ਸੰਭਵ ਸੰਸਥਾ ਵਲੋਂ ਸ਼ਹਿਰ ਵਿੱਚ 20 ਜੁਲਾਈ ਨੂੰ ਸਵੇਰੇ 8 ਵਜੇ ਤੋਂ 9 ਵਜੇ ਦੌਰਾਨ ਇੱਕ ਘੰਟੇ ਵਿੱਚ ਇੱਕ ਲੱਖ ਬੂਟੇ ਲਾਏ ਜਾਣ ਦੀ ਮੁਹਿੰਮ ਨੂੰ ਜਿੱਥੇ ਸ਼ਹਿਰ ਦੀਆਂ ਵੱਖ-ਵੱਖ ਸਮਾਜਿਕ, ਵਪਾਰਕ ਅਤੇ ਵਿਦਿਅਕ ਸੰਸਥਾਵਾਂ ਵਲੋਂ ਭਰਪੂਰ ਹੁੰਗਾਰਾ ਅਤੇ ਸਮੱਰਥਨ ਮਿਲ ਰਿਹਾ ਹੈ, ਉੱਥੇ ਵੱਖ-ਵੱਖ ਸਰਕਾਰੀ ਅਤੇ ਅਰਧ ਸਰਕਾਰੀ ਅਦਾਰਿਆਂ ਵਲੋਂ ਵੀ ਇਸ ਵਿੱਚ ਬੜੇ ਉਤਸ਼ਾਹ ਨਾਲ ਸ਼ਮੂਲੀਅਤ ਕੀਤੀ ਜਾ ਰਹੀ ਹੈ। ਇਸ ਵੇਲੇ ਬਿਜਲੀ ਖੇਤਰ ਦੀਆਂ ਦੋ ਕਾਰਪੋਰੇਸ਼ਨਾਂ ਹਨ। ਦੋਵਾਂ ਕੰਪਨੀਆਂ ਨਾਲ ਸਬੰਧਤ ਸਾਰੇ ਅਧਿਕਾਰੀਆਂ, ਕਰਮਚਾਰੀਆਂ ਅਤੇ ਉਹਨਾਂ ਦੇ ਪ੍ਰੀਵਾਰਾਂ ਵਿੱਚ ਇਸ ਕਾਰਜ ਵਿੱਚ ਸ਼ਾਮਿਲ ਹੋਣ ਲਈ ਭਾਰੀ ਉਤਸ਼ਾਹ ਹੈ। ਪੰਜਾਬ ਪਾਵਰਕਾਮ ਦੇ ਮੁੱਖ ਇੰਜਨੀਅਰ ਰਛਪਾਲ ਸਿੰਘ ਨੇ ਕਿਹਾ ਕਿ ਸ਼ਹਿਰ ਦੇ ਸਾਰੇ ਬਿਜਲੀ ਦਫਤਰਾਂ, ਸਬ-ਸਟੇਸ਼ਨਾਂ ਅਤੇ ਰਿਹਾਇਸ਼ੀ ਕਾਲੋਨੀਆਂ ਵਿੱਚ ਉਸ ਦਿਨ ਬਿਜਲੀ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਵਲੋਂ 5000 ਤੋਂ ਉਪਰ ਦਰਖਤਾਂ ਦੇ ਪੌਦੇ ਲਗਾਏ ਜਾਣਗੇ। ਊਰਜਾ ਕਲੱਬ ਵੀ ਮੁੱਖੀ ਸ੍ਰੀਮਤੀ ਨੀਰੂ ਕਲਸੀ ਨੇ ਕਿਹਾ ਹੈ ਕਿ ਬਿਜਲੀ ਪ੍ਰੀਵਾਰ ਦੀਆਂ ਸਾਰੀਆਂ ਔਰਤਾਂ ਅਤੇ ਬੱਚੇ ਵੀ ਆਪਣੇ ਆਪਣੇ ਘਰਾਂ ਅਤੇ ਰਿਹਾਇਸ਼ੀ ਖੇਤਰਾਂ ਵਿੱਚ 500 ਤੋਂ ਵੱਧ ਪੌਦੇ ਲਾਉਣਾ ਯਕੀਨੀ ਬਨਾਉਣਗੇ।
ਇਸੇ ਤਰ੍ਹਾਂ ਪੰਜਾਬ ਟਰਾਂਸਮਿਸ਼ਨ ਕਾਰਪੋਰੇਸ਼ਨ ਦੇ ਮੁੱਖ ਇੰਜਨੀਅਰ ਰਾਕੇਸ਼ ਸ਼ਰਮਾ ਨੇ ਕਿਹਾ ਹੈ ਕਿ ਉਹਨਾਂ ਅਧੀਨ ਸ਼ਹਿਰ ਵਿੱਚ 220 ਕੇ.ਵੀ. ਸਬ-ਸਟੇਸ਼ਨ ਫਿਰੋਜ਼ਪੁਰ ਰੋਡ, ਢੰਡਾਰੀ ਕਲਾਂ ਅਤੇ ਇਸਦੇ ਆਸ ਪਾਸ 220 ਕੇ.ਵੀ. ਸਬ-ਸਟੇਸ਼ਨ ਸਾਹਨੇਵਾਲ, ਲਲਤੋਂ ਕਲਾਂ, ਪੱਖੋਵਾਲ, ਗੌਂਸਗੜ੍ਹ ਅਤੇ ਕੋਹਾੜਾ ਅਤੇ ਹੰਬੜਾਂ ਹਨ। ਇਹਨਾਂ ਸਾਰੇ ਸਬ-ਸਟੇਸ਼ਨਾਂ, ਦਫਤਰਾਂ ਅਤੇ ਕਾਲੋਨੀਆਂ ਵਿੱਚ ਵੀ 2500 ਬੂਟੇ ਲਗਾਉਣ ਦਾ ਟੀਚਾ ਮਿਥਿਆ ਹੈ। ਇਸ ਵਾਸਤੇ ਅਧਿਕਾਰੀਆਂ ਦੀ ਮੀਟਿੰਗ ਬੁਲਾ ਕੇ ਸਾਰੇ ਪ੍ਰਬੰਧ ਕੀਤਾ ਜਾ ਰਹੇ ਹਨ ਤਾਂ ਕਿ ਉਸ ਦਿਨ ਮਿੱਥੇ ਇੱਕ ਘੰਟੇ ਦੇ ਅੰਦਰ ਇਸ ਕਾਰਜ ਨੂੰ ਮੁਕੰਮਲ ਕੀਤਾ ਜਾ ਸਕੇ। ਦੋਨਾਂ ਅਧਿਕਾਰੀਆਂ ਨੇ ਦੱਸਿਆ ਹੈ ਕਿ ਉਹਨਾਂ ਦੇ ਦਫਤਰਾਂ, ਕਾਲੋਨੀਆਂ ਅਤੇ ਬਿਜਲੀ ਘਰਾਂ ਵਿੱਚ ਪਾਣੀ ਅਤੇ ਸਾਂਭ ਸੰਭਾਲ ਦਾ ਬਿਹਤਰ ਪ੍ਰਬੰਧ ਹੈ। ਇਸ ਲਈ ਉਹ ਲਗਾਏ ਬੂਟਿਆਂ ਦੀ ਸੁਰੱਖਿਆ ਅਤੇ ਪਾਲਣ ਨੂੰ ਅਸਾਨੀ ਨਾਲ ਯਕੀਨੀ ਬਣਾ ਸਕਦੇ ਹਨ।