ਤਰਕਸ਼ੀਲ ਸੁਸਾਇਟੀ ਨੇ ਇੱਕ ਢੋਂਗੀ ਬਾਬੇ ਤੋਂ ਸ਼ਰਤੀਆ ਇਲਾਜ ਕਰਨ ਦੇ ਨਾਂ ਹੇਠ ਠੱਗੇ ਪੱਚੀ ਹਜ਼ਾਰ ਰੁਪਏ ਤਿੰਨ ਸਾਲਾਂ ਬਾਅਦ ਵਾਪਸ ਕਰਵਾਏ ਹਨ। ਖਾਸ ਗੱਲ ਇਹ ਹੈ ਕਿ ਬਾਬੇ ਨੇ ਇੱਕ ਤਰਕਸ਼ੀਲ ਮੈਂਬਰ ਵੱਲੋਂ ਫੋਨ ਕਰਨ 'ਤੇ ਹੀ ਕਾਰਵਾਈ ਦੇ ਡਰੋਂ ਇਹ ਰਕਮ ਵਾਪਸ ਪੀੜਤ ਦੇ ਖਾਤੇ ਵਿੱਚ ਜਮ੍ਹਾਂ ਕਰਵਾ ਦਿੱਤੀ। ਕਹਾਣੀ ਇਹ ਹੈ ਕਿ ਮੁੱਲਾਂਪੁਰ ਵਾਸੀ ਬਲਵੰਤ ਸਿੰਘ (ਬਦਲਿਆ ਨਾਂ) ਸ਼ਹਿਰ ਵਿੱਚ ਹੀ ਸਾਈਕਲਾਂ ਦੀ ਦੁਕਾਨ ਕਰਦਾ ਹੈ। ਕੁੱਝ ਸਾਲ ਪਹਿਲਾਂ ਉਸ ਦੇ ਲੜਕੇ ਦੀਆਂ ਦਿਮਾਗੀ ਨੁਕਸ ਕਾਰਨ ਲੱਤਾਂ ਕੰਮ ਕਰਨਾ ਬੰਦ ਕਰ ਗਈਆਂ। ਜਦੋਂ ਪੀਜੀਆਈ ਤੋਂ ਇਲਾਜ ਚੱਲ ਰਿਹਾ ਸੀ ਤਾਂ ਕਿਸੇ ਨੇ ਜਿਲ੍ਹਾ ਹੁਸ਼ਿਆਰਪੁਰ ਦੇ ਮਾਹਿਲਪੁਰ ਕਸਬੇ ਲਾਗਲੇ ਇੱਕ ਬਾਬੇ ਦੀ ਦੱਸ ਪਾ ਦਿੱਤੀ। ਬਾਬੇ ਨੇ ਘਰ ਦਾ ਦੌਰਾ ਕਰ ਕੇ ਅਜਿਹਾ ਹੋਣ ਦਾ ਕਾਰਨ ਕਿਸੇ ਵੱਲੋਂ ਕੁੱਝ 'ਕੀਤਾ ਕਰਾਇਆ' ਹੋਣ ਦੀ ਗੱਲ ਕਹੀ ਅਤੇ ਲੱਤਾਂ ਠੀਕ ਹੋਣ ਦਾ ਸ਼ਰਤੀਆ ਇਲਾਜ ਕਰਨ ਦਾ ਦਾਅਵਾ ਕੀਤਾ। ਬਾਬੇ ਨੇ ਇਸ ਗੱਲ ਦਾ ਵੀ ਦਾਅਵਾ ਕੀਤਾ ਸੀ ਕਿ ਜੇਕਰ ਲੜਕਾ ਪੂਰੀ ਤਰ੍ਹਾਂ ਠੀਕ ਨਾ ਹੋਇਆ ਤਾਂ ਪੈਸੇ ਦੁੱਗਣੇ ਦਿੱਤੇ ਜਾਣਗੇ। ਬਲਵੰਤ ਸ਼ਿੰਘ ਬਾਬੇ ਦੇ ਝਾਂਸੇ ਵਿੱਚ ਆ ਗਿਆ ਅਤੇ ਸੌਦਾ 45000 ਰੁਪਏ ਵਿੱਚ ਤੈਅ ਹੋਇਆ। 25000 ਹਜ਼ਾਰ ਰੁਪਿਆ ਪਹਿਲਾਂ ਅਤੇ ਬਾਕੀ ਠੀਕ ਹੋਣ ਤੋਂ ਬਾਅਦ ਵਿੱਚ ਦੇਣਾ ਤੈਅ ਹੋਇਆ। ਕੁੱਝ ਸਮਾਂ ਲੰਘ ਜਾਣ ਤੋਂ ਬਾਅਦ ਕੁੱਝ ਅਸਰ ਨਾ ਹੁੰਦਾ ਦੇਖ ਬਲਵੰਤ ਸਿੰਘ ਨੂੰ ਬਾਬਾ ਟਾਲ ਮਟੋਲ ਕਰਨ ਲੱਗਾ। ਉਸ ਨੇ ਪੈਸੇ ਵਾਪਸ ਲੈਣ ਲਈ ਬਾਬੇ ਦੇ 'ਦਰਬਾਰ' ਕਈ ਚੱਕਰ ਵੀ ਲਗਾਏ ਪਰੰਤੂ ਰਣਧੀਰ ਸਿੰਘ ਨੇ ਪੱਲੇ ਬਾਬੇ ਦੇ ਲਾਰੇ ਹੀ ਪਏ। ਤਿੰਨ ਸਾਲਾਂ ਬਾਅਦ ਤਰਕਸ਼ੀਲ ਸੁਸਾਇਟੀ ਪੰਜਾਬ ਦੀ ਇਕਾਈ ਮੋਹਾਲੀ ਦੇ ਮੈਂਬਰ ਗੋਰਾ ਹੁਸ਼ਿਆਰਪੁਰੀ ਨਾਲ ਬਲਵੰਤ ਸਿੰਘ ਦਾ ਸੰਪਰਕ ਹੋਇਆ ਅਤੇ ਉਸ ਨੇ ਆਪਣੀ ਵਿੱਥਿਆ ਦੱਸੀ। ਤਰਕਸ਼ੀਲ ਮੈਂਬਰ ਨੇ ਟੈਲੀਫੋਨ 'ਤੇ ਬਾਬੇ ਨੂੰ ਪੈਸੇ ਵਾਪਸ ਕਰਨ ਜਾਂ ਫਿਰ ਕਾਨੂੰਨੀ ਕਾਰਵਾਈ ਲਈ ਤਿਆਰ ਰਹਿਣ ਲਈ ਕਿਹਾ। ਇਸ ਮਗਰੋਂ ਬਾਬੇ ਨੇ ਪੀੜਤ ਦਾ ਖਾਤਾ ਨੰਬਰ ਲੈ ਕੇ ਹੁਸ਼ਿਆਰਪੁਰ ਤੋਂ ਹੀ ਉਸ ਦੇ ਖਾਤੇ ਵਿੱਚ ਠੱਗੇ ਪੈਸੇ ਵਾਪਸ ਪਵਾ ਦਿੱਤੇ। ਬਲਵੰਤ ਸਿੰਘ ਨੇ ਅੱਜ ਤਰਕਸ਼ੀਲ ਸੁਸਾਇਟੀ ਦੀ ਮਹੀਨਾਵਾਰ ਮੀਟਿੰਗ ਦੌਰਾਨ ਸੁਸਾਇਟੀ ਦਾ ਧੰਨਵਾਦ ਕੀਤਾ। ਇਸ ਮੌਕੇ ਤਰਕਸ਼ੀਲ ਆਗੂਆਂ ਜਰਨੈਲ ਕ੍ਰਾਂਤੀ, ਸੁਰਜੀਤ ਸਿੰਘ, ਜਸਵੰਤ ਮੁਹਾਲੀ ਆਦਿ ਨੇ ਦਾਅਵਾ ਕੀਤਾ ਕਿ ਕਿਸੇ ਬਾਬੇ ਕੋਲ ਗੈਬੀ ਸ਼ਕਤੀਆਂ ਰਾਹੀਂ ਕਿਸੇ ਦਾ ਕੋਈ ਕੰਮ ਸਵਾਰਨ ਦੀ ਕੋਈ ਸ਼ਕਤੀ ਨਹੀਂ ਹੁੰਦੀ ਸਗੋਂ ਬਾਬੇ ਆਮ ਲੋਕਾਂ ਦੀਆਂ ਸਮੱਸਿਆਵਾਂ ਦਾ ਫਾਇਦਾ ਉਠਾ ਕੇ ਉਹਨਾਂ ਦੀ ਲੁੱਟ ਕਰਦੇ ਹਨ। ਉਹਨਾਂ ਬਲਵੰਤ ਸਿੰਘ ਨੂੰ ਗਿਆਨ-ਵਿਗਿਆਨ ਨਾਲ ਸੰਬੰਧਿਤ ਕਿਤਾਬਾਂ ਵੀ ਦਿੱਤੀਆਂ।