ਬੀਤੇ ਕੱਲ ਵੱਖ-ਵੱਖ ਪਿੰਡਾਂ ਵਿੱਚ 17 ਬਲਦ ਮਾਰ ਕਿ ਸੁੱਟਣ ਵਾਲੀ ਘਟਨਾ ਦੀ ਪਹੇਲੀ ਸੁਲਝਾਉਂਦਿਆਂ ਅੰਮ੍ਰਿਤਸਰ ਦਿਹਾਤੀ ਦੀ ਪੁਲੀਸ ਨੇ ਇਕ ਦੋਸ਼ੀ ਨੂੰ ਘਟਨਾ ਵਿੱਚ ਵਰਤੀ ਗਈ ਕਾਰ ਸਮੇਤ ਕਾਬੂ ਕਰ ਲਿਆ ਹੈ ਅਤੇ ਤਿੰਨ ਦੋਸ਼ੀ ਅਜੇ ਫਰਾਰ ਹਨ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਡੀਐਸਪੀ ਜੰਡਿਆਲਾ ਗੁਰੂ ਗੁਰਪ੍ਰਤਾਪ ਸਿੰਘ ਸਹੋਤਾ ਨੇ ਦੱਸਿਆ ਕਿ ਕੱਲ ਥਾਣਾ ਤਰਸਿੱਕਾ ਦੇ ਅਧੀਨ ਆਉਂਦੇ ਪਿੰਡ ਮਾਲੋਵਾਲ ਦੇ ਪੁਲ ਨੇੜੇ ਛੇ ਬਲਦਾਂ, ਥਾਣਾ ਜੰਡਿਆਲਾ ਗੁਰੂ ਅਧੀਨ ਆਉਂਦੇ ਪਿੰਡ ਦੇਵੀਦਾਸਪੁਰਾ ਦੇ ਫਾਟਕ ਨੇੜੇ ਦੋ ਬਲਦਾਂ, ਚੌਹਾਨ ਪਿੰਡ ਦੀ ਡ੍ਰੇਨ ਨੇੜੇ ਪੰਜ ਬਲਦਾਂ, ਪਿੰਡ ਫਤਿਹਪੁਰ ਰਾਜਪੂਤਾਂ ਕੋਲ ਚਾਰ ਬਲਦਾਂ ਨੂੰ ਮਾਰ ਕਿ ਕੋਈ ਸੁੱਟ ਗਿਆ ਹੈ।ਇਸ ਦੇ ਸਬੰਧ ਵਿੱਚ ਮੁਕਦਮਾ ਨੰਬਰ 20 ਜੁਰਮ 429,3.5.8 ਗਊ ਕਾਸ਼ੀ ਐਕਟ ਥਾਣਾ ਤਰਸਿੱਕਾ ਅਤੇ ਮੁਕਦਮਾ ਨੰਬਰ 36 ਜੁਰਮ 429, 3.5.8 ਗਊ ਕਾਸ਼ੀ ਐਕਟ ਥਾਣਾ ਜੰਡਿਆਲਾ ਗੁਰੂ ਵਿੱਚ ਦਰਜ ਕੀਤੇ ਸਨ।ਐਸਐਸਪੀ ਅੰਮ੍ਰਿਤਸਰ ਦਿਹਾਤੀ ਪਰਮਪਾਲ ਸਿੰਘ ਵਲੋਂ ਬਣਾਈ ਗਈ ਇਕ ਜਾਂਚ ਟੀਮ ਐਸਪੀ ਹਰਪਾਲ ਸਿੰਘ(ਆਈ) 'ਤੇ ਡੀਐਸਪੀ ਸਹੋਤਾ ਦੀ ਦੇਖ-ਰੇਖ ਵਿੱਚ ਬਣਾਈ ਗਈ ਸੀ।ਇਸ ਘਟਨਾ ਦੀ ਤਫਤੀਸ਼ ਵਾਸਤੇ ਵੱਖ-ਵੱਖ ਟੀਮਾਂ ਬਣਾ ਕਿ ਕਾਰਵਾਈ ਕਰਦਿਆਂ ਐਸਐਚਉ ਤਰਸਿੱਕਾ ਬਿਕਰਮਜੀਤ ਸਿੰਘ ਨੂੰ ਖੂਫੀਆ ਜਾਣਕਾਰੀ ਮਿਲੀ ਕਿ ਇਹ ਕਾਰਾ ਕੁਲਦੀਪ ਸਿੰਘ ਉਰਫ ਸਾਗਰ, ਅਮਨਦੀਪ ਸਿੰਘ ਰੈਂਬੋ ਪੁੱਤਰ ਮੇਜਰ ਸਿੰਘ, ਹਰਭਾਲ ਸਿੰਘ ਭਾਲਾ, ਗੁਰਦਿਆਲ ਸਿੰਘ ਕਾਲਾ ਪੁੱਤਰ ਜੁਗਿੰਦਰ ਸਿੰਘ ਵਾਸੀ ਥਾਣਾ ਜੰਡਿਆਲਾ ਗੁਰੂ ਵਲੋਂ ਕੀਤਾ ਗਿਆ ਹੈ।ਇਸ 'ਤੇ ਐਸਐਚਉ ਤਰਸਿੱਕਾ ਬਿਕਰਮਜੀਤ ਸਿੰਘ ਨੇ ਤੁਰੰਤ ਕਾਰਵਾਈ ਕਰਦਿਆਂ ਕੁਲਦੀਪ ਸਿੰਘ ਸਾਗਰ ਪੁੱਤਰ ਮੇਜਰ ਸਿੰਘ ਵਾਸੀ ਰਾਏਪੁਰ ਕਲਾਂ ਨੂੰ ਵਾਰਦਾਤ ਵਿੱਚ ਵਰਤੀ ਕਾਰ ਸਵਿਫਟ ਡਿਜ਼ਾਇਰ ਪੀਬੀ 69 ਸੀ 0383 ਸਮੇਤ ਕਾਬੂ ਕਰ ਲਿਆ। ਕੁਲਦੀਪ ਸਿੰਘ ਨੇ ਪੁੱਛ-ਗਿੱਛ ਦੌਰਾਨ ਦੱਸਿਆ ਕਿ ਉਹ ਅਤੇ ਉਸਦੇ ਸਾਥੀ ਇਨ੍ਹਾਂ 17 ਬਲਦਾਂ ਨੂੰ ਸਰਦੂਲਗੜ ਨੇੜਿਉਂ ਖ੍ਰੀਦ ਕਿ ਇਕ ਕੰਨਟੇਨਰ ਵਿੱਚ ਲੱਦ ਕਿ ਵਾਪਸ ਅੰਮ੍ਰਿਤਸਰ ਲਿਆ ਰਹੇ ਸਨ ਪਰ ਰਸਤੇ ਵਿੱਚ ਬਲਦਾਂ ਦਾ ਕੰਨਟੇਨਰ ਵਿੱਚ ਸਾਹ ਘੁਟ ਜਾਣ ਕਾਰਨ ਸਾਰੇ ਬਲਦ ਮਰ ਗਏ।ਜਿਸ ਕਾਰਨ ਇਨ੍ਹਾਂ ਦੋਸ਼ੀਆਂ ਨੇ ਮਰੇ ਹੋਏ ਬਲਦਾਂ ਨੂੰ ਵੱਖ-ਵੱਖ ਥਾਵਾਂ 'ਤੇ ਸੁੱਟ ਦਿੱਤਾ।ਡੀਐਸਪੀ ਨੇ ਕਿਹਾ ਕਿ ਫਰਾਰ ਹੋਏ ਦੋਸ਼ੀਆਂ ਦੀ ਭਾਲ਼ ਵਿੱਚ ਛਾਪੇ ਮਾਰੀ ਕੀਤੀ ਜਾ ਰਹੀ।