ਮਨਤੇਜ ਸਿੰਘ ਐਸ ਐਚ ਓ ਰਾਮਦਾਸ ਨੇ ਦਸਿਆ ਕਿ ਹਰਦੀਪ ਸਿੰਘ ਪੁੱਤਰ ਬਲਦੇਵ ਸਿੰਘ ਨਿਵਾਸੀ ਪਿੰਡ ਕੋਟ ਰਾਜ਼ਦਾ ਨਜ਼ਦੀਕ ਅਜਨਾਲਾ ਨੇ ਸ਼ਿਕਾਇਤ ਦਰਜ ਕਰਵਾਈ ਸੀ ਕਿ ਉਸਦਾ 9 ਸਾਲਾ ਬੇਟਾ ਕਰਨਜੋਤ ਸਿੰਘ ਜੋ ਖਾਣਾ ਖਾ ਕੇ ਸੌ ਗਿਆ ਸੀ ਅਤੇ ਅਚਾਨਕ ਜਦੋਂ ਉਸਨੇ ਰਾਤ 12 ਵੱਜੇ ਉਠ ਕੇ ਦੇਖਿਆ ਤਾਂ ਉਹ ਆਪਣੇ ਬਿਸਤਰ ਤੇ ਨਹੀਂ ਸੀ।ਲੱਭਣ ਤੇ ਉਸਦੀ ਲਾਸ਼ ਧੁੱਸੀ ਨਜ਼ਦੀਕ ਸਵਾਹ ਵਿੱਚ ਪਈ ਮਿਲੀ ।ਹਰਦੀਪ ਸਿੰਘ ਦੀ ਪਹਿਲੀ ਪਤਨੀ ਅਤੇ ਕਰਨਜੋਤ ਸਿੰਘ ਦੀ ਮਾਂ ਰਾਜਪ੍ਰੀਤ ਕੌਰ ਨੇ ਸ਼ੱਕ ਜਤਾਇਆ ਸੀ ਕਿ ਉਸਦੇ ਬੇਟੇ ਦੀ ਹੱਤਿਆ ਉਸਦੀ ਮਤਰੇਈ ਮਾਂ ਮਨਜੀਤ ਕੌਰ ਨੇ ਕੀਤੀ ਹੈ ।ਕਰਨਜੋਤ ਦਾ ਸੰਸਕਾਰ ਕਰਨ ਤੋਂ ਬਾਅਦ ਐਸ ਐਸ ਪੀ ਦਿਹਾਤੀ ਅੰਮ੍ਰਿਤਸਰ ,ਐਸ ਪੀ ਡੀ ਹਰਪਾਲ ਸਿੰਘ ,ਹਰਪ੍ਰੀਤ ਸਿੰਘ ਡੀ ਐਸ ਪੀ ਅਜਨਾਲਾ ਨੇ ਜਾਂਚ ਸ਼ੁਰੂ ਕੀਤੀ ।ਜਿਸ ਵਿੱਚ ਮਨਜੀਤ ਕੌਰ ਤੋਂ ਜਦੋਂ ਸਖ਼ਤੀ ਨਾਲ ਪੁੱਛਗਿੱਛ ਕੀਤੀ ਗਈ ਤਾਂ ਉਸਨੇ ਆਪਣਾ ਜ਼ੁਰਮ ਕਬੂਲਿਆ ਤੇ ਕਿਹਾ ਕਿ ਉਸਦਾ ਪਤੀ ਸ਼ਰਾਬ ਪੀਣ ਦਾ ਆਦੀ ਹੈ ਜੋ ਦਿਨ ਰਾਤ ਸ਼ਰਾਬ ਪੀਂਦਾ ਰਹਿੰਦਾ ਹੈ।ਘਰ ਦਾ ਸਾਰਾ ਕੰਮਕਾਜ ਉਸਦੇ ਬੱਚਿਆਂ ਤੋਂ ਕਰਵਾਉਂਦਾ ਸੀ ਜਦਕਿ ਕਰਨਜੋਤ ਨੂੰ ਆਪਣੇ ਲਾਗੇ ਬਿਠਾ ਕੇ ਰੱਖਦਾ ਸੀ ।ਕਰਨਜੋਤ ਦੇ ਕਹਿਣ ਤੇ ਸਾਨੂੰ ਮਾਰਦਾ ਕੁੱਟਦਾ ਸੀ।28 ਜੂਨ ਦੀ ਸ਼ਾਮ ਨੂੰ ਉਸਨੇ ਸਾਡੇ ਨਾਲ ਝਗੜਾ ਕੀਤਾ ਅਤੇ ਕਿਹਾ ਕਿ ਆਪਣਾ ਬੋਰਿਆ ਬਿਸਤਰਾ ਲੈ ਜਾਓ ਇੱਥੋਂ ।ਇਸੇ ਗੱਲ ਨੂੰ ਲੈ ਕੇ ਮੈਂ ਇਹਘਟਨਾ ਨੂੰ ਅੰਜਾਮ ਦਿੱਤਾ ਕਿ ਕਿਉਂ ਨਾ ਕਰਨਜੋਤ ਨੂੰ ਮੁਕਾ ਦਿੱਤਾ ਜਾਵੇ ਜਿਸ ਕਰਕੇ ਇਹ ਝਗੜਾ ਹੁੰਦਾ ਹੈ ।ਉਸੇ ਰਾਤ ਮੈ ਉਸਦਾ ਦਮ ਘੁੱਟ ਕੇ ਉਸ ਨੂੰ ਮਾਰ ਦਿੱਤਾ ਅਤੇ ਲਾਸ਼ ਨੂੰ ਧੁੱਸੀ ਲਾਗੇ ਸਵਾਹ ਵਿੱਚ ਸੁੱਟ ਦਿੱਤਾ ।ਘਰ ਵਿੱਚ ਕੱਪੜੇ ਇਸ ਕਰਕੇ ਖਿਲਾਰ ਦਿੱਤੇ ਕਿ ਕੋਈ ਇਹ ਸਮਝੇ ਕਿ ਇਹ ਘਟਨਾ ਚੋਰੀ ਨਾਲ ਸਬੰਧਿਤ ਹੈ ।ਪੁਲਿਸ ਇਸ ਕਤਲ ਦੀ ਗੁੱਥੀ ਨੂੰ 24 ਘੰਟੇ ਅੰਦਿਰ ਹੀ ਸੁਲਝਾਉਣ ਵਿੱਚ ਸਫ਼ਲਤਾ ਹਾਸਿਲ ਕੀਤੀ ਹੈ।