Web Admin

5 ਦਰਿਆ ਨਿਊਜ਼ (ਸਾਹਿਬ ਸੰਧੂ)

ਭਦੌੜ/ਸ਼ਹਿਣਾ , 18 May 2014

ਭਾਵੇਂ ਕਿ ਸਾਇੰਸ ਬਹੁਤ ਜ਼ਿਆਦਾ ਤਰੱਕੀ ਕਰ ਗਈ ਹੈ ਅਤੇ ਜਲਦੀ ਹੀ ਮੰਗਲ ਗ੍ਰਹਿ ਉਪਰ ਕਲੋਨੀਆਂ ਬਣਾ ਕੇ ਲੋਕਾਂ ਨੂੰ ਵਸਾਉਣ ਦੀ ਯੋਜਨਾ ਬਣ ਰਹੀ ਹੈ ਪਰ ਕਈ ਲੋਕ ਅਜਿਹੇ ਹਨ ਜੋ ਗਰੀਬ ਅਤੇ ਅਨਪੜ੍ਹ ਲੋਕਾਂ ਦਾ ਵਹਿਮਾਂ-ਭਰਮਾਂ ਦੇ ਨਾਮ 'ਤੇ ਸ਼ੋਸ਼ਣ ਕਰ ਰਹੇ ਹਨ।ਅਜਿਹਾ ਹੀ ਕਿੱਸਾ ਭਦੌੜ ਸ਼ਹਿਰ ਵਿੱਚ ਉਸ ਸਮੇਂ ਸਾਹਮਣੇ ਆਇਆ ਜਦੋਂ ਮਨਜਿੰਦਰ ਸਿੰਘ ਪੁੱਤਰ ਪ੍ਰਕਾਸ਼ ਸਿੰਘ ਨਿਵਾਸੀ ਮਹੱਲਾ ਨੈਣੇਵਾਲਾ ਦੀ ਇੱਕ ਅਖੌਤੀ ਬਾਬੇ ਨੇ ਇਲਾਜ ਕਰਨ ਦੇ ਨਾਮ 'ਤੇ ਨਜਾਇਜ਼ ਕੁੱਟਮਾਰ ਕੀਤੀ।  ਪੀੜ੍ਹਤ ਦੇ ਭਰਾ ਗੋਬਿੰਦ ਸਿੰਘ ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਮੇਰੇ ਭਰਾ ਦੇ ਪਿਛਲੇ ਕਾਫ਼ੀ ਸਮੇਂ ਤੋਂ ਪਿੱਠ 'ਚ ਦਰਦ ਰਹਿੰਦਾ ਸੀ, ਜਿਸਦਾ ਅਸੀਂ ਕਾਫ਼ੀ ਇਲਾਜ ਕਰਵਾਇਆ ਸੀ ਪਰ ਭਦੌੜ ਦੇ ਹੀ ਨਿਵਾਸੀ ਇੱਕ ਅਖੌਤੀ ਬਾਬੇ ਨੇ ਮੇਰੀ ਅਨਪੜ੍ਹ ਮਾਤਾ ਨੂੰ ਆਪਣੀਆਂ ਗੱਲ੍ਹਾਂ 'ਚ ਲੈ ਲਿਆ ਅਤੇ ਕਿਹਾ ਕਿ ਮੈਂ ਥੌਲੇ ਨਾਲ ਤੁਹਾਡੇ ਲੜਕੇ ਦਾ ਇਲਾਜ ਕਰ ਦੇਵਾਂਗਾ। ਜਿਸ 'ਤੇ ਮੇਰੀ ਮਾਤਾ, ਮੇਰੇ ਭਰਾ ਮਨਜਿੰਦਰ ਸਿੰਘ ਨੂੰ ਉਕਤ ਬਾਬੇ ਪਾਸ ਇਲਾਜ ਲਈ ਲੈ ਗਈ ਤਾਂ ਇਸ ਬਾਬੇ ਨੇ ਮੇਰੀ ਮਾਤਾ ਨੂੰ ਇਹ ਕਹਿ ਕੇ ਘਰ ਭੇਜ ਦਿੱਤਾ ਕਿ ਇਸਦੇ ਇਲਾਜ 'ਚ ਪੂਰੀ ਰਾਤ ਲੱਗੇਗੀ ਅਤੇ ਤੁਸੀਂ ਕੱਲ੍ਹ ਸਵੇਰੇ ਆ ਕੇ ਇਸਨੂੰ ਲੈ ਜਾਣਾ। ਉਕਤ ਅਖੌਤੀ ਬਾਬੇ ਨੇ ਰਾਤ ਸਮੇਂ ਆਪਣੇ ਸਾਥੀਆਂ ਨਾਲ ਮਿਲ ਕੇ ਪਹਿਲਾਂ ਤਾਂ ਮੇਰੇ ਭਰਾ ਨੂੰ ਸ਼ਰਾਬ ਪਿਲਾਈ ਅਤੇ ਫਿਰ ਸਭ ਨੇ ਮਿਲ ਕੇ ਇਸਦੀ ਕੁੱਟਮਾਰ ਕੀਤੀ। ਅਖੌਤੀ ਬਾਬੇ ਵੱਲੋਂ ਮੇਰੇ ਭਰਾ ਦੇ ਵਾਲ ਕੱਟ ਲਏ ਗਏ ਅਤੇ ਖੂਨ ਵੀ ਲੈ ਲਿਆ ਗਿਆ। ਅਖੌਤੀ ਬਾਬੇ ਅਤੇ ਉਸਦੇ ਸਾਥੀਆਂ ਵੱਲੋਂ ਕਈ ਤਰ੍ਹਾਂ ਦੇ ਤਸੀਹੇ ਜਿਵੇਂ ਕਿ ਵਾਰ-ਵਾਰ ਕੰਧ 'ਚ ਸਿਰ ਮਾਰਣਾ, ਪਿੱਠ ਉਪਰ ਚੜ੍ਹ ਜਾਣਾ ਅਤੇ ਚਮਟਿਆਂ ਆਦਿ ਨਾਲ ਕੁੱਟਮਾਰ ਕਰਨ ਕਾਰਨ ਜਦੋਂ ਅਸੀਂ ਮਨਜਿੰਦਰ ਸਿੰਘ ਨੂੰ ਲੈਣ ਗਏ ਤਾਂ ਉਹ ਬਹੁਤ ਹੀ ਜਿਆਦਾ ਬੁਰੀ ਹਾਲਤ 'ਚ ਸੀ।  ਉਹ ਪਾਗਲਾਂ ਦੀ ਤਰ੍ਹਾਂ ਗੱਲਬਾਤ ਕਰ ਰਿਹਾ ਸੀ ਅਤੇ ਵਾਰ-ਵਾਰ ਬੇਹੋਸ਼ ਹੋ ਰਿਹਾ ਸੀ, ਜਦੋਂ ਅਸੀਂ ਇਸ ਨੂੰ ਇਲਾਜ ਲਈ ਸਰਕਾਰੀ ਹਸਪਤਾਲ ਭਦੌੜ ਵਿਖੇ ਲੈ ਕੇ ਗਏ ਤਾਂ ਇਹਨਾਂ ਨੇ ਡਾਕਟਰਾਂ ਦੀ ਘਾਟ ਹੋਣ ਕਾਰਨ ਬਰਨਾਲਾ ਤੋਂ ਇਲਾਜ ਕਰਵਾਉਣ ਲਈ ਕਿਹਾ। ਹੁਣ ਇਸਦਾ ਇਲਾਜ ਬਰਨਾਲਾ ਦੇ ਇੱਕ ਪ੍ਰਾਈਵੇਟ ਹਸਪਤਾਲ 'ਚ ਚੱਲ ਰਿਹਾ ਹੈ। ਅੱਗੇ ਜਾਣਕਾਰੀ ਦਿੰਦੇ ਹੋਏ ਗੋਬਿੰਦ ਸਿੰਘ ਨੇ ਦੱਸਿਆ ਕਿ ਉਹਨਾਂ ਨੇ ਅਖੌਤੀ ਬਾਬੇ ਦੇ ਖਿਲਾਫ਼ ਥਾਣਾ ਭਦੌੜ 'ਚ ਦਰਖਾਸਤ ਦੇ ਦਿੱਤੀ ਹੈ। ਜਦੋਂ ਇਸ ਸਬੰਧੀ ਥਾਣਾ ਭਦੌੜ ਦੇ ਏ.ਐਸ.ਆਈ. ਜਸਵਿੰਦਰ ਸਿੰਘ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਹਨਾਂ ਨੇ ਦੱਸਿਆ ਕਿ ਇਸ ਸਬੰਧੀ ਪੜਤਾਲ ਜਾਰੀ ਹੈ।