'ਮੇਰਾ ਮੁਕਤਸਰ ਮੇਰਾ ਮਾਣ' ਮੁਹਿੰਤ ਤਹਿਤ ਸਥਾਨਕ ਸਬਜੀ ਮੰਡੀ ਵਿਚ 5 ਰੁਪਏ ਵਿਚ ਧਰਤੀ ਬਚਾਓ ਟੀਮ ਵੱਲੋਂ ਜਾਗਰੁਕਤਾ ਸਮਾਗਮ ਕਵਾਇਆ ਗਿਆ। ਇਸ ਮੌਕੇ ਵਿਸੇਸ਼ ਤੌਰ ਤੇ ਪਹੁੰਚੇ ਜ਼ਿਲੇ ਦੀ ਵਧੀਕ ਡਿਪਟੀ ਕਮਿਸ਼ਨਰ ਜਨਰਲ ਡਾ: ਰਿਚਾ ਨੇ ਸਮੂਹ ਸਬਜੀ ਵਿਕ੍ਰੇਤਾਵਾਂ ਅਤੇ ਹੋਰ ਦੁਕਾਨਦਾਰਾਂ ਨੂੰ ਵੀ ਇਸ ਮੁਹਿੰਮ ਨਾਲ ਜੁੜ ਕੇ ਸ੍ਰੀ ਮੁਕਤਸਰ ਸਾਹਿਬ ਸ਼ਹਿਰ ਨੂੰ ਪੋਲੀਥੀਨ ਤੋਂ ਮੁਕਤ ਕਰਨ ਵਿਚ ਸਹਿਯੋਗ ਦੀ ਅਪੀਲ ਕੀਤੀ। ਉਨਾਂ ਨੇ ਇਸ ਮੌਕੇ ਐਲਾਣ ਕੀਤਾ ਕਿ ਸਬਜੀ ਮੰਡੀ ਦਾ ਜਿਹੜਾ ਦੁਕਾਨਦਾਰ ਆਪਣੀ ਦੁਕਾਨ, ਰੇਹੜੀ ਨੂੰ ਪੋਲੀਥੀਨ ਤੋਂ ਮੁਕਤ ਕਰੇਗਾ ਉਸ ਨੂੰ 26 ਜਨਵਰੀ ਨੂੰ ਸਨਮਾਨਿਤ ਕੀਤਾ ਜਾਵੇਗਾ। ਇਸ ਮੌਕੇ ਏ.ਡੀ.ਸੀ. ਨੇ ਕਿਹਾ ਕਿ ਪੋਲੀਥੀਨ ਸਾਡੇ ਵਾਤਾਵਰਨ ਅਤੇ ਮਨੁੱਖੀ ਸਿਹਤ ਲਈ ਵੱਡਾ ਖਤਰਾ ਹੈ। ਸਰਕਾਰ ਵੱਲੋਂ ਇਸਤੇ ਪਾਬੰਦੀ ਲਗਾਈ ਗਈ ਹੈ। ਉਨਾਂ ਨੇ ਸਪੱਸ਼ਟ ਕੀਤਾ ਕਿ ਜੇਕਰ ਕਿਸੇ ਦੁਕਾਨ ਤੋਂ ਪਾਬੰਦੀਸੁਦਾ ਪੋਲੀਥੀਨ ਮਿਲਿਆ ਤਾਂ ਨਗਰ ਕੋਂਸਲ ਪੁਲਿਸ ਕੋਲ ਐਫ.ਆਈ.ਆਰ. ਦਰਜ ਕਰਨ ਤੋਂ ਵੀ ਗੁਰੇਜ ਨਹੀਂ ਕਰੇਗੀ। ਉਨਾਂ ਨੇ ਇਸ ਮੌਕੇ ਸਬਜੀ ਖਰੀਦਣ ਆਏ ਲੋਕਾਂ ਨੂੰ ਵੀ ਅਪੀਲ ਕੀਤੀ ਕਿ ਉਹ ਸਬਜੀ ਖਰੀਦਣ ਲਈ ਆਉਣ ਸਮੇਂ ਘਰ ਤੋਂ ਕਪੜੇ ਦੇ ਥੈਲੇ ਲੈ ਕੇ ਆਉਣ ਕਿਉਂਕਿ ਪੋਲੀਥੀਨ ਦੇ ਮਨੁੱਖੀ ਸਿਹਤ ਲਈ ਖਤਰਨਾਕ ਲਿਫਾਫਿਆਂ ਵਿਚ ਖਾਣ ਪੀਣ ਦੀਆਂ ਵਸਤਾਂ ਪਾਉਣਾ ਸਾਡੀ ਸਿਹਤ ਲਈ ਵੀ ਘਾਤਕ ਹੈ।
ਇਸ ਮੌਕੇ 5 ਰੁਪਏ ਵਿਚ ਧਰਤੀ ਬਚਾਓ ਟੀਮ ਦੇ ਮੈਂਬਰ ਡਾ: ਸੀਮਾ ਗੋਇਲ ਤੇ ਨਵਦੀਪ ਸਿੰਘ ਸੁੱਖੀ ਨੇ ਲੋਕਾਂ ਨੂੰ ਆਪਣੀ ਟੀਮ ਵੱਲੋਂ ਤਿਆਰ ਕੀਤੇ ਕਪੜੇ ਦੇ ਥੈਲੇ 5 5 ਰੁਪਏ ਵਿਚ ਮੁਹਈਆ ਕਰਵਾਏ ਅਤੇ ਲੋਕਾਂ ਨੂੰ ਪ੍ਰੇਰਿਤ ਕੀਤਾ ਕਿ ਉਹ ਕਪੜੇ ਦੇ ਥੈਲੇ ਦੀ ਵਰਤੋਂ ਕਰਨ ਅਤੇ ਪੋਲੀਥੀਨ ਦੇ ਲਿਫਾਫਿਆਂ ਦੀ ਵਰਤੋਂ ਨਾ ਕਰਨ।ਇਸ ਮੌਕੇ ਨਗਰ ਕੋਂਸਲ ਦੇ ਸੈਨੇਟਰੀ ਇੰਸਪਕਟਰਾਂ ਪਰਮਜੀਤ ਸਿੰਘ ਅਤੇ ਦਵਿੰਦਰ ਸਿੰਘ ਨੇ ਸ਼ਹਿਰ ਵਾਸੀਆਂ ਨੂੰ 4 ਜਨਵਰੀ ਨੂੰ ਸ਼ੁਰੂ ਹੋ ਰਹੇ ਸਵੱਛਤਾ ਸਰਵੇਖਣ 2019 ਬਾਰੇ ਜਾਣਕਾਰੀ ਦਿੱਤੀ ਅਤੇ ਸੱਦਾ ਦਿੱਤਾ ਕਿ ਸਾਰੇ ਆਪਣੇ ਸ਼ਹਿਰ ਨੂੰ ਸਾਫ ਸੁਥਰਾ ਰੱਖੀਏ ਅਤੇ ਆਪਣੇ ਸ਼ਹਿਰ ਨੂੰ ਸਵੱਛਤਾ ਸਰਵੇਖਣ ਵਿਚ ਅੱਗੇ ਲੈ ਕੇ ਆਈਏ।ਇਸ ਮੌਕੇ ਡੇਅਰੀਆਂ ਦੇ ਮਾਲਕਾਂ ਨੂੰ ਵੀ ਸੁਚੇਤ ਕੀਤਾ ਗਿਆ ਕਿ ਉਹ ਦੁੱਧ ਅਤੇ ਦਹੀ ਪੋਲੀਥੀਨ ਦੇ ਲਿਫਾਫਿਆਂ ਵਿਚ ਦੇਣ ਦੀ ਬਜਾਏ ਭਾਂਡਿਆਂ ਵਿਚ ਦੇਣ ਅਤੇ ਲੋਕਾਂ ਨੂੰ ਦੁੱਧ ਲੈਣ ਲਈ ਆਉਂਦੇ ਸਮੇਂ ਭਾਂਡੇ ਲੈ ਕੇ ਆਉਣ ਲਈ ਪ੍ਰੇਰਿਤ ਕਰਨ। ਇਸ ਮੌਕੇ ਕਪੜੇ ਦੇ ਥੈਲੇ ਤਿਆਰ ਕਰਨ ਵਾਲੀਆਂ ਔਰਤਾਂ ਨੂੰ ਸਨਮਾਨਿਤ ਵੀ ਕੀਤਾ ਗਿਆ। ਇਸ ਮੌਕੇ ਸਬਜੀ ਵਿਕ੍ਰੇਤਾਵਾਂ ਗੌਰਵ ਅਤੇ ਮਾਨ ਸਿੰਘ ਨੇ ਇਸ ਮੁਹਿੰਮ ਵਿਚ ਸਹਿਯੋਗ ਦਾ ਪ੍ਰਣ ਲਿਆ। ਇਸ ਮੌਕੇ ਜ਼ਿਲਾ ਭਲਾਈ ਅਫ਼ਸਰ ਸ: ਜਗਮੋਹਨ ਸਿੰਘ ਮਾਨ, ਅਨੁਰਾਗ ਰਾਹੁਲ ਸ਼ਰਮਾ, ਸੋਨੀ ਬਾਬਾ ਰੁਪਾਣੇ ਵਾਲੇ,ਅੰਮ੍ਰਿਤਪਾਲ ਸਿੰਘ, ਬੂਟਾ ਰਾਮ ਕਮਰਾ, ਦਲਜੀਤ ਸਿੰਘ, ਪਰਮਪਾਲ ਸਿੰਘ, ਗੁਰਤੇਜ ਸਿੰਘ, ਕਿਰਨਾਂ ਰਾਣੀ ਆਦਿ ਹਾਜਰ ਸਨ।