ਪੰਜਾਬ ਵਿੱਚ ਵਿਧਾਨ ਸਭਾ ਚੋਣਾਂ ਦੌਰਾਨ ਨਸ਼ੇ ਦੀ ਵਰਤੋਂ ਨੂੰ ਰੋਕਣ ਲਈ ਚੋਣ ਕਮਿਸ਼ਨ ਵੱਲੋਂ ਸਖ਼ਤ ਕਦਮ ਚੁੱਕੇ ਗਏ ਹਨ। ਵੱਖ ਵੱਖ ਹਲਕਿਆਂ ਵਿੱਚ ਨਸ਼ਾ ਰੌਕੂ ਟੀਮਾਂ ਅਤੇ ਫ਼ਲਾਇੰਗ ਦਸਤੇ ਲਗਾ ਕੇ ਚੋਣਾਂ ਦੌਰਾਨ ਨਸ਼ੇ ਦੀ ਵੰਡ ਕਰਨ ਵਾਲੇ ਉਮੀਦਵਾਰਾਂ ਅਤੇ ਉਨ੍ਹਾਂ ਦੇ ਸਹਿਯੋਗੀਆਂ 'ਤੇ ਸਖ਼ਤ ਨਜ਼ਰ ਰੱਖੀ ਜਾ ਰਹੀ ਹੈ। ਹਲਕਾ ਸ਼੍ਰੀ ਚਮਕੌਰ ਸਾਹਿਬ ਵਿੱਚ ਫ਼ਲਾਇੰਗ ਦਸਤੇ ਦੇ ਇੰਚਾਰਜ਼ ਬਾਵਾ ਸਿੰਘ ਐਸ.ਡੀ.ਓ ਦੀ ਅਗਵਾਈ ਵਿੱਚ ਏ.ਐਸ.ਆਈ ਦੀਪਕ ਕੁਮਾਰ ਵੱਲੋ ਫ਼ਲਾਇੰਗ ਪੁਲਿਸ ਪਾਰਟੀ ਸਮੇਤ ਨਜ਼ਦੀਕੀ ਪਿੰਡ ਕਾਈਨੌਰ 'ਚ ਦੋ ਵੱਖ ਵੱਖ ਥਾਵਾਂ 'ਤੇ ਛਾਪੇਮਾਰੀ ਕਰਕੇ ਚੰਡੀਗੜ੍ਹ ਵਿੱਚ ਵਿਕਣ ਵਾਲੀ ਸ਼ਰਾਬ ਦੀਆਂ 27 ਨਜ਼ਾਇਜ਼ ਪੇਟੀਆਂ ਬਰਾਮਦ ਕੀਤੀ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਫ਼ਲਾਇੰਗ ਦਸਤੇ ਦੀ ਟੀਮ ਦੇ ਇੰਚਾਰਜ਼ ਬਾਵਾ ਸਿੰਘ ਐਸ.ਡੀ.ਓ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਗੁਪਤ ਸੂਚਨਾ ਪ੍ਰਾਪਤ ਹੋਈ ਸੀ ਕਿ ਨਜ਼ਦੀਕੀ ਪਿੰਡ ਕਾਈਨੌਰ ਦੇ ਵਿਅਕਤੀਆਂ ਵਲੋਂ ਪੰਜਾਬ ਵਿੱਚ ਪਾਬੰਦੀ ਸ਼ੁਦਾ ਨਜ਼ਾਇਜ਼ ਸ਼ਰਾਬ ਦਾ ਸਟਾਕ ਰੱਖਿਆ ਹੋਇਆ ਹੈ। ਸੂਚਨਾ ਦੇ ਅਧਾਰ 'ਤੇ ਜਦੋਂ ਸ਼ੇਖਰ ਐਕਸਾਈਜ਼ ਇੰਸਪੈਕਟਰ ਸਰਕਲ ਮੋਰਿੰਡਾ ਦੀ ਹਾਜ਼ਰੀ 'ਚ ਪਿੰਡ ਕਾਈਨੌਰ ਦੇ ਵਸਨੀਕ ਜਸਵੰਤ ਸਿੰਘ ਪੁੱਤਰ ਸ਼ੇਰ ਸਿੰਘ ਦੇ ਘਰ ਛਾਪਾ ਮਾਰਿਆ ਤਾਂ ਉਸ ਪਾਸੋਂ 5 ਪੇਟੀਆਂ ਕਿੰਗ ਗੋਲਡ ਅਤੇ 3 ਪੇਟੀਆਂ ਰੋਇਲ ਆਰਮ ਵਿਸਕੀ ਚੰਡੀਗੜ੍ਹ ਸੇਲ ਦੀਆਂ ਬਰਾਮਦ ਹੋਈਆਂ। ਜਦ ਕਿ ਦੇਵਿੰਦਰ ਸਿੰਘ ਪੁੱਤਰ ਚੰਦ ਸਿੰਘ ਵਾਸੀ ਕਾਈਨੌਰ ਪਾਸੋਂ 19 ਪੇਟੀਆਂ ਕਿੰਗ ਗੋਲਡ ਵਿਸਕੀ ਚੰਡੀਗੜ੍ਹ ਸੇਲ ਦੀਆਂ ਬਰਾਮਦ ਹੋਈਆਂ। ਉਨਾਂ ਦੱਸਿਆ ਕਿ ਦੋਵੇਂ ਵਿਅਕਤੀਆਂ ਨੂੰ ਮੌਕੇ 'ਤੇ ਸ਼ਰਾਬ ਸਮੇਤ ਹਿਰਾਸਤ ਵਿੱਚ ਲੈ ਕੇ ਥਾਣਾ ਮੋਰਿੰਡਾ ਵਿੱਖੇ ਲਿਆਂਦਾ। ਜਿੱਥੇ ਉਕਤ ਦੋਵੇਂ ਵਿਅਕਤੀਆਂ ਵਿਰੁਧ ਚੋਣ ਜਾਬਤੇ ਦੀ ਉਲੰਘਣਾ ਕਰਨ ਦਾ ਪਰਚਾ ਦਰਜ਼ ਕਰਕੇ ਮਾਨਯੋਗ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਜਾਂਚ ਪੜਤਾਲ ਕਰਨ ਤੋਂ ਬਾਅਦ ਪਤਾ ਲੱਗੇਗਾ ਕਿ ਕਿਸੇ ਪਾਰਟੀ ਵੱਲੋਂ ਹਲਕੇ ਦੇ ਲੋਕਾਂ ਨੂੰ ਵੰਡਣ ਰੱਖੀ ਗਈ ਹੈ ਹਲਕਾ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਪਿੱਛਲੇ ਵਿਧਾਨ ਸਭਾ ਚੋਣਾ ਦੋਰਾਨ ਵੀ ਵੱਡੀ ਗਿਣਤੀ 'ਚ ਹਲਕਾ ਸ੍ਰੀ ਚਮਕੌਰ ਸਾਹਿਬ ਵਿੱਚੋ ਸਰਾਬ ਬਰਾਮਦ ਹੋਈ ਸੀ ਜਿਸ ਦੀ ਜਾਂਚ ਅੱਜ ਤੱਕ ਨਹੀ ਹੋ ਸਕੀ।