ ਉਰਫ ਬਿੱਟੂ ਅਤੇ ਵਰਿੰਦਰ ਕੁਮਾਰ ਉਰਫ ਬਿੱਟੂ ਨੂੰ ਸਮੇਤ ਆਲਟੋ ਕਾਰ ਦੇ ਟੀ-ਪੁਆਇੰਟ ਰਾਮਪੁਰ ਸੈਣੀਆਂ ਤੋਂ ਚੈਕਿੰਗ ਦੌਰਾਨ ਗ੍ਰਿਫਤਾਰ ਕੀਤਾ।ਉਨਾਂ ਦੱਸਿਆ ਕਿ ਗ੍ਰਿਫਤਾਰ ਕੀਤੇ ਗਏ ਮੁਲਜ਼ਮਾਂ ਦੀ ਮੁੱਢਲੀ ਪੁੱਛਗਿੱਛ ਤੋਂ ਇਹ ਗੱਲ ਸਾਹਮਣੇ ਆਈ ਹੈ ਕਿ ਮੁਦੱਈ ਲਖਵਿੰਦਰ ਸਿੰਘ ਪਿੰਡ ਵਿੱਚ ਚੰਗਾ ਅਸਰ ਰਸੂਖ ਰੱਖਦਾ ਹੈ ਅਤੇ ਇਸ ਦਾ ਮੁਲਜ਼ਮ ਮੁਨੀਸ਼ ਦੀ ਪਤਨੀ ਨੂੰ ਸਰਬ-ਸੰਮਤੀ ਨਾਲ ਪੰਚ ਬਣਾਉਣ ਵਿੱਚ ਕਾਫੀ ਅਹਿਮ ਰੋਲ ਰਿਹਾ ਸੀ, ਜਿਸ ਕਾਰਨ ਲਖਵਿੰਦਰ ਸਿੰਘ ਆਨੇ-ਬਹਾਨੇ ਮੁਨੀਸ਼ ਨੂੰ ਜ਼ਲੀਲ ਕਰਦਾ ਰਹਿੰਦਾ ਸੀ। ਇਸ ਰੰਜ਼ਿਸ ਕਰਕੇ ਮੁਲਜ਼ਮ ਮੁਨੀਸ਼ ਅਤੇ ਵਰਿੰਦਰ ਬਿੱਟੂ ਨੇ ਆਪਸੀ ਸਲਾਹ ਮਸ਼ਵਰਾ ਕਰਕੇ ਸਾਥੀਆਂ ਸਮੇਤ ਲਖਵਿੰਦਰ ਸਿੰਘ 'ਤੇ ਕਾਤਲਾਨਾ ਹਮਲਾ ਕੀਤਾ ਸੀ। ਉਨਾਂ ਕਿਹਾ ਕਿ ਮੁਲਜ਼ਮਾਂ ਤੋਂ ਹੋਰ ਡੂੰਘਾਈ ਨਾਲ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਮੁਕੱਦਮੇ ਦੀ ਤਫਤੀਸ਼ ਜਾਰੀ ਹੈ।