ਬਟਾਲਾ ਪੁਲਿਸ ਨੇ ਇੱਕ ਕਤਲ ਦੇ ਮਾਮਲੇ ਨੂੰ 24 ਘੰਟਿਆਂ ਵਿੱਚ ਹੱਲ ਕਰਕੇ ਕਤਲ ਦੇ ਸਾਰੇ ਦੋਸ਼ੀਆਂ ਜਿਨਾਂ ਵਿੱਚ 3 ਔਰਤਾਂ ਅਤੇ 5 ਨੌਜਵਾਨਾਂ ਨੂੰ ਹਿਰਾਸਤ ਵਿੱਚ ਲੈ ਲਿਆ ਹੈ। ਅੱਜ ਸਥਾਨਕ ਪੁਲਿਸ ਲਾਈਨ ਵਿਖੇ ਪ੍ਰੈਸ ਕਾਨਫਰੰਸ ਦੌਰਾਨ ਡੀ.ਐੱਸ.ਪੀ. ਡਾ. ਬੀ.ਕੇ ਸਿੰਗਲਾ ਨੇ ਦੱਸਿਆ ਕਿ ਬੀਤੇ ਦਿਨੀ ਮਿਤੀ 9 ਅਪ੍ਰੈਲ ਨੂੰ ਸਤਕੋਹਾ ਲਿੰਕ ਰੋਡ ਪਿੰਡ ਧਾਰੀਵਾਲ ਭੋਜਾ ਨਜਦੀਕ ਕਣਕ ਦੇ ਖੇਤ ਵਿੱਚੋਂ ਇੱਕ ਵਿਅਕਤੀ ਦੀ ਲਾਸ਼ ਮਿਲੀ ਸੀ, ਜਿਸ ਦਾ ਕਿਸੇ ਨਾਮਲੂਮ ਵਿਅਕਤੀਆਂ ਵੱਲੋ ਤੇਜਧਾਰ ਹਥਿਆਰ ਨਾਲ ਕਤਲ ਕੀਤਾ ਗਿਆ ਸੀ। ਉਨਾਂ ਦੱਸਿਆ ਕਿ ਮਿ੍ਰਤਕ ਦੀ ਪਹਿਚਾਣ ਗੁਰਨਾਮ ਸਿੰਘ ਪੁੱਤਰ ਮਹਿੰਦਰ ਸਿੰਘ ਵਾਸੀ ਨੇੜੇ ਆਈ.ਟੀ.ਆਈ, ਕਾਹਨੂੰਵਾਨ ਰੋਡ ਬਟਾਲਾ ਵਜੋਂ ਹੋਈ ਸੀ ਅਤੇ ਮਿ੍ਰਤਕ ਦੀ ਪਤਨੀ ਸੁਖਵੰਤ ਕੌਰ ਦੇ ਬਿਆਨ ਪਰ ਮੁਕੱਦਮਾ ਨੰਬਰ 27 ਮਿਤੀ 09.04.19 ਜੁਰਮ 302,201 ਭ:ਦ ਥਾਣਾ ਸੇਖਵਾ ਬਰਖਿਲਾਫ ਅਣਪਛਾਤੇ ਵਿਅਕਤੀਆਂ ਖਿਲਾਫ ਦਰਜ ਕੀਤਾ ਗਿਆ ਸੀ।ਡੀ.ਐੱਸ.ਪੀ. ਸਿੰਗਲਾ ਨੇ ਦੱਸਿਆ ਕਿ ਇਸ ਕਤਲ ਕੇਸ਼ ਦੀ ਜਾਂਚ ਕਪਤਾਨ ਪੁਲਿਸ, ਇੰਨਵੈਸਟੀਗੇਸ਼ਨ, ਬਟਾਲਾ, ਉਪ ਕਪਤਾਨ ਪੁਲਿਸ, ਸਿਟੀ ਬਟਾਲਾ ਅਤੇ ਮੁੱਖ ਅਫਸਰ, ਥਾਣਾ ਸੇਖਵਾ ਦੀ ਟੀਮ ਵਲੋਂ ਕੀਤੀ ਗਈ ਸੀ ਅਤੇ ਇਸ ਜਾਂਚ ਟੀਮ ਨੇ ਮੁਕੱਦਮੇ ਦੀ ਤਫਤੀਸ਼ ਡੂੰਘਾਈ ਨਾਲ ਕਰਦੇ ਹੋਏ ਮਿ੍ਰਤਕ ਦੀ ਪਤਨੀ ਸੁਖਵੰਤ ਕੌਰ ਪਾਸੋ ਪੁੱਛ-ਗਿੱਛ ਕੀਤੀ ਗਈ, ਜਿਸ ਨੇ ਦੌਰਾਨੇ ਪੁੱਛ-ਗਿੱਛ ਮੰਨਿਆ ਕਿ ਉਸ ਵੱਲੋਂ ਹੀ ਆਪਣੇ ਲੜਕੇ ਪ੍ਰਕਾਸ਼ ਸਿੰਘ, ਭਰਜਾਈ ਗੁਰਪ੍ਰੀਤ ਕੌਰ, ਭਰਜਾਈ ਦੀ ਭੈਣ ਰਾਜਵਿੰਦਰ ਕੌਰ, ਰਾਜਵਿੰਦਰ ਕੌਰ ਦੇ ਜਾਣਕਾਰ ਅਮਰਜੀਤ ਸਿੰਘ ਪੁੱਤਰ ਗੁਰਚਰਨ ਸਿੰਘ, ਨਵਦੀਪ ਸਿੰਘ ਪੁੱਤਰ ਹਰਬੰਸ ਸਿੰਘ ਵਾਸੀਆਨ ਅਲਾਵਲਪੁਰ, ਵਿਜੇ ਮਸੀਹ ਪੁੱਤਰ ਪ੍ਰੇਮ ਮਸੀਹ ਵਾਸੀ ਭਗਟਾਣਾ ਬੋਹੜ ਵਾਲਾ, ਪ੍ਰਤਾਪ ਉਰਫ ਬੌਬੀ ਪੁੱਤਰ ਅਮਰ ਸਿੰਘ ਵਾਸੀ ਪਿੰਡ ਖੱਦਰ ਨੂੰ ਘਰ ਬੁਲਾ ਕੇ ਦਾਤਰਾਂ ਅਤੇ ਕਿਰਚਾਂ ਨਾਲ ਆਪਣੇ ਪਤੀ ਗੁਰਨਾਮ ਸਿੰਘ ਦਾ ਕਤਲ ਕਰਵਾ ਕੇ ਲਾਸ਼ ਨੂੰ ਗੱਡੀ ਸਵਿਫਟ ਨੰਬਰ ਪੀ.ਬੀ 32-ਐਮ-9222 ਵਿੱਚ ਪਾ ਕੇ ਸਤਕੋਹਾ ਲਿੰਕ ਰੋਡ ਪਿੰਡ ਧਾਰੀਵਾਲ ਭੋਜਾ ਨਜਦੀਕ ਕਣਕ ਦੇ ਖੇਤਾ ਵਿੱਚ ਸੁੱਟ ਦਿੱਤਾ ਸੀ। ਵਜਾ ਰੰਜਿਸ਼ ਕਿ ਉਸ ਦਾ ਪਤੀ ਸ਼ਰਾਬ ਪੀਣ ਦਾ ਆਦੀ ਸੀ ਅਤੇ ਬਾਹਰ ਹੋਰ ਔਰਤਾਂ ਨਾਲ ਗਲਤ ਸਬੰਧ ਰੱਖਦਾ ਸੀ ਅਤੇ ਆਪਣੇ ਪ੍ਰੀਵਾਰ ਨੂੰ ਚੰਗਾ ਨਹੀ ਜਾਣਦਾ ਸੀ।ਡੀ.ਐੱਸ.ਪੀ. ਡਾ. ਬੀ.ਕੇ ਨੇ ਦੱਸਿਆ ਕਿ ਮੁਕੱਦਮੇ ਦੇ ਸਾਰੇ ਦੋਸੀਆਂ ਨੂੰ ਗਿਫਤਾਰ ਕਰਕੇ, ਵਾਰਦਾਤ ਸਮੇਂ ਵਰਤੇ 02 ਦਾਤਰ, 01 ਕਿਰਚ, 02 ਮੋਟਰਸਾਈਕਲ ਬ੍ਰਾਮਦ ਕੀਤੇ ਗਏ ਹਨ ਅਤੇ ਵਾਰਦਾਤ ਵਿੱਚ ਵਰਤੀ ਗੱਡੀ ਸਵਿਫਟ ਬ੍ਰਾਂਮਦ ਕਰਨੀ ਬਾਕੀ ਹੈ। ਉਨਾਂ ਦੱਸਿਆ ਕਿ ਮਿ੍ਰਤਕ ਦਾ ਕਤਲ ਕਰਨ ਵਾਲੇ ਉਸਦੇ ਆਪਣੇ ਹੀ ਘਰ ਵਾਲੇ ਨਿਕਲੇ ਹਨ ਅਤੇ ਕਤਲ ਕਰਨ ਲਈ ਘਰ ਵਾਲਿਆਂ ਨੇ ਕੁਝ ਹੋਰ ਨੌਜਵਾਨਾਂ ਨੂੰ 86 ਹਜ਼ਾਰ ਰੁਪਏ ਦਾ ਲਾਲਚ ਦੇ ਕੇ ਕਤਲ ਕਰਵਾਇਆ ਸੀ।