ਚੰਡੀਗੜ੍ਹ ਦੇ ਵਿਸ਼ਵ ਪ੍ਰਸਿੱਧ ਯੋਜਨਾਕਾਰ ਲੀ ਕਾਰਬੂਜ਼ੀਏ ਦੇ 129ਵੇਂ ਜਨਮ ਦਿਵਸ ਨੂੰ ਸਮਰਪਿਤ ਚੰਡੀਗੜ੍ਹ ਯੂਨੀਵਰਸਿਟੀ ਘੜੂੰਆਂ ਦਾ ਦੋ ਰੋਜ਼ਾ 'ਲੀ ਕਾਰਬੂ ਫੈਸਟ-2016' ਅੱਜ ਇੱਥੇ ਆਰਕੀਟੈਕਟਾਂ ਨੂੰ ਆਪਣੇ ਡਿਜ਼ਾਈਨ ਮਾਨਵਤਾ ਦੇ ਵਡੇਰੇ ਹਿੱਤਾਂ ਲਈ ਕੁਦਰਤ ਪੱਖੀ ਬਨਾਉਣ ਦਾ ਸੰਦੇਸ਼ ਦਿੰਦਾ ਹੋਇਆ ਸਮਾਪਤ ਹੋ ਗਿਆ। ਯੂਨੀਵਰਸਿਟੀ ਇੰਸਟੀਚਿਊਟ ਆਫ ਆਰਕੀਟੈਕਟ ਵੱਲੋਂ ਆਯੋਜਿਤ ਕੀਤੇ ਗਏ ਇਸ ਫੈਸਟੀਵਲ ਦੇ ਦੂਜੇ ਅਤੇ ਆਖਰੀ ਦਿਨ ਜਿੱਥੇ ਦੇਸ਼ ਦੇ ਉੱਘੇ ਯੋਜਨਾਕਾਰਾਂ ਨੇ ਵਿਦਿਆਰਥੀਆਂ ਨਾਲ ਆਪਣੇ ਤਜ਼ਰਬੇ ਸਾਂਝੇ ਕੀਤੇ ਉੱਥੇ ਹੀ ਇਸ ਮੌਕੇ ਨਵੇਂ ਉੱਭਰਦੇ ਆਰਕੀਟੈਕਟਾਂ ਦੇ ਇੰਟਰ ਹਾਊਸ ਪ੍ਰਤਿਭਾ ਖੋਜ ਮੁਕਾਬਲੇ ਵੀ ਕਰਵਾਏ ਗਏ। ਇਸ ਮੌਕੇ ਮੁੱਖ ਮਹਿਮਾਨ ਦੇ ਤੌਰ ਪੁੱਜੇ ਪੰਜਾਬ ਦੇ ਚੀਫ ਆਰਕੀਟੈਕਟ ਸਪਨਾ ਭਟਨਾਗਰ ਨੇ ਜੇਤੂ ਵਿਦਿਆਰਥੀਆਂ ਨੂੰ ਤਕਸੀਮ ਕਰਨ ਉਪਰੰਤ ਆਪਣੇ ਸੰਬੋਧਨੀ ਭਾਸ਼ਣ ਦੌਰਾਨ ਬੋਲਦਿਆਂ ਆਖਿਆ ਕਿ ਅਸਲੋਂ ਨਿਵੇਕਲੇ ਡਿਜ਼ਾਈਨ ਤਿਆਰ ਕਰਨ 'ਚ ਕੁਦਰਤ ਸਾਡੀ ਵੱਡੀ ਮਾਰਗਦਰਸ਼ਕ ਸਿੱਧ ਹੋ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਇੱਕ ਅਗਾਂਹਵਧੂ ਯੋਜਨਾਕਾਰ ਨੂੰ ਹਮੇਸ਼ਾਂ ਨਵੀਆਂ ਥਾਵਾਂ ਅਤੇ ਇਮਾਰਤਾਂ ਨੂੰ ਵੇਖਦੇ ਰਹਿਣਾ ਚਾਹੀਦਾ ਹੈ ਤਾਂ ਹੀ ਡਿਜ਼ਾਈਨ ਦੇ ਖੇਤਰ 'ਚ ਨਿਵੇਕਲੀਆਂ ਪੈੜਾਂ ਪਾ ਸਕਣਗੇ।
ਇਸ ਮੌਕੇ ਵਿਭਿੰਨ ਵਰਗਾਂ ਦੇ ਮੁਕਾਬਲਿਆਂ ਦੌਰਾਨ ਬਿਹਤਰੀਨ ਕਾਰਗੁਜ਼ਾਰੀ ਵਿਖਾਉਣ ਵਾਲੇ ਵਾਲਟਰ ਗਰੋਪਿਅਸ ਹਾਊਸ ਨੇ ਓਵਰ ਆਲ ਟਰਾਫੀ 'ਤੇ ਕਬਜ਼ਾ ਕੀਤਾ। ਇਸ ਦੌਰਾਨ ਵੱਖ-ਵੱਖ ਸ਼੍ਰੇਣੀਆਂ ਦੇ ਮੁਕਾਬਲਿਆਂ 'ਚੋਂ ਗ੍ਰਾਫਤੀ ਦੇ ਮੁਕਾਬਲੇ 'ਚ ਲੀ ਕਾਰਬੂਜ਼ੀਏ ਹਾਊਸ ਦੇ ਵਿਦਿਆਰਥੀਆਂ ਸਿਮਰਨ ਰੀਨ, ਸੁਰਬੀ ਸਿਨਹਾ ਅਤੇ ਰਵਨੀਤ ਕੌਰ ਨੇ ਪਹਿਲਾ ਜਦਕਿ ਵਾਲਟਰ ਗਰੋਪਿਅਸ ਹਾਊਸ ਨੇ ਦੂਜਾ ਸਥਾਨ ਹਾਸਲ ਕੀਤਾ। ਆਰਕੀਟੈਚਰਲ ਕੁਇਜ਼ 'ਚ ਐੱਫ. ਐੱਲ. ਰਾਈਟ ਹਾਊਸ ਦੇ ਵਿਦਿਆਰਥੀਆਂ ਬਖ਼ਸ਼ੀ ਪਰਾਚੀ ਤੇ ਪਾਰਸ ਲੂਥਰਾ ਨੇ ਪਹਿਲਾ ਸਥਾਨ ਅਤੇ ਵਾਲਟਰ ਗਰੋਪਿਅਸ ਹਾਊਸ ਦੇ ਗੌਰਵ ਗੁਪਤਾ ਤੇ ਐਸ਼ਵਰੀ ਕੌਸ਼ਲ ਨੇ ਦੂਜਾ ਸਥਾਨ ਪ੍ਰਾਪਤ ਕੀਤਾ। ਇਸੇ ਤਰ੍ਹਾਂ ਫਾਇਰ ਆਨ ਕੈਨਵਸ ਪ੍ਰਤੀਯੋਗਤਾ 'ਚ ਕਾਰਤਿਕ ਚੰਦੇਲ ਅਤੇ ਉਰਵੀ ਨੂੰ ਪਹਿਲੀ ਅਤੇ ਰਵਿੰਦਰ ਕੌਰ ਤੇ ਤਨਵੀ ਬਾਂਸਲ ਨੂੰ ਦੂਜੀ ਪੁਜ਼ੀਸ਼ਨ ਹਾਸਲ ਹੋਈ। ਵਾਦ ਵਿਵਾਦ ਦੇ ਮਹੱਤਵਪੂਰਨ ਮੁਕਾਬਲੇ 'ਚ ਸ਼ਰਿਆਂਸ਼ ਨੂੰ ਪਹਿਲਾ ਅਤੇ ਅੰਜਲੀ ਸਿੰਗਲਾ ਨੂੰ ਦੂਜਾ, ਕੈਡ ਮੈਡ ਦੇ ਮੁਕਾਬਲੇ 'ਚ ਭੁਪਿੰਦਰ ਨੂੰ ਪਹਿਲਾ ਅਤੇ ਕਮਲ ਗੋਇਲ ਨੂੰ ਦੂਜਾ ਸਥਾਨ ਪ੍ਰਾਪਤ ਹੋਇਆ। ਇਸ ਤੋਂ ਇਲਾਵਾ ਮੁਰਾਲ ਡਿਜ਼ਾਈਨ ਦੇ ਅਹਿਮ ਮੁਕਾਬਲੇ 'ਚ ਕਾਰਤਿਕ ਤੇ ਅੰਜਲੀ ਨੂੰ ਪਹਿਲਾ ਅਤੇ ਜਦਕਿ ਅਕਾਸ਼ਦੀਪ ਨੂੰ ਦੂਜਾ ਅਤੇ 3 ਡੀ ਇੰਸਟਾਲੇਸ਼ਨ ਦੇ ਵਿਲੱਖਣ ਪ੍ਰਤੀਯੋਗੀ ਮੁਕਾਬਲੇ 'ਚ ਕੋਮਲ ਠਾਕੁਰ ਨੇ ਪਹਿਲਾ ਅਤੇ ਮੋਹਿਤ, ਰਵਨੀਤ ਤੇ ਅਮਰਿੰਦਰ ਨੇ ਦੂਜਾ ਸਥਾਨ ਹਾਸਲ ਕੀਤਾ।
ਚੰਡੀਗੜ੍ਹ ਯੂਨੀਵਰਸਿਟੀ ਘੜੂੰਆਂ ਦੇ ਉਪ-ਕੁਲਪਤੀ ਡਾ. ਆਰ. ਐੱਸ. ਬਾਵਾ ਨੇ 'ਵਰਸਿਟੀ ਦੇ ਆਰਕੀਟੈਕਟ ਇੰਸਟੀਚਿਊਟ ਦੇ ਵਿਦਿਆਰਥੀਆਂ ਨੂੰ ਲੀ ਕਾਰਬੂਜ਼ੀਏ ਦੀ ਦੂਰਅੰਦੇਸ਼ੀ ਸੋਚ ਨੂੰ ਅਪਨਾਉਣ ਅਤੇ ਨਵੇਂ ਡਿਜ਼ਾਈਨ ਤਿਆਰ ਕਰਨ ਸਮੇਂ ਉਨ੍ਹਾਂ ਤੋਂ ਸੇਧ ਲੈਣ ਦੀ ਪ੍ਰੇਰਨਾ ਦਿੰਦੇ ਹੋਏ ਆਖਿਆ ਕਿ 'ਵਰਸਿਟੀ ਦੇ ਵੱਖ-ਵੱਖ ਵਿਭਾਗਾਂ ਦੀ ਯੋਜਨਾਬੰਦੀ ਵੀ ਇਮਾਰਤਸਾਜ਼ੀ ਦੇ ਦੂਰਦਰਸ਼ੀ ਨਜ਼ਰੀਏ 'ਤੇ ਆਧਾਰਿਤ ਹੋਣੀ ਚਾਹੀਦੀ ਹੈ। ਉਨ੍ਹਾਂ ਕਿਹਾ ਕਿ ਸਾਡੀ ਇਹ ਇੱਛਾ ਹੈ ਕਿ ਚੰਡੀਗੜ੍ਹ ਦੀ ਤਰਜ਼ 'ਤੇ ਹੀ ਚੰਡੀਗੜ੍ਹ 'ਵਰਸਿਟੀ ਦਾ ਆਰਕੀਟੈਕਟ ਵਿਭਾਗ ਕੈਂਪਸ ਦੀ ਸਾਂਭ ਸੰਭਾਲ ਦੀ ਜ਼ਿੰਮੇਵਾਰੀ ਆਪਣੇ ਸਿਰ ਲਵੇ। ਉਨ੍ਹਾਂ ਆਰਕੀਟੈਕਟ ਵਿਭਾਗ ਇਮਾਰਤ ਨੂੰ ਸਜਾਉਣ ਲਈ ਵਿਦਿਆਰਥੀਆਂ ਵੱਲੋਂ ਵਿਖਾਈ ਰਚਨਾਤਮਕਤਾ ਦੀ ਸ਼ਲਾਘਾ ਕਰਦੇ ਹੋਏ ਆਖਿਆ ਹੈ ਕਿ 'ਵਰਸਿਟੀ ਦੇ ਸਿੱਖਿਆ ਪਾਠਕ੍ਰਮਾਂ ਦਾ ਮੁੱਖ ਮਕਸਦ ਵਿਦਿਆਰਥੀਆਂ ਨੂੰ ਨਵੀਨਤਮ ਵਿਵਹਾਰਕ ਗਿਆਨ ਨਾਲ ਜੋੜਨਾ ਹੈ ਅਤੇ ਇਸ ਲਈ ਆਰਕੀਟੈਕਟ ਸਿੱਖਿਆ ਦੇ ਪਾਠਕ੍ਰਮ ਦਾ 50 ਫੀਸਦੀ ਹਿੱਸਾ ਵੀ ਪ੍ਰੈਕਟੀਕਲ ਸਿੱਖਿਆ ਨਾਲ ਜੋੜਿਆ ਹੈ ਤਾਂ ਜੋ ਸਾਡੇ ਵਿਦਿਆਰਥੀ ਇੰਡਸਟਰੀ 'ਤੇ ਆਧਾਰਿਤ ਨਵੀਆਂ ਤਕਨੀਕਾਂ ਦਾ ਗਿਆਨ ਹਾਸਲ ਕਰ ਸਕਣ ਅਤੇ ਆਪਣੇ ਡਿਜ਼ਾਈਨ ਤਿਆਰ ਕਰਨ ਸਮੇਂ ਉਨ੍ਹਾਂ ਤਕਨੀਕਾਂ ਦਾ ਲਾਭ ਪ੍ਰਾਪਤ ਕਰ ਸਕਣ।