ਸਥਾਨਕ ਵੱਡਾ ਚੌਂਕ ਵਿਖੇ ਇੱਕ ਮਹਾਜਨ ਪਰਿਵਾਰ ਵੱਲੋਂ ਆਪਣੀ ਨੂੰਹ ਨੂੰ ਦਾਜ਼ ਲਈ ਕੁੱਟਮਾਰ ਤੇ ਤਿਲ ਤਿਲ ਕਰ ਮਰਨ ਲਈ ਮਜਬੂਰ ਕਰਨ ਵਾਲੇ ਸਹੁਰਾ ਪਰਿਵਾਰ ਖਿਲਾਫ ਭਦੌੜ ਪੁਲਿਸ ਨੇ ਲੜਕੀ ਪਰਿਵਾਰ ਦੀ ਸਕਾਇਤ ਤੇ ਦਾਜ਼ ਦਹੇਜ਼ ਤੇ ਕੁੱਟਮਾਰ ਦਾ ਮਾਮਲਾ ਦਰਜ਼ ਕੀਤਾ ਗਿਆ ਹੈ।ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਐਸ. ਐਚ. ਓ ਭਦੌੜ ਭੁਪਿੰਦਰ ਸਿੰਘ ਨੇ ਦੱਸਿਆ ਕਿ ਸੋਨੂੰ ਰਾਣੀ ਪੁੱਤਰੀ ਰਾਮ ਸਰੂਪ ਵਾਸੀ ਬੱਧਨੀ ਕਲਾਂ ਦਾ ਛੇ ਸਾਲ ਪਹਿਲਾਂ ਭਦੌੜ ਦੇ ਦੀਪਕ ਕੁਮਾਰ ਪੁੱਤਰ ਊਦੇਪਾਲ (ਮਾਡਰਨ ਟੈਂਟ) ਨਾਲ ਹੋਇਆ ਸੀ ਲੜਕੀ ਕੋਲ 4 ਸਾਲ ਤੇ 3 ਸਾਲ ਦੇ ਦੋ ਲੜਕੇ ਹਨ। ਇਹ ਪਰਿਵਾਰ ਲੜਕੀ ਨਾਲ ਦਾਜ਼ ਦਹੇਜ਼ ਲਈ ਕੁੱਟਮਾਰ ਕਰਦਾ ਸੀ ਤੇ 22 ਜੁਲਾਈ ਨੂੰ ਇਹਨਾਂ ਨੇ ਲੜਕੀ ਨਾਲ ਕੁੱਟਮਾਰ ਕਰ ਉਸ ਨੂੰ ਘਰੋਂ ਬਾਹਰ ਕੱਡ ਦਿੱਤਾ ਸੀ ਲੜਕੀ ਪਰਿਵਾਰ ਨੇ ਲੜਕੀ ਨੂੰ ਜਖ਼ਮੀ ਹਾਲਤ ਵਿੱਚ ਬੱਧਨੀਂ ਕਲਾਂ ਦੇਹਸਪਤਾਲ ਵਿਖੇ ਦਾਖ਼ਲ ਕਰਵਾਇਆ। ਜਿਥੇ ਪੁਲਿਸ ਨੇ ਲੜਕੀ ਦੇ ਬਿਆਨਾਂ ਤੇ ਲੜਕੀ ਦੇ ਪਤੀ ਦੀਪਕ ਕੁਮਾਰ, ਸਹੁਰਾ ਊਦੇਪਾਲ ਅਤੇ ਸੱਸ ਸ਼ਰੋਜ਼ ਰਾਣੀ ਖਿਲਾਫ ਮੁੱਕਦਮਾ ਨੰ 50 ਅਧੀਨ ਧਾਰਾ 498 ਏ, 406, 323, 34 ਆਈ. ਪੀ. ਸੀ ਅਧੀਨ ਮਾਮਲਾ ਦਰਜ਼ ਉਕਤ ਵਿਅਕਤੀਆਂ ਦੀ ਭਾਲ ਲਈ ਛਾਪੇਮਾਰੀ ਸ਼ੁਰੂ ਕਰ ਦਿੱਤੀ ਜੋ ਕਿ ਘਰੋਂ ਫਰਾਰ ਹੋ ਚੁੱਕੇ ਸਨ।
ਦੂਸਰੇ ਪਾਸੇ ਬਧਨੀ ਕਲਾਂ ਤੋਂ ਲੜਕੀ ਪਰਿਵਾਰ ਨਾਲ ਆਏ ਵਿਅਕਤੀਆਂ ਬਲਦੇਵ ਸਿੰਘ ਧਾਲੀਵਾਲ ਅਕਾਲੀ ਆਗੂ, ਅਜ਼ਮੇਰ ਸਿੰਘ, ਖਰੈਤੀ ਲਾਲ, ਭੂਸ਼ਨ ਤਾਇਲ, ਮਨੋਜ਼ ਕੁਮਾਰ ਆਦਿ ਵਿਅਕਤੀਆਂ ਨੇ ਦੱਸਿਆ ਕਿ ਲੜਕੀ ਦਾ ਲਾਲਚੀ ਸਹੁਰਾ ਪਰਿਵਾਰ ਲੰਮੇ ਸਮੇ ਤੋਂ ਲੜਕੀ ਨਾਲ ਕੁੱਟਮਾਰ ਕਰਦਾ ਸੀ। ਲੜਕੀ ਨੂੰ ਕਈ ਕਈ ਦਿਨ ਭੁੱਖਾ ਰੱਖਿਆ ਜਾਂਦਾ ਸੀ। ਧੁੱਪੇ ਬੋਰੀਆਂ ਤੇ ਸੌਣ ਲਈ ਮਜਬੂਰ ਕੀਤਾ ਜਾਂਦਾ ਤੇ ਅਨੇਕਾਂ ਤਰਾਂ ਨਾਲ ਤਸੀਹੇ ਦਿੱਤੇ ਜਾਂਦੇ ਤਾਂ ਜੋ ਲੜਕੀ ਦੀ ਮੌਤ ਹੋਣ ਤੇ ਪਰਿਵਾਰ ਤੇ ਕੋਈ ਕਾਰਵਾਈ ਨਾ ਹੋ ਸਕੇ। ਲੜਕੀ ਪਰਿਵਾਰ ਨਾਲ ਵੱਡੀ ਗਿਣਤੀ ਵਿੱਚ ਬਧਨੀ ਵਾਸੀ ਥਾਣਾ ਭਦੌੜ ਪੁੱਜ਼ੇ ਜਦਕਿ ਲੜਕੇ ਪਰਿਵਾਰ ਨਾਲ ਕੋਈ ਵਿਅਕਤੀ ਨਹੀ ਸੀ ਸਗੋ ਮਹੁੱਲਾ ਵਾਸੀ ਵੀ ਲੜਕੀ ਪਰਿਵਾਰ ਵਾਲਿਆਂ ਦੀ ਵੱਧ ਚੜ੍ਹ ਮਦਦ ਕਰ ਰਹੇ ਸਨ। ਪਿੰਡ ਵਾਸੀਆਂ ਨੇ ਲੜਕੀ ਤੇ ਰੌਂਗਟੇ ਖੜ੍ਹੇ ਕਰ ਦੇਣ ਵਾਲੇ ਤਸੀਹਿਆਂ ਬਾਰੇ ਦੱਸਦਿਆਂ ਕਿਹਾ ਕਿ ਲੜਕੀ ਨੂੰ ਆਪਣੇ ਘਰੇ ਬੰਦੀ ਬਣਾ ਰੱਖਿਆ ਜਾਂਦਾ ਸੀ। ਏ. ਸੀ ਦੀ ਹੀਟ ਮਗਰ ਪੱਲੀ ਤੇ ਸੌਣ ਲਈ ਜਗ੍ਹਾ ਦਿੱਤੀ ਜਾਂਦੀ ਸੀ। ਲੜਕੀ ਦੇ ਬੱਚਿਆਂ ਨੂੰ ਵੀ ਦੱਸਿਆ ਗਿਆ ਸੀ ਕਿ ਇਹ ਔਰਤ ਘਰ ਦੀ ਨੌਕਰਾਣੀ ਹੈ ਤੇ ਇਸ ਨੂੰ ਖਾਣ ਲਈ ਸਿਰਫ ਆਟਾ ਦਿੱਤਾ ਜਾਂਦਾ ਸੀ। ਨਵਾਂ ਘਰ ਬਣਾਉਣ ਦੇ ਕੰਮ ਵਿੱਚ ਲੜਕੀ ਤੋਂ ਮਜਦੂਰਾਂ ਵਾਂਗ ਕੰਮ ਲਿਆ ਜਾਂਦਾ ਰਿਹਾ ਆਦਿ ਹੋਰ ਵੀ ਦਿਲ ਦਹਿਲਾ ਦੇਣ ਵਾਲੇ ਤਸੀਹੇ ਦਿੱਤੇ ਜਾਂਦੇ ਸਨ। ਖ਼ਬਰ ਲਿਖੇ ਜਾਣ ਤੱਕ ਉਕਤ ਵਿਅਕਤੀਆਂ ਦੀ ਭਾਲ ਲਈ ਪੁਲਿਸ ਪਾਰਟੀ ਭੇਜ਼ੀ ਜਾ ਰਹੀ ਸੀ।