ਅਮਰੀਕਾ ਨੂੰ ਗੈਰ ਕਨੂੰਨੀ ਤੌਰ ਤੇ ਜਾ ਰਹੇ ਕੁਝ ਨੌਜਵਾਨਾਂ ਦੇ ਪਨਾਮਾ ਸਮੁੰਦਰ ਵਿਚ ਡੁਬ ਜਾਣ ਦੀਆਂ ਖਬਰਾਂ ਉਪਰ ਆਪਣੇ ਦੁਖ ਦਾ ਪਰਗਟਾਵਾ ਕਰਦਿਆਂ ਨਾਰਥ ਅਮਰੀਕਨ ਪੰਜਾਬੀ ਐਸੋਸ਼ੀਏਸ਼ਨ (ਨਾਪਾ) ਦੇ ਕਾਰਜਕਾਰੀ ਡਾਇਰੈਕਟਰ ਸਤਨਾਮ ਸਿੰਘ ਚਾਹਲ ਨੇ ਕਿਹਾ ਕਿ ਇਸ ਦੁਖਦਾਈ ਘਟਨਾ ਤੋਂ ਬਾਅਦ ਸਰਕਾਰ ਵਲੋਂ ਘਟਨਾ ਸਥਲ ਤੇ ਭੇਜੀ ਜਾਣ ਵਾਲੀ ਵਿਸ਼ੇਸ਼ ਟੀਮ ਦਾ ਮਤਲਬ ਈਦ ਪਿਛੋਂ ਤੰਬਾ ਫੂਕਣ ਦੇ ਬਰਾਬਰ ਹੈ।ਸ: ਚਾਹਲ ਨੇ ਕਿਹਾ ਕਿ ਪੰਜਾਬ ਅੰਦਰ ਗੈਰ ਕਨੂੰਨੀ ਮਨੁਖੀ ਤਸਕਰੀ ਨੂੰ ਰੋਕਣ ਲਈ ਬਹੁਤ ਸਾਰੇ ਕਨੂੰਨ ਤਾਂ ਬਣੇ ਹੋਏ ਹਨ ਪਰ ਇਹਨਾਂ ਕਨੂੰਨਾਂ ਨੂੰ ਅਸਰਦਾਰ ਤਰੀਕੇ ਨਾਲ ਲਾਗੂ ਨਹੀਂ ਕੀਤਾ ਜਾ ਰਿਹਾ ਜਿਸ ਕਾਰਣ ਅਜ ਇਹ ਨੌਜਵਾਨ ਮੌਤ ਦੇ ਮੂੰਹ ਵਿਚ ਚਲੇ ਗਏ ਹਨ।ਸ: ਚਾਹਲ ਨੇ ਦਸਿਆ ਕਿ ਉਹ ਪਿਛਲੇ ਪੰਜ ਸਾਲਾਂ ਤੋਂ ਪੰਜਾਬ ਸਰਕਾਰ ਤੇ ਕੇਂਦਰ ਸਰਕਾਰ ਦੇ ਮੰਤਰੀਆਂ ਦੇ ਧਿਆਨ ਵਿਚ ਜਿਥੇ ਇਹ ਮਸਲਾ ਧਿਆਨ ਵਿਚ ਲਿਆਉਂਦੇ ਆ ਰਹੇ ਹਨ ਉਥੇ ਇਸ ਸਮੱਸਿਆ ਦੇ ਹਲ ਲਈ ਕੇਰਲਾ ਤੇ ਮਹਾਂਰਾਸ਼ਟਰ ਵਾਂਗ ਉਵਰਸੀਜ ਮੈਨਪਾਵਰ ਐਕਸਪੋਰਟ ਕਾਰਪੋਰੇਸ਼ਨ ਬਣਾਉਣ ਤੇ ਵੀ ਜੋਰ ਦਿੰਦੇ ਆ ਰਹੇ ਹਨ।ਸ: ਚਾਹਲ ਨੇ ਦਸਿਆ ਕਿ ੨੦੧੪ ਦੇ ਜਨਵਰੀ ਮਹੀਨੇ ਦੌਰਾਨ ਜਦ ਉਹ ਕੇਂਦਰ ਦੇ ਪਰਵਾਸੀ ਮਾਮਲਿਆਂ ਬਾਰੇ ਮੰਤਰੀ ਤੇ ਹੋਰ ਉਚ ਅਧਿਕਾਰੀਆਂ ਨਾਲ ਇਸ ਮਸਲੇ ਬਾਰੇ ਹੋਈ ਮੀਟਿੰਗ ਦੌਰਾਨ ਇਹ ਮਸਲਾ ਜੋਰ ਨਾਲ ਉਠਾਇਆ ਸੀ।ਇਸ ਮੀਟਿੰਗ ਤੋਂ ਬਾਅਦ ਕੇਂਦਰ ਸਰਕਾਰ ਨੇ ਆਪਣੀ ਐਕਸ਼ਨ ਟੇਕਿੰਗ ਰਿਪੋਰਟ ਦੇ ਸੀਰੀਅਲ ਨੰਬਰ ੧੬ ( ਕਿਰਪਾ ਨਾਲ ਨੱਥੀ ਰਿਪੋਰਟ ਵੇਖੋ)ਤੇ ਦਰਜ ਤਾਂ ਕਰ ਲਿਆ ਸੀ ਪਰ ਅਜੇ ਤਕ ਇਹ ਰਿਪੋਰਟ ਕਾਗਜਾਂ ਦਾ ਹਿੱਸਾ ਹੀ ਬਣੀ ਹੋਈ ਹੋਈ ਹੈ।ਸ: ਚਾਹਲ ਨੇ ਇਸ ਗਲ ਦਾ ਵੀ ਦੁਖ ਪਰਗਟ ਕੀਤਾ ਕਿ ਜਦ ਉਹ ਅਮਰੀਕਾ ਦੀ ਟੈਕਸਾਸ ਸਟੇਟ ਦੀ ਐਲਪਾਸੋ ਜੇਲ ਵਿਚ ਨਜਰਬੰਦ ਪੰਜਾਬੀਆਂ ਨੌਜਵਾਨਾਂ ਨੂੰ ਮਿਲੇ ਸਨ ਉਸ ਵਕਤ ਉਹਨਾਂ ਨੇ ਪੰਜਾਬ ਵਿਚੋਂ ਗੈਰ ਕਨੂੰਨੀ ਮਨੁਖੀ ਤਸਕਰੀ ਵਿਚ ਲਗੇ ਹੋਏ ਏਜੰਟਾਂ ਦੇ ਨਾਮ,ਐਡਰੈਸ ਤੇ ਸੰਪਰਕ ਨੰਬਰ ਪੰਜਾਬ ਦੇ ਅਧਿਕਾਰੀਆਂ ਨੂੰ ਭੇਜੇ ਸਨ ਪਰ ਅਜੇ ਤਕ ਉਹਨਾਂ ਦੀ ਜਾਣਕਾਰੀ ਅਨੁਸਾਰ ਇਹ ਏਜੰਟ ਅਜੇ ਵੀ ਆਪਣੇ ਕਾਰੋਬਾਰ ਵਿਚ ਲਗੇ ਹੋਏ ਹਨ ।ਸ: ਚਾਹਲ ਨੇ ਪੰਜਾਬ ਦੇ ਲੋਕਾਂ ਤੇ ਪੰਜਾਬ ਸਰਕਾਰ ਨੂੰ ਸਾਵਧਾਨ ਕਰਦਿਆਂ ਕਿਹਾ ਕਿ ਜੇਕਰ ਅਜੇ ਵੀ ਗੈਰ ਕਨੂੰਨੀ ਤੌਰ ਤੇ ਮਨੁਖੀ ਤਸਕਰੀ ਵਿਚ ਲਗੇ ਹੋਏ ਏਜੰਟਾਂ ਨੂੰ ਜਲਦੀ ਤੋਂ ਜਲਦੀ ਨੱਥ ਨਾ ਪਾਈ ਗਈ ਤਾਂ ਜਿਸ ਮਾਲਟਾ/ਪਨਾਮਾ ਵਰਗੇ ਕਾਂਡ ਹੋਰ ਵਾਪਰ ਜਾਣ ਦੀਆਂ ਸੰਭਾਵਨਾਵਾਂ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ