ਸਾਬਕਾ ਸੰਸਦ ਮੈਂਬਰ ਤੇ ਤ੍ਰਿਣਮੂਲ ਕਾਂਗਰਸ ਪੰਜਾਬ ਦੇ ਪ੍ਰਧਾਨ ਜਗਮੀਤ ਸਿੰਘ ਬਰਾੜ ਨੇ ਅੱਜ ਐਲਾਨ ਕੀਤਾ ਹੈ ਕਿ ਟੀ.ਐਮ.ਸੀ ਹੁਣ ਸੂਬਾ ਪੱਧਰ 'ਤੇ ਆਪਣੇ ਦਫਤਰ ਖੋਲ੍ਹਣ ਤੇ ਨਵੇਂ ਚੇਹਰਿਆਂ ਨੂੰ ਸ਼ਾਮਿਲ ਕਰਨ ਦੀ ਪ੍ਰੀਕ੍ਰਿਆ ਨੂੰ ਹੋਰ ਤੇਜ਼ ਕਰੇਗੀ। ਉਨ੍ਹਾਂ ਨੇ ਸ਼ੁੱਕਰਵਾਰ ਨੂੰ 6 ਮੈਂਬਰੀ ਸੰਗਠਨ ਵਿਸਥਾਰ ਕਮੇਟੀ ਦੀ ਨਿਯੁਕਤੀ ਕੀਤੀ ਹੈ, ਤਾਂ ਜੋ ਪੰਜਾਬ 'ਚ ਟੀ.ਐਮ.ਸੀ ਦੀ ਮੈਂਬਰਸ਼ਿਪ ਤੇ ਸੰਗਠਨਾਤਮਕ ਢਾਂਚੇ ਨੂੰ ਵਧਾਇਆ ਜਾ ਸਕੇ। ਉਨ੍ਹਾਂ ਨੇ ਕਿਹਾ ਕਿ ਅਸੀਂ ਪੰਜਾਬ 'ਚ ਸਾਰੇ ਵਚਨਬੱਧ ਸਮਾਜਿਕ ਤੇ ਸਿਆਸੀ ਵਰਕਰਾਂ ਲਈ ਟੀ.ਐਮ.ਸੀ ਨੂੰ ਇਕ ਸਾਂਝਾ ਮੰਚ ਬਣਾਉਣਾ ਹੈ ਅਤੇ ਸਮਾਂ ਆ ਗਿਆ ਹੈ ਕਿ ਅਸੀਂ ਸਾਰੇ ਹਮਖਿਆਲੀ ਲੋਕਾਂ ਤੱਕ ਪਹੁੰਚੀਏ ਅਤੇ ਪੰਜਾਬ ਨੂੰ ਬਚਾਉਣ ਲਈ ਸਮਾਨ ਮਿਸ਼ਨ ਹੇਠ ਉਨ੍ਹਾਂ ਨੂੰ ਇਕੋ ਬੈਨਰ ਹੇਠ ਇਕੱਠੇ ਕਰੀਏ।ਇਸ ਛੇ ਮੈਂਬਰੀ ਟੀਮ 'ਚ ਸਾਬਕਾ ਮੰਤਰੀ ਡਾ. ਹਰਬੰਸ ਲਾਲ, ਸਾਬਕਾ ਆਪ ਯੂਥ ਮੀਤ ਪ੍ਰਧਾਨ ਬਲਜੀਤ ਸਿੰਘ, ਅਮਰਜੀਤ ਸਿੰਘ ਰਾਜੀਆਨਾ, ਸੰਤ ਸਿੰਘ ਘੱਗਾ, ਗੌਤਮਬੀਰ ਸਿੰਘ ਤੇ ਅਮਨਦੀਪ ਸਿੰਘ ਮਾਂਗਟ ਸ਼ਾਮਿਲ ਹਨ। ਇਸ ਲੜੀ ਹੇਠ ਤੇਜ਼ੀ ਨਾਲ ਅੱਗੇ ਵੱਧਣ ਦੀ ਨੀਤੀ ਹੇਠ ਬਰਾੜ ਨੇ ਹਰੇਕ ਕਮੇਟੀ ਮੈਂਬਰ ਨੂੰ ਇਕ ਵਿਸ਼ੇਸ਼ ਗਰੁੱਪ 'ਤੇ ਧਿਆਨ ਦੇਣ ਦੇ ਟੀਚੇ ਤਹਿਤ ਸ਼ਾਮਿਲ ਕੀਤਾ ਹੈ, ਤਾਂ ਜੋ ਪੁਖਤਾ ਕੀਤਾ ਜਾ ਸਕੇ ਕਿ ਟਾਰਗੇਟ ਗਰੁੱਪ ਦੇ ਲੋਕ ਵੱਧ ਤੋਂ ਵੱਧ ਗਿਣਤੀ 'ਚ ਪਾਰਟੀ ਨਾਲ ਜੁੜਨ।ਬਰਾੜ ਨੇ ਕਿਹਾ ਕਿ ਇਸ ਕਮੇਟੀ ਨੂੰ ਇਹ ਅਧਿਕਾਰ ਦਿੱਤਾ ਗਿਆ ਹੈ ਕਿ ਸਾਰੇ ਨਵੇਂ ਮੈਂਬਰਾਂ ਤੋਂ ਇਹ ਪੁਖਤਾ ਕੀਤਾ ਜਾਵੇ ਕਿ ਉਹ ਟੀ.ਐਮ.ਸੀ ਦੇ ਵਿਚਾਰਾਂ ਤੇ ਕੀਮਤਾਂ 'ਤੇ ਵਿਸ਼ਵਾਸ ਕਰਦੇ ਹਨ ਅਤੇ ਸਮਾਜ ਸੇਵਾ 'ਚ ਸਾਫ ਟਰੈਕ ਰਿਕਾਰਡ ਅਤੇ ਅਕਸ ਵਾਲੇ ਲੋਕਾਂ ਨੂੰ ਪਹਿਲ ਦਿੱਤੀ ਜਾਵੇਗੀ। ਉਨ੍ਹਾਂ ਨੇ ਕਿਹਾ ਕਿ ਇਹ ਦੂਜੀਆਂ ਪਾਰਟੀਆਂ ਤੋਂ ਮੈਂਬਰਾਂ ਤੇ ਨਾਮੀ ਚੇਹਰਿਆਂ ਨੂੰ ਜਮ੍ਹਾ ਕਰਨ ਦੀ ਪ੍ਰੀਕ੍ਰਿਆ ਨਹੀਂ ਹੈ, ਸਗੋਂ ਅਸੀਂ ਹਮਖਿਆਲੀ ਲੋਕਾਂ ਦਾ ਇਕ ਮੰਚ ਬਣਾ ਰਹੇ ਹਾਂ, ਜਿਨ੍ਹਾਂ ਦਾ ਬੇਹਤਰ ਪੰਜਾਬ ਲਈ ਇਕ ਸਮਾਨ ਏਜੰਡਾ ਤੇ ਜੋਸ਼ ਹੋਵੇ। ਚੋਣਾਂ ਦਾ ਐਲਾਨ ਕਿਸੇ ਵੀ ਦਿਨ ਹੋ ਸਕਦਾ ਹੈ ਤੇ ਬਰਬਾਦ ਕਰਨ ਵਾਸਤੇ ਸਾਡੇ ਕੋਲ ਵਕਤ ਨਹੀਂ ਹੈ।