ਡੇਰਾਬੱਸੀ ਵਿਖੇ ਇੱਕ ਬੈਂਕ ਵਿੱਚ ਪੈਸੇ ਜਮਾਂ ਕਰਵਾਉਣ ਆਇਆ ਇੱਕ ਮਜ਼ਦੂਰ ਠੱਗੀ ਦਾ ਸ਼ਿਕਾਰ ਹੋ ਗਿਆ। ਠੱਗਾਂ ਨੇ ਵੱਧ ਪੈਸਿਆਂ ਦਾ ਲਾਲਚ ਦੇ ਕੇ ਉਸ ਕੋਲੋਂ ਇੱਕ ਮੋਬਾਇਲ ਤੇ 17000 ਰੁਪਏ ਲੈ ਕੇ ਫਰਾਰ ਹੋ ਗਏ। ਇਹ ਘਟਨਾ ਅੱਜ ਸਵੇਰੇ ਕਰੀਬ 10.30 ਬੈਂਕ ਆਫ਼ ਇੰਡੀਆ ਵਿੱਚ ਵਾਪਰੀ। ਪੁਲਿਸ ਕੋਲ ਦਰਜ ਕਰਵਾਈ ਸ਼ਿਕਾਇਤ ਵਿੱਚ ਠੱਗੀ ਦਾ ਸ਼ਿਕਾਰ ਹੋਏ ਵਿਅਕਤੀ ਕਲਮੇਸ਼ ਕੁਮਾਰ ਵਾਸੀ ਸੀਤਾਮੜੀ(ਬਿਹਾਰ) ਨੇ ਦੱਸਿਆ ਕਿ ਉਹ ਹੈਬਤਪੁਰ ਵਿਖੇ ਸਮਰਾਟ ਪਲਾਈਵੁੱਡ ਫੈਕਟਰੀ ਵਿੱਚ ਕੰਮ ਕਰਦਾ ਹੈ। ਉਹ ਆਪਣਾ ਚਾਚਾ ਦੇ ਖਾਤੇ ਵਿੱਚ 17 ਹਜ਼ਾਰ ਰੁਪਏ ਜਮਾਂ ਕਰਵਾਉਣ ਲਈ ਬੈਂਕ ਆਫ਼ ਇੰਡੀਆ ਵਿਚ ਗਿਆ। ਬੈਂਕ ਵਿਚ ਜਦੋਂ ਉਹ ਬਾਊਚਰ ਭਰਨ ਲੱਗਿਆ ਤਾਂ ਪੈਨ ਲੈਣ ਲਈ ਉਹ ਬਾਹਰ ਨਿਕਲ ਗਿਆ। ਬੈਂਕ ਵਿੱਚ ਪਹਿਲਾਂ ਹੀ ਦੋ ਨੌਜਵਾਨ ਖੜ੍ਹੇ ਸਨ ਜੋ ਉਸਦੇ ਪਿੱਛੇ ਹੀ ਬਾਹਰ ਆ ਗਏ। ਇਨ੍ਹਾਂ ਅਣਪਛਾਤੇ ਨੌਜਵਾਨਾਂ ਨੇ ਉਸ ਕੋਲੋਂ ਖੁੱਲ੍ਹੇ ਪੈਸੇ ਲੈਣ ਦੀ ਗੱਲ ਕਹੀ। ਕਮਲੇਸ਼ ਨੂੰ ਰੁਮਾਲ ਵਿੱਚ ਲਪੇਟੀ 50 ਹਜ਼ਾਰ ਰੁਪਏ ਦੀ ਥੱਦੀ ਦੱਸਕੇ ਠੱਗਾਂ ਨੇ ਉਸਨੂੰ ਸਭ ਤੋਂ ਉਪਰ ਲੱਗਿਆ ਪੰਜ ਸੌ ਦਾ ਨੋਟ ਦਿਖਾਇਆ। ਕਮਲੇਸ਼ ਨੇ ਤਸੱਲੀ ਪ੍ਰਗਟ ਕਰਦਿਆਂ ਉਨ੍ਹਾਂਨੂੰ 17000 ਰੁਪਏ ਦੇ ਦਿੱਤੇ। ਠੱਗਾਂ ਨੇ ਕਮਲੇਸ਼ ਤੋਂ ਉਸਦਾ ਮੋਬਾਇਲ ਵੀ ਇਹ ਕਹਿ ਕੇ ਲੈ ਲਿਆ ਕਿ ਉਸਦਾ ਰੀਚਾਰਜ ਕਰਵਾ ਕੇ ਵਾਪਸ ਕਰ ਦੇਣਗੇ। ਦੇਖਦੇ ਹੀ ਦੇਖਦੇ ਦੋਨੋਂ ਠੱਗ ਮੌਕੇ ਤੋਂ ਫਰਾਰ ਹੋ ਗਏ। ਕਮਲੇਸ਼ ਨੇ ਗੁਲਾਬਗੜ੍ਹ ਰੋਡ 'ਤੇ ਆ ਕੇ ਇੱਕ ਦੁਕਾਨ 'ਤੇ ਜਦੋਂ ਰੁਮਾਲ ਵਿਚੋਂ ਥੱਦੀ ਖੋਲ੍ਹੀ ਦਾ ਉਸ ਵਿਚੋਂ ਇੱਕ ਨੋਟ ਛ੍ਰੱਡਕੇ ਬਾਕੀ ਬਾਰੇ ਕਾਗਜ਼ ਦੇ ਟੁੱਕੜੇ ਮਿਲੇ।ਇਸ ਘਟਨਾ ਬਾਰੇ ਡੇਰਾਬੱਸੀ ਪੁਲਿਸ ਨੂੰ ਸੂਚਨਾ ਦੇਣ ਤੋਂ ਬਾਅਦ ਪੁਲਿਸ ਨੇ ਮੌਕੇ ਦਾ ਮੁਆਇਨਾ ਕੀਤਾ ਅਤੇ ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਫੁਟੇਜ ਦੀ ਜਾਂਚ ਕੀਤੀ। ਐਸ.ਐਚ.ਓ. ਤਰਲੋਚਨ ਸਿੰਘ ਨੇ ਦੱਸਿਆ ਕਿ ਮਾਮਲਾ ਸ਼ੱਕੀ ਲੱਗ ਰਿਹਾ ਹੈ ਕਿਉਂਕਿ 17000 ਰੁਪਏ ਕਮਲੇਸ਼ ਦੇ ਚਾਚਾ ਦੇ ਸਨ।