13 ਅਪਰੈਲ 2006 ਨੂੰ ਵਿਰਾਸਤ-ਏ-ਖਾਲਸਾ ਦੀ ਇਮਾਰਤ ਦੇ ਕੀਤੇ ਉਦਘਾਟਨ ਤੋਂ ਬਾਅਦ ਅੱਜ ਲਗਭਗ 13 ਸਾਲਾਂ ਉਪਰੰਤ ਪਹਿਲੀ ਵਾਰ ਵਿਰਾਸਤ-ਏ-ਖਾਲਸਾ ਵੇਖ ਕੇ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਗਦ-ਗਦ ਹੋ ਉੱਠੇ। ਉਨ੍ਹਾਂ ਜਿੱਥੇ ਬਾਖੂਬੀ ਪੰਜਾਬ ਦੇ ਸ਼ਾਨਾਂਮੱਤੇ ਇਤਿਹਾਸ ਨੂੰ ਰੂਪਮਾਨ ਕਰਨ ਵਾਲੇ ਇਸ ਪ੍ਰੋਜੈਕਟ 'ਚ ਹੋਏ ਕੰਮ ਦੀ ਤਰੀਫ ਕੀਤੀ ਉੱਥੇ ਉਨ੍ਹਾਂ ਡਿਜ਼ਾਈਨਰਾਂ ਅਤੇ ਤੈਨਾਤ ਸਟਾਫ ਦੀ ਵੀ ਤਰੀਫ ਕੀਤੀ।ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਪਹਿਲਾਂ ਪੰਜਾਬ ਦੇ ਇੱਕ ਦਿਨ, ਇੱਕ ਸਾਲ ਅਤੇ ਸਾਰੀਆਂ ਰੁੱਤਾਂ ਨੂੰ ਮਹਿਜ਼ 8 ਮਿੰਟਾਂ 'ਚ ਦਰਸਾਉਣ ਵਾਲੀ ਕਿਸ਼ਤੀਨੁਮਾ ਇਮਾਰਤ ਦਾ ਦੌਰਾ ਕੀਤਾ। ਜਿਸਤੋਂ ਬਾਅਦ ਉਨ੍ਹਾਂ ਬੁਹਤ ਹੀ ਖੂਬਸੂਰਤ ਢੰਗ ਦੇ ਨਾਲ ਕ੍ਰਿਸਟਲਾਂ ਦੀ ਮੱਦਦ ਨਾਲ ਬਣਾਏ ਗਏ < ਨੂੰ ਵੇਖਿਆ। ਜਿਸ ਉਪਰੰਤ ਪਹਿਲੀ ਪਾਤਸ਼ਾਹੀ ਗੁਰੁ ਨਾਨਕ ਦੇਵ ਜੀ ਦੇ ਜੀਵਨ 'ਤੇ ਅਧਾਰਤ ਅਤੇ ਉਨ੍ਹਾਂ ਵੱਲੋਂ ਕੀਤੀਆਂ ਉਦਾਸੀਆਂ 'ਤੇ ਅਧਾਰਤ ਬਣੀਆਂ ਗੈਲਰੀਆਂ ਦਾ ਕੰਮ ਨੂੰ ਸਰਾਹਿਆਂ। ਬੁਹਤ ਹੀ ਦਿਲਚਸਪੀ ਦੇ ਨਾਲ ਮਿਊਜ਼ੀਅਮ ਵੇਖ ਰਹੇ ਮੁੱਖ ਮੰਤਰੀ ਨੇ ਅਧਿਕਾਰੀਆਂ ਤੋਂ ਰੋਜ਼ਾਨਾਂ ਆਉਣ ਵਾਲੇ ਸੈਲਾਨੀਆਂ ਦੀ ਗਿਣਤੀ ਬਾਰੇ ਵੀ ਪੁੱਛਿਆ। ਇਸ ਉਪਰੰਤ ਉਨ੍ਹਾਂ ਵਿਰਾਸਤ-ਏ-ਖਾਲਸਾ ਦੇ ਦੂਸਰੇ ਭਾਗ ਦੇ ਵਿੱਚ ਅਜ਼ਾਦੀ ਦੇ ਸੰਘਰਸ਼ ਨੂੰ ਬਿਆਨ ਕਰਦੀਆਂ ਗੈਲਰੀਆਂ, ਮਾਸਟਰ ਤਾਰਾ ਸਿੰਘ ਦੇ ਐਨੀਮੈਟਰੋਨਿਕਸ ਕੋਲ ਖੜੇ ਹੋ ਕੇ ਉਨ੍ਹਾਂ ਦਾ ਭਾਸ਼ਣ ਵੀ ਸੁਣਿਆ ਤੇ ਹੋਰ ਜਾਣਕਾਰੀ ਵੀ ਹਾਸਲ ਕੀਤੀ। ਜਿਸ ਉਪਰੰਤ ਉਨ੍ਹਾਂ ਧਰਮ ਯੁੱਧ ਮੋਰਚਿਆਂ ਅਤੇ ਪੰਜਾਬ ਦੀਆਂ ਵੱਖ-ਵੱਖ ਰਿਆਸਤਾਂ ਤੇ ਅਧਾਰਤ ਬਣੀ ਗੈਲਰੀ ਦਾ ਵੀ ਦੌਰਾ ਕੀਤਾ।ਇਸ ਦੌਰਾਨ ਆਪਣੀ ਗੱਲਬਾਤ ਦੌਰਾਨ ਉਨ੍ਹਾਂ ਪੁਰਾਣੇ ਪਲਾਂ ਨੂੰ ਯਾਦ ਕੀਤਾ ਅਤੇ ਦੱਸਿਆ ਕਿ ਉਨ੍ਹਾਂ ਆਪਣੀ ਸਰਕਾਰ ਮੌਕੇ ਵਿਰਾਸਤ-ਏ-ਖਾਲਸਾ ਦੇ ਨਿਰਮਾਣ ਕਾਰਜ ਨੂੰ ਮੁਕੰਮਲ ਕਰਵਾਉਣ ਦੇ ਲਈ 100 ਕਰੋੜ ਰੁਪਏ ਵੀ ਮੁਹਈਆ ਕਰਵਾਏ ਸਨ। ਜਿਸਤੋਂ ਬਾਅਦ ਇਮਾਰਤ ਮੁਕੰਮਲ ਕਰਕੇ ਰਸਮੀ ਉਦਘਾਟਨ ਵੀ 13 ਅਪਰੈਲ 2006 ਨੂੰ ਕੀਤਾ ਸੀ। ਇਸ ਮੌਕੇ ਉਨ੍ਹਾਂ ਦੇ ਨਾਲ ਪੰਜਾਬ ਵਿਧਾਨ ਸਭਾ ਦੇ ਸਪੀਕਰ ਰਾਣਾ ਕੇ ਪੀ ਸਿੰਘ, ਕੈਬਨਿਟ ਮੰਤਰੀ ਚਰਨਜੀਤ ਸਿੰਘ ਚੰਨੀ, ਜ਼ਿਲ੍ਹਾ ਰੂਪਨਗਰ ਦੇ ਡਿਪਟੀ ਕਮਿਸ਼ਨਰ ਡਾ.ਸੁਮਿਤ ਜਾਰੰਗਲ, ਜ਼ਿਲ੍ਹਾ ਪੁਲੀਸ ਮੁੱਖੀ ਸਵਪਨ ਸ਼ਰਮਾ, ਵਧੀਕ ਡਾਇਰੈਕਟਰ ਸੱਭਿਆਚਾਰਕ ਵਿਭਾਗ ਲਖਮੀਰ ਸਿੰਘ ਤੋਂ ਇਲਾਵਾ ਹੋਰ ਅਧਿਕਾਰੀ ਸਹਿਬਾਨ ਵੀ ਹਾਜ਼ਰ ਸਨ।