ਪੰਜਾਬ ਦੇ ਬੁਨਿਆਦੀ ਢਾਂਚੇ 'ਚ ਹੋਏ ਵਿਕਾਸ ਸਦਕਾ ਹੀ ਅੰਮ੍ਰਿਤਸਰ ਨੂੰ ਅਫਗਾਨਿਸਤਾਨ ਉੱਤੇ ਹਾਰਟ ਆਫ਼ ਏਸ਼ੀਆ ਕਾਨਫ਼ਰੰਸ ਵਰਗੇ ਵੱਕਾਰੀ ਸਮਾਗਮ ਦੀ ਮੇਜ਼ਬਾਨੀ ਕਰਨ ਦਾ ਮੌਕਾ ਮਿਲਿਆ ਹੈ। ਗੁਰੂ ਕੀ ਨਗਰੀ ਵਿਚ ਹੋਈ ਇਸ ਦੋ ਰੋਜ਼ਾ ਕਾਨਫਰੰਸ ਵਿਚ ਚੀਨ ਅਤੇ ਰੂਸ ਸਮੇਤ 14 ਦੇਸ਼ਾਂ ਦੀ ਵੱਡੀਆਂ ਹਸਤੀਆਂ ਨੇ ਭਾਗ ਲਿਆ ਹੈ। ਇਹ ਪਹਿਲੀ ਵਾਰ ਹੈ ਕਿ ਅੰਮ੍ਰਿਤਸਰ ਨੇ ਵੱਡੇ ਪੱਧਰ ਦੀ ਇੱਕ ਅੰਤਰਰਾਸ਼ਟਰੀ ਅਤੇ ਵੱਕਾਰੀ ਕਾਨਫਰੰਸ ਦੀ ਮੇਜ਼ਬਾਨੀ ਕੀਤੀ ਹੈ।ਇਸ ਨਾਲ ਇਹ ਪਵਿੱਤਰ ਸ਼ਹਿਰ ਅੰਤਰਰਾਸ਼ਟਰੀ ਨਕਸ਼ੇ 'ਤੇ ਚਮਕ ਗਿਆ ਹੈ।ਇਹ ਸ਼ਬਦ ਸ੍ਰੋਮਣੀ ਅਕਾਲੀ ਦਲ ਦੇ ਬੁਲਾਰੇ ਮਨਜਿੰਦਰ ਸਿੰਘ ਸਿਰਸਾ ਨੇ ਇੱਥੇ ਇਕ ਬਿਆਨ ਜਾਰੀ ਕਰਦਿਆਂ ਕਹੇ। ਉਹਨਾਂ ਅੱਗੇ ਕਿਹਾ ਕਿ ਇਸ ਕਾਨਫਰੰਸ ਨਾਲ ਉਪ ਮੁੱਖ ਮੰਤਰੀ ਸ਼ ਸੁਖਬੀਰ ਸਿੰਘ ਬਾਦਲ ਦਾ ਸੁਫਨਾ ਪੂਰਾ ਹੋਇਆ ਹੈ, ਜਿਹਨਾਂ ਨੇ ਪੰਜਾਬ ਦੇ ਸਮੁੱਚੇ ਵਿਕਾਸ ਲਈ ਦਿਨ ਰਾਤ ਇੱਕ ਕਰ ਦਿੱਤਾ ਹੈ। ਅੰਮ੍ਰਿਤਸਰ ਪ੍ਰਤੀ ਉਹਨਾਂ ਦੀ ਵਿਸ਼ੇਸ਼ ਖਿੱਚ ਰਹੀ ਹੈ, ਕਿਉੱਕਿ ਇਸ ਸ਼ਹਿਰ ਵਾਸਤੇ ਦੁਨੀਆਂ ਭਰ ਵਿਚ ਵਸਦੇ ਸਿੱਖਾਂ ਦੇ ਅੰਦਰ ਅਥਾਹ ਸ਼ਰਧਾ ਹੈ।
ਕੁੱਝ ਹੀ ਸਾਲ ਪਹਿਲਾਂ ਤਕ ਇਸ ਵਿਰਾਸਤੀ ਸ਼ਹਿਰ ਵਿਚ ਦੂਰ ਦੁਰਾਡੇ ਤੋ ਆਉਣ ਵਾਲੇ ਸਿੱਖਾਂ ਅਤੇ ਸੈਲਾਨੀਆਂ ਨੂੰ ਠਹਿਰਣ ਲਈ ਸਰਾਵਾਂ ਅਤੇ ਧਰਮਸ਼ਾਲਾਵਾਂ ਵਿਚ ਹੀ ਰੁਕਣਾ ਪੈਂਦਾ ਸੀ। ਪਰੰਤੂ ਸ਼ ਸੁਖਬੀਰ ਸਿੰਘ ਬਾਦਲ ਜੀ ਦੀ ਦੂਰ-ਦ੍ਰਿਸ਼ਟੀ ਸਦਕਾ ਹੁਣ ਇਹ ਸ਼ਹਿਰ ਇੰਨਾ ਵਿਕਾਸ ਕਰ ਗਿਆ ਹੈ ਕਿ ਬਹੁਤ ਸਾਰੇ ਪੰਜ-ਤਾਰਾ ਅਤੇ ਚਾਰ-ਤਾਰਾ ਹੋਟਲ ਇਸ ਸ਼ਹਿਰ ਦਾ ਸਿੰæਗਾਰ ਬਣ ਚੁੱਕੇ ਹਨ। ਇਹਨਾਂ ਹੋਟਲਾਂ ਵਿਚ ਵੱਡੇ ਕਨਵੈਨਸ਼ਨ ਹਾਲ ਬਣੇ ਹੋਏ ਹਨ, ਜਿੱਥੇ ਅੰਤਰਰਾਸ਼ਟਰੀ ਕਾਨਫਰੰਸਾਂ ਕਰਵਾਈਆਂ ਜਾ ਸਕਦੀਆਂ ਹਨ। ਇਸ ਤੋਂ ਇਲਾਵਾ ਸੜਕੀ ਨੈਟਵਰਕ ਦੇ ਵਿਕਾਸ, ਫਲਾਈਓਵਰਾਂ ਅਤੇ ਬਾਈਪਾਸਾਂ ਨੇ ਸ਼ਹਿਰ ਦੀ ਸੁੰਦਰਤਾ ਨੂੰ ਚਾਰ ਚੰਨ ਲਾ ਦਿੱਤੇ ਹਨ।ਉਹਨਾਂ ਕਿਹਾ ਕਿ ਵਿਰਾਸਤੀ ਮਾਰਗ ਦੇ ਬਣਨ ਨਾਲ ਸ੍ਰੀ ਦਰਬਾਰ ਸਾਹਿਬ ਦਾ ਆਲਾ ਦੁਆਲਾ ਹੋਰ ਵੀ ਸੁੰਦਰ ਹੋ ਗਿਆ ਹੈ।ਇਸ ਦਾ ਸਿਹਰਾ ਸ਼ ਸੁਖਬੀਰ ਸਿੰਘ ਬਾਦਲ ਦੇ ਸਿਰ ਬੱਝਦਾ ਹੈ, ਜਿਹਨਾਂ ਨੇ ਬਹੁਤ ਹੀ ਥੋੜ੍ਹੇ ਸਮੇਂ ਵਿਚ ਸੁੰਦਰੀਕਰਨ ਦੇ ਪ੍ਰਾਜੈਕਟ ਨੂੰ ਪੂਰਾ ਕਰਨ ਲਈ ਅਣਥੱਕ ਮਿਹਨਤ ਕੀਤੀ ਹੈ। ਪ੍ਰਧਾਨ ਮੰਤਰੀ ਸ੍ਰੀ ਨਰਿਦਰ ਮੋਦੀ ਅਤੇ ਅਫਗਾਨਿਸਤਾਨ ਦੇ ਰਾਸ਼ਟਰਪਤੀ ਸ੍ਰੀ ਅਸ਼ਰਫ ਗ਼ਨੀ ਲੰਘੀ ਰਾਤ ਇਸ ਵਿਰਾਸਤੀ ਲਾਂਘੇ ਵਿਚੋਂ ਦੀ ਗੁਜ਼ਰੇ ਅਤੇ ਇਸ ਦੀ ਰੱਜ ਕੇ ਤਾਰੀਫ ਕੀਤੀ। ਰਾਸ਼ਟਰਪਤੀ ਅਸ਼ਰਫ ਗ਼ਨੀ ਨੇ ਇਸ ਨੂੰ 'ਅਦਭੁੱਤ ਕਲਪਨਾ'ਆਖਿਆ ਜਦਕਿ ਸ੍ਰੀ ਮੋਦੀ ਨੇ ਗੁਜਰਾਤੀ ਵਿਚ ਇਸ ਦੀ ਪ੍ਰਸੰਸਾ ਕੀਤੀ।