ਰੰਧਾਵਾ ਰੋਡ ਤੇ ਕਈ ਕਲੋਨੀਆਂ ਵਿਚ ਰਾਤ ਤੋਂ ਬੰਦ ਹੋਈ ਬਿਜਲੀ ਦੀ ਸਪਲਾਈ ਕਾਰਨ ਕਲੋਨੀਆਂ ਵਿਚ ਵੱਸਦੇ ਪਰਿਵਾਰਾਂ ਨੂੰ ਸਵੇਰੇ ਪਾਣੀ ਵੀ ਨਸੀਬ ਨਹੀ ਹੋਇਆ। ਰਣਜੀਤ ਸਿੰਘ, ਹਰਮਿੰਦਰ ਸਿੰਘ, ਚਰਨ ਸਿੰਘ, ਪਰਮਜੀਤ ਸਿੰਘ, ਦਵਿੰਦਰ ਸਿੰਘ, ਪ੍ਰਕਾਸ਼ ਚੰਦ, ਚਰਨਜੀਤ ਕੌਰ ਸਮੇਤ ਹੋਰਨਾਂ ਦੱਸਿਆ ਕਿ ਗੁਰੂ ਅੰਗਦ ਦੇਵ ਇਨਕਲੇਵ ਸਮੇਤ ਹੋਰ ਕਲੋਨੀਆਂ ਵਿਚ ਪਿਛਲੇ ਕਾਫੀ ਸਮੇਂ ਤੋਂ ਬਿਜਲੀ ਦੀ ਸਪਲਾਈ ਬਹੁਤ ਘੱਟ ਆ ਰਹੀ ਸੀ ਕਿ ਰਾਤ ਅਚਨਚੇਤ ਬਿਜਲੀ ਦੀ ਸਪਲਾਈ ਬੰਦ ਹੋ ਗਈ। ਰਾਤ ਹੀ ਉਨ੍ਹਾਂ ਵਲੋਂ ਪਾਵਰਕਾਮ ਦੇ ਸਿਕਾਇਤ ਨੰਬਰ 1912 ਤੇ ਫੋਨ ਕੀਤਾ ਅਤੇ ਅੱਗੋ ਜਵਾਬ ਮਿਲਿਆ ਕਿ ਉਨ੍ਹਾਂ ਪਾਸ ਏਰੀਆ ਦਾ ਕੱਟ ਗਲਾਉਣ ਜਾਂ ਪਰਮਿਟ ਜਾਰੀ ਕਰਵਾਉਣ ਸਬੰਧੀ ਕੋਈ ਸਡਿਊਲ ਨਹੀ ਹੈ। ਦੂਸਰੇ ਪਾਸੇ ਪਾਵਰਕਾਮ ਸ਼ਹਿਰੀ ਖਰੜ ਦੇ ਐਸ.ਡੀ.ਓ.ਸਤਪ੍ਰੀਤ ਸਿੰਘ ਬਾਜਵਾ ਨੇ ਦੱਸਿਆ ਕਿ ਇਸ ਏਰੀਆ ਨੂੰ ਜਿਸ ਟਰਾਸਫਾਰਮਰ ਤੋਂ ਸਪਲਾਈ ਦਿੱਤੀ ਜਾਂਦੀ ਹੈ ਉਹ ਇੱਕ ਫੇਸ ਸਪਲਾਈ ਘੱਟ ਦਿੰਦਾ ਸੀ ਜਿਸ ਕਾਰਨ ਰਾਤ ਨਵਾਂ ਟਰਾਂਸਫਾਰਮਰ ਬਦਲਿਆ ਗਿਆ ਸੀ ਪਰ ਉਹ ਵੀ ਨਹੀਂ ਚੱਲਿਆ। ਅੱਜ ਨਵੇ ਸਿਰੇ ਤੋਂ ਟਰਾਂਸਫਾਰਮਰ ਲਿਆ ਕੇ ਰੱਖਿਆ ਗਿਆ ਹੈ ਅਤੇ ਸਪਲਾਈ ਚਾਲੂ ਕਰ ਦਿੱਤੀ ਜਾਵੇਗੀ।