ਪੰਜਾਬ ਸਰਕਾਰ ਵੱਲੋਂ ਨਸ਼ਿਆਂ ਦੇ ਪ੍ਰਭਾਵ ਨੂੰ ਖਤਮ ਕਰਨ ਲਈ ਅਤੇ ਨਸ਼ਾ ਪੀੜਤਾਂ ਨੂੰ ਇਲਾਜ ਮੁਹੱਈਆ ਕਰਵਾਉਣ ਲਈ ਆਰੰਭੀ ਮੁਹਿੰਮ ਤਹਿਤ ਸ਼ਹੀਦ ਭਗਤ ਸਿੰਘ ਨਗਰ ਜ਼ਿਲ੍ਹੇ ’ਚ ਕਾਰਜਸ਼ੀਲ ਓਟ ਸੈਂਟਰ ਜ਼ਿਲ੍ਹੇ ਦੇ 1200 ਨਸ਼ਾ ਪੀੜਤਾਂ ਨੂੰ ਇਲਾਜ ਦੇਣ ਦਾ ਅਹਿਮ ਵਸੀਲਾ ਸਾਬਤ ਹੋ ਰਹੇ ਹਨ।ਜ਼ਿਲ੍ਹੇ ’ਚ ਇਸ ਸਾਲ ਮਈ ਮਹੀਨੇ ਨਵਾਂਸ਼ਹਿਰ ਅਤੇ ਬਲਾਚੌਰ ਵਿਖੇ ਨਸ਼ਾ ਪੀੜਤਾਂ ਨੂੰ ‘ਯੂਨੀਕ ਆਈ ਡੀ’ ਦੇ ਕੇ ਇਲਾਜ ਦੇਣ ਦੇ ਦੋ ਕੇਂਦਰ ਸ਼ੁਰੂ ਕੀਤੇ ਗਏ ਸਨ, ਜਿਨ੍ਹਾਂ ਦੀ ਸਫ਼ਲਤਾ ਦਰ ਨੂੰ ਧਿਆਨ ’ਚ ਰੱਖਦੇ ਹੋਏ ਸਤੰਬਰ ਦੇ ਅਖੀਰ ’ਚ ਪੰਜ ਹੋਰ ਨਵੇਂ ਓਟ ਸੈਂਟਰ ਸਥਾਪਿਤ ਕੀਤੇ ਗਏ। ਇਨ੍ਹਾਂ ਨਵੇਂ ਓਟ ਸੈਂਟਰਾਂ ’ਚ ਬਲਾਚੌਰ ਸਬ ਡਵੀਜ਼ਨ ’ਚ ਕਾਠਗੜ੍ਹ ਤੇ ਸੜੋਆ, ਨਵਾਂਸ਼ਹਿਰ ਸਬ ਡਵੀਜ਼ਨ ’ਚ ਰਾਹੋਂ ਅਤੇ ਬੰਗਾ ਸਬ ਡਵੀਜ਼ਨ ’ਚ ਬੰਗਾ ਤੇ ਮੁਕੰਦਪੁਰ ਸ਼ਾਮਿਲ ਹਨ।ਸਿਵਲ ਸਰਜਨ ਡਾ. ਗੁਰਿੰਦਰ ਕੌਰ ਅਨੁਸਾਰ ਮਈ ਤੋਂ ਜੁਲਾਈ ਮਹੀਨੇ ਤੱਕ ਨਵਾਂਸ਼ਹਿਰ ਅਤੇ ਬਲਾਚੌਰ ਵਿਖੇ ਸਥਾਪਿਤ ਦੋਵਾਂ ਓਟ ਸੈਂਟਰਾਂ ’ਤੇ 614 ਨਸ਼ਾ ਪੀੜਤਾਂ ਦੀ ਰਜਿਸਟ੍ਰੇਸ਼ਨ ਦਰਜ ਕੀਤੀ ਗਈ ਜਦਕਿ ਸਤੰਬਰ ਮਹੀਨੇ ਦੌਰਾਨ 5 ਹੋਰ ਓਟ ਸੈਂਟਰਾਂ ਦੀ ਸਥਾਪਤੀ ਬਾਅਦ 15 ਨਵੰਬਰ ਤੱਕ ਇਨ੍ਹਾਂ ਓਟ ਸੈਂਟਰਾਂ ਤੋਂ ਇਲਾਜ ਲੈਣ ਵਾਲੇ ਪੀੜਤਾਂ ਦੀ ਗਿਣਤੀ 1200 ਹੋ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਓਟ ਸੈਂਟਰਾਂ ’ਤੇ ਨਸ਼ਾ ਪੀੜਤਾਂ ਦਾ ਇਲਾਜ ਲੈਣ ਆਉਣ ਦਾ ਮੁੱਖ ਕਾਰਨ ਸਾਰੇ ਤਰ੍ਹਾਂ ਦੇ ਟੈਸਟ ਅਤੇ ਦਵਾਈ ਦਾ ਮੁਫ਼ਤ ਹੋਣਾ ਹੈ। ਇਸ ਤੋਂ ਵੀ ਅੱਗੇ, ਉਨ੍ਹਾਂ ਨੂੰ ਰਜਿਸਟਰ ਕਰਨ ਬਾਅਦ ਜਾਰੀ ਕੀਤੇ ਜਾਂਦੇ ‘ਯੂਨੀਕ ਆਈ ਡੀ’ ਰਾਹੀਂ ਪੰਜਾਬ ਦੇ ਕਿਸੇ ਵੀ ਸ਼ਹਿਰ ਜਾਂ ਜ਼ਿਲ੍ਹੇ ’ਚ ਚਲ ਰਹੇ ਓਟ ਸੈਂਟਰ ਤੋਂ ਦਵਾਈ ਲੈਣ ਦੀ ਸੁਵਿਧਾ ਮਿਲਣਾ ਹੈ।
ਉਨ੍ਹਾਂ ਦੱਸਿਆ ਕਿ ਆਮ ਤੌਰ ’ਤੇ ਓਟ ਸੈਂਟਰ ’ਚ ਦਵਾਈ ਲੈਣ ਰੋਜ਼ਾਨਾ ਆਉਣਾ ਪੈਂਦਾ ਹੈ ਅਤੇ ਇਸ ਦੌਰਾਨ ਜੇਕਰ ਕਿਸੇ ਪੀੜਤ ਨੂੰ ਕਿਸੇ ਕੰਮ ਹੋਰ ਸ਼ਹਿਰ ਜਾਣਾ ਪੈ ਜਾਵੇ ਤਾਂ ਉਹ ਉਸ ਦਿਨ ਜਾਂ ਜਿੰਨੇ ਦਿਨ ਉੱਥੇ ਠਹਿਰਨਾ ਹੈ, ਦੀ ਰੋਜ਼ਾਨਾ ਦੀ ਦਵਾਈ ਆਪਣੇ ਨੇੜੇ ਸਥਿਤ ਓਟ ਸੈਂਟਰ ਤੋਂ ‘ਯੂਨੀਕ ਆਈ ਡੀ’ ਦਿਖਾ ਕੇ ਖਾ ਸਕਦਾ ਹੈ।ਉਨ੍ਹਾਂ ਅੱਗੇ ਦੱਸਿਆ ਕਿ ਓਟ ਸੈਂਟਰਾਂ ’ਚ ਰਜਿਣਟਰ ਹੋਣ ਵਾਲੇ ਨਸ਼ਾ ਪੀੜਤਾਂ ਦਾ ਸਮੁੱਚਾ ਰਿਕਾਰਡ ਗੁਪਤ ਰੱਖਿਆ ਜਾਂਦਾ ਹੈ ਜਿਸ ਕਾਰਨ ਉਨ੍ਹਾਂ ਨੂੰ ਆਪਣੀ ਪਛਾਣ ਜੱਗ-ਜਾਹਰ ਨਾ ਹੋਣ ਦਾ ਵੀ ਭਰੋਸਾ ਰਹਿੰਦਾ ਹੈ, ਇਸੇ ਕਾਰਨ ਨਸ਼ਾ ਪੀੜਤ ਓਟ ਸੈਂਟਰਾਂ ’ਚੋਂ ਦਵਾਈ ਲੈਣ ਨੂੰ ਤਰਜੀਹ ਦਿੰਦੇ ਹਨ।ਸਿਵਲ ਸਰਜਨ ਅਨੁਸਾਰ ਇਨ੍ਹਾਂ ਓਟ ਸੈਂਟਰਾਂ ਨੂੰ ਚਲਾਉਣ ਵਾਲੇ ਵਿਭਾਗੀ ਡਾਕਟਰਾਂ ਨੂੰ ਸਿਹਤ ਵਿਭਾਗ ਵੱਲੋਂ ਬਾਕਾਇਦਾ ਨਸ਼ਾ ਪੀੜਤਾਂ ਦੇ ਇਲਾਜ ਲਈ ਸਿਖਲਾਈ ਦਿੱਤੀ ਗਈ ਹੈ ਤਾਂ ਜੋ ਉਹ ਉਨ੍ਹਾਂ ਨੂੰ ਬੇਤਰ ਢੰਗ ਨਾਲ ਇਲਾਜ ਦੇ ਕੇ ਨਸ਼ਿਆਂ ਦੇ ਮਾੜੇ ਪ੍ਰਭਾਵ ਤੋਂ ਮੁਕਤ ਕਰ ਸਕਣ। ਇਸ ਤੋਂ ਇਲਾਵਾ ਇਨ੍ਹਾਂ ਓਟ ਸੈਂਟਰਾਂ ਵਿਖੇ ਇਨ੍ਹਾਂ ਨਸ਼ਾ ਪੀੜਤਾਂ ਨੂੰ ਨਸ਼ਿਆਂ ਦੇ ਮਾੜੇ ਪ੍ਰਭਾਵਾਂ ਪ੍ਰਤੀ ਜਾਗਰੂਕ ਕਰਨ ਲਈ ਕਾਊਂਸਲਿੰਗ ਸੁਵਿਧਾ ਵੀ ਮੁਹੱਈਆ ਕਰਵਾਈ ਜਾਂਦੀ ਹੈ।ਉਨ੍ਹਾਂ ਨੇ ਜ਼ਿਲ੍ਹੇ ਦੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਜੇਕਰ ੳਨ੍ਹਾਂ ਦੇ ਸੰਪਰਕ ਜਾਂ ਧਿਆਨ ਵਿੱਚ ਕੋਈ ਵੀ ਅਜਿਹਾ ਵਿਅਕਤੀ ਹੈ ਜੋ ਕਿ ਨਸ਼ਿਆਂ ਤੋਂ ਪੀੜਤ ਹੈ ਤਾਂ ਉਸ ਨੂੰ ਪ੍ਰੇਰ ਕੇ ਆਪਣੇ ਨੇੜਲੇ ਓਟ ਸੈਂਟਰ ਲੈ ਕੇ ਜਾਣ ਅਤੇ ਉਸ ਦਾ ਇਲਾਜ ਕਰਵਾਉਣ ਵਿੱਚ ਮੱਦਦ ਕਰਨ। ਉਨ੍ਹਾਂ ਦੱਸਿਆ ਕਿ ਸਮਾਜ ’ਚੋਂ ਨਸ਼ਿਆਂ ਦੇ ਕੋਹੜ ਨੂੰ ਖਤਮ ਕਰਨ ਲਈ ਸਾਨੂੰ ਇਨ੍ਹਾਂ ਪੀੜਤਾਂ ਨੂੰ ਪਹਿਲਾਂ ਬਾਹਰ ਲੈ ਕੇ ਆਉਣਾ ਪਵੇਗਾ ਤਾਂ ਜੋ ਇਲਾਜ ਨਾਲ ਉਨ੍ਹਾਂ ਨੂੰ ਸਮਾਜ ਦੀ ਮੁੱਖ ਧਾਰਾ ’ਚ ਲਿਆ ਕੇ ਜ਼ਿੰਦਗੀ, ਪਰਿਵਾਰ ਅਤੇ ਸਮਾਜ ਪ੍ਰਤੀ ਗੰਭੀਰ ਤੇ ਜ਼ਿੰਮੇਂਵਾਰ ਬਣਾਇਆ ਜਾ ਸਕੇ।