ਪੀ.ਐਨ.ਡੀ.ਟੀ. ਐਕਟ ਨੂੰ ਸੁਚਾਰੂ ਢੰਗ ਨਾਲ ਅਮਲ ਵਿੱਚ ਲਿਆਉਣ ਲਈ ਜ਼ਿਲ੍ਹਾ ਐਪ੍ਰੋਪ੍ਰੀਏਟ ਅਥਾਰਟੀ-ਕਮ-ਸਿਵਲ ਸਰਜਨ ਬਰਨਾਲਾ ਡਾ. ਜੁਗਲ ਕਿਸ਼ੋਰ ਵੱਲੋਂ ਪੀ.ਐਨ.ਡੀ.ਟੀ. ਐਡਵਾਇਜ਼ਰੀ ਕਮੇਟੀ ਦੀ ਮੀਟਿੰਗ ਕੀਤੀ ਗਈ। ਸਿਵਲ ਸਰਜਨ ਬਰਨਾਲਾ ਨੇ ਮੀਟਿੰਗ ਦੌਰਾਨ ਮਹੀਨਾਵਾਰ ਕੀਤੀ ਗਈਆਂ ਅਲਟਰਾਸਾਉਂਡ ਸੈਂਟਰ ਦੀ ਚੈਕਿੰਗਾਂ ਬਾਰੇ ਜਾਣਕਾਰੀ ਸਾਂਝੀ ਕੀਤੀ। ਇਸ ਮੀਟਿੰਗ ਵਿੱਚ ਇਕ ਅਲਟਰਾਸਾਉਂਡ ਸੈਂਟਰ ਦੀ ਰਿਨੀਊਲ ਅਤੇ ਇਕ ਨਵਾਂ ਸੈਂਟਰ ਰਜਿਸਟਰ ਕਰਨ ਸਬੰਧੀ ਵਿਚਾਰ ਕੀਤਾ ਗਿਆ। ਡਾ. ਜੁਗਲ ਕਿਸ਼ੋਰ ਨੇ ਕਿਹਾ ਕਿ ਸੂਬਾ ਪੱਧਰੀ ਜਾਂਚ ਟੀਮ ਵੱਲੋਂ ਸਮੇਂ ਸਮੇਂ ਤੇ ਲਗਾਤਾਰ ਹਰ ਜ਼ਿਲ੍ਹੇ ਵਿੱਚ ਬਹੁਤ ਬਰੀਕੀ ਨਾਲ ਜਾਂਚ ਕੀਤੀ ਜਾ ਰਹੀ ਹੈ। ਸਿਵਲ ਸਰਜਨ ਬਰਨਾਲਾ ਨੇ ਦੱਸਿਆ ਕਿ ਸਰਕਾਰ ਵੱਲੋਂ ਲਿੰਗ ਜਾਂਚ ਰੋਕਣ ਲਈ ਇਕ ਪ੍ਰਾਇਵੇਟ ਏਜੰਸੀ ਨਾਲ ਕਰਾਰ ਕੀਤਾ ਹੈ, ਜੋ ਸੂਹੀਆ ਬਣਕੇ ਲਿੰਗ ਜਾਂਚ ਕਰਨ ਵਾਲਿਆਂ ਨੂੰ ਫੜਦੇ ਹਨ।
ਇਸ ਮੌਕੇ ਮੀਟਿੰਗ ਦੌਰਾਨ ਹਾਜ਼ਰ ਡਾ. ਹਰਿੰਦਰਪਾਲ ਸਿੰਘ ਜ਼ਿਲ੍ਹਾ ਪਰਿਵਾਰ ਭਲਾਈ ਅਫ਼ਸਰ ਬਰਨਾਲਾ ਨੇ ਕਿਹਾ ਕਿ ਸਰਕਾਰ ਪੀ. ਸੀ. ਅਤੇ ਪੀ.ਐਨ.ਡੀ.ਟੀ. ਐਕਟ ਸਬੰਧੀ ਪ੍ਰਾਪਤ ਸਖ਼ਤ ਹਦਾਇਤਾਂ ਦੀ ਇੰਨ ਬਿੰਨ ਪਾਲਣਾ ਕੀਤੀ ਜਾਣੀ ਚਾਹੀਦੀ ਹੈ ਅਤੇ ਅਲਟਰਾਸਾਉਂਡ ਸੈਂਟਰਾਂ ਦੀ ਚੈਕਿੰਗ ਮਹੀਨਾਵਾਰ ਜਾਰੀ ਰਹੇਗੀ ਤਾਂ ਜੋ ਸਮਾਜ ਵਿਚ ਲਿੰਗ ਜਾਂਚ ਰਾਹੀ ਕੀਤੀ ਜਾਂਦੀ ਭਰੂਣ ਹੱਤਿਆ ਦੇ ਕਲੰਕ ਨੂੰ ਖ਼ਤਮ ਕੀਤਾ ਜਾ ਸਕੇ। ਡਾ. ਹਰਿੰਦਰਪਾਲ ਸਿੰਘ ਨੇ ਕਿਹਾ ਕਿ ਲੋਕਾਂ ਨੂੰ ਜਾਗਰੂਕ ਕਰਨ ਹਿੱਤ ਇਸ਼ਤਿਹਾਰ/ਫਲੈਕਸ ਬੋਰਡ ਵੀ ਲਗਾਏ ਜਾਣੇ ਚਾਹੀਦੇ ਹਨ। ਇਸ ਮੀਟਿੰਗ ਦੌਰਾਨ ਐਡਵਾਇਜ਼ਰੀ ਕਮੇਟੀ ਦੇ ਮੈਂਬਰ ਦਿਲਪ੍ਰੀਤ ਸਿੰਘ ਏ.ਡੀ.ਏ., ਡਾ. ਮਨਪ੍ਰੀਤ ਸਿੱਧੂ ਮੈਡੀਸਿਨ ਸਪੈਸ਼ਲਿਸਟ, ਡਾ. ਦੀਪਿਕਾ ਗਾਇਨੋਕੋਲੋਜਿਸਟ, ਡਾ. ਭਾਰਤੀ (ਬੱਚਿਆਂ ਦੇ ਮਾਹਰ), ਰਜਿੰਦਰ ਕੁਮਾਰ, ਹਾਕਮ ਚੰਦ( ਐਨ.ਜੀ.ਓ.), ਜ਼ਿਲ੍ਹਾ ਪੀ.ਐਨ.ਡੀ.ਟੀ. ਕੋਆਰਡੀਨੇਟਰ ਗੁਰਜੀਤ ਸਿੰਘ, ਹਰਜੀਤ ਸਿੰਘ ਜ਼ਿਲ੍ਹਾ ਬੀ.ਸੀ.ਸੀ, ਰਫ਼ੀਕ ਮੁਹੰਮਦ ਹਾਜ਼ਰ ਸਨ।