5 Dariya News

ਫ਼ਤਹਿਗੜ੍ਹ ਸਾਹਿਬ , 13 Apr 2019

ਦਿੱਲੀ-ਅੰਮ੍ਰਿਤਸਰ ਜੀ.ਟੀ. ਰੋਡ 'ਤੇ ਦਸਮੇਸ਼ ਐਚ.ਪੀ. ਸੈਂਟਰ, ਹਰਬੰਸਪੁਰਾ (ਫ਼ਤਹਿਗੜ੍ਹ ਸਾਹਿਬ) ਵਿਖੇ ਪੰਜਾਬ ਦੇ ਪਹਿਲੇ ਆਨ-ਲਾਈਨ ਸੀ.ਐਨ.ਜੀ. ਗੈਸ ਸਟੇਸ਼ਨ ਦਾ ਉਦਘਾਟਨ ਮੁੱਖ ਮੰਤਰੀ, ਪੰਜਾਬ, ਕੈਪਟਨ ਅਮਰਿੰਦਰ ਸਿੰਘ ਦੇ ਸਲਾਹਕਾਰ ਸ. ਭਰਤਇੰਦਰ ਸਿੰਘ ਚਾਹਲ ਨੇ ਕੀਤਾ। ਇਸ ਮੌਕੇ ਉਨ੍ਹਾਂ ਦੇ ਸੁਪਤਨੀ ਸ਼੍ਰੀਮਤੀ ਜਸਵਿੰਦਰ ਕੌਰ, ਸਪੁੱਤਰ ਸ. ਬਿਕਰਮਜੀਤ ਇੰਦਰ ਸਿੰਘ ਚਾਹਲ, ਨੂੰਹ ਸ਼੍ਰੀਮਤੀ ਕਮਲਜੀਤ ਕੌਰ ਅਤੇ ਪੋਤਰਾ ਸ. ਗੁਰਸ਼ੇਰ ਇੰਦਰ ਸਿੰਘ ਚਾਹਲ ਵੀ ਉਚੇਚੇ ਤੌਰ 'ਤੇ ਮੌਜੂਦ ਸਨ।ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਸ. ਚਾਹਲ ਨੇ ਦੱਸਿਆ ਕਿ ਦਿੱਲੀ-ਅੰਮ੍ਰਿਤਸਰ ਜੀ.ਟੀ. ਰੋਡ 'ਤੇ ਖੁੱਲ੍ਹਿਆ ਹੈ ਇਹ ਪੰਜਾਬ ਦਾ ਪਹਿਲਾ ਆਨ ਲਾਈਨ ਸੀ.ਐਨ.ਜੀ. ਗੈਸ ਸਟੇਸ਼ਨ ਹੈ ਜੋ ਕਿ ਸੀ.ਐਨ.ਜੀ. ਪਾਈਪ ਲਾਈਨ 'ਤੇ ਆਈ.ਆਰ.ਐਮ. ਐਨਰਜੀ ਵੱਲੋਂ 2.50 ਕਰੋੜ ਦੀ ਲਾਗਤ ਨਾਲ ਲਾਇਆ ਗਿਆ ਹੈ। ਸੀ.ਐਨ.ਜੀ. ਪਾਈਪ ਲਾਈਨ 'ਤੇ ਹੋਣ ਸਦਕਾ ਇਸ ਸਟੇਸ਼ਨ 'ਤੇ 24 ਘੰਟੇ ਗੈਸ ਉਪਲੱਬਧ ਹੋਵੇਗੀ। ਹੋਰਨਾਂ ਸਟੇਸ਼ਨਾਂ 'ਤੇ ਸੀ.ਐਨ.ਜੀ. ਬਾਹਰੋਂ ਲਿਆ ਕੇ ਸਟੋਰ ਕੀਤੀ ਜਾਂਦੀ ਹੈ। ਇਸ ਸਟੇਸ਼ਨ 'ਤੇ ਕੁੱਲ 03 ਡਿਸਪੈਂਸਰ ਤੇ 06 ਨੋਜ਼ਲਜ਼ ਲਾਏ ਗਏ ਹਨ। ਬੱਸਾਂ, ਟਰੱਕਾਂ ਤੇ ਹੋਰ ਭਾਰੀ ਵਾਹਨਾਂ ਵਿੱਚ ਗੈਸ ਭਰਨ ਲਈ ਵੱਖਰਾ ਡਿਸਪੈਂਸਰ ਲਾਇਆ ਗਿਆ ਹੈ ਤੇ ਹੋਰਨਾਂ ਵਾਹਨਾਂ ਲਈ ਵੱਖਰੇ ਡਿਸਪੈਂਸਰ ਤੇ ਨੋਜ਼ਲ ਲਾਏ ਗਏ ਹਨ।
ਇਸ ਪ੍ਰੋਜੈਕਟ ਬਾਰੇ ਹੋਰ ਜਾਣਕਾਰੀ ਦਿੰਦਿਆਂ ਐਚ.ਪੀ. ਦੇ ਸਹਾਇਕ ਸੇਲਜ਼ ਮੈਨੇਜਰ (ਫ਼ਤਹਿਗੜ੍ਹ ਸਾਹਿਬ) ਸ਼੍ਰੀ ਗੌਰਵ ਯਾਦਵ ਨੇ ਦੱਸਿਆ ਕਿ ਸੀ.ਐਨ.ਜੀ. ਜਿੱਥੇ ਪੋਟਰੈਲ ਤੇ ਡੀਜ਼ਲ ਨਾਲੋਂ ਸਸਤੀ ਪੈਂਦੀ ਹੈ, ਉਥੇ ਵਾਤਾਵਰਨ ਪ੍ਰਦੂਸ਼ਣ ਘਟਾਉਣ ਵਿੱਚ ਵੀ ਸਹਾਈ ਹੁੰਦੀ ਹੈ ਅਤੇ ਵਾਹਨਾਂ ਲਈ ਵੀ ਲਾਹੇਬੰਦ ਹੁੰਦੀ ਹੈ।ਉਨ੍ਹਾਂ ਦੱਸਿਆ ਕਿ ਪੈਟਰੋਲ-ਡੀਜ਼ਲ ਦੇ ਸਰੋਤਾਂ ਵਿੱਚ ਲਾਗਾਤਾਰ ਕਮੀ ਆ ਰਹੀ ਹੈ ਇਸ ਸੀ.ਐਨ.ਜੀ. ਵਰਗੇ ਬਦਲ ਲਾਜ਼ਮੀ ਬਣਦੇ ਜਾ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਹੁਣ ਲੋਕ ਵੱਡੇ ਪੱਧਰ 'ਤੇ ਇਸ ਬਾਰੇ ਜਾਗਰੂਕ ਹੋ ਰਹੇ ਹਨ ਤੇ ਸੀ.ਐਨ.ਜੀ. ਵਾਹਨਾਂ ਦੀ ਗਿਣਤੀ ਲਗਾਤਾਰ ਵੱਧ ਰਹੀ ਹੈ।ਇਹ ਗੈਸ ਸਟੇਸ਼ਨ ਦਿੱਲੀ-ਅੰਮ੍ਰਿਤਸਰ ਜੀ.ਟੀ. ਰੋਡ 'ਤੇ ਸਥਿਤ ਹੈ, ਜਿੱਥੋਂ ਰੋਜ਼ਾਨਾ 24 ਘੰਟੇ ਵੱਡੀ ਗਿਣਤੀ ਵਾਹਨ ਲੰਘਦੇ ਹਨ, ਜਿਨ੍ਹਾਂ ਨੂੰ ਪਹਿਲਾਂ ਸੀ.ਐਨ.ਜੀ. ਗੈਸ ਭਰਵਾਉਣ ਲਈ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈਂਦਾ ਸੀ ਤੇ ਹੁਣ ਸੀ.ਐਨ.ਜੀ. ਵਾਹਨ ਆਸਾਨੀ ਨਾਲ ਇਸ ਗੈਸ ਸਟੇਸ਼ਨ ਤੋਂ ਗੈਸ ਭਰਵਾ ਸਕਣਗੇ। ਸੀ.ਐਨ.ਜੀ. ਸਟੇਸ਼ਨ ਦੇ ਉਦਘਾਟਨ ਮੌਕੇ ਸੀ.ਐਨ.ਜੀ. ਭਰਵਾਉਣ ਵਾਲੇ ਵਾਹਨਾਂ ਦੀ ਲੰਮੀ ਲਾਈਨ ਵੀ ਦੇਖੀ ਗਈ। ਇਸ ਮੌਕੇ ਆਈ.ਆਰ.ਐਮ. ਦੇ ਸਹਾਇਕ ਸੇਲਜ਼ ਮੈਨੇਜਰ (ਫ਼ਤਹਿਗੜ੍ਹ ਸਾਹਿਬ) ਭਵਿਆ ਗੁਪਤਾ ਸਮੇਤ ਪੰਪ ਦੇ ਸਟਾਫ਼ ਮੈਂਬਰ ਅਤੇ ਵੱਡੀ ਗਿਣਤੀ ਵਾਹਨ ਚਾਲਕ ਮੌਜੂਦ ਸਨ।