ਬਸਪਾ ਦੇ ਸੰਸਥਾਪਕ ਸਾਹਿਬ ਸ੍ਰੀ ਕਾਂਸੀ ਰਾਮ ਦੇ ਜਨਮ ਤੇ ਬਸਪਾ ਵੱਲੋਂ 15 ਮਾਰਚ ਨੂੰ ਨਵਾਂ ਸ਼ਹਿਰ ਦੀ ਦਾਣਾ ਮੰਡੀ ਵਿੱਚ ਮਹਾਂਰੈਲੀ ਰੱਖੀ ਗਈ ਹੈ ਜਿਸ ਨੂੰ ਸਬੋਧਨ ਕਰਨ ਅਤੇ ਪੰਜਾਬ ਵਿੱਚ ਸਾਲ 2017 'ਚ ਹੋਣ ਜਾ ਰਹੀਆਂ ਵਿਧਾਨ ਸਭਾ ਚੋਣਾਂ ਦੇ ਮੱਦੇਨਜਰ ਪਾਰਟੀ ਵਰਕਰਾਂ ਨੂੰ ਦਿਸ਼ਾ ਨਿਰਦੇਸ਼ ਦੇਣ ਲਈ ਪਾਰਟੀ ਦੀ ਕੌਮੀਂ ਪ੍ਰਧਾਨ ਅਤੇ ਉੱਤਰ ਪ੍ਰਦੇਸ਼ ਦੀ ਸਾਬਕਾ ਮੁੱਖ ਮੰਤਰੀ, ਮੈਂਬਰ ਰਾਜ ਸਭਾ ਭੈਣ ਕੁਮਾਰੀ ਮਾਇਆਵਤੀ ਪਹੁੰਚ ਰਹੇ ਹਨ। ਜਿਨ੍ਹਾਂ ਦੀ ਆਮਦ ਨੂੰ ਲੈ ਕੇ ਅਤੇ ਇਸ ਰੈਲੀ ਨੂੰ ਇਤਿਹਾਸਕ ਬਣਾਉਣ ਲਈ ਉੱਤਰੀ ਭਾਰਤ ਦੇ ਇੰਚਾਰਜ ਮੈਂਬਰ ਰਾਜ ਸਭਾ ਸ੍ਰੀ ਨਰਿੰਦਰ ਕਸ਼ਯਪ ਅਤੇ ਸੂਬਾ ਪ੍ਰਧਾਨ ਅਤੇ ਸਾਬਕਾ ਮੈਂਬਰ ਰਾਜ ਸਭਾ ਵੱਲੋਂ ਸੂਬੇ ਭਰ ਵਿੱਚ ਮੀਟਿੰਗਾਂ ਦਾ ਦੌਰ ਸੁਰੂ ਕੀਤਾ ਗਿਆ ਹੈ। ਏਸੇ ਲੜੀ ਦੇ ਤਹਿਤ ਲੁਧਿਆਣਾ ਦੇ ਸਰਕਟ ਹਾਊਸ ਵਿਖੇ ਵੀ ਇੱਕ ਮੀਟਿੰਗ 'ਚ ਪਹੁੰਚੇ ਦੋਵਾਂ ਆਗੂਆਂ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ 15 ਮਾਰਚ ਨੂੰ ਪਾਰਟੀ ਦੇ ਸੰਸਥਾਪਕ ਸਾਹਿਬ ਸ੍ਰੀ ਕਾਂਸੀ ਰਾਮ ਦੇ ਜਨਮ ਦਿਨ ਤੇ ਇਸ ਮਹਾਂਰੈਲੀ ਦਾ ਆਯੋਜਨ ਪੰਜਾਬ 'ਚ ਸੱਤਾ ਸਥਾਪਤੀ ਦਾ ਮੁੱਢ ਬੰਨਣ ਲਈ ਕੀਤਾ ਗਿਆ ਹੈ। ਜਿਸ ਵਿੱਚ ਪਹੁੰਚੇ ਲੱਖਾਂ ਲੋਕ ਇਸ ਗੱਲ ਦੀ ਗਵਾਹੀ ਦੇਣਗੇ ਕਿ ਪੰਜਾਬ ਦੇ ਲੋਕ ਜੋ ਸੂਬੇ 'ਚ ਹਰ ਪਾਰਟੀ ਨੂੰ ਦੇਖ ਚੁੱਕੇ ਹਨ ਹੁਣ ਅਗਲੀਆਂ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਉਹ ਬਸਪਾ ਦੇ ਨਾਲ ਹਨ।
ਕਸ਼ਯਪ ਨੇ ਕਿਹਾ ਕਿ 15 ਮਾਰਚ ਨੂੰ ਨਵਾਂ ਸ਼ਹਿਰ 'ਚ ਹੋਣ ਜਾ ਰਹੀ ਮਹਾਂਰੈਲੀ ਇਤਿਹਾਸਕ ਹੋਵੇਗੀ ਅਤੇ ਅਗਲੀਆਂ ਵਿਧਾਨ ਸਭਾ ਚੋਣਾਂ ਲਈ ਬਸਪਾ ਦੀ ਤਾਕਤ ਦਾ ਜੋਰਦਾਰ ਪ੍ਰਦਰਸ਼ਨ ਕਰਦੀ ਹੋਈ ਏਹ ਉਸਦਾ ਮੁੱਢ ਬੰਨੇਗੀ। ਆਗੂਆਂ ਨੇ ਕਿਹਾ ਕਿ ਲੋਕਾਂ ਵੱਲੋਂ ਮਿਲ ਰਹੇ ਭਰਭੂਰ ਸਮੱਰਥਨ ਦੇ ਚੱਲਦਿਆਂ ਬਸਪਾ 117 ਸੀਟਾਂ ਤੇ ਮਜਬੂਤ ਉਮੀਦਵਾਰ ਖੜ੍ਹੇ ਕਰਨ ਦੀ ਪੂਰੀ ਤਿਆਰੀ ਵਿੱਚ ਹੈ ਅਤੇ ਕਾਂਗਰਸ ਵੱਲੋਂ ਬਣਾਏ ਜਾ ਰਹੇ ਸੰਭਾਵੀ ਮਹਾਂਗਠਜੋੜ ਦਾ ਹਿੱਸਾ ਬਣਨ ਦਾ ਫੈਸਲਾ ਪਾਰਟੀ ਸੁਪਰੀਮੋ ਖੁਦ ਇਸ ਮਹਾਂਰੈਲੀ ਵਿੱਚ ਕਰਨਗੇ। ਸ: ਕਰੀਮਪੁਰੀ ਨੇ ਆਪ ਬਾਰੇ ਕਿਹਾ ਕਿ ਹੁਣ ਉਹ ਆਮ ਆਦਮੀਂ ਦੀ ਪਾਰਟੀ ਨਾ ਹੋ ਕੇ ਦਲ ਬਦਲੂਆਂ ਦੀ ਪਾਰਟੀ ਬਣ ਗਈ ਹੈ ਜਿਸ ਵਿੱਚ ਵੱਖ ਵੱਖ ਪਾਰਟੀਆਂ ਦੇ ਭਗੋੜੇ ਸੱਤਾ ਪ੍ਰਾਪਤੀ ਦੀ ਆਸ ਨਾਲ ਆਏ ਹਨ। ਸ: ਕਰਮੀਪੁਰੀ ਨੇ ਕਿਹਾ ਕਿ ਪਾਣੀ ਦੇ ਬੁੱਲਬਲੇ ਵਰਗੀ ਏਹ ਪਾਰਟੀ ਵਿਧਾਨ ਸਭਾ ਚੋਣਾਂ ਤੋਂ ਬਾਅਦ ਕਿਤੇ ਨਹੀ ਰੜਕੇਗੀ ਅਤੇ ਇਸ ਵਿੱਚ ਸਵਾਰ ਆਗੂ ਨਵੇਂ ਕਿਨਾਰੇ ਲੱਭਣ ਲਈ ਇਸ ਨੂੰ ਛੱਡ ਕੇ ਦੌੜ ਜਾਣਗੇ। ਕਿਹਾ ਕਿ ਪੰਜਾਬ ਵਿੱਚ ਫੈਲੇ ਜੰਗਲਰਾਜ ਕਾਰਨ ਦਲਿਤ ਵਰਗ ਹੀ ਨਹੀ ਬਲਕਿ ਪੰਜਾਬ ਦਾ ਹਰ ਵਰਗ ਅੱਜ ਸੰਤਾਪ ਭੋਗ ਰਿਹਾ ਹੈ ਅਤੇ ਲੋਕ ਇਨਸਾਫ ਅਤੇ ਰੋਜਗਾਰ ਲਈ ਦਰ ਦਰ ਦੀਆਂ ਠੋਕਾਂ ਖਾਣ ਲਈ ਮਜਬੂਰ ਹਨ।
ਉਨ੍ਹਾਂ ਕਿਹਾ ਕਿ ਪੰਜਾਬ ਵਿੱਚ ਪਿਛਲੇ ਸਮੇਂ ਦਲਿਤਾਂ ਤੇ ਅਤਿਆਚਾਰਾਂ ਦੀਆਂ ਜੋ ਅਤਿ ਘਿਨੋਣੀਆਂ ਘਟਨਾਵਾਂ ਵਾਪਰੀਆਂ ਹਨ ਉਸ ਨੇ ਇਨਸਾਨੀਅਤ ਨੂੰ ਤਾਂ ਸ਼ਰਮਸਾਰ ਕਰ ਦਿੱਤਾ ਹੈ ਪਰ ਸੱਤਾ ਤੇ ਕਾਬਜ ਅਕਾਲੀ ਭਾਜਪਾ ਲੋਟੂ ਅਤੇ ਅੱਤਿਆਚਾਰੀ ਗੁੰਡਾ ਗਠਜੋੜ ਤੇ ਕੋਈ ਅਸਰ ਵਿਖਾਈ ਨਹੀ ਦੇ ਰਿਹਾ। ਇਸ ਲੋਟੂ ਗਠਜੋੜ ਦੀਆਂ ਲੋਕ ਮਾਰੂ ਨੀਤੀਆਂ ਕਾਰਨ ਕਿਸਾਨ ਤੇ ਮਜਦੂਰ ਮਰ ਰਿਹਾ ਹੈ, ਪੜੇ ਲਿਖੇ ਨੌਜਵਾਨ ਰੋਜਗਾਰ ਦੀ ਮੰਗ ਨੂੰ ਲੈ ਕੇ ਸੜਕਾਂ ਤੇ ਪੁਲਿਸ ਅਤੇ ਜੱਥੇਦਾਰਾਂ ਦੀਆਂ ਡਾਗਾਂ ਖਾ ਕੇ ਜਲੀਲ ਹੋ ਰਹੇ ਹਨ, ਸਰਕਾਰ ਚਲਾਉਣ ਵਾਲਿਆਂ ਦੇ ਅਪਣੇ ਖਜਾਨੇ ਤਾਂ ਦਿਨ ਪ੍ਰਤੀ ਦਿਨ ਭਰਭੂਰ ਹੋ ਰਹੇ ਹਨ ਪਰ ਸਰਕਾਰੀ ਖਜਾਨਾ ਖਾਲੀ ਹੋਣ ਕਾਰਨ ਮੁਲਾਜਮਾਂ ਨੂੰ ਤਨਖਾਹਾਂ ਨਹੀ ਮਿਲ ਰਹੀਆਂ, ਉਦਯੋਗਪਤੀ ਤੇ ਵਪਾਰੀ ਸੂਬੇ ਨੂੰ ਛੱਡ ਕੇ ਦੌੜ ਰਿਹਾ ਹੈ ਅਤੇ ਵਿਕਾਸ ਦਾ ਨਾਮ ਸਿਰਫ਼ ਅਕਾਲੀ ਭਾਜਪਾ ਆਗੂਆਂ ਦੇ ਬਿਆਨਾਂ ਤੱਕ ਹੀ ਸੀਮਤ ਹੈ।
ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਇਸ ਲੋਟੂ ਟੋਲੇ ਨੂੰ ਪੰਜਾਬ ਦੀ ਸੱਤਾ ਤੋਂ ਚੱਲਦਾ ਕਰਨ ਲਈ ਬਸਪਾ ਦੇ ਹੱਥ ਮਜਬੂਰ ਕਰਨ ਅਤੇ 15 ਮਾਰਚ ਨੂੰ ਹੋਣ ਜਾ ਰਹੀ ਇਸ ਇਤਿਹਾਸਕ ਰੈਲੀ ਵਿੱਚ ਹੁੰਮ ਹੁੰਮਾਂ ਕੇ ਪਹੁੰਚਣ ਤੇ ਭੈਣ ਕੁਮਾਰੀ ਮਾਇਆਵਤੀ ਦੇ ਵਿਚਾਰ ਸੁਣਨ। ਇਸ ਮੌਕੇ ਬਲਵਿੰਦਰ ਬਿੱਟਾ ਜੋਨ ਕੋਆਡੀਨੇਟਰ, ਭਰਭੂਰ ਸਿੰਘ ਡੇਹਲੋਂ, ਲਾਲਜੀ ਪ੍ਰਤਾਪ ਗੌਤਮ, ਜਿਲ੍ਹਾ ਪ੍ਰਧਾਨ ਜੀਤਰਾਮ ਬਸਰਾ, ਪ੍ਰਗਣ ਬਿਲਗਾ, ਡਾ: ਰਾਮਨੈਣ, ਰਾਜਿੰਦਰ ਨਿੱਕਾ, ਰਵੀ ਕਾਂਤ ਜੱਖੂ, ਇੰਦਰੇਸ਼ ਕੁਮਾਰ, ਖਵਾਜਾ ਪ੍ਰਸਾਦ, ਬੂਟਾ ਸਿੰਘ ਸੰਗੋਵਾਲ, ਪ੍ਰੇਮ ਸਿੰਘ ਮਨਸੂਰਾਂ, ਬਲਵੀਰ ਸਿੰਘ ਸਮਰਾਲਾ, ਦਲਵੀਰ ਸਿੰਘ ਮੰਡਆਲਾ, ਲਾਭ ਸਿੰਘ ਭਾਮੀਆਂ ਮੈਂਬਰ ਬਲਾਕ ਸੰਮਤੀ, ਗੁਰਦੀਪ ਸਿੰਘ ਕਾਲੀ, ਬਲਵਿੰਦਰ ਕੋਚ, ਚਮਕੌਰ ਸਿੰਘ, ਚਰਨ ਸਿੰਘ ਈਸੇਵਾਲ, ਬਿਸੰਬਰ ਦਾਸ, ਰਾਮਲੋਕ ਸਿੰਘ, ਨਿਰਮਲ ਸਿੰਘ ਸਾਇਆ, ਅਤੇ ਰਾਮਾਨੰਦ ਤੋਂ ਇਲਾਵਾ ਹੋਰ ਹਾਜਰ ਸਨ।