ਸ੍ਰੋਮਣੀ ਅਕਾਲੀ ਦਲ ਮੌਜੂਦਾ ਸਮੇਂ ਅਜਿਹੀ ਡੁੱਬਦੀ ਬੇੜੀ ਵਾਂਗ ਹੈ ਜਿਸਦੇ ਦੋਵੇਂ ਮਲਾਹ ਮੁੱਖ ਮੰਤਰੀ ਪ੍ਰਕਾਸ ਸਿੰਘ ਬਾਦਲ ਅਤੇ ਉੱਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਇਸਨੂੰ ਬਚਾਉਣ ਲਈ ਇੱਕ ਤੋਂ ਬਾਅਦ ਦੂਸਰੇ ਝੂਠ ਦਾ ਸਹਾਰਾ ਲੈਂਦੇ ਹੋਏ ਅਪਣੇ ਹੀ ਲੀਡਰਾਂ ਹੱਥੋਂ ਖੁਦ ਨੂੰ 'ਕਿਸ਼ਾਨਾਂ ਦਾ ਮਸੀਹਾ' ਅਤੇ 'ਪਾਣੀਆਂ ਦਾ ਰਾਖਾ' ਐਵਾਰਡ ਲੈ ਰਹੇ ਹਨ ਪਰ ਦੂਜੇ ਪਾਸੇ ਕਰਜਿਆਂ ਦੇ ਬੋਝ ਕਾਰਨ ਕਿਸਾਨਾਂ ਅਤੇ ਵੱਡੀ ਪੱਧਰ ਤੇ ਪਾਣੀ ਵਿੱਚ ਪਾਏ ਜਾ ਰਹੇ ਯੂਰੇਨੀਅਮ ਕਾਰਨ ਆਮ ਲੋਕਾਂ ਦੀਆਂ ਰੋਜ ਹੋ ਰਹੀਆਂ ਮੌਤਾਂ ਕਿਸੇ ਤੋਂ ਛੁਪੀਆਂ ਨਹੀ ਰਹੀਆਂ। ਇਨ੍ਹਾਂ ਸਬਦਾਂ ਦਾ ਪ੍ਰਗਟਾਵਾ ਬਹੁਜਨ ਸਮਾਜ ਪਾਰਟੀ ਦੇ ਸੂਬਾ ਪ੍ਰਧਾਨ ਅਵਤਾਰ ਸਿੰਘ ਕਰੀਮਪੁਰੀ ਸਾਬਕਾ ਰਾਜ ਸਭਾ ਮੈਂਬਰ ਨੇ ਕੀਤਾ ਜੋ ਲੁਧਿਆਣਾ 'ਚ ਸੂਬਾ ਕੇਆਡੀਨੇਟਰ ਡਾ: ਨੱਛਤਰ ਪਾਲ ਦੇ ਭਤੀਜੇ ਦੇ ਵਿਆਹ ਸਮਾਰੋਹ ਵਿੱਚ ਪਹੁੰਚੇ ਹੋਏ ਸਨ। ਉਨ੍ਹਾਂ ਕਿਹਾ ਕਿ ਨਵਾਂ ਸ਼ਹਿਰ ਦੀ ਮਹਾਂਰੈਲੀ ਨੇ ਬਸਪਾ ਨੂੰ ਪੰਜਾਬ ਵਿੱਚ ਮੁੱਖ ਰਾਜਨੀਤਿਕ ਪਾਰਟੀ ਵਜੋਂ ਖੜ੍ਹਾ ਕੀਤਾ ਜਿਸ ਕਾਰਨ ਪੰਜਾਬ ਦੀਆਂ ਬਾਕੀ ਵਿਰੋਧੀ ਪਾਰਟੀਆਂ ਵਿੱਚ ਇਸਦੀ ਘਬਰਾਹਟ ਸਾਫ ਦੇਖਣ ਨੂੰ ਮਿਲ ਰਹੀ ਹੈ। ਉਨ੍ਹਾਂ ਬਾਦਲ ਪਰਿਵਾਰ ਤੇ ਵਰ੍ਹਦਿਆਂ ਕਿਹਾ ਕਿ ਅੱਜ ਹਰ ਰੋਜ ਔਸਤਨ 3 ਕਿਸਾਨ ਖੁਦਕੁਸ਼ੀਆਂ ਕਰ ਰਹੇ ਹਨ ਤੇ ਮੁੱਖ ਮੰਤਰੀ ਅਪਣੇ ਹੀ ਲੀਡਰਾਂ ਨੂੰ ਖੜ੍ਹੇ ਕਰ ਕੇ ਉਨ੍ਹਾਂ ਹੱਥੋਂ 'ਕਿਸਾਨਾਂ ਦਾ ਮਸੀਹਾ' ਐਵਾਰਡ ਲੈ ਰਿਹਾ ਹੈ।
ਦੂਜੇ ਪਾਸੇ ਇੱਕ ਰਿਪੋਰਟ ਮੁਤਾਬਿਕ ਪੰਜਾਬ ਦੇ 117 ਬਲਾਕ ਖੁਸ਼ਕ ਘੋਸਿਤ ਹੋ ਚੁੱਕੇ ਹਨ ਅਤੇ ਪਾਣੀ 'ਚ ਫੈਲੇ ਯੂਰੇਨੀਅਮ ਰਸਾਇਣਕ ਦੇ ਚੱਲਦਿਆਂ ਕੈਂਸਰ ਕਾਰਨ ਰੋਜਾਨਾਂ ਹੀ ਕਈ ਵਿਆਕਤੀ ਮੌਤ ਦੇ ਮੂੰਹ ਵਿੱਚ ਜਾ ਰਹੇ ਹਨ ਜਿਸ ਦਾ ਸੱਭ ਤੋਂ ਜਿਆਦਾ ਅਸਰ ਬਾਦਲਾਂ ਦੇ ਗੜ੍ਹ ਮਾਲਵਾ ਵਿੱਚ ਦੇਖਣ ਨੂੰ ਮਿਲ ਰਿਹਾ ਹੈ। ਸੂਬੇ ਦੀ ਸਤਾ ਤੇ ਪਿਛਲੇ 9 ਸਾਲਾਂ ਤੋਂ ਕਾਬਜ ਅਕਾਲੀ ਭਾਜਪਾ ਗਠਜੋੜ ਦੀ ਸਰਕਾਰ ਵੱਲੋਂ ਇਸਦਾ ਕੋਈ ਵੀ ਹੱਲ ਨਹੀ ਕੱਢਿਆ ਜਾ ਰਿਹਾ ਤੇ ਉੱਪ ਮੁੱਖ ਮੰਤਰੀ ਵੀ ਅਪਣੇ ਖੜ੍ਹੇ ਕੀਤੇ ਚਹਤਿਆਂ ਕੋਲੋਂ 'ਪਾਣੀਆਂ ਦਾ ਰਾਖਾ' ਐਵਾਰਡ ਲੈ ਰਿਹਾ ਹੈ। ਜੇ ਗੱਲ ਕੇਂਦਰੀ ਮੰਤਰੀ ਤੇ ਬਾਦਲ ਪਰਿਵਾਰ ਦੀ ਨੂੰਹ ਦੀ ਕੀਤੀ ਜਾਵੇ ਤਾਂ ਉਸ ਦੇ ਅਪਣੇ ਇਲਾਕੇ ਵਿੱਚ ਕੁੜੀਆਂ ਦੀ ਔਸਤ ਮੁੰਿਡਆਂ ਦੇ ਮੁਕਾਬਲੇ ਘੱਟ ਹੈ ਅਤੇ ਉਹ ਵੀ ਨੰਨੀ ਛਾਂ ਦੇ ਐਵਾਰਡ ਲੈ ਰਹੀ ਹੈ। ਸ: ਕਰੀਮਪੁਰੀ ਨੇ ਕਿਹਾ ਕਿ ਕਿੱਡੀ ਬੇਸ਼ਰਮੀ ਦੀ ਗੱਲ ਹੈ ਕਿ ਪੰਜਾਬ ਜਲ ਰਿਹਾ ਹੈ ਅਤੇ ਬਾਦਲ ਪਰਿਵਾਰ ਬੰਸਰੀ ਵਜਾ ਰਿਹਾ ਹੈ। ਸ: ਕਰੀਮਪੁਰੀ ਨੇ ਕਿਹਾ ਕਿ ਇਸ ਨੂੰ ਦੇਖਦੇ ਹੋਏ ਬਸਪਾ ਨੇ ਬਾਦਲਾਂ ਦਾ ਸਿਆਸੀ ਅੰਤ ਕਰਨ ਦਾ ਫੈਸਲਾ ਕੀਤਾ ਹੈ। ਜਿਸ ਦੀ ਸੁਰੂਆਤ ਬਾਦਲਾਂ ਦੇ ਗੜ੍ਹ 'ਚ ਸੰਵਿਧਾਨ ਨਿਰਮਾਤਾ ਬਾਬਾ ਸਾਹਿਬ ਡਾ: ਭੀਮ ਰਾਓ ਅੰਬੇਡਕਰ ਦੇ ਜਨਮ ਦਿਨ ਤੇ 14 ਅਪ੍ਰੈਲ ਨੂੰ ਸਰਦੂਲਗੜ੍ਹ 'ਚ ਰੱਖੀ ਮਹਾਂਰੈਲੀ ਤੋਂ ਕੀਤੀ ਜਾਵੇਗੀ। ਸ: ਕਰੀਮਪੁਰੀ ਨੇ ਕਿਹਾ ਕਿ ਏਸੇ ਮਹਾਂਰੈਲੀ ਤੋਂ ਬਸਪਾ ਬਾਦਲ ਪਰਿਵਾਰ ਅਤੇ ਅਕਾਲੀ ਭਾਜਪਾ ਗਠਜੋੜ ਸਰਕਾਰ ਨੂੰ ਲਲਕਾਰ ਕੇ ਉਨ੍ਹਾਂ ਤੇ ਸਿਆਸੀ ਅੰਤ ਦੀ ਨੀਂਹ ਰੱਖੇਗੀ। ਇਸ ਮੌਕੇ ਉਨ੍ਹਾਂ ਨਾਲ ਸੂਬਾ ਕੋਆਡੀਨੇਟਰ ਡਾ: ਨਛੱਤਰਪਾਲ, ਸੂਬਾਈ ਆਗੂ ਗੁਰਲਾਲ ਸਿੰਘ ਸੈਲਾ, ਠੇਕੇਦਾਰ ਰਾਜਿੰਦਰ ਸਿੰਘ, ਬਲਵਿੰਦਰ ਬਿੱਟਾ, ਜਿਲ੍ਹਾ ਪ੍ਰਧਾਨ ਜੀਤਰਾਮ ਬਸਰਾ, ਪ੍ਰਗਣ ਬਿਲਗਾ, ਮੁਖਤਿਆਰ ਸਿੰਘ ਪ੍ਰਧਾਨ ਰਾਹੋਂ, ਖਵਾਜਾ ਪ੍ਰਸਾਦ, ਸੁਭਾਸ਼ ਚੰਦਰ, ਰਾਜਿੰਦਰ ਨਿੱਕਾ, ਰਾਜਿੰਦਰ ਮੂਲਨਿਵਾਸੀ, ਸੋਨੂੰ ਅੰਬੇਡਕਰ, ਰਵੀ ਕਾਂਤ ਜੱਖੂ, ਸੁਖਦੇਵ ਭਟੋਏ ਅਤੇ ਜੋਹਨ ਗੰਗੜ ਤੋਂ ਇਲਾਵਾ ਹੋਰ ਹਾਜਰ ਸਨ।