ਪੰਜਾਬ ਐਮਚਿਓਰ ਰੋਇੰਗ ਐਸੋਸੀਏਸ਼ਨ ਵੱਲੋਂ ਪੰਜਾਬ ਜੂਨੀਅਰ ਕਿਸ਼ਤੀ ਚਾਲਣ ਚੈਂਪੀਅਨਸ਼ਿਪ ਇੱਥੇ ਸੁਖਨਾ ਝੀਲ ਵਿਖੇ ਜਨਰਲ ਸਕੱਤਰ ਜਸਪ੍ਰੀਤ ਸਿੰਘ ਸਿੱਧੂ ਤੇ ਕੋਚ ਹਰਜਿੰਦਰ ਸਿੰਘ ਦੀ ਅਗਵਾਈ ਵਿੱਚ ਕਰਵਾਈ ਗਈ। ਪੰਜਾਬ ਦੇ ਖੁਰਾਕ ਤੇ ਸਿਵਲ ਸਪਲਾਈ ਮੰਤਰੀ ਅਤੇ ਪੰਜਾਬ ਰੋਇੰਗ ਐਸੋਸੀਏਸ਼ਨ ਦੇ ਪ੍ਰਧਾਨ ਆਦੇਸ਼ ਪ੍ਰਤਾਪ ਸਿੰਘ ਕੈਰੋਂ ਇਨਾਮ ਵੰਡ ਸਮਾਰੋਹ ਵਿੱਚ ਮੁੱਖ ਮਹਿਮਾਨ ਵਜੋਂ ਪਹੁੰਚੇ। ਇਸ ਮੌਕੇ ਖਿਡਾਰੀਆਂ ਨੂੰ ਸੰਬੋਧਨ ਕਰਦਿਆਂ ਕੈਰੋਂ ਨੇ ਕਿਹਾ ਕਿ ਪੰਜਾਬ ਵਿੱਚ ਇਸ ਖੇਡ ਦੀ ਪ੍ਰਤਿਭਾ ਦੀ ਕੋਈ ਕਮੀ ਨਹੀਂ ਹੈ, ਲੋੜ ਹੀ ਇਸ ਨੂੰ ਤਰਾਸ਼ਣ ਦੀ। ਉਨ੍ਹਾਂ ਕਿਹਾ ਕਿ ਇਸ ਖੇਡ ਦੇ ਵਿਕਾਸ ਲਈ ਉਨ੍ਹਾਂ ਦੀ ਐਸੋਸੀਏਸ਼ਨ ਅਤੇ ਸਰਕਾਰ ਵੱਲੋਂ ਵਧੀਆ ਸਿਖਲਾਈ ਕੇਂਦਰ ਖੋਲ੍ਹਣ ਦੇ ਯਤਨ ਕੀਤੇ ਜਾ ਰਹੇ ਹਨ ਅਤੇ ਖਿਡਾਰੀਆਂ ਨੂੰ ਹਰ ਤਰ੍ਹਾਂ ਦੀਆਂ ਸਹੂਲਤਾਂ ਦੇਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਖਿਡਾਰੀਆਂ ਨੂੰ ਤਗਮੇ ਅਤੇ ਸਰਟੀਫਿਕੇਟ ਦਿੱਤੇ ਗਏ ਅਤੇ ਮੇਜ਼ਬਾਨਾਂ ਨੂੰ ਵਧਾਈ ਦਿੱਤੀ।
ਲੜਕਿਆਂ ਦੇ ਸਿੰਗਲ ਸਕੱਲ ਵਰਗ 'ਚ ਅਰਮਾਨ ਸੰਧੂ ਪਹਿਲੇ, ਗੁਰਵਿੰਦਰ ਸਿੰਘ ਦੂਸਰੇ ਅਤੇ ਕਿਰਤਪ੍ਰਤਾਪ ਸਿੰਘ ਤੀਸਰੇ, ਡਬਲ ਸਕੱਲ 'ਚ ਸਤਨਾਮ ਸਿੰਘ ਤੇ ਸੁਖਵਿੰਦਰ ਸਿੰਘ ਅੱਵਲ, ਸੰਦੀਪ ਸਿੰਘ ਤੇ ਮਿੱਠੂ ਸਿੰਘ ਦੂਸਰੇ ਅਤੇ ਅਰਵਿੰਦਰ ਸਿੰਘ ਤੇ ਕੁਲਵੰਤ ਸਿੰਘ ਤੀਸਰੇ, ਪੇਅਰ 'ਚ ਮਨਪ੍ਰੀਤ ਸਿੰਘ ਤੇ ਹਰਜਿੰਦਰ ਸਿੰਘ ਪਹਿਲੇ, ਗੁਰਵੀਰ ਸਿੰਘ ਤੇ ਨਵਦੀਪ ਸਿੰਘ ਦੂਸਰੇ ਅਤੇ ਅਰਸ਼ਦੀਪ ਸਿੰਘ ਤੇ ਦਲੇਰ ਸਿੰਘ ਤੀਸਰੇ, ਫੋਰ ਵਰਗ 'ਚ ਜਤਿੰਦਰ ਸਿੰਘ, ਪ੍ਰਭਜੋਤ ਸਿੰਘ, ਧਰਮਿੰਦਰ ਸਿੰਘ ਤੇ ਮੰਗਤ ਸਿੰਘ ਪਹਿਲੇ, ਬੱਬੀ ਕੁਮਾਰ, ਹਰਜਿੰਦਰ ਸਿੰਘ, ਸਤਬੀਰ ਸਿੰਘ ਤੇ ਹਰਸ਼ਦੀਪ ਸਿੰਘ ਢਿੱਲੋਂ ਦੀ ਟੀਮ ਦੂਸਰੇ ਅਤੇ ਗੁਰਦਿੱਤ ਸਿੰਘ, ਕਸਿਸ ਧਾਰੀਵਾਲ, ਸੁਖਜੀਤ ਸਿੰਘ ਤੇ ਰਣਜੀਤ ਸਿੰਘ ਦੀ ਟੀਮ ਤੀਸਰੇ ਸਥਾਨ 'ਤੇ ਰਹੀ। ਲੜਕੀਆਂ ਦੇ ਸਿੰਗਲ ਸਕੱਲ ਮੁਕਾਬਲੇ 'ਚ ਤਮੰਨਾ ਬਰਾੜ ਪਹਿਲੇ, ਰਵਿੰਦਰ ਕੌਰ ਦੂਸਰੇ ਤੇ ਅਨਮੋਲ ਖੋਸਾ ਤੀਸਰੇ, ਡਬਲ ਸਕੱਲ 'ਚ ਰਵਿੰਦਰ ਕੌਰ ਤੇ ਅਨਮੋਲ ਖੋਸਾ ਪਹਿਲੇ, ਹਰੁਪਿੰਦਰ ਕੌਰ ਤੇ ਬਲਜੀਤ ਕੌਰ ਦੂਸਰੇ ਅਤੇ ਅਮਨਦੀਪ ਕੌਰ ਤੇ ਕਮਲਜੀਤ ਕੌਰ ਤੀਸਰੇ ਸਥਾਨ 'ਤੇ ਰਹੀਆਂ। ਇਸ ਮੌਕੇ ਬੂਟਾ ਸਿੰਘ ਕਾਲੇਕਾ, ਪ੍ਰੋ. ਜਸਵੀਰ ਸਿੰਘ ਕਪਿਆਲ, ਗਗਨਦੀਪ ਜੱਸੋਵਾਲ ਤੇ ਸੀਨੀਅਰ ਕਿਸ਼ਤੀ ਚਾਲਕ ਵੀ ਮੌਜੂਦ ਸਨ।