ਨੇਪਾਲ ਵਿਖੇ ਆਏ ਭੂਚਾਲ ਤੋਂ ਬਾਅਦ ਪੰਜਾਬ ਸਰਕਾਰ ਅਤੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਸਾਂਝੇ ਤੌਰ 'ਤੇ ਨੇਪਾਲ ਵਿਖੇ ਚਲਾਏ ਜਾ ਰਹੇ ਰਿਲੀਫ ਕੈਂਪਾਂ ਦੌਰਾਨ ਜਿੱਥੇ ਪੀੜ੍ਹਤਾਂ ਨੂੰ ਲੰਗਰ ਛਕਾਇਆ ਜਾ ਰਿਹਾ ਹੈ ਉਥੇ ਲੋੜਵੰਦਾਂ ਨੂੰ ਕੰਬਲ, ਤਰਪਾਲਾਂ ਤੇ ਕੱਪੜੇ ਮੁਹੱਈਆ ਕਰਵਾਏ ਜਾ ਰਹੇ ਹਨ। ਜਖ਼ਮੀਆਂ ਨੂੰ ਮੈਡੀਕਲ ਸਹਾਇਤਾ ਦਿੱਤੀ ਜਾ ਰਹੀ ਹੈ। ਰਿਲੀਫ ਟੀਮਾਂ ਨੇਪਾਲ ਦੇ ਵੱਖ-ਵੱਖ ਪ੍ਰਭਾਵਿਤ ਇਲਾਕਿਆਂ ਵਿੱਚ ਜਾ ਕੇ ਲੰਗਰ, ਸੁੱਕਾ ਰਾਸ਼ਨ, ਕੱਪੜੇ ਅਤੇ ਦਵਾਈਆਂ ਪਹੁੰਚਾਣ ਦਾ ਕੰਮ ਕਰ ਰਹੀਆਂ ਹਨ। ਇਹ ਜਾਣਕਾਰੀ ਅੱਜ ਇਥੇ ਪੰਜਾਬ ਸਰਕਾਰ ਦੇ ਬੁਲਾਰੇ ਵੱਲੋਂ ਦਿੱਤੀ ਗਈ ਹੈ।ਸਰਕਾਰੀ ਬੁਲਾਰੇ ਅਨੁਸਾਰ ਸ਼੍ਰੋਮਣੀ ਕਮੇਟੀ ਦੇ ਸਾਬਕਾ ਸਕੱਤਰ ਸ. ਦਲਮੇਘ ਸਿੰਘ ਖੱਟੜਾ, ਪੰਜਾਬ ਸਰਕਾਰ ਦੇ ਆਈ.ਏ.ਐਸ.ਅਧਿਕਾਰੀ ਸ੍ਰੀ ਦਿਲਰਾਜ ਸਿੰਘ ਤੇ ਆਈ.ਪੀ.ਐਸ. ਅਧਿਕਾਰੀ ਸ੍ਰੀ ਨੌਨਿਹਾਲ ਸਿੰਘ ਅਤੇ ਬਾਬਾ ਮਾਨ ਸਿੰਘ ਪਿਹੋਵੇ ਵਾਲੇ ਦੀ ਦੇਖ ਰੇਖ ਵਿੱਚ ਗੁਰਦੁਆਰਾ ਗੁਰੂ ਨਾਨਕ ਸਤਸੰਗ ਕੁਪਨਡੋਲ ਲਲਿਤਪੁਰ ਵਿਖੇ 30 ਅਪਰੈਲ ਤੋਂ ਰਿਲੀਫ ਕੈਂਪ ਚੱਲ ਰਿਹਾ ਹੈ। ਇਸ ਕੈਂਪ ਲਈ ਚੰਡੀਗੜ ਤੋਂ ਏਅਰ ਫੋਰਸ ਦੀ ਮੱਦਦ ਨਾਲ ਪੰਜਾਬ ਸਰਕਾਰ ਵੱਲੋਂ ਹੋਰ ਸਮੱਗਰੀ ਵੀ ਭੇਜੀ ਜਾ ਰਹੀ ਹੈ। ਇਸ ਕੈਂਪ ਵਿੱਚ ਕਾਠਮੰਡੂ ਅਤੇ ਆਲੇ ਦੁਆਲੇ ਪਿੰਡਾਂ ਵਿੱਚ ਭੂਚਾਲ ਕਾਰਨ ਹੋਈ ਤਬਾਹੀ ਅਤੇ ਮੌਤਾਂ ਕਾਰਨ ਬੇਘਰੇ ਹੋਏ ਲੋਕ ਵੱਡੀ ਗਿਣਤੀ ਵਿੱਚ ਇਕੱਠੇ ਹੋਏ ਹਨ। ਇਥੇ ਨਿਰੰਤਰ ਲੰਗਰ ਵਰਤਾਇਆ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ ਮੈਡੀਕਲ ਕੈਂਪ ਲਗਾ ਕੇ ਜ਼ਖਮੀਆਂ ਦਾ ਇਲਾਜ ਕੀਤਾ ਜਾ ਰਿਹਾ ਹੈ।
ਬੱਚਿਆਂ ਨੂੰ ਦੁੱਧ ਅਤੇ ਲੋਕਾਂ ਨੂੰ ਕੰਬਲ, ਤਰਪਾਲਾਂ ਆਦਿ ਵੰਡੇ ਜਾ ਰਹੇ ਹਨ।ਸਰਕਾਰੀ ਬੁਲਾਰੇ ਅਨੁਸਾਰ ਇਸ ਭੂਚਾਲ ਨਾਲ ਪ੍ਰਭਾਵਿਤ ਹੋਏ ਇਲਾਕੇ ਸਿੱਧੂਪਾਲ, ਭੀਮਟੇਰ ਤੇ ਸਿਪਲਾ ਕੋਟ ਵਿਖੇ 1000 ਲੋਕਾਂ ਨੂੰ ਸੁੱਕਾ ਰਾਸ਼ਨ, ਤਰਪਾਲਾਂ ਅਤੇ ਦਵਾਈਆਂ ਵੰਡੀਆਂ ਗਈਆਂ। ਇਸੇ ਤਰਾਂ ਹਰੀ ਸਿੱਧ ਵਿੱਚ ਲੱਗੇ ਕੈਂਪ ਵਿੱਚ 3000 ਲੋਕਾਂ ਨੂੰ ਲੰਗਰ ਛਕਾਇਆ ਗਿਆ ਅਤੇ ਮੈਡੀਕਲ ਕੈਂਪ ਵਿੱਚ ਤਿੰਨ ਸੌ ਤੋਂ ਵੱਧ ਪੀੜਤਾਂ ਨੂੰ ਦਵਾਈਆਂ ਵੰਡੀਆਂ ਗਈਆਂ। ਨੇਪਾਲ ਦੇ ਫੌਜੀ ਅਧਿਕਾਰੀਆਂ ਨਾਲ ਤਾਲਮੇਲ ਕਰਕੇ ਬਹੁਤ ਪ੍ਰਭਾਵਿਤ ਪਹਾੜੀ ਇਲਾਕੇ ਦੇ ਪਿੰਡ ਮਜੂਆ ਜੋ ਕਿ ਪੂਰੀ ਤਰਾਂ ਢਹਿ ਚੁੱਕਾ ਸੀ, ਦੇ ਲੋਕਾਂ ਨੂੰ ਕੰਬਲ ਤੇ ਦਰੀਆਂ ਅਵੰਡੀਆਂ ਗਈਆਂ। ਇਸੇ ਤਰਾਂ ਕੀਰਤੀਪੁਰ ਵਿਖੇ ਸੁੱਕਾ ਰਾਸ਼ਨ, ਕੰਬਲ ਅਤੇ ਦਰੀਆਂ ਵੰਡੀਆਂ ਗਈਆ।ਸਰਕਾਰੀ ਬੁਲਾਰੇ ਨੇ ਦੱਸਿਆ ਕਿ ਗੁਰਦੁਆਰਾ ਕੁਪਨਡੋਲ ਸਾਹਿਬ ਵਿਖੇ ਰੋਜ਼ਾਨਾ ਲੰਗਰ ਤਿਆਰ ਕਰਕੇ ਵੱਖ-ਵੱਖ ਪ੍ਰਭਾਵਿਤ ਇਲਾਕਿਆਂ ਵਿੱਚ ਲਿਜਾ ਕੇ 5000 ਲੋਕਾਂ ਨੂੰ ਲੰਗਰ ਛਕਾਇਆ ਜਾ ਰਿਹਾ ਹੈ। ਇਸੇ ਤਰਾਂ ਪ੍ਰਭਾਵਿਤ ਪਿੰਡਾਂ ਜੀਵਨ, ਦੇਵਰਾਨੀ, ਆਮਵੋਟ ਵਿੱਚ ਸੁੱਕਾ ਰਾਸ਼ਨ, ਦਾਲ, ਚੌਲ, ਬਿਸਕੁਟ, ਦਵਾਈਆਂ ਤਰਪਾਲਾਂ ਅਤੇ ਦਰੀਆਂ ਵੰਡੀਆਂ ਗਈਆਂ। ਫੌਜ ਦੇ ਕੈਪਾਂ ਵਿੱਚ ਬੈਠੇ ਲੋਕਾਂ ਅਤੇ ਪਿੰਡ ਰੀਸਿੱਧੀ, ਲਲਿਤਪੁਰ ਵਿੱਚ 6000 ਲੋਕਾਂ ਨੂੰ ਲੰਗਰ ਭੇਜਿਆ ਗਿਆ। ਪਿੰਡ ਭਾਨਗੇ ਵਿੱਚ ਦਾਲ, ਚੌਲ, ਬਿਸਕੁਟ, ਦਵਾਈਆਂ, ਤਰਪਾਲਾ ਅਤੇ ਦਰੀਆਂ ਵੰਡੀਆਂ ਗਈਆਂ।