ਸ੍ਰੋਮਣੀ ਅਕਾਲੀ ਦਲ ਨੇ ਰਾਜ ਵਿਚ ਦਿਨ ਬ ਦਿਨ ਵੱਧ ਫੈਲ ਰਹੀ ਨਸ਼ਿਆਂ ਦੀ ਅਲਾਮਤ 'ਤੇ ਗਹਿਰੀ ਚਿੰਤਾ ਪ੍ਰਗਟ ਕਰਦਿਆਂ ਪੰਜਾਬ ਦੇ ਮੁਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਸਵਾਲ ਕੀਤਾ ਕਿ ਉਹ ਦਸੇ ਕਿ ਉਸ ਨੇ ਨਸ਼ਿਆਂ ਨੂੰ ਖਤਮ ਕਰਨ ਦੀ ਸੂਹ ਖਾਧੀ ਸੀ ਕਿ ਖੁਲੇਆਮ ਨਸ਼ਾ ਵੇਚਣ ਦੇਣ ਦੀ? ਸ੍ਰੋਮਣੀ ਅਕਾਲੀ ਦਲ ਦੇ ਬੁਲਾਰੇ ਪ੍ਰੋ: ਵਿਰਸਾ ਸਿੰਘ ਵਲਟੋਹਾ ਅਤੇ ਸਾਬਕਾ ਮੰਤਰੀ ਜਥੇਦਾਰ ਗੁਲਜਾਰ ਸਿੰਘ ਰਣੀਕੇ ਨੇ ਪ੍ਰੈਸ ਕਾਨਫਰੰਸ ਦੌਰਾਨ ਨਸ਼ਿਆਂ ਅਤੇ ਅਮਨ ਕਾਨੂੰਨ ਦੀ ਬਦਤਰ ਸਥਿਤੀ ਲਈ ਕਾਂਗਰਸ ਅਤੇ ਕੈਪਟਨ ਸਰਕਾਰ 'ਤੇ ਖੂਬ ਰਗੜੇ ਲਾਏ। ਉਹਨਾਂ ਦੋਸ਼ ਲਾਇਆ ਕਿ ਕਾਂਗਰਸ ਨਸ਼ਿਆਂ ਦੇ ਮਾਮਲੇ 'ਚ ਕੋਈ ਚੰਗੀ ਤੇ ਕਾਰਗਰ ਨੀਤੀ ਬਣਾਉਣ ਦੀ ਥਾਂ ਰਾਜਨੀਤੀ ਕੀਤੀ ਅਤੇ ਅਕਾਲੀ ਦਲ ਨੂੰ ਬਦਨਾਮ ਕਰਦਾ ਰਿਹਾ ਜਦ ਕਿ ਅਸਲੀਅਤ ਜੋ ਹੁਣ ਸਭ ਦੇ ਸਾਹਮਣੇ ਨਿਤ ਆ ਰਹੇ ਹਨ 'ਚ ਕਾਂਗਰਸੀ ਆਗੂ ਨਸ਼ਿਆਂ ਦੇ ਵਪਾਰੀਆਂ ਦੀ ਪੁਸ਼ਤ ਪਨਾਹੀ ਕਰਦਿਆਂ ਰਾਜ ਵਿਚ ਨਸ਼ਿਆਂ ਨੂੰ ਪ੍ਰਫੁਲਤ ਕਰਨ 'ਚ ਲਗੇ ਹੋਏ ਹਨ। ਉਹਨਾਂ ਦਸਿਆ ਕਿ ਬੀਤੇ ਦਿਨੀ ਜਿਲਾ ਦਿਹਾਤੀ ਪੁਲੀਸ ਵਲੋਂ ਨਾਕੇ ਦੌਰਾਨ ਅਧਾ ਕਿਲੋ ਹੈਰੋਇਨ ਸਮੇਤ ਫੜਿਆ ਗਿਆ ਗੁਰਇਕਬਾਲ ਸਿੰਘ ਰੂਪਾ ਅਟਾਰੀ ਹਲਕੇ ਦੇ ਕਾਂਗਰਸ ਵਿਧਾਇਕ ਤਰਸੇਮ ਸਿੰਘ ਡੀਸੀ ਦੀ ਸਜੀ ਬਾਂਹ ਹੈ ਅਤੇ ਯੂਥ ਕਾਂਗਰਸ ਦਾ ਆਗੂ ਹੋਣ ਦੇ ਨਾਲ ਨਾਲ ਕਾਂਗਰਸ ਐਂਟੀ ਨਾਰਕੋਟਿਕਸ ਸੈਲ ਦਾ ਬਲਾਕ ਪ੍ਰਧਾਨ ਵੀ ਹੈ। ਉਹਨਾਂ ਦੋਸ਼ ਲਾਇਆ ਕਿ ਪੁਲੀਸ ਨੇ ਰੂਪੇ ਤੋਂ ਬਰਾਮਦ ਅਧਾ ਕਿਲੋ ਹੈਰੋਇਨ ਨੂੰ ਸਿਆਸੀ ਦਬਾਅ ਹੇਠ ਸਿਰਫ 2 ਗਰਾਮ ਵਿਚ ਤਬਦੀਲ ਕਰਦਿਤਾ ਹੈ, ਜਿਸ ਬਾਰੇ ਉਚ ਪਧਰੀ ਜਾਂਚ ਹੋਣੀ ਚਾਹੀਦੀ ਹੈ , ਸਰਕਾਰ ਦਸੇ ਕਿ ਬਾਕੀ ਦਾ ਹੋਰੋਇਨ ਕਿਥੇ ਗਿਆ। ਉਹਨਾਂ ਕਿਹਾ ਕਿ ਰੂਪਾ ਕਾਂਗਰਸ ਅਤੇ ਕੈਪਟਨ ਸਰਕਾਰ ਦਾ ਪ੍ਰਤੀਨਿਧ ਰੂਪ ਹੈ , ਜੋ ਨਸ਼ਿਆਂ ਦਾ ਸੌਦਾਗਰ ਹੈ ਪਰ ਬਦਨਾਮ ਅਕਾਲੀ ਦਲ ਨੂੰ ਕੀਤਾ ਜਾਂਦਾ ਰਿਹਾ। ਉਹਨਾਂ ਰੂਪੇ ਨਾਲ ਕਈ ਮੰਤਰੀਆਂ ਦੀਆਂ ਤਸਵੀਰਾਂ ਦਿਖਾਉਦਿਆਂ ਦੋਸ਼ ਲਾਇਆ ਕਿ ਰੂਪਾ ਇਕ ਪ੍ਰਭਾਵਸ਼ਾਲੀ ਵਿਅਕਤੀ ਹੈ ਜਿਸ ਦੀਆਂ ਤਾਰਾਂ ਕੈਬਟਿਨ ਮੰਤਰੀਆਂ ਨਾਲ ਜੁੜੀਆਂ ਹੋਈਆਂ ਹਨ।
ਇਹ ਵੀ ਚਰਚਾ ਹੈ ਕਿ ਨਸ਼ਿਆਂ ਖਿਲਾਫ ਬਿਆਨਬਾਜੀ ਕਰਨ ਵਾਲਾ ਇਹ ਰੂਪਾ ਘੜਿਡਾ ਥਾਣੇ 'ਚ ਬੰਦ ਮੁਲਜਮਾਂ ਨੂੰ ਗੁਪਤ ਰੂਪ 'ਚ ਨਸ਼ਾ ਸਪਲਾਈ ਕਰਦਾ ਕਰਾਉਦਾ ਰਿਹਾ। ਉਹਨਾਂ ਦਸਿਆ ਕਿ ਉਹਨਾਂ ਦਸਿਆ ਕਿ ਇਹ ਕੋਈ ਇਕ ਵਾਕਿਆ ਨਹੀਂ ਰਾਜ ਵਿਚ ਅਜਿਹੀ ਖੇਡ ਆਮ ਹੋ ਚੁਕੀ ਹੈ ਕਿ ਨਸ਼ਿਆਂ ਸਮੇਤ ਫੜੇ ਜਾਂਦੇ ਰਹੇ ਕਾਂਗਰਸੀ ਆਗੂ ਸਿਆਸੀ ਦਬਾਅ ਅਧੀਨ ਛੱਡ ਦਿਤੇ ਜਾਂਦੇ ਹਨ। ਉਹਨਾਂ ਦਸਿਆ ਕਿ ਨਸ਼ਿਆਂ ਦੇ ਓਵਰਡੋਜ ਕਾਰਨ ਭਾਰੀ ਗਿਣਤੀ 'ਚ ਹੋ ਰਹੀਆਂ ਮੌਤਾਂ ਨਸ਼ਿਆਂ ਦੇ ਪਸਾਰੇ ਦੀ ਬਾਤ ਪਾ ਰਹੇ ਹਨ। ਕਿਨੀ ਹੈਰਾਨੀ ਦੀ ਗਲ ਹੈ ਕਿ ਗੁਟਕਾ ਸਾਹਿਬ ਹੱਥ 'ਚ ਲੈ ਕੇ ਸਭ ਦੇ ਸਾਹਮਣੇ ਚਾਰ ਹਫਤਿਆਂ 'ਚ ਨਸ਼ਾ ਖਤਮ ਕਰ ਦੇਣ ਦੀ ਸੌਹ ਖਾਣ ਵਾਲੇ ਕੈਪਟਨ ਨੇ ਹੁਣ ਕਹਿਣਾ ਸ਼ੁਰੂ ਕਰਦਿਤਾ ਹੈ ਕਿ ਉਸ ਨੇ ਨਸ਼ਿਆਂ ਦਾ ਲਕ ਤੋੜਣ ਦੀ ਯੌਹ ਖਾਦੀ ਸੀ , ਪਰ ਉਸ ਦੀ ਖਾਧੀ ਯੋਹ ਦੀਆਂ ਰਿਕਾਰਡਿੰਗ ਸੋਸ਼ਲ ਮੀਡੀਆ 'ਤੇ ਅਜ ਵੀ ਦੇਖਿਆ ਜਾ ਸਕਦਾ ਹੈ। ਅਕਾਲੀ ਆਗੂਆਂ ਨੇ ਕਾਂਗਰਸ ਵਿਧਾਇਕ ਇੰਦਰਬੀਰ ਸਿੰਘ ਬੁਲਾਰੀਆ 'ਤੇ ਵੀ ਨਜਾਇਜ ਕਾਬਜਕਾਰਾਂ ਨੂੰ ਸ਼ਹਿ ਦੇਣ ਦਾ ਦੋਸ਼ ਲਾਇਆ ਤੇ ਕਿਹਾ ਕਿ ਅਮ੍ਰਿਤਸਰ 'ਚ ਇਕ ਮਕਾਨ 'ਤੇ ਕਬਜਾ ਕਰਨ ਸਮੇਂ ਨੇਪਾਲੀ ਦੰਪਤੀ 'ਤੇ ਹਲਮਾ ਕਰਨ ਵਾਲੇ ਮਹਾਂਵੀਰ ਸਿੰਘ ਮਿਠੂ ਦੇ ਵੀ ਕਾਂਗਰਸੀ ਆਗੂ ਬੁਲਾਰੀਏ ਨਾਲ ਸਿਧੀ ਕੁਨੈਸ਼ਨ ਸਾਹਮਣੇ ਆਏ ਹਨ। ਅਕਾਲੀ ਆਗੂਆਂ ਨੇ ਨਸ਼ਿਆਂ ਦੇ ਮਾਮਲਿਆਂ 'ਚ ਕਾਂਗਰਸੀ ਆਗੂਆਂ ਦੀ ਸ਼ਮੂਲੀਅਤ ਸਾਹਮਣੇ ਆਉਣ 'ਤੇ ਕੈਪਟਨ ਅਮਰਿੰਦਰ ਸਿੰਘ ਤੋਂ ਜਵਾਬ ਮੰਗਿਆ ਹੈ ਅਤੇ ਰੂਪਾ ਦੇ ਮਾਮਲੇ 'ਚ ਉਚ ਪਧਰੀ ਜਾਂਚ ਦੀ ਮੰਗ ਕੀਤੀ ਹੈ। ਇਸ ਮੌਕੇ ਗੁਰਪ੍ਰੀਤ ਸਿੰਘ ਰੰਧਾਵਾ, ਰਾਣਾ ਰਣਬੀਰ ਸਿੰਘ ਲੋਪੋਕੇ ਆਦਿ ਵੀ ਮੌਜੂਦ ਸਨ।