ਮਦਨ ਮੋਹਲ ਮਿੱਤਲ ਕੈਬਨਿਟ ਮੰਤਰੀ ਉਦਯੋਗ ਅਤੇ ਵਣਜ ਸਦਾ ਹੀ ਸ਼੍ਰੀ ਅਨੰਦਪੁਰ ਸਾਹਿਬ ਹਲਕੇ ਦੇ ਵਸਨੀਕਾਂ ਨੂੰ ਦਰਪੇਸ਼ ਸਮੱਸਿਆਵਾਂ ਨੂੰ ਦੂਰ ਕਰਨ ਲਈ ਯਤਨਸ਼ੀਲ ਰਹਿੰਦੇ ਹਨ। ਭਾਵੇਂ ਉਨ੍ਹਾਂ ਸਮੱਸਿਆਵਾਂ ਦਾ ਹੱਲ ਪੰਜਾਬ ਸਰਕਾਰ ਪਾਸੋਂ ਹੋਣਾ ਹੋਵੇ ਜਾਂ ਫਿਰ ਕੇਂਦਰ ਸਰਕਾਰ ਪਾਸੋਂ । ਇਸ ਦੇ ਤਹਿਤ ਬੀਤੇ ਦਿਨੀ ਵੀ ਸ਼੍ਰੀ ਮਿੱਤਲ ਨੇ ਕੇਂਦਰੀ ਰੇਲ ਮੰਤਰੀ ਸ਼੍ਰੀ ਪੀ.ਸੁਰੇਸ਼ ਪ੍ਰਭੂ ਨਾਲ ਮੁਲਾਕਾਤ ਕੀਤੀ ਅਤੇ ਉਨ੍ਹਾਂ ਨੂੰ ਇਸ ਇਲਾਕੇ ਦੀ ਭੁਗੌਲਿਕ ਸਥਿਤੀ ਤੋਂ ਜਾਣੂ ਕਰਵਾਉਂਦਿਆਂ ਦੱਸਿਆ ਕਿ ਇਹ ਨੰਗਲ ਸ਼ਹਿਰ ਪੰਜਾਬ ਰਾਜ ਦਾ ਸਰਹੱਦੀ ਸਹਿਰ ਹੈ ਜਿਥੇ ਕਿ ਪੰਜਾਬ ਦਾ ਅਖੀਰਲਾ ਰੇਲਵੇ ਸਟੇਸ਼ਨ ਬਣਿਆ ਹੋਇਆ ਹੈ। ਉਨ੍ਹਾਂ ਕੇਂਦਰੀ ਰੇਲ ਮੰਤਰੀ ਨੂੰ ਇਸ ਸਹਿਰ ਵਿਚ ਰੇਲਵੇ ਦੇ ਲੋਡਿੰਗ ਯਾਰਡ ਦੀਆਂ ਸੰਭਾਵਨਾਵਾਂ ਬਾਰੇ ਗੱਲ ਕਰਦਿਆਂ ਉਨ੍ਹਾਂ ਦੇ ਧਿਆਨ ਵਿਚ ਲਿਆਂਦਾ ਕਿ ਭਾਖੜਾ ਡੈਮ ਨੂੰ ਬਣਾਏ ਜਾਣ ਸਮੇ ਇਥੇ ਦੂਜੇ ਰਾਜਾਂ ਤੋਂ ਸਮਾਨ ਦੀ ਢੋਅ-ਢੁਆਈ ਕਰਵਾਈ ਜਾਂਦੀ ਸੀ ਅਤੇ ਜੇਕਰ ਨੰਗਲ ਵਿਚ ਰੇਲਵੇ ਦੇ ਲੋਡਿੰਗ ਯਾਰਡ ਦੀ ਵਿਵਸਥਾ ਹੋ ਜਾਵੇ ਤਾਂ ਜਿਥੇ ਇਸ ਇਲਾਕੇ ਦੇ ਲੋਕਾਂ ਵਿਚ ਰੋਜ਼ਗਾਰ ਦੇ ਸਾਧਨ ਵਧਣਗੇ ਉਥੇ ਇਥੇ ਰਹਿ ਰਹੇ ਲੋਕਾਂ ਦੀ ਆਰਥਿਕ ਹਾਲਤ ਵਿਚ ਵੀ ਸੁਧਾਰ ਆਵੇਗਾ ਅਤੇ ਇਸ ਸਦੇ ਨਾਲ ਲਗਦੇ ਗੁਆਂਢੀ ਰਾਜ ਹਿਮਾਚਲ ਪ੍ਰਦੇਸ਼ ਦੀਆਂ ਉਦਯੋਗ ਈਕਾਈਆਂ ਨੂੰ ਕੱਚੇ ਮਾਲ ਦੀ ਢੋਅ-ਢੋਆਈ ਸਸਤੇ ਰੇਟਾਂ 'ਤੇ ਸੰਭਾਵ ਹੋ ਸਕੇਗੀ।
ਸ਼੍ਰੀ ਮਿੱਤਲ ਨੇ ਕੇਂਦਰੀ ਰੇਲ ਮੰਤਰੀ ਦੇ ਇਹ ਵੀ ਧਿਆਨ ਵਿਚ ਲਿਆਂਦਾ ਕਿ ਪਿਛਲੇ ਕਈ ਸਾਲਾਂ ਤੋਂ ਖਰੋਟੇ ਦਾ ਫਾਟਕ ਬੰਦ ਪਿਆ ਹੈ। ਉਨਾਂ ਇਹ ਵੀ ਮੰਗ ਕੀਤੀ ਕਿ ਇਸ ਫਾਟਕ ਨੂ ਜਲਦੀ ਖੁਲਵਾਇਆ ਜਾਵੇ ਅਤੇ ਇਸ ਤੇ ਓਵਰਬ੍ਰਿਜ ਬਣਾਇਆ ਜਾਵੇ। ਸ਼੍ਰੀ ਮਿੱਤਲ ਨੇ ਦਸਿਆ ਕਿ ਕੇਂਦਰੀ ਰੇਲ ਮੰਤਰੀ ਨੇ ਭਰੋਸਾ ਦਿਵਾਇਆ ਹੈ ਕਿ ਆਉਣ ਵਾਲੇ ਸਮੇ ਵਿਚ ਸ਼੍ਰੀ ਅਨੰਦਪੁਰਸਾਹਿਬ ਵਿਧਾਨ ਸਭਾ ਖੇਤਰ ਲਈ ਕਈ ਅਹਿਮ ਯੋਜਨਾਵਾਂ ਦਾ ਐਲਾਨ ਕੀਤਾ ਜਾਵੇਗਾ ਉਹ ਭਾਵੇ ਰੇਲਵੇ ਲੋਡਿੰਗ ਯਾਰਡ ਸਬੰਧੀ ਹੋਵੇ ਜਾਂ ਫਿਰ ਖਰੋਟੇ ਦੇ ਫਾਟਕ ਸਬੰਧੀ। ਉਨ੍ਹਾਂ ਇਹ ਦਸਿਆ ਕਿ ਰੇਲ ਮੰਤਰਾਲਾ ਕਈ ਅਹਿਮ ਪ੍ਰੋਜੈਕਟਾਂ ਨੂੰ ਗੁਰੂ ਦੀ ਇਸ ਨਗਰੀ ਸ਼੍ਰੀ ਅਨੰਦਪੁਰਸਾਹਿਬ ਲਈ ਸਹਿਮਤੀ ਦਿਖਾ ਚੁਕਿਆ ਹੈ। ਇਸ ਤੋਂ ਇਲਾਵਾ ਨੰਗਲ ਡੈਮ ਦੇ ਨਜ਼ਦੀਕ ਬਣਨ ਵਾਲੇ ਦੋ ਫਲਾਈਓਵਰਾਂ ਦੀ ਉਸਾਰੀ ਬਾਰੇ ਕੇਂਦਰੀ ਰੇਲਵੇ ਮੰਤਰੀ ਨੇ ਭਰੋਸਾ ਦਿਤਾ ਹੈ ਕਿ ਇਸ ਪ੍ਰੋਜੈਕਟ ਸਬੰਧੀ ਉਨਾ ਦਾ ਮੰਤਰਾਲਾ ਜਲਦੀ ਪ੍ਰਵਾਨਗੀਆਂ ਦੇ ਦੇਵਾਗਾ। ਕੈਬਨਿਟ ਮੰਤਰੀ ਨੇ ਇਹ ਵੀ ਦਸਿਆ ਕਿ ਆਉਣ ਵਾਲੇ ਦਿਨਾਂ ਵਿਚ ਇਸ ਇਲਾਕੇ ਦੇ ਸਰਵਪੱਖੀ ਵਿਕਾਸ ਲਈ ਕਈ ਨਵੀਆਂ ਵਿਕਾਸ ਯੋਜਨਾਵਾਂ ਦਾ ਐਲਾਨ ਕੀਤਾ ਜਾਵੇਗਾ।