ਲੋਕ ਸਭਾ 'ਚ ਕਾਂਗਰਸ ਧਿਰ ਦੇ ਡਿਪਟੀ ਲੀਡਰ ਕੈਪਟਨ ਅਮਰਿੰਦਰ ਸਿੰਘ ਨੇ ਸ਼ਨੀਵਾਰ ਨੂੰ ਕਿਹਾ ਕਿ ਬਾਦਲ ਆਪਣੀ ਪਾਰਟੀ ਦੇ ਵਿਧਾਇਕਾਂ ਨੂੰ ਤਾਂ ਸੰਤੁਸ਼ਟ ਕਰ ਨਹੀਂ ਸਕੇ ਹਨ, ਅਜਿਹੇ 'ਚ ਲੋਕਾਂ ਦੀ ਕੀ ਗੱਲ ਕਰਨੀ।
ਸਥਾਨਕ ਵਿਧਾਇਕ ਗੁਰਕੀਰਤ ਸਿੰਘ ਕੋਟਲੀ ਵੱਲੋਂ ਬੇਤੇ ਦਿਨ ਇਥੇ ਸ਼ਹੀਦ ਕਰਨੈਲ ਸਿੰਘ ਈਸੜੂ ਦੀ ਯਾਦ 'ਚ ਅਯੋਜਿਤ ਵਿਸ਼ਾਲ ਰੈਲੀ ਨੂੰ ਸੰਬੋਧਨ ਕਰਦਿਆਂ ਕੈਪਟਨ ਅਮਰਿੰਦਰ ਨੇ ਕਿਹਾ ਕਿ ਹੁਣ ਸਿਰਫ ਕਾਂਗਰਸੀ ਵਿਧਾਇਕ ਜਾਂ ਆਗੂ ਹੀ ਨਹੀਂ ਪੱਖਪਾਤ ਦੇ ਦੋਸ਼ ਲਗਾ ਰਹੇ, ਬਲਕਿ ਅਕਾਲੀ ਵਿਧਾਇਕਾਂ ਨੇ ਵੀ ਬਾਦਲ ਸਰਕਾਰ ਖਿਲਾਫ ਧਰਨੇ ਲਗਾਉਣੇ ਸ਼ੁਰੂ ਕਰ ਦਿੱਤੇ ਹਨ।ਉਨ੍ਹਾਂ ਨੇ ਅਕਾਲੀ ਵਿਧਾਇਕਾਂ 'ਚ ਨਿਰਾਸ਼ਾ ਹੋਣ ਬਾਰੇ ਉਨ੍ਹਾਂ 'ਤੇ ਅਫਵਾਹ ਫੈਲ੍ਹਾਉਣ ਦਾ ਦੋਸ਼ ਲਗਾਉਣ ਵਾਲੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ 'ਤੇ ਚੁਟਕੀ ਲੈਂਦਿਆਂ ਕਿਹਾ ਕਿ ਅਕਾਲੀ ਵਿਧਾਇਕ ਸਰ੍ਹੇਆਮ ਬਾਦਲਾਂ 'ਤੇ ਪੱਖਪਾਤ ਦਾ ਦੋਸ਼ ਲਗਾ ਰਹੇ ਹਨ, ਇਸ ਤੋਂ ਵੱਧ ਬਾਦਲ ਹੋਰ ਕੀ ਸਬੂਤ ਚਾਹੁੰਦੇ ਹਨ?
ਇਸ ਮੌਕੇ ਕੋਟਲੀ ਨੂੰ ਸ਼ਾਨਦਾਰ ਇਕੱਠ ਕਰਨ ਲਈ ਵਧਾਈ ਦਿੰਦਿਆਂ, ਜਿਸਨੇ ਅਕਾਲੀਆਂ ਸਮੇਤ ਹੋਰਨਾਂ ਦੀਆਂ ਸਿਆਸੀ ਕਾਨਫਰੰਸਾਂ ਨੂੰ ਫਿੱਕਾ ਕਰ ਦਿੱਤਾ ਹੈ, ਕੈਪਟਨ ਅਮਰਿੰਦਰ ਨੇ ਕਿਹਾ ਕਿ ਇਹ ਲੋਕਾਂ ਵਿਚਾਲੇ ਅਕਾਲੀਆਂ ਖਿਲਾਫ ਵੱਡੇ ਪੱਧਰ 'ਤੇ ਗੁੱਸੇ ਦਾ ਪ੍ਰਗਟਾਵਾ ਕਰਦਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਪੰਜਾਬ ਨੇ ਕਦੇ ਵੀ ਅਜਿਹੀ ਮਾੜੀ ਸਰਕਾਰ ਨਹੀਂ ਦੇਖੀ, ਜਿਹੜੀ ਹਰ ਮੋਰਚੇ 'ਤੇ ਫੇਲ੍ਹ ਰਹੀ ਹੈ।ਉਨ੍ਹਾਂ ਨੇ ਕਿਹਾ ਕਿ ਬਾਦਲਾਂ ਖਿਲਾਫ ਗੁੱਸਾ ਸਮਝਣਯੋਗ ਹੈ, ਕਿਉਂਕਿ ਬਾਦਲਾਂ ਨੇ ਹਰੇਕ ਚੀਜ਼ ਨੂੰ ਆਪਣੇ ਕਬਜ਼ੇ ਕਰ ਲਿਆ ਹੈ। ਇਸ ਲੜੀ ਹੇਠ ਰੇਤ ਦੀ ਖੁਦਾਈ, ਸ਼ਰਾਬ ਦੇ ਵਪਾਰ, ਟਰਾਂਸਪੋਰਟ ਜਾਂ ਕੇਬਲ ਨੇਟਵਰਕ ਸਮੇਤ ਹਰੇਕ ਚੀਜ਼ 'ਤੇ ਕਬਜ਼ੇ ਦਾ ਬਾਦਲ ਗੈਂਗ ਨਾਲ ਨਜ਼ਦੀਕੀ ਸਬੰਧ ਹੈ। ਕਦੋਂ ਇਨ੍ਹਾਂ ਦੀ ਲਾਲਚ ਖਤਮ ਹੋਵੇਗੀ।ਕੈਪਟਨ ਅਮਰਿੰਦਰ ਨੇ ਖੁਲਾਸਾ ਕੀਤਾ ਕਿ ਬਾਦਲ ਨੂੰ ਆਪਣੇ ਪਿਤਾ ਕੋਲੋਂ ਸਿਰਫ 80 ਏਕੜ ਜੱਦੀ ਜ਼ਮੀਨ ਮਿਲੀ ਸੀ ਤੇ ਹੁਣ ਇਨ੍ਹਾਂ ਦੀ ਜਾਇਦਾਦ ਹੋਟਲਾਂ ਤੇ ਟਰਾਂਸਪੋਰਟ ਬਿਜਨੇਸ ਸਮੇਤ ਹਜ਼ਾਰਾਂ ਕਰੋੜਾਂ ਰੁਪਏ ਦੀ ਹੈ। ਉਹ ਬਾਦਲ ਨੂੰ ਸਵਾਲ ਕਰਨਾ ਚਾਹੁੰਦੇ ਹਨ ਕਿ ਕਿਸ ਜਾਦੂ ਦੀ ਛੜੀ ਨਾਲ ਉਨ੍ਹਾਂ ਨੇ 80 ਏਕੜ ਜ਼ਮੀਨ ਤੋਂ ਹਜ਼ਾਰਾਂ ਕਰੋੜਾਂ ਰੁਪਏ ਇਕੱਠੇ ਕਰ ਲਏ ਹਨ, ਜਦਕਿ ਆਮ ਗਰੀਬ ਕਿਸਾਨ ਆਪਣੀ ਦਾਲ ਰੋਟੀ ਦਾ ਗੁਜਾਰਾ ਵੀ ਨਾ ਕਰ ਪਾਉਣ ਕਾਰਨ ਆਤਮ ਹੱਤਿਆ ਕਰ ਰਹੇ ਹਨ।
ਉਨ੍ਹਾਂ ਨੇ ਲੋਕਾਂ ਨੂੰ ਸਾਵਧਾਨ ਕਰਦਿਆਂ ਚੇਤਾਵਨੀ ਦਿੱਤੀ ਕਿ ਬਾਦਲ ਕੋਈ ਚਲਾਕੀ ਕਰ ਸਕਦੇ ਹਨ, ਕਿਉਂਕਿ ਜਦੋਂ ਵੀ ਇਹ ਆਪਣੀ ਕੁਰਸੀ ਨੂੰ ਖਤਰਾ ਮਹਿਸੂਸ ਕਰਦੇ ਹਨ, ਤਾਂ ਇਹ ਪੰਜਾਬ ਦੇ ਹਾਲਾਤ ਖਰਾਬ ਕਰਦਿਆਂ ਚਲਾਕੀਆਂ ਵਰਤਦੇ ਹਨ।ਇਸ ਮੌਕੇ ਸੰਬੋਧਨ ਕਰਦਿਆਂ ਗੁਰਕੀਰਤ ਕੋਟਲੀ ਨੇ ਕੈਪਟਨ ਅਮਰਿੰਦਰ ਦਾ ਰੈਲੀ 'ਚ ਸ਼ਾਮਿਲ ਹੋਣ ਲਈ ਸੱਦਾ ਸਵੀਕਾਰ ਕਰਨ 'ਤੇ ਧੰਨਵਾਦ ਕੀਤਾ। ਉਨ੍ਹਾਂ ਨੇ ਕਿਹਾ ਕਿ ਇਸ 'ਚ ਕੋਈ ਸ਼ੱਕ ਨਹੀਂ ਹੈ ਕਿ ਕੈਪਟਨ ਅਮਰਿੰਦਰ ਪੰਜਾਬ ਦੇ ਅਗਲੇ ਮੁੱਖ ਮੰਤਰੀ ਬਣਨਗੇ ਅਤੇ ਲੋਕ ਬੇਸਬ੍ਰੀ ਨਾਲ ਉਨ੍ਹਾਂ ਦੇ ਅਹੁਦਾ ਸੰਭਾਲਣ ਦਾ ਇੰਤਜ਼ਾਰ ਕਰ ਰਹੇ ਹਨ।ਇਸ ਦੌਰਾਨ ਹੋਰਨਾਂ ਤੋਂ ਇਲਾਵਾ, ਪ੍ਰਨੀਤ ਕੌਰ, ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ, ਸੁਖਜਿੰਦਰ ਰੰਧਾਵਾ, ਸਾਧੂ ਸਿੰਘ ਧਰਮਸੋਤ,ਬੀਬੀ ਹਰਚੰਦ ਕੌਰ, ਨਵਤੇਜ਼ ਚੀਮਾ, ਕਰਨ ਕੌਰ ਬਰਾੜ, ਪਰਮਿੰਦਰ ਪਿੰਕੀ, ਤੇਜ਼ ਪ੍ਰਕਾਸ਼, ਸੁਖ ਸਰਕਾਰੀਆ, ਮੁਹੰਮਦ ਸਦੀਕ ਵੀ ਮੌਜ਼ੂਦ ਰਹੇ।