ਅੱਜ ਇਥੇ ਜਿਲਾ ਪ੍ਰਸ਼ਾਸ਼ਨ ਵਲੋਂ ਘੋੜਿਆਂ ਚ ਫੈਲ ਰਹੀ ਗਲੈਂਡਰਜ਼ ਦੀ ਬਿਮਾਰੀ ਦੇ ਮੱਦੇਨਜ਼ਰ ਨਿਹੰਗ ਜਥੇਬੰਦੀਆਂ, ਜਿਸ ਦੀ ਅਗਵਾਈ ਬਾਬਾ ਬਲਬੀਰ ਸਿੰਘ 96 ਕਰੌੜੀ ਪ੍ਰਮੁੱਖ ਬਾਬਾ ਬੁੱਢਾ ਦਲ ਕਰ ਰਹੇ ਸਨ ,ਨਾਲ ਇੱਕ ਵਿਸ਼ੇਸ਼ ਮੀਟਿੰਗ ਕੀਤੀ ਗਈ ।ਇਹ ਮੀਟਿੰਗ ਸੁਖਾਵੇ ਮਾਹੌਲ ਅਤੇ ਹੋਲੇ ਮਹੱਲੇ ਨੂੰ ਅਮਨ ਅਮਾਨ ਦੇ ਨਾਲ ਨੇਪਰੇ ਚਾੜ੍ਹਨ ਦਾ ਤੱਹਈਆ ਕਰਦੇ ਹੋਏ ਨੇਪਰੇ ਚੜ੍ਹੀ।ਇਸ ਮੀਟਿੰਗ ਦੌਰਾਨ ਪਸ਼ੂ ਪਾਲਣ ਵਿਭਾਗ ਦੇ ਉੱਚ ਅਧਿਕਾਰੀਆਂ ਵਲੋਂ ਨਿਹੰਗ ਜਥੇਬੰਦੀਆਂ ਨੂੰ ਉਕਤ ਬਿਮਾਰੀ ਸਬੰਧੀ ਜਿਥੇ ਜਾਣਕਾਰੀ ਦਿਤੀ ਗਈ ਉਥੇ ਕੇਂਦਰ ਸਰਕਾਰ ਵਲੋਂ ਜਾਰੀ ਚਿਠੀ ਸਬੰਧੀ ਵੀ ਜਾਣਕਾਰੀ ਦਿਤੀ ਜਿਸ ਰਾਂਹੀ ਇਹ ਹਦਾਇਤ ਕੀਤੀ ਗਈ ਹੈ ਕਿ ਉਤਰ ਪ੍ਰਦੇਸ਼ ,ਹਰਿਆਣਾ ਤੇ ਪੰਜਾਬ ਵਿਚ ਘੋੜਿਆ ਦੀਆਂ ਦੌੜਾਂ ,ਸ਼ੋਅ ਅਤੇ ਮੰਡੀਆਂ ਤੇ ਰੋਕ ਲਗਾਈ ਹੋਈ ਹੈ ।ਇਸ ਤੇ ਨਿਹੰਗ ਸਿੰਘਾਂ ਨੇ ਪ੍ਰਸ਼ਾਸਨ ਦਾ ਸਾਥ ਦੇਣ ਦਾ ਫੈਸਲਾ ਕਰਦੇ ਹੋਏ ਕਿਹਾ ਕਿ ਗੁਰੁ ਕਾਲ ਤੋਂ ਹੀ ਇਹ ਪਰੰਪਰਾ ਚਲੀ ਆ ਰਹੀ ਹੈ ਕਿ ਨਿਹੰਗ ਜਥੇਬੰਦੀਆਂ ਵਲੋਂ ਹੋਲੇ ਮਹੱਲੇ ਦੌਰਾਨ ਗਤਕਾ ਬਾਜ਼ੀ,ਘੁੜ ਦੌੜ ਕਰਵਾਈ ਜਾਂਦੀ ਹੈ। ਉਨਾਂ ਕਿਹਾ ਕਿ ਉਹ ਇਸ ਬਿਮਾਰੀ ਦੇ ਮਦੇਨਜਰ ਪ੍ਰਸ਼ਾਸਨ ਦਾ ਸਾਥ ਦਿੰਦੇ ਹੋਏ ਜਿਲਾ ਪ੍ਰਸ਼ਾਸ਼ਨ ਨੂੰ ਆਪਣੇ ਘੋੜਿਆਂ ਦੇ ਟਿਕਾਣਿਆਂ ਬਾਰੇ ਦੱਸ ਦਿੰਦੇ ਹਨ ਅਤੇ ਪਸ਼ੂ ਪਾਲਣ ਵਿਭਾਗ ਸਾਰੇ ਘੋੜਿਆਂ ਦੇ ਸੈਂਪਲ ਲੈ ਲਵੋ ਤੇ ਰਿਪੋਰਟ ਆਉਣ ਤੇ ਉਨਾਂ ਨੂੰ ਦਸ ਦਿਤਾ ਜਾਵੇ ।ਇਸ ਰਿਪੋਰਟ ਉਪਰੰਤ ਉਹ ਆਪਣੇ ਬਿਮਾਰ ਘੋੜੇ ਉਸ ਥਾਂ ਤੇ ਹੀ ਛੱਡ ਦੇਣਗੇ ਅਤੇ ਤੰਦਰੁਸਤ ਘੋੜੇ ਹੀ ਹੋਲੇ ਮਹੱਲੇ ਦੌਰਾਨ ਲੈ ਕੇ ਆਉਣਗੇ।ਇਸ ਤੇ ਡਿਪਟੀ ਕਮਿਸ਼ਨਰ ਗੁਰਨੀਤ ਤੇਜ਼ ਨੇ ਪਸ਼ੂ ਪਾਲਣ ਵਿਭਾਗ ਦੀਆਂ ਟੀਮਾ ਦਾ ਗਠਨ ਕਰਦੇ ਹੋਏ ਉਨਾਂ ਨੂੰ ਹਦਾਇਤ ਕੀਤੀ ਕਿ ਉਹ ਨਿਹੰਗ ਜਥੇਬੰਦੀਆਂ ਵਲੋਂ ਦਸੀਆਂ ਥਾਵਾਂ ਤੇ ਜਾਕੇ ਘੋੜਿਆ ਦੇ ਟੈਸਟ ਲਈ ਸੈਂਪਲ ਲੈਣ।ਇਸ ਉਪਰੰਤ ਰਿਪੋਰਟ ਆਉਣ ਤੇ ਤੁਰੰਤ ਜਾਣਕਾਰੀ ਦਿਤੀ ਜਾਵੇ ਤਾਂ ਜੋ ਨਿਹੰਗ ਜਥੇਬੰਦੀਆਂ ਨੂੰ ਸੂਚਿਤ ਕੀਤਾ ਜਾ ਸਕੇ ਅਤੇ ਉਹ ਕੇਵਲ ਤੰਦਰੁਸਤ ਘੌੜੇ ਨੂੰ ਹੀ ਮਹੱਲੇ ਦੌਰਾਨ ਲੈ ਕੇ ਆਉਣ।ਇਸ ਮੀਟਿੰਗ ਦੌਰਾਨ ਸੀਨੀਅਰ ਪੁਲਿਸ ਕਪਤਾਨ ਸ਼੍ਰੀ ਰਾਜ ਬਚਨ ਸਿੰਘ ਸੰਧੂ,ਮੈਨੇਜਰ ਸਰਦਾਰ ਰਣਜੀਤ ਸਿੰਘ ਤਖਤ ਸ਼੍ਰੀਕੇਸਗੜ ਸਾਹਿਬ, ਵਧੀਕ ਡਿਪਟੀ ਕਮਿਸ਼ਨਰ ਸ਼੍ਰੀ ਲਖਮੀਰ ਸਿੰਘ,ਐਸ.ਡੀ.ਐਮ ਮੈਡਮ ਰੂਹੀ ਦੁੱਗ, ਐਸ.ਡੀ.ਐਮ. ਸ਼੍ਰੀ ਰਾਕੇਸ਼ ਕੁਮਾਰ ਗਰਗ , ਸਹਾਇਕ ਕਮਿਸ਼ਨਰ (ਜਨਰਲ) ਸ਼੍ਰੀ ਹਰਬੰਸ ਸਿੰਘ,ਡੀ.ਐਸ.ਪੀ.ਰਮਿੰਦਰ ਸਿੰਘ ਕਾਹਲੋ,ਡਾਕਟਰ ਏ.ਐਸ.ਮੁਲਤਾਨੀ ਸੰਯੁਕਤ ਡਾਇਰੈਕਟਰ,ਡਾਕਟਰ ਮਧੂਕੇਸ਼ ਪਲਟਾ ਡਿਪਟੀ ਡਾਇਰੈਕਟਰ ਤੇ ਪਸ਼ੂ ਪਾਲਣ ਵਿਭਾਗ ਦੇ ਹੋਰ ਅਧਿਕਾਰੀ ਹਾਜਰ ਸਨ ।