ਪੰਜਾਬ 'ਚ ਦਲਿਤ ਨੂੰ ਉਪ ਮੁੱਖ ਮੰਤਰੀ ਵਰਗੇ ਵੱਡੇ ਅਹੁਦੇ 'ਤੇ ਬਿਠਾਉਣ ਦੇ ਲਾਰੇ ਲਾ ਰਹੇ ਆਪ ਮੁਖੀ ਅਰਵਿੰਦ ਕੇਜਰੀਵਾਲ ਨੂੰ ਪਹਿਲਾਂ ਇਹ ਦੱਸਣਾ ਚਾਹੀਦਾ ਹੈ ਕਿ ਉਸ ਨੇ ਦਿੱਲੀ ਵਿਚ ਕਿੰਨੇ ਦਲਿਤਾਂ ਨੂੰ ਵਜ਼ੀਰੀਆਂ ਦਿੱਤੀਆਂ ਹਨ? ਅਸਲੀਅਤ ਇਹ ਹੈ ਕਿ ਦਿੱਲੀ ਵਿਚ ਉਸ ਨੇ ਇਕ ਵੀ ਦਲਿਤ ਨੂੰ ਮੰਤਰੀ ਤਕ ਨਹੀਂ ਬਣਾਇਆ।ਇਹ ਸ਼ਬਦ ਉਪ ਮੁਖ ਮੰਤਰੀ ਦੇ ਸਲਾਹਕਾਰ ਅਤੇ ਸ੍ਰੋਮਣੀ ਅਕਾਲੀ ਦਲ ਦੇ ਬੁਲਾਰੇ ਮਨਜਿੰਦਰ ਸਿੰਘ ਸਿਰਸਾ ਨੇ ਇੱਥੇ ਇੱਕ ਪ੍ਰੈਸ ਬਿਆਨ ਜਾਰੀ ਕਰਦਿਆਂ ਕਹੇ। ਉਹ ਸ਼ਨੀਵਾਰ ਨੂੰ ਆਦਮਪੁਰ ਰੈਲੀ ਵਿਖੇ ਅਰਵਿੰਦ ਕੇਜਰੀਵਾਲ ਵੱਲੋਂ ਕਿਸੇ ਦਲਿਤ ਨੂੰ ਉਪ ਮੁੱਖ ਮੰਤਰੀ ਬਣਾਉਣ ਬਾਰੇ ਦਿੱਤੇ ਬਿਆਨ ਉੱਤੇ ਟਿੱਪਣੀ ਕਰ ਰਹੇ ਸਨ। ਸ਼ ਸਿਰਸਾ ਨੇ ਕਿਹਾ ਕਿ ਆਪ ਆਗੂ ਦਾ ਦਲਿਤਾਂ ਲਈ ਪਿਆਰ ਸਿਰਫ ਪੰਜਾਬ ਵਿਚ ਆ ਕੇ ਹੀ ਜਾਗਦਾ ਹੈ। ਦਿੱਲੀ ਵਾਪਸ ਮੁੜਦੇ ਹੀ ਉਹ ਦਲਿਤਾਂ ਨੂੰ ਐਸਵਾਈਐਲ ਨਹਿਰ ਦੇ ਮੁੱਦੇ ਵਾਂਗੂੰ ਭੁੱਲ ਜਾਂਦੇ ਹਨ। ਉਹਨਾਂ ਕਿਹਾ ਕਿ ਦਿੱਲੀ ਵਿਚ ਆਪ ਸਰਕਾਰ ਦੇ ਮੰਤਰੀ ਮੰਡਲ ਵਿਚ ਇੱਕ ਵੀ ਦਲਿਤ ਮੰਤਰੀ ਨਹੀਂ ਹੈ। ਜੇਕਰ ਉਸ ਦੀ ਪਾਰਟੀ ਨੂੰ ਦਲਿਤਾਂ ਨਾਲ ਇੰਨੀ ਹਮਦਰਦੀ ਹੈ ਤਾਂ ਉਸ ਨੇ ਇਹ ਹਮਦਰਦੀ ਦਿੱਲੀ ਵਿਚ ਕਿਉਂ ਨਹੀਂ ਵਿਖਾਈ?
ਸ਼ ਸਿਰਸਾ ਨੇ ਕਿਹਾ ਕਿ ਕੇਜਰੀਵਾਲ ਨੂੰ ਪੰਜਾਬ ਦੇ ਲੋਕਾਂ ਨਾਲ ਨਹੀਂ, ਸਗੋਂ ਉਹਨਾਂ ਨਾਲ ਜੁੜੀਆਂ ਵੋਟਾਂ ਨਾਲ ਮੋਹ ਹੈ। ਇਸ ਲਈ ਉਹ ਪੰਜਾਬ 'ਚ ਵੜਦੇ ਹੀ ਦਲਿਤਾਂ, ਕਿਸਾਨਾਂ, ਵਪਾਰੀਆਂ, ਨੌਜਵਾਨਾਂ ਆਦਿ ਨੂੰ ਭਰਮਾਉਣ ਲੱਗਦਾ ਹੈ। ਸ਼ ਸਿਰਸਾ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦਾ ਮਕਸਦ ਹਰ ਹੀਲੇ ਸੱਤਾ ਉੱਤੇ ਕਬਜ਼ਾ ਕਰਨਾ ਹੈ, ਜਿਸ ਲਈ ਇਸ ਦੇ ਆਗੂ ਵੱਖ ਵੱਖ ਹਥਕੰਡਿਆਂ ਨਾਲ ਲੋਕਾਂ ਨੂੰ ਗੁੰਮਰਾਹ ਕਰਨ 'ਚ ਜੁਟੇ ਹਨ। ਪਰ ਪੰਜਾਬ ਦੇ ਲੋਕ 'ਆਪ' ਦਾ ਅਸਲੀ ਰੰਗ ਵੇਖ ਚੁੱਕੇ ਹਨ।
ਕੇਜਰੀਵਾਲ ਦੁਆਰਾ ਰੈਲੀ ਵਿਚ ਵਰਕਰਾਂ ਨੂੰ ਅਕਾਲੀ ਦਲ ਅਤੇ ਕਾਂਗਰਸ ਦੇ ਪਰਚੇ ਫਾੜਣ ਵਾਸਤੇ ਉਕਸਾਏ ਜਾਣ ਦੀ ਨਿੰਦਾ ਕਰਦਿਆਂ ਸ਼ ਸਿਰਸਾ ਨੇ ਕਿਹਾ ਕਿ ਲੋਕਾਂ ਵਿਚ ਆਪਣਾ ਅਕਸ ਖੁਰਦਾ ਵੇਖ ਕੇ ਆਪ ਆਗੂ ਹੋਛੇ ਹਥਕੰਡਿਆਂ ਉੱਤੇ ਉੱਤਰ ਆਏ ਹਨ ਅਤੇ ਲੋਕਾਂ ਨੂੰ ਹਿੰਸਾ ਕਰਨ ਵਾਸਤੇ ਉਕਸਾ ਰਹੇ ਹਨ। ਉਹਨਾਂ ਕਿਹਾ ਕਿ ਆਪ ਕੋਲ ਜਮਹੂਰੀ ਤਰੀਕੇ ਨਾਲ ਅਕਾਲੀ ਦਲ ਦਾ ਟਾਕਰਾ ਕਰਨ ਦੀ ਤਾਕਤ ਨਹੀਂ ਬਚੀ ਹੈ, ਇਸ ਲਈ ਉਹ ਸਮਾਜ ਵਿਚ ਅਸ਼ਾਂਤੀ ਫੈਲਾ ਕੇ ਕੁਰਸੀ ਉੱਤੇ ਕਬਜ਼ਾ ਕਰਨਾ ਚਾਹੁੰਦੀ ਹੈ। ਪਰ ਅਕਾਲੀ-ਭਾਜਪ ਗਠਜੋੜ ਆਪ ਆਗੂਆਂ ਦੇ ਸਮਾਜ-ਵਿਰੋਧੀ ਮਨਸੂਬਿਆਂ ਨੂੰ ਕਾਮਯਾਬ ਨਹੀਂ ਹੋਣ ਦੇਵੇਗਾ ਅਤੇ ਜਮਹੂਰੀ ਤਰੀਕੇ ਨਾਲ ਲਗਾਤਾਰ ਤੀਜੀ ਵਾਰ ਸਰਕਾਰ ਬਣਾਉਣ ਦਾ ਇਤਿਹਾਸ ਰਚੇਗਾ।