ਆਮ ਆਦਮੀ ਪਾਰਟੀ ਦੇ ਆਗੂ ਤੇ ਲੋਕ ਸਭਾ ਮੈਂਬਰ ਭਗਵੰਤ ਮਾਨ ਉੱਤੇ ਇਰਾਕ ਵਿਚ ਫਸੇ ਪੰਜਾਬੀਆਂ ਦੇ ਪਰਿਵਾਰਾਂ ਨੂੰ ਗੁੰਮਰਾਹ ਕਰਨ ਦਾ ਦੋਸ਼ ਲਾਉਂਦਿਆਂ, ਪੰਜਾਬ ਦੇ ਮੁੱਖ ਸੰਸਦੀ ਸਕੱਤਰ ਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਆਗੂ ਵਿਰਸਾ ਸਿੰਘ ਵਲਟੋਹਾ ਨੇ ਅੱਜ ਇਥੇ ਕਿਹਾ ਹੈ ਕਿ ਉਹਨਾਂ ਨੂੰ ਇਸ ਅਤਿ ਨਾਜ਼ਕ ਮਾਮਲੇ ਉੱਤੇ ਸੌੜੀ ਸਿਆਸਤ ਕਰਨੀ ਸ਼ੋਭਾ ਨਹੀਂ ਦਿੰਦੀ। ਵਲਟੋਹਾ ਨੇ ਅੱਜ ਇਥੇ ਜਾਰੀ ਕੀਤੇ ਗਏ ਇੱਕ ਪ੍ਰੈਸ ਬਿਆਨ ਵਿਚ ਕਿਹਾ ਹੈ ਕਿ ਭਗਵੰਤ ਮਾਨ ਨੇ ਗੰਭੀਰ ਸੰਕਟ ਵਿਚ ਫਸੇ ਪੰਜਾਬੀ ਪਰਿਵਾਰਾਂ ਦੀ ਤ੍ਰਾਸਦੀ ਦਾ ਸਿਆਸੀ ਲਾਹਾ ਲੈਣ ਤੇ ਆਪਣੀ ਭੱਲ ਬਨਾਉਣ ਲਈ ਪਹਿਲਾਂ ਖੁਦ ਇਰਾਕ ਜਾਣ ਦਾ ਐਲਾਨ ਕੀਤਾ ਤੇ ਫਿਰ ਇਹ ਬਿਆਨ ਦਾਗ ਦਿੱਤਾ ਕਿ ਇਰਾਕ ਵਿਚ ਫਸੇ ਪੰਜਾਬੀ ਨੌਜਵਾਨਾਂ ਨੂੰ ਵਾਪਸ ਲਿਆਉਣ ਲਈ ਉਹਨਾਂ ਨੇ ਆਪਣੇ ਪੱਲਿਉਂ ਪੈਸੇ ਖਰਚ ਕੇ ੭੨ ਹਵਾਈ ਟਿਕਟਾਂ ਖਰੀਦ ਦਿੱਤੀਆਂ ਹਨ। ਉਹਨਾਂ ਕਿਹਾ ਹੈ ਕਿ ਤਕਰੀਬਨ ਇੱਕ ਹਫਤਾ ਬੀਤ ਜਾਣ ਤੋਂ ਬਾਅਦ ਵੀ ਭਗਵੰਤ ਮਾਨ ਨਾ ਤਾਂ ਇਰਾਕ ਹੀ ਗਏ ਹਨ ਅਤੇ ਨਾ ਹੀ ਕਿਸੇ ਨੂੰ ਇਹ ਪਤਾ ਹੈ ਕਿ ਉਹਨਾਂ ਦੀਆਂ “ਖਰੀਦੀਆਂ ਹਵਾਈ ਟਿਕਟਾਂ” ਰਾਹੀਂ ਕਿਹੜੇ ੭੨ ਵਿਅਕਤੀ ਵਾਪਸ ਲਿਆਂਦੇ ਗਏ ਹਨ।
ਅਕਾਲੀ ਆਗੂ ਨੇ ਕਿਹਾ ਕਿ ਭਗਵੰਤ ਮਾਨ ਨੇ ਆਪਣੇ ਕੀਤੇ ਗਏ ਐਲਾਨਾਂ ਉੱਤੇ ਪੂਰੇ ਉਤਰਣ ਦੀ ਥਾਂ ਹੁਣੇ ਅਜਿਹੀਆਂ ਅਜੀਬੋ ਗਰੀਬ ਹਰਕਤਾਂ ਕਰਨੀਆਂ ਸ਼ੁਰੂ ਕਰ ਦਿੱਤੀਆਂ ਹਨ ਜਿਵੇਂ ਇਰਾਕ ਵਿਚ ਫਸੇ ਪੰਜਾਬੀ ਨੌਜਵਾਨਾਂ ਦੇ ਦੁੱਖ ਨੇ ਉਹਨਾਂ ਨੂੰ ਸੁਰਤ ਸਿਰ ਹੀ ਨਾ ਰਹਿਣ ਦਿੱਤਾ ਹੋਵੇ।ਉਹਨਾਂ ਕਿਹਾ ਕਿ ਅਜਿਹੀਆਂ ਹਰਕਤਾਂ ਕਰਕੇ ਉਹ ਨਾ ਤਾਂ ਪੰਜਾਬ ਦੇ ਲੋਕਾਂ ਨੂੰ ਗੁੰਮਰਾਹ ਕਰ ਸਕਦੇ ਹਨ ਅਤੇ ਨਾ ਹੀ ਕਿਸੇ ਦੀ ਹਮਦਰਦੀ ਹਾਸਲ ਕਰ ਸਕਦੇ ਹਨ।ਆਮ ਆਦਮੀ ਪਾਰਟੀ ਉੱਤੇ ਸਿਆਸੀ ਤਨਜ਼ ਕਸਦਿਆਂ, ਸ੍ਰ. ਵਲਟੋਹਾ ਨੇ ਕਿਹਾ ਕਿ ਇਸ ਪਾਰਟੀ ਦਾ ਪ੍ਰਧਾਨ ਹੀ ਲੋਕਾਂ ਵਲੋਂ ਦਿੱਤੀ ਗਈ ਜ਼ਿਮੇਂਵਾਰੀ ਨਿਭਾਉਣ ਤੋਂ ਭੱਜ ਗਿਆ ਹੋਵੇ ਉਸ ਪਾਰਟੀ ਦੇ ਹੋਰ ਕਿਸੇ ਆਗੂ ਤੋਂ ਵਾਅਦਾ ਨਿਭਾਉਣ ਦੀ ਕੀ ਆਸ ਕੀਤੀ ਜਾ ਸਕਦੀ ਹੈ? ਉਹਨਾਂ ਕਿਹਾ ਕਿ ਦਿੱਲੀ ਵਿਚ ਆਪਣੀ ਬਣੀ ਬਣਾਈ ਸਰਕਾਰ ਛੱਡਕੇ ਭੱਜ ਜਾਣ ਤੋਂ ਸਿੱਧ ਹੋ ਗਿਆ ਹੈ ਕਿ ਆਮ ਆਦਮੀ ਪਾਰਟੀ ਦੇ ਆਗੂ ਸਿਰਫ ਦੂਜੀਆਂ ਪਾਰਟੀਆਂ ਜਾਂ ਸਰਕਾਰਾਂ ਵਿਚ ਨੁਕਸ ਹੀ ਕੱਢ ਸਕਦੇ ਹਨ, ਪਰ ਖੁਦ ਸਰਕਾਰਾਂ ਚਲਾਉਣ ਦੇ ਕਾਬਲ ਨਹੀਂ ਹਨ।ਆਮ ਆਦਮੀ ਪਾਰਟੀ ਦੇ ਵਰਤਾਰੇ ਨੂੰ ਪਾਣੀ ਦਾ ਬੁਲਬੁਲਾ ਦਸਦਿਆਂ, ਸ੍ਰ. ਵਲਟੋਹਾ ਨੇ ਕਿਹਾ ਕਿ ਦਿੱਲੀ ਦੇ ਲੋਕਾਂ ਵਾਂਗ ਪੰਜਾਬ ਦੀ ਜਨਤਾ ਵੀ ਇਸ ਪਾਰਟੀ ਦੇ ਉਮੀਦਵਾਰਾਂ ਨੂੰ ਵੋਟਾਂ ਪਾ ਕੇ ਫਛਤਾ ਰਹੀ ਹੈ ਅਤੇ ਆਉਣ ਵਾਲੀਆਂ ਚੋਣਾਂ ਤੱਕ ਤਾਂ ਇਸ ਪਾਰਟੀ ਦਾ ਸ਼ਾਇਦ ਵਜੂਦ ਹੀ ਕਾਇਮ ਨਾ ਰਹੇ।