ਪਾਰਸ ਹੈਲਥ ਪੰਚਕੂਲਾ ਦੀ ਵਿਸ਼ੇਸ਼ਗਿਆ ਟੀਮ ਨੇ ਦਿੱਲੀ ਦੇ 49 ਸਾਲਾ ਆਨੰਦ ਪ੍ਰਕਾਸ਼ ਮਿਸ਼ਰਾ ਦਾ ਸਫਲ ਕਿਡਨੀ ਟ੍ਰਾਂਸਪਲਾਂਟ ਕਰਕੇ ਉਸ ਨੂੰ ਨਵੀਂ ਜ਼ਿੰਦਗੀ ਬਖ਼ਸ਼ੀ। ਮਰੀਜ਼ ਲੰਮੇ ਸਮੇਂ ਤੋਂ ਕ੍ਰੋਨਿਕ ਕਿਡਨੀ ਬਿਮਾਰੀ (CKD), ਸ਼ੂਗਰ ਅਤੇ ਹਾਈ ਬਲੱਡ ਪ੍ਰੈਸ਼ਰ ਨਾਲ ਪੀੜਤ ਸੀ ਅਤੇ ਡਾਇਲਿਸਿਸ ‘ਤੇ ਨਿਰਭਰ ਸੀ। ਇਸ ਤੋਂ ਇਲਾਵਾ ਉਸ ਨੂੰ ਦਿਲ ਦੀ ਗੰਭੀਰ ਬਿਮਾਰੀ (ਕਾਰਡੀਓਮਾਇਓਪੈਥੀ), ਫੇਫੜਿਆਂ ‘ਚ ਪਾਣੀ ਅਤੇ ਹੋਰ ਜਟਿਲਤਾਵਾਂ ਵੀ ਸਨ, ਜਿਸ ਕਾਰਨ ਉਹ ਉੱਚ-ਖ਼ਤਰੇ ਵਾਲੇ ਮਰੀਜ਼ ਵਜੋਂ ਮੰਨਿਆ ਗਿਆ।
ਇਹਨਾਂ ਮੁਸ਼ਕਲ ਹਾਲਾਤਾਂ ਵਿੱਚ ਉਸ ਦੀ ਪਤਨੀ, ਸ੍ਰੀਮਤੀ ਰਜਨੀ ਨਿਸ਼ਾ ਨੇ ਨਿਸ਼ਕਾਮ ਭਾਵ ਨਾਲ ਕਿਡਨੀ ਦਾਨ ਕਰਕੇ ਪਤੀ ਦੀ ਜ਼ਿੰਦਗੀ ਬਚਾਉਣ ਦਾ ਫ਼ੈਸਲਾ ਲਿਆ। ਲੈਪ੍ਰੋਸਕੋਪਿਕ ਤਰੀਕੇ ਨਾਲ ਕੀਤੀ ਗਈ ਸਰਜਰੀ ਤੋਂ ਬਾਅਦ ਉਹ ਸਿਰਫ਼ ਤਿੰਨ ਦਿਨਾਂ ਵਿੱਚ ਸਿਹਤਯਾਬ ਹੋ ਕੇ ਘਰ ਪਰਤ ਗਈ। ਦੂਜੇ ਪਾਸੇ, ਸ਼੍ਰੀ ਮਿਸ਼ਰਾ ਦੀ ਸਿਹਤ ਵੀ ਤੇਜ਼ੀ ਨਾਲ ਸੁਧਰੀ—ਕਿਡਨੀ ਦੀ ਕਾਰਗੁਜ਼ਾਰੀ ਨਾਰਮਲ ਹੋਈ, ਫੇਫੜਿਆਂ ‘ਚੋਂ ਪਾਣੀ ਦੂਰ ਹੋ ਗਿਆ ਅਤੇ ਦਿਲ ਦੀ ਕਾਰਗੁਜ਼ਾਰੀ ਵੀ ਬਿਹਤਰ ਹੋ ਗਈ।
ਡਾ. ਸੁਨੀਲ ਕੁਮਾਰ, ਡਾਇਰੈਕਟਰ – ਕਿਡਨੀ ਟ੍ਰਾਂਸਪਲਾਂਟ ਨੇ ਕਿਹਾ, “ਇਹ ਬਹੁਤ ਹੀ ਚੁਣੌਤੀਪੂਰਨ ਕੇਸ ਸੀ। ਮਰੀਜ਼ ਦੀ ਰਿਕਵਰੀ ਪਰਿਵਾਰ ਦੇ ਭਰੋਸੇ, ਡੋਨਰ ਦੇ ਹੌਂਸਲੇ ਅਤੇ ਸਾਡੇ ਟੀਮਵਰਕ ਦਾ ਨਤੀਜਾ ਹੈ। ਇਹ ਪਾਰਸ ਹੈਲਥ ਪੰਚਕੂਲਾ ਦੀ ਵਿਸ਼ਵ-ਸਤਰੀਯ ਸਿਹਤ ਸੇਵਾਵਾਂ ਦੀ ਪ੍ਰਤੀਬੱਧਤਾ ਨੂੰ ਦਰਸਾਉਂਦਾ ਹੈ।” ਫੈਸਿਲਿਟੀ ਡਾਇਰੈਕਟਰ ਡਾ. ਪੰਕਜ ਮਿੱਤਲ ਨੇ ਦੱਸਿਆ ਕਿ ਪਾਰਸ ਹੈਲਥ ਪੰਚਕੂਲਾ ਪਿਛਲੇ ਦੋ ਸਾਲਾਂ ਤੋਂ ਲਗਾਤਾਰ ਕਿਡਨੀ ਟ੍ਰਾਂਸਪਲਾਂਟ ਕਰ ਰਿਹਾ ਹੈ, ਜਿਨ੍ਹਾਂ ਵਿੱਚ ਕਈ ਜਟਿਲ ਅਤੇ ਉੱਚ-ਖ਼ਤਰੇ ਵਾਲੇ ਕੇਸ ਵੀ ਸ਼ਾਮਲ ਹਨ।
ਇਸ ਸਫਲਤਾ ਨੇ ਨਾ ਸਿਰਫ਼ ਹਸਪਤਾਲ ਦੀ ਮੈਡੀਕਲ ਖੂਬੀ ਸਾਬਤ ਕੀਤੀ ਹੈ, ਸਗੋਂ ਇਲਾਕੇ ਦੇ ਮਰੀਜ਼ਾਂ ਤੱਕ ਅਡਵਾਂਸਡ ਹੈਲਥਕੇਅਰ ਪਹੁੰਚਾਉਣ ਦੇ ਮਿਸ਼ਨ ਨੂੰ ਵੀ ਮਜ਼ਬੂਤ ਕੀਤਾ ਹੈ। ਇਹ ਕੇਸ ਅੰਗਦਾਨ ਦੀ ਮਹੱਤਤਾ ਨੂੰ ਵੀ ਰੋਸ਼ਨ ਕਰਦਾ ਹੈ। ਅੰਗਦਾਨ ਨਾ ਸਿਰਫ਼ ਜ਼ਿੰਦਗੀਆਂ ਬਚਾਉਂਦਾ ਹੈ, ਸਗੋਂ ਬੇਸ਼ੁਮਾਰ ਮਰੀਜ਼ਾਂ ਵਿੱਚ ਨਵੀਂ ਉਮੀਦ ਜਗਾਉਂਦਾ ਹੈ। ਪਾਰਸ ਹੈਲਥ ਅੰਗਦਾਨ ਬਾਰੇ ਜਾਗਰੂਕਤਾ ਫੈਲਾਉਣ ਲਈ ਨਿਰੰਤਰ ਯਤਨਸ਼ੀਲ ਹੈ।