ਬੰਦੀ ਸਿੰਘਾਂ ਦੀ ਰਿਹਾਈ ਲਈ 187 ਦਿਨਾਂ ਤੋਂ ਭੁੱਖ ਹੜਤਾਲ 'ਤੇ ਬੈਠੇ ਬਾਪੂ ਸੂਰਤ ਸਿੰਘ ਖ਼ਾਲਸਾ ਨੂੰ ਪੁਲਿਸ ਵੱਲੋਂ ਚੁੱਕਣ ਅਤੇ ਸਿੱਖਾਂ 'ਤੇ ਤਸ਼ੱਦਦ ਦੀ ਪੁਲਿਸ ਕਾਰਵਾਈ ਦੀ ਨਾਰਥ ਅਮਰੀਕਨ ਪੰਜਾਬੀ ਐਸੋਸੀਏਸ਼ਨ ਨੇ ਸਖ਼ਤ ਨਿਖੇਧੀ ਕੀਤੀ ਹੈ। ਪ੍ਰੈੱਸ ਨੂੰ ਜਾਰੀ ਕੀਤੇ ਬਿਆਨ ਰਾਹੀਂ ਨਾਪਾ ਦੇ ਆਗੂ ਸ. ਦਲਵਿੰਦਰ ਸਿੰਘ ਧੂਤ,ਡਾ.ਗੁਰਦੀਪ ਸਿੰਘ ਬੁਟਰ, ਗੁਰਨਾਮ ਸਿੰਘ ਸੰਧਰ,ਡਾ.ਅਜਿੰਦਰ ਸਿੰਘ ਢੱਟ,ਤੇ ਪਾਲ ਮੋਰ ਨੇ ਕਿਹਾ ਕਿ ਬੰਦੀ ਸਿੰਘਾਂ ਨੂੰ ਰਿਹਾਅ ਕਰਨ ਦੀ ਮੰਗ ਨੂੰ ਲੈ ਕੇ ਮਰਨ ਵਰਤ ਤੇ ਬੈਠੇ ਬਾਪੂ ਸੂਰਤ ਸਿੰਘ ਖਾਲਸਾ ਨੂੰ ਜਬਰੀ ਖੁਰਾਕ ਦੇਣੀ ਮਨੁਖੀ ਅਧਿਕਾਰਾਂ ਦੀ ਜਿਥੇ ਉਲੰਘਣਾ ਹੈ ਉਥੇ ਇਕ ਅਪਰਾਧ ਵੀ ਹੈ ।ਨਾਪਾ ਆਗੂਆਂ ਨੇ ਕਿਹਾ ਕਿ ਨਿਹੱਥੇ ਸਿੱਖਾਂ ਅਤੇ ਬੀਬੀਆਂ 'ਤੇ ਲਾਠੀਚਾਰਜ਼ ਕਰਕੇ ਬਾਦਲ ਸਰਕਾਰ ਨੇ ਦਰਸਾ ਦਿੱਤਾ ਹੈ ਕਿ ਇਹ ਸਰਕਾਰ ਸਜ਼ਾਵਾਂ ਕੱਟ ਚੁੱਕੇ ਸਿੱਖਾਂ ਨੂੰ ਰਿਹਾਅ ਕਰਨਾ ਤਾਂ ਦੂਰ ਸਗੋਂ ਇਸਦੀ ਮੰਗ ਕਰਨ ਨੂੰ ਵੀ ਗੁਨਾਹ ਸਮਝਦੀ ਹੈ। ਘਟਨਾਕ੍ਰਮ ਦੀ ਕਵਰੇਜ਼ ਕਰ ਰਹੇ ਪੱਤਰਕਾਰਾਂ 'ਤੇ ਲਾਠੀਆਂ ਵਰ੍ਹਾ ਕੇ ਇਹ ਸਰਕਾਰ ਆਪਣਾ ਨਾਦਰਸ਼ਾਹੀ ਜ਼ੁਲਮ ਲੋਕਾਂ ਵਿੱਚ ਜਾਣ ਤੋਂ ਰੋਕ ਨਹੀਂ ਸਕੀ ਤੇ ਇਸ ਜ਼ੁਲਮ ਦੀਆਂ ਖ਼ਬਰਾਂ ਮਿੰਟਾਂ ਵਿੱਚ ਦੁਨੀਆਂ ਭਰ 'ਚ ਪਹੁੰਚ ਚੁੱਕੀਆਂ ਹਨ।ਸਰਕਾਰ ਦੀਆਂ ਇਨ੍ਹਾਂ ਕਾਰਵਾਈਆਂ ਕਾਰਨ ਹੀ ਅਕਾਲੀ ਆਗੂਆਂ ਪ੍ਰਤੀ ਦੇਸ਼ਾਂ-ਵਿਦੇਸ਼ਾਂ ਵਿੱਚ ਵਸਦੇ ਸਿੱਖਾਂ 'ਚ ਗੁੱਸਾ ਵਧਦਾ ਜਾ ਰਿਹਾ ਹੈ ।ਨਾਪਾ ਆਗੂਆਂ ਨੇ ਦੋਸ਼ ਲਾਇਆ ਕਿ ਜਦੋਂ ਸਰਕਾਰ ਸਿਆਸੀ ਚਾਲਾਂ ਰਾਹੀ ਬਾਪੂ ਸੂਰਤ ਸਿੰਘ ਦੇ ਸੰਘਰਸ਼ ਨੂੰ ਫਲਾਪ ਕਰਨ ਨਹੀਂ ਕਰ ਸਕੀ ਤਾਂ ਉਸਨੇ ਚਾਣਕਿਆ ਨੀਤੀ ਅਨੁਸਾਰ ਹੁਣ ਡੰਡਾ ਚੁੱਕ ਲਿਆ ਹੈ। ਇਹਨਾਂ ਆਗੂਆਂ ਨੇ ਦਸਿਆ ਕਿ ਦੁਨੀਆਂ ਦਾ ਕੋਈ ਵੀ ਕਾਨੂੰਨ ਸਜ਼ਾਵਾਂ ਕੱਟ ਚੁੱਕੇ ਲੋਕਾਂ ਨੂੰ ਉਨ੍ਹਾਂ ਦੀ ਬਣਦੀ ਸਜ਼ਾ ਤੋਂ ਇੱਕ ਦਿਨ ਵੀ ਵੱਧ ਸਮੇਂ ਲਈ ਅੰਦਰ ਨਹੀਂ ਰੱਖ ਸਕਦਾ ਪਰ ਭਾਰਤ ਵਿੱਚ ਘੱਟਗਿਣਤੀਆਂ ਲਈ ਵੱਖਰੇ ਕਾਨੂੰਨ ਹਨ, ਜਿੱਥੇ ਸਜ਼ਾਵਾਂ ਪੂਰੀਆਂ ਹੋਣ ਦੇ ਕਈ-ਕਈ ਸਾਲਾਂ ਬਾਅਦ ਵੀ ਸਿੱਖ ਜੇਲ੍ਹਾਂ ਵਿੱਚ ਬੰਦ ਹਨ ਤੇ ਇਨ੍ਹਾਂ ਦੀ ਰਿਹਾਈ ਦੀ ਮੰਗ ਕਰਨ ਵਾਲੇ ਲੋਕਾਂ 'ਤੇ ਤਸ਼ੱਦਦ ਕਰਕੇ ਸਰਕਾਰ ਉਨ੍ਹਾਂ ਦੀ ਆਵਾਜ਼ ਹਮੇਸ਼ਾਂ ਲਈ ਬੰਦ ਕਰਾ ਚਾਹੁੰਦੀ ਹੈ ਕਿ ਉਹ ਮੁੜ ਇਨ੍ਹਾਂ ਦੀਆਂ ਰਿਹਾਈਆਂ ਦੀ ਮੰਗ ਨਾ ਕਰਨ।