ਅੰਬੇਡਕਰ ਚੌਂਕ ਦੇ ਨਜਦੀਕ ਪੈਂਦੀ ਦਾਣਾ ਮੰਡੀ ਵਿਖੇ ਸਤਿਗੁਰੂ ਰਵਿਦਾਸ ਧਰਮ ਸਮਾਜ ਵੱਲੋਂ ਦੂਸਰਾ ਮਹਾਨ ਜਿਲਾ ਪੱਧਰੀ ਸੰਤ ਸੰਮੇਲਨ ਕਰਵਾਇਆ ਗਿਆ ਜਿਸ ਵਿੱਚ ਸੰਤ ਰਾਮਾਨੰਦ ਜੀ ਤੋਂ ਇਲਾਵਾ ਕਈ ਹੋਰ ਸੰਤ ਮਹਾਂਪੁਰਸ਼ਾਂ ਨੇ ਪਹੁੰਚ ਕੇ ਸੰਗਤ ਨੂੰ ਆਸ਼ੀਰਵਾਦ ਦਿੱਤਾ। ਇਸ ਮੌਕੇ ਬਸਪਾ ਦੇ ਸੂਬਾ ਪ੍ਰਧਾਨ ਅਵਤਾਰ ਸਿੰਘ ਕਰੀਮਪੁਰੀ ਵੀ ਉਚੇਚੇ ਤੌਰ ਤੇ ਪਹੁੰਚੇ ਜਿਨਾਂ ਸੰਗਤ ਨੂੰ ਸਬੋਧਨ ਕਰਦਿਆਂ ਕਿਹਾ ਸ੍ਰੀ ਗੁਰੂ ਰਵਿਦਾਸ ਮਹਾਰਾਜ ਨੇ ਗੰਗਾਂ ਜਲ ਤੋਂ ਬਣੀ ਹੋਈ ਸ਼ਰਾਬ ਨੂੰ ਵੀ ਨਾ ਪੀਣ ਦੀ ਮਨਾਹੀ ਕੀਤੀ ਹੈ ਇਸ ਲਈ ਜੋ ਸ਼ੀਸ ਸ੍ਰੀ ਗੁਰੂ ਰਵਿਦਾਸ ਜੀ ਅੱਗੇ ਝੁੱਕਦਾ ਹੈ ਉਸ ਸ਼ੀਸ ਨੂੰ ਸ਼ਰਾਬ ਪੀਣ ਤੋਂ ਵੀ ਤੋਬਾ ਕਰਨੀ ਚਾਹੀਦੀ ਹੈ। ਉਨ੍ਹਾਂ ਸ੍ਰੀ ਗੁਰੂ ਰਵਿਦਾਸ ਜੀ ਦੀ ਬਾਣੀ ਦਾ ਵਿਖਿਆਨ ਕਰਦਿਆਂ ਹੋਰ ਸਮਾਜਿਕ ਬੁਰਾਈਆਂ ਨੂੰ ਖਤਮ ਕਰਨ ਲਈ ਉਨ੍ਹਾਂ ਖਿਲਾਫ ਉੱਠ ਕੇ ਖੜੇ ਹੋਣ ਲਈ ਵੀ ਕਿਹਾ। ਇਸ ਤੋਂ ਉਨ੍ਹਾਂ ਕਿਹਾ ਕਿ ਸ੍ਰੀ ਗੁਰੂ ਰਵਿਦਾਸ ਨੇ ਅਪਣੇ ਕ੍ਰਾਂਤੀਕਾਰੀ ਵਿਚਾਰਾਂ ਸਦਕਾ ਮਹਾਨਤਾ ਹਾਸ਼ਿਲ ਕੀਤੀ ਅਤੇ ਉਨ੍ਹਾਂ ਦੀ ਏਸੇ ਕਮਾਈ ਸਦਕਾ ਅਖੌਤੀ ਉੱਚੇ ਵਰਣ ਦੇ ਲੋਕ ਵੀ ਉਨ੍ਹਾਂ ਦੀ ਡੰਡੋਤ ਕਰਨ ਲੱਗੇ। ਉਨ੍ਹਾਂ ਦਲਿਤ ਸਮਾਜ ਨੂੰ ਅਪਣਾ ਰਾਜ ਲਿਆਉਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਅੱਜ ਦੇਸ਼ ਵਿੱਚ ਦਲਿਤ ਵਿਰੋਧੀ ਘਟਨਵਾਂ ਇਨਸਾਨੀਅਤ ਨੂੰ ਸ਼ਰਮਸਾਰ ਕਰ ਰਹੀਆਂ ਹਨ। ਉਨ੍ਹਾਂ ਕਿਹਾ ਕਿ ਮਰੀ ਹੋਈ ਗਾਂ ਦਾ ਚਮੜਾ ਉਤਾਰਨ ਕਾਰਨ ਜਿਉਂਦੇ ਦਲਿਤਾਂ ਨੂੰ ਜੀਪ ਪਿਛੇ ਬੰਨ ਕੇ ਕੁੱਟਿਆ ਜਾਂਦਾ ਹੈ ਅਤੇ ਉਨ੍ਹਾਂ ਦਾ ਚਮੜਾ ਉਤਾਰਿਆ ਜਾ ਰਿਹਾ ਹੈ।
ਉਨ੍ਹਾਂ ਕਿਹਾ ਲੁਧਿਆਣਾ ਵਿੱਚ ਪੀ ਐੱਚ ਡੀ ਦੀ ਵਿਦਿਆਰਥਣ ਨੂੰ ਜਾਤੀ ਕਸਟਾ ਕਾਰਨ ਜਾਨ ਦੇਣੀ ਪਈ, ਬੋਹਾਪੁਰ ਦੋ ਸਕੇ ਭਰਾ ਜਾਤੀਵਾਦ ਦੀ ਭੇਂਟ ਚੜ ਗਏ, ਭੀਮ ਟਾਂਕ ਦੇ ਜਿਉਂਦੇ ਦੇ ਹੱਥ ਪੈਰ ਵੱਢ ਦਿੱਤੇ ਗਏ, ਰੋਹਿਲ ਬੇਮੁਲਾ ਨੂੰ ਕਤਲ ਕੀਤਾ ਗਿਆ ਪੂਰੇ ਦੇਸ਼ ਵਿੱਚ ਰੋਜਾਨਾ ਅਣਗਿਣਤ ਅਜਿਹੀਆਂ ਘਟਨਾਵਾਂ ਵਾਪਰ ਰਹੀਆਂ ਹਨ ਜੋ ਸਾਨੂੰ ਗੁਲਾਮੀ ਦਾ ਅਹਿਸਾਸ ਕਰਵਾ ਰਹੀਆਂ ਹਨ। ਅਪਣੇ ਸਬੋਧਨ ਉਪਰੰਤ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਉਨ੍ਹਾਂ ਕਿਹਾ ਕਿ ਬਸਪਾ 1 ਨਵੰਬਰ 2014 ਤੋਂ ਪੰਜਾਬ ਬਚਾਓ ਦਾ ਨਾਅਰਾ ਲੈ ਕੇ ਤੁਰੀ ਸੀ ਅਤੇ ਬਸਪਾ ਨੂੰ ਦੇਖਦਿਆਂ ਅੱਜ ਹਰ ਪਾਰਟੀ ਪੰਜਾਬ ਬਚਾਓ ਦੀ ਦੁਹਾਈ ਦੇ ਕੇ ਲੋਕਾਂ ਨੂੰ ਗੁੰਮਰਾਹ ਕਰਨ ਤੇ ਲੱਗੀ ਹੋਈ ਹੈ ਜਿਨ•ਾਂ ਦਾ ਮਨੋਰਥ ਪੰਜਾਬ ਬਚਾਓ ਨਹੀ ਬਲਕਿ ਸੱਤਾ ਤੇ ਕਾਬਜ ਹੋਣ ਦਾ ਹੈ। ਉਨ੍ਹਾਂ ਕਿਹਾ ਕਿ ਜਿਸ ਪ੍ਰਕਾਰ ਅਕਾਲੀ ਭਾਜਪਾ ਗਠਜੋੜ ਤੋਂ ਪੰਜਾਬ ਵਾਸੀ ਕਿਸੇ ਭਲੇ ਦੀ ਆਸ ਨਾ ਰੱਖਣ ਉਸੇ ਪ੍ਰਕਾਰ ਆਪ ਤਾਂ ਪੰਜਾਬ ਦਾ ਭਲ ਕਰਨ ਤੋਂ ਕੋਹਾਂ ਦੂਰ ਹੈ। ਉਨ੍ਹਾਂ ਅਵਾਜ ਏ ਪੰਜਾਬ ਨੂੰ ਆਰ ਐਸ ਐਸ ਦੀ ਪੈਦਾਇਤ ਆਖਦਿਆਂ ਕਿਹਾ ਕਿ ਇਸਦੇ ਆਗੂ ਨਾਗਪੁਰ ਤੋਂ ਦਿਸ਼ਾ ਨਿਰਦੇਸ਼ ਲੈ ਕੇ ਆਏ ਹਨ। ਉਨ੍ਹਾਂ ਕਿਹਾ ਕਿ ਅਗਲੀਆਂ ਚੋਣਾਂ ਵਿੱਚ ਜੋ ਸਮੀਕਰਨ ਬਣ ਰਹੇ ਹਨ ਉਨ੍ਹਾਂ ਤੋਂ ਸਾਫ ਹੈ ਕਿ ਬਸਪਾ ਅਪਣੇ ਦਮ ਤੇ ਇੱਕਲਿਆਂ ਹੀ ਸੱਤਾ ਵਿੱਚ ਆਵੇਗੀ। ਇਸ ਮੌਕੇ ਪ੍ਰਬੰਧਕਾਂ ਤੋਂ ਇਲਾਵਾ ਬਲਵਿੰਦਰ ਬਿੱਟਾ, ਜੀਤਰਾਮ ਬਸਰਾ, ਸ਼ਿਵ ਚੰਦ ਗੋਗੀ, ਲਾਭ ਸਿੰਘ ਭਾਮੀਆਂ, ਨਿਰਮਲ ਸਿੰਘ ਸਾਇਆਂ, ਰਵੀ ਜੱਖੂ, ਪ੍ਰਗਣ ਬਿਲਗਾ, ਬੂਟਾ ਸਿੰਘ ਸੰਗੋਵਾਲ, ਰਾਜਿੰਦਰ ਮੂਲਨਿਵਾਸੀ, ਰਾਜਿੰਦਰ ਨਿੱਕਾ ਅਤੇ ਹੋਰ ਹਾਜਰ ਸਨ।