ਸਥਾਨਕ ਸਰਕਟ ਹਾਊਸ ਵਿਖੇ ਯੂਨੀਵਰਸਿਲ ਹਿਊਮਨ ਰਾਈਟਸ ਦੇ ਸਾਰੇ ਅਹੁਦੇਦਾਰਾਂ ਨੇ ਅੱਜ ਬਸਪਾ ਦੀ ਕੇਂਦਰੀ ਕਾਰਜਕਾਰਨੀ ਕਮੇਟੀ ਦੇ ਮੈਂਬਰ ਅਤੇ ਸਾਬਕਾ ਸੰਸਦ ਮੈਂਬਰ ਅਵਤਾਰ ਸਿੰਘ ਕਰੀਮਪੁਰੀ ਦੀ ਹਾਜਰੀ ਵਿੱਚ ਪਾਰਟੀ ਵਿੱਚ ਸਾਮਿਲ ਹੋਣ ਦਾ ਐਲਾਨ ਕੀਤਾ। ਸ: ਕਰੀਮਪੁਰੀ ਨੇ ਹਿਊਮਨ ਰਾਈਟਸ ਦੇ ਕੌਮੀਂ ਚੇਅਰਮੈਨ ਕੇਹਰ ਸਿੰਘ ਹਿੱਸੋਵਾਲ ਅਤੇ ਪ੍ਰਧਾਨ ਡਾ: ਲਖਵਿੰਦਰ ਸਿੰਘ ਧਾਲੀਵਾਲ ਤੋਂ ਬਿਨ੍ਹਾਂ ਮਹਿਲਾ ਅਹੁਦੇਦਾਰਾਂ ਸਮੇਤ ਵੱਡੀ ਗਿਣਤੀ ਵਿੱਚ ਹਾਜਰ ਹੋਰਨਾਂ ਅਹੁਦੇਦਾਰਾਂ ਨੂੰ ਬਸਪਾ ਵਿੱਚ ਸ਼ਾਮਿਲ ਕਰਦਿਆਂ ਪੂਰਾ ਮਾਣ ਸਨਮਾਨ ਦੇਣ ਦੀ ਗੱਲ ਆਖੀ। ਇਸ ਮੌਕੇ ਸ: ਕਰੀਮਪੁਰੀ ਨੇ ਪ੍ਰਧਾਨ ਮੰਤਰੀ ਮੋਦੀ ਦੁਆਰਾ ਦੇਸ਼ ਦੀ ਜਨਤਾ ਤੋਂ 50 ਦਿਨ ਮੰਗਣ ਤੇ ਕਿਹਾ ਕਿ ਉਨ੍ਹਾਂ ਤੋਂ ਇਸ ਸਮੇਂ ਦੌਰਾਨ ਵੀ ਕੁਝ ਨਹੀ ਹੋਵੇਗਾ। ਸ: ਕਰੀਮਪੁਰੀ ਨੇ ਕਿਹਾ ਕਿ ਇਸ ਤੋਂ ਪਹਿਲਾਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਵਿਦੇਸ਼ਾਂ ਦੀਆਂ ਬੈਂਕਾਂ ਵਿੱਚ ਦੇਸ਼ ਦੇ ਜਮ੍ਹਾਂ ਕਾਲੇ ਧਨ ਨੂੰ ਵਾਪਿਸ ਲਿਆਉਣ ਲਈ ਦੇਸ਼ ਦੀ ਜਨਤਾ ਤੋਂ 100 ਦਿਨ ਮੰਗੇ ਸਨ ਅਤੇ ਬਦਲੇ ਵਿੱਚ ਇਨ੍ਹਾਂ 100 ਦਿਨਾਂ ਦੇ ਅੰਦਰ ਹਰੇਕ ਭਾਰਤੀ ਦੇ ਖਾਤੇ ਵਿੱਚ 15 ਲੱਖ ਦੀ ਰਾਸ਼ੀ ਪਾਉਣ ਦਾ ਭਰੋਸਾ ਦਿੱਤਾ ਸੀ ਜੋ ਸਿਰਫ ਲੋਕ ਸਭਾ ਚੋਣਾਂ ਜਿੱਤਣ ਅਤੇ ਪ੍ਰਧਾਨ ਮੰਤਰੀ ਬਣਨ ਦਾ ਚੋਣਾਵੀ ਸਟੰਟ ਸੀ। ਦੇਸ਼ ਦੀ ਜਨਤਾ ਨੇ ਮੋਦੀ ਨੂੰ ਮੌਕਾ ਦਿੱਤਾ ਪਰ 100 ਦਿਨ ਤਾਂ ਕੀ ਢਾਈ ਸਾਲਾਂ ਵਿੱਚ ਕਿਸੇ ਵੀ ਭਾਰਤੀ ਦੇ ਖਾਤੇ ਵਿੱਚ ਅਜੇ ਤੱਕ ਇੱਕ ਟਕਾ ਵੀ ਨਹੀ ਆਇਆ।
ਸ: ਕਰੀਮਪੁਰੀ ਨੇ ਕਿਹਾ ਮੌਜੂਦਾ ਸਮੇਂ ਉੱਤਰ ਪ੍ਰਦੇਸ਼ ਅਤੇ ਪੰਜਾਬ ਸਮੇਤ 5 ਸੂਬਿਆਂ ਵਿੱਚ ਵਿਧਾਨ ਸਭਾ ਚੋਣਾਂ ਹੋਣ ਜਾ ਰਹੀਆਂ ਹਨ ਅਤੇ ਦੇਸ਼ ਦੀ ਜਨਤਾ ਭਾਜਪਾ ਤੋਂ ਬੁਰ੍ਹੀ ਤਰ੍ਹਾਂ ਨਿਰਾਸ਼ ਹੈ ਜਿਸ ਕਾਰਨ ਲੋਕਾਂ ਦਾ ਧਿਆਨ ਅਸਲ ਮੁੱਦਿਆਂ ਤੋਂ ਹਟਾ ਕੇ ਏਹ ਚੋਣਾਂ ਜਿੱਤਣ ਲਈ ਮੋਦੀ ਸਰਕਾਰ ਨੇ ਬਿਨ੍ਹਾਂ ਕਿਸੇ ਯੋਜਨਾ ਤੋਂ ਮੁੱਦਰਾ ਬਦਲ ਦਿੱਤੀ ਜਿਸ ਕਾਰਨ ਆਮ ਜਨਤਾ ਅਣਐਲਾਨੀ ਵਿੱਤੀ ਐਮਰਜੈਂਸੀ ਦਾ ਸਾਹਮਣਾ ਕਰ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਜਦੋਂ ਪੂਰੇ ਦੇਸ਼ ਵਿੱਚ ਇਸ ਫੈਸਲੇ ਕਾਰਨ ਅਫਰਾ ਤਫਰੀ ਦਾ ਮਾਹੌਲ ਪੈਦਾ ਹੋ ਗਿਆ ਤਾਂ ਮੋਦੀ ਮੱਗਰਮੱਛ ਵਾਲੇ ਹੰਝੂ ਸੁੱਟ ਦੇਸ਼ ਦੀ ਜਨਤਾ ਤੋਂ 5ਰ ਦਿਨਾਂ ਦੀ ਮੰਗ ਕਰ ਰਿਹਾ ਹੈ। ਸ:ਕਰੀਮਪੁਰੀ ਨੇ ਕਿਹਾ ਕਿ ਮੋਦੀ ਦੱਸੇ ਕਿ ਉਸ ਨੇ ਇਸ ਤੋਂ ਪਹਿਲਾਂ ਮੰਗੇ 100 ਦਿਨਾਂ ਦੌਰਾਨ ਕਿੰਨਾਂ ਕਾਲਾ ਧਨ ਭਾਰਤ ਲਿਆ ਕੇ ਦੇਸ਼ ਵਾਸੀਆਂ ਨੂੰ ਦਿੱਤਾ। ਸਤਲੁਜ ਯਮੁਨਾ ਲਿੰਕ ਨਹਿਰ ਦੇ ਛਿੜੇ ਤਾਜਾ ਵਿਵਾਦ ਤੇ ਉਨ੍ਹਾਂ ਕਿਹਾ ਕਿ ਕਾਂਗਰਸ ਇਸ ਨੂੰ ਲਿਆਉਣ ਵਾਲੀ ਹੈ ਅਤੇ ਅਤੇ ਮੁੱਖ ਪ੍ਰਕਾਸ ਸਿੰਘ ਬਾਦਲ ਨੇ ਪੰਜਾਬ ਦੇ ਹਿੱਤ ਛਿੱਕੇ ਟੰਗ ਕੇ ਚੌਧਰੀ ਦੇਵੀ ਲਾਲ ਨਾਲ ਯਾਰੀ ਪੁਗਾਉਂਦਿਆਂ ਜਮੀਨ ਐਕਵਾਇਰ ਕਰਨ ਦਾ ਨੋਟੀਫਿਕੇਸ਼ਨ ਜਾਰੀ ਕੀਤਾ ਸੀ। ਇਸ ਲਈ ਇਸਦੇ ਲਈ ਦੋਵੇਂ ਪਾਰਟੀਆਂ ਬਰਾਬਰ ਦੀਆਂ ਜਿੰਮੇਵਾਰ ਹਨ। ਇਸਤੋਂ ਬਿਨ੍ਹਾਂ ਆਮ ਆਦਮੀਂ ਪਾਰਟੀ ਨੇ ਸੁਪਰੀਮ ਕੋਰਟ ਵਿੱਚ ਨਿਊਟਲ ਹੋਣ ਦੀ ਅਰਜੀ ਦਿੱਤੀ ਹੈ ਜਿਸ ਕਾਰਨ ਉਸ ਨੂੰ ਵੀ ਹੁਣ ਧਰਨੇ ਲਗਾਉਣ ਦਾ ਕੋਈ ਅਧਿਕਾਰ ਨਹੀ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੀ ਜਨਤਾ ਇਸ ਵਾਰ ਬਸਪਾ ਨੂੰ ਸਰਕਾਰ ਬਣਾਉਣ ਦਾ ਮੌਕਾ ਦੇਵੇ ਜੋ ਨਵੇਂ ਸਿਰੇ ਤੋਂ ਲੜਾਈ ਲੜ੍ਹ ਕੇ ਪੰਜਾਬ ਦੀ ਇੱਕ ਬੂੰਦ ਵੀ ਕਿਸੇ ਹੋਰ ਰਾਜ ਨੂੰ ਜਾਣ ਨਹੀ ਦੇਵੇਗੀ। ਇਸ ਮੌਕੇ ਯੁਗਰਾਜ ਸਿੰਘ, ਨਾਹਰ ਸਿੰਘ, ਜੋਗਿੰਦਰ ਸਿੰਘ, ਪਿਆਰਾ ਸਿੰਘ, ਬਲਵੀਰ ਸਿੰਘ ਗੁਰਨਾਮ ਸਿੰਘ, ਬਿੰਦਰਪਾਲ ਕੌਰ, ਜਸਪਾਲ ਕੌਰ, ਚਰਨਜੀਤ ਕੌਰ, ਗੁਰਮੀਤ ਕੌਰ ਤੋਂ ਇਲਾਵਾ ਬਸਪਾ ਆਗੂ ਬਲਵਿੰਦਰ ਬਿੱਟਾ, ਚੌਧਰੀ ਗੁਰਨਾਮ ਸਿੰਘ, ਗੁਰਮੇਲ ਸਿੰਘ ਚੰਦੜ, ਭਰਭੂਰ ਸਿੰਘ ਡੇਹਲੋਂ, ਜੀਤਰਾਮ ਬਸਰਾ, ਨਿਰਮਲ ਸਿੰਘ ਸਾਇਆਂ, ਸ਼ਿਵ ਚੰਦ ਗੋਗੀ, ਬੂਟਾ ਸਿੰਘ ਸੰਗੋਵਾਲ, ਰਾਜਿੰਦਰ ਮੂਲਨਿਵਾਸੀ, ਪ੍ਰਗਣ ਬਿਲਗਾ, ਖਵਾਜਾ ਪ੍ਰਸਾਦ, ਇੰਦਰੇਸ਼ ਕੁਮਾਰ, ਬਲਵੀਰ ਰਾਜਗੜ੍ਹ ਅਤੇ ਹੋਰ ਹਾਜਰ ਸਨ।