ਕੁਐਸਟ ਗਰੁੱਪ ਆਫ਼ ਇੰਸਟਿਚਿਊਸ਼ਨਜ਼ ਵੱਲੋਂ ਕੈਂਪਸ ਵਿਚ ਦੋ ਦਿਨਾਂ ਇੰਟਰ ਡਿਪਾਰਟਮੈਂਟ ਕ੍ਰਿਕਟ ਟੂਰਨਾਮੈਂਟ ਦਾ ਆਯੋਜਨ ਕੀਤਾ ਗਿਆ। ਇਸ ਦੌਰਾਨ ਐਮ ਬੀ ਏ, ਇਲੈਕਟ੍ਰੋਨਿਕ, ਕੰਪਿਊਟਰ ਸਾਇੰਸ ਅਤੇ ਮਕੈਨੀਕਲ ਵਿਭਾਗ ਦੀਆਂ ਟੀਮਾਂ ਦੌਰਾਨ ਮੈਚ ਕਰਵਾਏ ਗਏ। ਦੋ ਦਿਨਾਂ ਚੱਲੇ ਇਸ ਟੂਰਨਾਮੈਂਟ ਵਿਚ ਰੱਖੇ ਗਏ ਮੈਚਾਂ ਵਿਚ ਖਿਡਾਰੀਆਂ ਦੀ ਬਿਹਤਰੀਨ ਪ੍ਰਤਿਭਾ ਵੇਖਣ ਨੂੰ ਮਿਲੀ। ਇਸ ਦੌਰਾਨ ਹੋਰਨਾਂ ਵਿਦਿਆਰਥੀਆਂ ਨੇ ਆਪਣੇ ਵਿਭਾਗਾਂ ਦੇ ਖਿਡਾਰੀਆਂ ਨੂੰ ਬਾਹਰੋਂ ਹੱਲਾਂ ਸ਼ੇਰੀ ਦਿਤੀ। ਇਸ ਟੂਰਨਾਮੈਂਟ ਦਾ ਉਦਘਾਟਨ ਚੇਅਰਮੈਨ ਡੀ ਐੱਸ ਸੇਖੋਂ ਵੱਲੋਂ ਕੀਤਾ ਗਿਆ। ਜਦ ਕਿ ਇਨਾਮਾਂ ਦੀ ਵੰਡ ਵਾਈਸ ਚੇਅਰਮੈਨ ਐੱਚ ਪੀ ਐੱਸ ਧਾਲੀਵਾਲ ਅਤੇ ਹਰਿੰਦਰ ਕਾਂਡਾ ਵੱਲੋਂ ਕੀਤੀ ਗਈ। ਉਦਘਾਟਨੀ ਸਮਾਰੋਹ ਵਿਚ ਚੇਅਰਮੈਨ ਸੇਖੋਂ ਨੇ ਸਭ ਵਿਦਿਆਰਥੀਆਂ ਨੂੰ ਸਫਲ ਜ਼ਿੰਦਗੀ ਜਿਊਣ ਲਈ ਪੜਾਈ ਦੇ ਨਾਲ ਨਾਲ ਖੇਡਾਂ ਨਾਲ ਵੀ ਜੁੜਨ ਦੀ ਪ੍ਰੇਰਨਾ ਦਿਤੀ।ਚਾਰੇ ਵਿਭਾਗਾਂ ਦੇ ਕਰੜੇ ਮੁਕਾਬਲੇ ਤੋਂ ਬਾਅਦ ਫਾਈਨਲ ਮੈਚ ਐਮ ਬੀ ਏ ਅਤੇ ਕੰਪਿਊਟ ਵਿਭਾਗ ਦੇ ਖਿਡਾਰੀਆਂ ਵਿਚਕਾਰ ਹੋਇਆ।
ਸ਼ੁਰੂਆਤ ਵਿਚ ਬਣੇ ਫਸਵੇਂ ਮੁਕਾਬਲੇ ਨੂੰ ਹੌਲੀ ਹੌਲੀ ਪੂਰੀ ਤਰਾਂ ਇਕ ਤਰਫਾ ਕਰਦੇ ਹੋਏ ਐਮ ਬੀ ਏ ਵਿਭਾਗ ਦੇ ਖਿਡਾਰੀਆਂ ਨੇ ਇਹ ਟੂਰਨਾਮੈਂਟ 8 ਵਿਕਟਾਂ ਨਾਲ ਜਿੱਤ ਲਿਆ। ਇਸ ਦੌਰਾਨ ਮੈਨ ਆਫ਼ ਦੀ ਮੈਚ ਦੀਪ ਮੋਨੀ ਨੂੰ ਪੰਜ ਵਿਕਟਾਂ ਲੈਣ ਲਈ ਐਲਾਨਿਆ ਗਿਆ ਜਦ ਕਿ ਐਮ ਬੀ ਏ ਵਿਭਾਗ ਦੇ ਕੈਪਟਨ ਅਮਨਪ੍ਰੀਤ ਸਿੰਘ ਨੂੰ ਉਸ ਦੇ ਬਿਹਤਰੀਨ ਪ੍ਰਦਰਸ਼ਨ ਲਈ ਮੈਨ ਆਫ਼ ਦੀ ਸੀਰੀਜ਼ ਐਲਾਨਿਆ ਗਿਆ।ਇਸ ਮੌਕੇ ਤੇ ਜੇਤੂ ਖਿਡਾਰੀਆਂ ਨੂੰ ਇਨਾਮ ਤਕਸੀਮ ਕਰਦੇ ਹੋਏ ਵਾਈਸ ਚੇਅਰਮੈਨ ਧਾਲੀਵਾਲ ਨੇ ਆਪਣੇ ਸੰਬੋਧਨ ਵਿਚ ਕਿਹਾ ਕਿ ਬੇਸ਼ੱਕ ਜਿੱਤ ਹਾਰ ਜ਼ਿੰਦਗੀ ਦਾ ਅਹਿਮ ਹਿੱਸਾ ਹਨ । ਪਰ ਇਸ ਦੇ ਨਾਲ ਹੀ ਖੇਡਾਂ ਸਾਨੂੰ ਲਗਾਤਾਰ ਮੁਕਾਬਲਾ ਕਰਦੇ ਹੋਏ ਜਿੱਤ ਵੱਲ ਵਧਣ ਦੀ ਪ੍ਰੇਰਨਾ ਦਿੰਦੀਆਂ ਹਨ। ਅਖੀਰ ਵਿਚ ਵਾਈਸ ਚੇਅਰਮੈਨ ਕਾਂਡਾ ਨੇ ਸਭ ਵਿਦਿਆਰਥੀਆਂ ਦੇ ਉੱਜਲ ਭਵਿਖ ਦੀ ਕਾਮਨਾ ਕੀਤੀ।