ਪਿਛਲੇ ਕਾਫੀ ਦਿਨਾਂ ਤੋਂ ਕਰੋਮ ਸਰਵਿਸ ਸੈਂਟਰ ਮਿਆਮੀ ਫਲੋਰਿਡਾ ਸਟੇਟ ਦੀ ਜੇਲ ਵਿਚ ਨਜਰਬੰਦ ੨੨ ਪੰਜਾਬੀ ਨੌਜਵਾਨ ਅਜ ਸਵੇਰੇ ਰਿਹਾਅ ਹੋ ਗਏ ਹਨ।ਇਸ ਗਲ ਦੀ ਜਾਣਕਾਰੀ ਦਿੰਦਿਆਂ ਅਜ ਇਥੇ ਪਿਛਲੇ ਕਾਫੀ ਦਿਨਾਂ ਤੋਂ ਇਹਨਾਂ ਨੌਜਵਾਨਾਂ ਦੀ ਰਿਹਾਈ ਲਈ ਯਤਨ ਕਰ ਰਹੇ ਨਾਰਥ ਅਮਰੀਕਨ ਪੰਜਾਬੀ ਐਸੋਸ਼ੀਏਸ਼ਨ (ਨਾਪਾ) ਦੇ ਕਾਰਜਕਾਰੀ ਡਾਇਰੈਕਟਰ ਸ: ਸਤਨਾਮ ਸਿੰਘ ਚਾਹਲ ਨੇ ਦਸਿਆ ਕਿ ਜਿਹੜੇ ੨੨ ਪੰਜਾਬੀ ਨੌਜਵਾਨ ਅਜ ਰਿਹਾਅ ਹੋਏ ਹਨ ਉਹਨਾਂ ਵਿਚੋਂ ਬਹੁਤ ਸਾਰੇ ਆਪੋ ਆਪਣੇ ਰਿਸ਼ਤੇਦਾਰਾਂ ਕੋਲ ਪਹੁੰਚ ਚੁਕੇ ਹਨ ਜਦਕਿ ਬਾਕੀ ਦੇ ਅਜੇ ਗੁਰੂਦੁਆਰਾ ਸਾਹਿਬ ਮਿਆਮੀ ਵਿਖੇ ਠਹਿਰੇ ਹੋਏ ਹਨ।ਉਹਨਾਂ ਦਸਿਆ ਕਿ ਇਹ ਪੰਜਾਬੀ ਨੌਜਵਾਨ ਆਪਣੀ ਮੰਗਾਂ ਦੇ ਸਮੱਰਥਨ ਵਿਚ ਰੋਸ ਵਜੋਂ ਜੇਲ ਅੰਦਰ ਹੀ ਭੁਖ ਹੜਤਾਲ ਤੇ ਬੈਠੇ ਸਨ ।
ਚਾਹਲ ਨੇ ਦਸਿਆ ਕਿ ਜਿਸ ਵਕਤ ਇਹਨਾਂ ਨੌਜਵਾਨਾਂ ਨੇ ਉਹਨਾਂ ਨਾਲ ਸੰਪਰਕ ਕਾਇਮ ਕੀਤਾ ਤਾਂ ਉਸ ਸਮੇਂ ਤੋਂ ਹੀ ਉਹ ਲਗਾਤਾਰ ਇੰਮੀਗਰੇਸ਼ਨ ਤੇ ਕਸਟਮ ਇੰਨਫੋਰਸਮੈਂਟ (ਆਈ.ਸੀ.ਈ) ਵਿਭਾਗ ਦੇ ਉਚ ਅਧਿਕਾਰੀਆਂ ਨਾਲ ਲਗਾਤਾਰ ਸੰਪਰਕ ਬਣਾ ਕੇ ਰਖੇ ਹੋਏ ਸਨ ਜਿਸ ਕਾਰਣ ਅਜ ਉਹਨਾਂ ਸਾਰਿਆਂ ਨੂੰ ਬਾਂਡ ਲੈ ਕੇ ਰਿਹਾ ਕਰ ਦਿਤਾ ਗਿਆ ਹੈ।ਸ: ਚਾਹਲ ਨੇ ਦਸਿਆ ਕਿ ਜਿਹੜੇ ਪੰਜਾਬੀ ਨੌਜਵਾਨਾਂ ਦੀ ਸੂਚੀ ਉਹਨਾਂ ਨੇ ਵਿਭਾਗ ਨੂੰ ਰਿਹਾਈ ਲਈ ਭੇਜੀ ਸੀ ਉਹਨਾਂ ਵਿਚੋਂ ਇਕ ਪੰਜਾਬੀ ਨੌਜਵਾਨ ਅਜੇ ਵੀ ਇਸ ਜੇਲ ਵਿਚ ਨਜਰਬੰਦ ਹੈ।ਸ: ਚਾਹਲ ਨੇ ਇਹਨਾਂ ਨੌਜਵਾਨਾਂ ਦੀ ਰਿਹਾਈ ਉਪਰ ਆਪਣੀ ਖੁਸ਼ੀ ਦਾ ਪਰਗਟਾਵਾ ਕਰਦਿਆਂ ਕਿਹਾ ਕਿ ਇਹ ਗਲ ਬੜੀ ਬਦਕਿਸਮਤੀ ਵਾਲੀ ਹੈ ਕਿ ਪੰਜਾਬ ਅੰਦਰ ਗੈਰ ਕਨੂੰਨੀ ਮਨੁਖੀ ਤਸਕਰੀ ਨੂੰ ਰੋਕਣ ਲਈ ਦੋ ਬੜੇ ਸਖਤ ਕਨੂੰਨ ਤਾਂ ਬਣੇ ਹੋਏ ਹੋਏ ਹਨ ਪਰ ਇਹਨਾਂ ਕਨੂੰਨਾਂ ਦੀ ਪਾਲਣਾ ਨਹੀਂ ਕੀਤੀ ਜਾ ਰਹੀ ਜਿਸ ਕਾਰਣ ਅਜ ਵੀ ਕਰੋੜਾਂ ਰੂਪੈ ਦਾ ਕਾਰੋਬਾਰ ਗੈਰ ਮਨੁਖੀ ਤਸਕਰਾਂ ਵਲੋਂ ਕੀਤਾ ਰਿਹਾ ਹੈ ਜਿਸ ਨੇ ਪੰਜਾਬ ਦੇ ਨੌਜਵਾਨਾਂ ਤੇ ਉਹਨਾਂ ਦੇ ਪਰਿਵਾਰਾਂ ਨੂੰ ਆਰਥਿਕ ਤੌਰ ਤੇ ਤਬਾਹ ਕਰਕੇ ਕੇ ਰਖ ਦਿਤਾ ਹੈ।ਸ: ਚਾਹਲ ਨੇ ਦਸਿਆ ਕਿ ਭਾਵੇਂ ਪੰਜਾਬ ਦੇ ਇਹ ਨੌਜਵਾਨ ਜੇਲ ਵਿਚੋਂ ਰਿਹਾ ਹੋ ਗਏ ਹਨ ਪਰ ਉਹਨਾਂ ਦਾ ਭਵਿਖ ਅਜੇ ਕਈ ਸਾਲ ਹੋਰ ਅੰਧੇਰੇ ਵਿਚ ਰਹੇਗਾ ਜਿਸ ਕਾਰਣ ਉਹਨਾਂ ਨੂੰ ਬਹੁਤ ਸਖਤ ਮੁਸ਼ਕਲਾਂ ਦਾ ਸਾਹਮਣਾ ਵੀ ਕਰਨਾ ਪਵੇਗਾ।ਸ: ਚਾਹਲ ਨੇ ਪੰਜਾਬ ਦੇ ਵਿਦੇਸ਼ ਆਉਣ ਦੇ ਚਾਹਵਾਨ ਪੰਜਾਬੀ ਨੌਜਵਾਨਾਂ ਨੂੰ ਅਪੀਲ ਕੀਤੀ ਕਿ ਉਹ ਕਨੂੰਨੀ ਰਸਤੇ ਰਾਹੀਂ ਹੀ ਵਿਦੇਸ਼ ਪਹੁੰਚਣ।