ਪੰਜਾਬ ਕੇਂਦਰੀ ਯੂਨੀਵਰਸਿਟੀ (ਸੀਯੂ ਪੰਜਾਬ) ਵੱਲੋਂ ਵਾਈਸ ਚਾਂਸਲਰ ਪ੍ਰੋ. ਰਾਘਵੇਂਦਰ ਪ੍ਰਸਾਦ ਤਿਵਾਰੀ ਦੇ ਪੰਜ ਸਾਲਾ ਕਾਰਜਕਾਲ ਦੇ ਪੂਰੇ ਹੋਣ 'ਤੇ ਇੱਕ ਵਿਸ਼ੇਸ਼ ਸਮਾਰੋਹ ਆਯੋਜਿਤ ਕੀਤਾ ਗਿਆ। ਇਸ ਮੌਕੇ 'ਤੇ ਯੂਨੀਵਰਸਿਟੀ ਦੇ ਅਧਿਕਾਰੀਆਂ ਅਤੇ ਅਧਿਆਪਕਾਂ ਨੇ ਯੂਨੀਵਰਸਿਟੀ ਨੂੰ ਨਵੀਆਂ ਉਚਾਈਆਂ 'ਤੇ ਲਿਜਾਣ ਲਈ ਪ੍ਰੋ. ਤਿਵਾਰੀ ਦਾ ਧੰਨਵਾਦ ਕੀਤਾ।
ਪ੍ਰੋ. ਵਾਈਸ ਚਾਂਸਲਰ ਪ੍ਰੋ. ਕਿਰਨ ਹਜ਼ਾਰਿਕਾ ਨੇ ਵਾਈਸ ਚਾਂਸਲਰ ਪ੍ਰੋ. ਤਿਵਾਰੀ ਦਾ ਖੋਜ, ਨਵੀਨਤਾ ਅਤੇ ਮੁੱਲ-ਅਧਾਰਤ ਸਿੱਖਿਆ 'ਤੇ ਕੇਂਦ੍ਰਿਤ ਰਹਿੰਦੇ ਹੋਏ ਯੂਨੀਵਰਸਿਟੀ ਦੀ ਰਾਸ਼ਟਰੀ ਸਾਖ ਨੂੰ ਮਜ਼ਬੂਤ ਕਰਨ ਅਤੇ ਵਿਸ਼ਵ ਪੱਧਰ 'ਤੇ ਮਾਨਤਾ ਦੀ ਰਾਹ ਤੇ ਅੱਗੇ ਲੈ ਕੇ ਜਾਣ ਲਈ ਧੰਨਵਾਦ ਕੀਤਾ। ਉਨ੍ਹਾਂ ਨੇ ਉੱਚ ਸਿੱਖਿਆ ਖੇਤਰ ਵਿੱਚ ਪ੍ਰੋ. ਤਿਵਾਰੀ ਦੇ ਮਹੱਤਵਪੂਰਨ ਯੋਗਦਾਨ ਨੂੰ ਵੀ ਰੇਖਾਂਕਿਤ ਕੀਤਾ।
ਡੀਨ ਇੰਚਾਰਜ ਅਕਾਦਮਿਕ ਪ੍ਰੋ. ਆਰ.ਕੇ. ਵੁਸੁਰਿਕਾ ਨੇ ਕਿਹਾ ਕਿ ਵਾਈਸ ਚਾਂਸਲਰ ਪ੍ਰੋ. ਤਿਵਾਰੀ ਦੀ ਅਗਵਾਈ ਹੇਠ ਸਾਲ 2020 ਤੋਂ 2025 ਦਰਮਿਆਨ ਯੂਨੀਵਰਸਿਟੀ ਦੇ ਅਕਾਦਮਿਕ ਪ੍ਰੋਗਰਾਮ 69 ਤੋਂ ਵੱਧ ਕੇ 100 ਹੋ ਗਏ ਅਤੇ ਫੈਕਲਟੀ ਮੈਂਬਰਾਂ ਦੀ ਗਿਣਤੀ 128 ਤੋਂ 201 ਤੱਕ ਪਹੁੰਚ ਗਈ। ਉਨ੍ਹਾਂ ਨੇ ਧੰਨਵਾਦ ਕਰਦਿਆਂ ਕਿਹਾ ਕਿ ਪ੍ਰੋ. ਤਿਵਾਰੀ ਨੇ ਏਕੀਕ੍ਰਿਤ ਯੂਜੀ ਅਤੇ ਸੰਯੁਕਤ ਡਿਪਲੋਮਾ ਕੋਰਸ ਸ਼ੁਰੂ ਕਰਵਾਏ ਅਤੇ ਐਨਈਪੀ 2020 ਦੇ ਸੁਧਾਰਾਂ ਨੂੰ ਸਫਲਤਾਪੂਰਵਕ ਲਾਗੂ ਕੀਤਾ, ਜਿਸ ਨਾਲ ਵਿਦਿਆਰਥੀਆਂ ਲਈ ਸਿੱਖਣ ਦਾ ਅਨੁਭਵ ਹੋਰ ਲਚਕੀਲਾ ਅਤੇ ਪ੍ਰਭਾਵਸ਼ਾਲੀ ਹੋਇਆ।
ਡਾਇਰੈਕਟਰ ਖੋਜ ਅਤੇ ਵਿਕਾਸ ਪ੍ਰੋ. ਅੰਜਨਾ ਮੁਨਸ਼ੀ ਨੇ ਕਿਹਾ ਕਿ ਵਾਈਸ ਚਾਂਸਲਰ ਪ੍ਰੋ. ਤਿਵਾਰੀ ਦੀ ਅਗਵਾਈ ਹੇਠ ਪਿਛਲੇ ਪੰਜ ਸਾਲਾਂ ਦੌਰਾਨ ਖੋਜ ਵਿੱਚ ਬੇਮਿਸਾਲ ਵਾਧਾ ਹੋਇਆ। ਸਕੋਪਸ ਪੇਪਰ 4.18 ਗੁਣਾ ਵਧੇ, ਹਵਾਲੇ 11.54 ਗੁਣਾ ਵਧੇ ਅਤੇ h-ਇੰਡੈਕਸ 111 ਤੱਕ ਪਹੁੰਚ ਗਿਆ। ਖੋਜ ਗ੍ਰਾਂਟਾਂ ਵੀ ₹63.77 ਕਰੋੜ ਤੋਂ ਵੱਧ ਕੇ ₹104 ਕਰੋੜ ਹੋ ਗਈਆਂ।
ਆਈਕਿਊਏਸੀ ਡਾਇਰੈਕਟਰ ਪ੍ਰੋ. ਮੋਨੀਸ਼ਾ ਧੀਮਾਨ ਨੇ ਵਾਈਸ ਚਾਂਸਲਰ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਪ੍ਰੋ. ਤਿਵਾਰੀ ਦੀ ਅਗਵਾਈ ਹੇਠ ਯੂਨੀਵਰਸਿਟੀ ਨੇ 2023 ਵਿੱਚ ਨੈਕ ਤੋਂ 'ਏ+’ ਗ੍ਰੇਡ ਪ੍ਰਾਪਤ ਕੀਤਾ ਅਤੇ ਲਗਾਤਾਰ ਛੇ ਸਾਲਾਂ ਲਈ ਐਨ.ਆਈ.ਆਰ.ਐਫ. ਰੈਂਕਿੰਗ ਅਨੁਸਾਰ ਭਾਰਤ ਦੀਆਂ ਚੋਟੀ ਦੀਆਂ 100 ਯੂਨੀਵਰਸਿਟੀਆਂ ਵਿੱਚ ਸਥਾਨ ਪ੍ਰਾਪਤ ਕੀਤਾ। ਉਨ੍ਹਾਂ ਨੇ ਬਠਿੰਡਾ ਅਤੇ ਉੱਤਰੀ ਭਾਰਤ ਦੇ ਉੱਚ ਸਿੱਖਿਆ ਸੰਸਥਾਨਾਂ ਵਿਚਕਾਰ ਸਹਿਯੋਗ ਮਜ਼ਬੂਤ ਕਰਨ ਲਈ ਬਣਾਏ ਗਏ ਕਨਸੋਰਸ਼ੀਅਮ ਦੀ ਵੀ ਪ੍ਰਸੰਸਾ ਕੀਤੀ।
ਰਜਿਸਟਰਾਰ ਡਾ. ਵਿਜੇ ਸ਼ਰਮਾ ਨੇ ਕਿਹਾ ਕਿ ਵਾਈਸ ਚਾਂਸਲਰ ਪ੍ਰੋ. ਤਿਵਾਰੀ ਨੇ ਪਾਰਦਰਸ਼ੀ ਪ੍ਰਸ਼ਾਸਨ ਸਥਾਪਤ ਕੀਤਾ ਅਤੇ ਯੂਨੀਵਰਸਿਟੀ ਦੇ 500 ਏਕੜ ਕੈਂਪਸ ਨੂੰ ਆਧੁਨਿਕ, ਹਰੇ-ਭਰੇ ਕੈਂਪਸ ਵਿੱਚ ਬਦਲ ਦਿੱਤਾ। ਉਨ੍ਹਾਂ ਨੇ ਨਵੀਆਂ ਸਹੂਲਤਾਂ ਜਿਵੇਂ ਕਿ ਕੇਂਦਰੀ ਵਿਦਿਆਲਿਆ, ਪ੍ਰਸਤਾਵਿਤ ਪ੍ਰਸ਼ਾਸਕੀ ਬਲਾਕ ਅਤੇ ਲਾਇਬ੍ਰੇਰੀ, ਕਮਿਊਨਿਟੀ ਰੇਡੀਓ ਸਟੇਸ਼ਨ (ਟੈਸਟਿੰਗ ਹੇਠ) ਅਤੇ ਹੋਰ ਪੰਜ ਇਮਾਰਤਾਂ (ਹਾਲ ਹੀ ਵਿੱਚ ਨੀਂਹ ਰੱਖੀ ਗਈ) ਬਾਰੇ ਜਾਣਕਾਰੀ ਦਿੱਤੀ।
ਫਾਇਨੈਂਸ ਅਫ਼ਸਰ ਡਾ. ਰਾਜਕੁਮਾਰ ਸ਼ਰਮਾ ਨੇ ਵਾਈਸ ਚਾਂਸਲਰ ਪ੍ਰੋ. ਤਿਵਾਰੀ ਦੀਆਂ ਮਹੱਤਵਪੂਰਨ ਪਹਿਲਕਦਮੀਆਂ ਦਾ ਜ਼ਿਕਰ ਕੀਤਾ। ਇਸ ਤੋਂ ਇਲਾਵਾ ਪ੍ਰੋ. ਸੰਜੀਵ ਠਾਕੁਰ (ਡੀਨ ਵਿਦਿਆਰਥੀ ਭਲਾਈ), ਪ੍ਰੋ. ਵਿਨੋਦ ਕੇ. ਗਰਗ (ਵਾਤਾਵਰਣ ਵਿਗਿਆਨ ਵਿਭਾਗ), ਪ੍ਰੋ. ਬਾਵਾ ਸਿੰਘ (ਐਸਸੀਏਐਸ ਵਿਭਾਗ) ਅਤੇ ਡਾ. ਰੂਬਲ ਕਨੋਜੀਆ (ਪੱਤਰਕਾਰੀ ਅਤੇ ਜਨਸੰਚਾਰ ਵਿਭਾਗ) ਨੇ ਵੀ ਯੂਨੀਵਰਸਿਟੀ ਦੇ ਸਮੁੱਚੇ ਵਿਕਾਸ, ਵਿਦਿਆਰਥੀ ਭਲਾਈ ਅਤੇ ਰਾਸ਼ਟਰੀ ਸਾਖ ਨੂੰ ਵਧਾਉਣ ਲਈ ਵਾਈਸ ਚਾਂਸਲਰ ਪ੍ਰੋ. ਤਿਵਾਰੀ ਦਾ ਧੰਨਵਾਦ ਕੀਤਾ।
ਵਾਈਸ ਚਾਂਸਲਰ ਪ੍ਰੋ. ਤਿਵਾਰੀ ਨੇ ਆਪਣੇ ਸੰਬੋਧਨ ਵਿੱਚ ਯੂਨੀਵਰਸਿਟੀ ਭਾਈਚਾਰੇ ਦਾ ਪਿਛਲੇ ਪੰਜ ਸਾਲਾਂ ਦੌਰਾਨ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਲਈ ਧੰਨਵਾਦ ਕੀਤਾ ਅਤੇ ਛੇਵੇਂ ਸਾਲ ਵਿੱਚ ਸੀਯੂ ਪੰਜਾਬ ਨੂੰ ਐਨ.ਆਈ.ਆਰ.ਐਫ. ਵਿੱਚ ਚੋਟੀ ਦੀਆਂ 50 ਯੂਨੀਵਰਸਿਟੀਆਂ ਵਿੱਚ ਲਿਜਾਣ ਦਾ ਸੰਕਲਪ ਸਾਂਝਾ ਕੀਤਾ। ਉਨ੍ਹਾਂ ਨੇ ਰੋਡਮੈਪ ਦੱਸਦਿਆਂ ਕਿਹਾ ਕਿ ਅਧਿਆਪਕਾਂ ਨੂੰ ਗੁਣਵੱਤਾ ਸਿੱਖਿਆ ਅਤੇ ਖੋਜ ਦੇ ਨਾਲ-ਨਾਲ ਨਤੀਜਾ ਅਧਾਰਤ ਸਿੱਖਿਆ-ਅਧਾਰਿਤ ਪਾਠਕ੍ਰਮ, ਵਿਦਿਆਰਥੀ-ਕੇਂਦ੍ਰਿਤ ਸਿੱਖਿਆ, ਨਿਰੰਤਰ ਮੁਲਾਂਕਣ ਅਤੇ ਪ੍ਰਭਾਵਸ਼ਾਲੀ ਆਉਟਰੀਚ 'ਤੇ ਧਿਆਨ ਦੇਣਾ ਚਾਹੀਦਾ ਹੈ।
ਉਨ੍ਹਾਂ ਨੇ ਭਵਿੱਖਮੁਖੀ ਪ੍ਰੋਗਰਾਮਾਂ ਨੂੰ ਸ਼ੁਰੂ ਕਰਨ, ਵਿਦਿਆਰਥੀਆਂ ਨੂੰ ਨਵੀਂ ਪੀੜ੍ਹੀ ਦੇ ਹੁਨਰਾਂ ਨਾਲ ਲੈਸ ਕਰਨ ਅਤੇ ਮੁੱਲ-ਅਧਾਰਿਤ ਸਰਬਪੱਖੀ ਸਿੱਖਿਆ ਪ੍ਰਦਾਨ ਕਰਨ ਦੀ ਲੋੜ 'ਤੇ ਵੀ ਜ਼ੋਰ ਦਿੱਤਾ, ਤਾਂ ਜੋ ਨੌਜਵਾਨ ਵਿਕਸਿਤ ਭਾਰਤ @2047 ਦੇ ਨਿਰਮਾਣ ਵਿੱਚ ਯੋਗਦਾਨ ਪਾ ਸਕਣ।
ਪਿਛਲੇ ਪੰਜ ਸਾਲਾਂ ਵਿੱਚ ਵਾਈਸ-ਚਾਂਸਲਰ ਪ੍ਰੋ. ਤਿਵਾਰੀ ਦੀ ਅਗਵਾਈ ਹੇਠ ਪੰਜਾਬ ਕੇਂਦਰੀ ਯੂਨੀਵਰਸਿਟੀ ਦੀਆਂ ਮੁੱਖ ਪ੍ਰਾਪਤੀਆਂ
• ਲਗਾਤਾਰ 6 ਸਾਲਾਂ ਤੋਂ ਐਨਆਈਆਰਐਫ ਦੀਆਂ ਚੋਟੀ ਦੀਆਂ 100 ਯੂਨੀਵਰਸਿਟੀਆਂ ਦੀ ਸੂਚੀ ਵਿੱਚ ਸ਼ਮੂਲੀਅਤ; 2024 ਵਿੱਚ ਯੂਨੀਵਰਸਿਟੀ ਸ਼੍ਰੇਣੀ ਵਿੱਚ 83ਵਾਂ ਅਤੇ ਫਾਰਮੇਸੀ ਵਿੱਚ 23ਵਾਂ ਰੈਂਕ।
• ਸਾਲ 2023 ਵਿੱਚ ਨੈਕ ਤੋਂ 'ਏ ਪਲੱਸ' ਗ੍ਰੇਡ ਪ੍ਰਾਪਤ ਕਰਨਾ।
• ਸਾਲ 2025 ਦੀ ਰਾਸ਼ਟਰੀ ਦਰਜਾਬੰਦੀ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ: ਆਈਆਈਆਰਐਫ (ਕੇਂਦਰੀ ਯੂਨੀਵਰਸਿਟੀ ਸ਼੍ਰੇਣੀ) ਵਿੱਚ 7ਵਾਂ, ਆਉਟਲੁੱਕ ਇੰਡੀਆ ਆਈ-ਕੇਅਰ (ਕੇਂਦਰੀ ਯੂਨੀਵਰਸਿਟੀ ਸ਼੍ਰੇਣੀ) ਵਿੱਚ 9ਵਾਂ, ਇੰਡੀਆ ਟੂਡੇ (ਸਰਕਾਰੀ ਯੂਨੀਵਰਸਿਟੀ ਸ਼੍ਰੇਣੀ) ਵਿੱਚ 26ਵਾਂ ਅਤੇ ਨੇਚਰ ਇੰਡੈਕਸ ਵਿੱਚ 67ਵਾਂ ਰੈਂਕ ਪ੍ਰਾਪਤ ਕਰਨਾ।
• ਖੋਜ ਵਿੱਚ ਬੇਮਿਸਾਲ ਵਾਧਾ: ਸਕੋਪਸ ਪੇਪਰਾਂ ਵਿੱਚ 4.18 ਗੁਣਾਂ, ਹਵਾਲਾ ਸਾਈਟੇਸ਼ਨ ਵਿੱਚ 11.54 ਗੁਣਾਂ, ਐਚ-ਇੰਡੈਕਸ ਵਿੱਚ 2.64 ਗੁਣਾਂ ਵਾਧਾ ਹੋਇਆ। ਮਿਤੀ 20.08.2025 ਤੱਕ ਇਹਨਾਂ ਦੀ ਗਿਣਤੀ 3,978 ਪੇਪਰ, 98,307 ਹਵਾਲੇ ਅਤੇ 111 ਐਚ-ਇੰਡੈਕਸ ਤੱਕ ਪਹੁੰਚ ਗਈ। ਖੋਜ ਗ੍ਰਾਂਟ ਸਾਲ 2020-21 ਵਿੱਚ ₹63.77 ਕਰੋੜ ਤੋਂ 2024-25 ਵਿੱਚ ₹104 ਕਰੋੜ ਤੱਕ ਪਹੁੰਚ ਗਈ।
• ਨਵੀਨਤਾ ਅਤੇ ਉੱਦਮਤਾ ਨੂੰ ਉਤਸ਼ਾਹਿਤ ਕਰਨ ਲਈ ਯੂਨੀਵਰਸਿਟੀ ਵਿਖੇ ਨਿਧੀ ਇਨਕਿਊਬੇਟਰ, ਈ-ਯੁਵਾ ਕੇਂਦਰ, ਅਤੇ ਆਈਡੀਆ ਲੈਬ ਦੀ ਸਥਾਪਨਾ ਕੀਤੀ ਗਈ।
• ਅਕਾਦਮਿਕ ਸਹਿਯੋਗ ਵਧਾਉਣ ਲਈ ਬਠਿੰਡਾ ਅਤੇ ਉੱਤਰੀ ਭਾਰਤ ਦੇ ਉੱਚ ਸਿੱਖਿਆ ਸੰਸਥਾਵਾਂ ਦੇ ਸੰਘ ਦੀ ਸਥਾਪਨਾ ਕੀਤੀ ਗਈ।
• ਯੂਨੀਵਰਸਿਟੀ ਵਿਖੇ ਰਾਸ਼ਟਰੀ ਸਿਖਿਆ ਨੀਤੀ 2020 ਸਫਲਤਾ ਪੂਰਵਕ ਲਾਗੂ
• ਯੂਨੀਵਰਸਿਟੀ ਬੁਨਿਆਦੀ ਢਾਂਚਾ ਵਿਕਾਸ: 2020 ਵਿੱਚ ਅਤਿ-ਆਧੁਨਿਕ ਘੁੱਦਾ ਕੈਂਪਸ ਦਾ ਉਦਘਾਟਨ; 2023 ਵਿੱਚ ਕੇਂਦਰੀ ਵਿਦਿਆਲਿਆ ਦੀ ਸ਼ੁਰੂਆਤ; 2024 ਵਿੱਚ ਪ੍ਰਸ਼ਾਸਕੀ ਇਮਾਰਤ ਅਤੇ ਕੇਂਦਰੀ ਲਾਇਬ੍ਰੇਰੀ ਦਾ ਨੀਂਹ ਪੱਥਰ; 2025 ਵਿੱਚ ₹201 ਕਰੋੜ ਦੇ ਨਵੇਂ ਪ੍ਰੋਜੈਕਟਾਂ ਦਾ ਨੀਂਹ ਪੱਥਰ।
• ਸਵੈ-ਨਿਰਭਰਤਾ ਅਤੇ ਹਰਿਆਲੀ ਪਹਿਲਕਦਮੀਆਂ: ਯੂਨੀਵਰਸਿਟੀ ਲਈ ਭਵਿੱਖ ਵਿੱਚ ਮਾਲੀਆ ਪੈਦਾ ਕਰਨ ਲਈ 100 ਏਕੜ ਕਿੰਨੂ ਗਾਰਡਨ ਅਤੇ ਵਪਾਰਕ ਪੌਦਿਆਂ ਦੀ ਬਿਜਾਈ ਕੀਤੀ ਗਈ।
• ਯੂਨੀਵਰਸਿਟੀ ਵਿਖੇ ਉੱਘੀਆਂ ਸ਼ਖਸੀਅਤਾਂ ਦਾ ਦੌਰਾ: ਯੂਨੀਵਰਸਿਟੀ ਦੇ 10ਵੇਂ ਕਨਵੋਕੇਸ਼ਨ (2025) 'ਤੇ ਭਾਰਤ ਦੇ ਰਾਸ਼ਟਰਪਤੀ ਸ਼੍ਰੀਮਤੀ ਦ੍ਰੋਪਦੀ ਮੁਰਮੂ ਅਤੇ 9ਵੇਂ ਕਨਵੋਕੇਸ਼ਨ (2024) 'ਤੇ ਸਾਬਕਾ ਰਾਸ਼ਟਰਪਤੀ ਸ਼੍ਰੀ ਰਾਮ ਨਾਥ ਕੋਵਿੰਦ ਅਤੇ ਰਾਸ਼ਟਰੀ ਸੁਰੱਖਿਆ ਸਲਾਹਕਾਰ ਸ਼੍ਰੀ ਅਜੀਤ ਡੋਵਾਲ ਦਾ ਦੌਰਾ।
• ਗਲੋਬਲ ਮਾਨਤਾ: 2024 ਵਿੱਚ ਸਟੈਨਫੋਰਡ ਦੇ ਚੋਟੀ ਦੇ ਵਿਗਿਆਨੀਆਂ ਦੀ ਸੂਚੀ ਵਿੱਚ 17 ਫੈਕਲਟੀ ਮੈਂਬਰ ਅਤੇ 1 ਖੋਜਕਰਤਾ ਸ਼ਾਮਲ ਹਨ।
• ਯੁਵਾ ਪ੍ਰਾਪਤੀਆਂ: 16ਵੇਂ ਰਾਸ਼ਟਰੀ ਯੁਵਾ ਸੰਸਦ ਮੁਕਾਬਲੇ ਵਿੱਚ ਪਹਿਲਾ ਇਨਾਮ ਜਿੱਤਿਆ।
• ਗੁਣਵੱਤਾ ਪ੍ਰਮਾਣੀਕਰਣ: ਆਈਐਸਓ 9001:2015 (ਗੁਣਵੱਤਾ ਪ੍ਰਬੰਧਨ ਪ੍ਰਣਾਲੀ) ਲਈ ਪ੍ਰਮਾਣੀਕਰਣ ਪ੍ਰਾਪਤ ਕੀਤਾ।
• ਪੁਰਸਕਾਰ: ਰਾਸ਼ਟਰੀ ਜਲ ਪੁਰਸਕਾਰ 2022 (ਸਰਬੋਤਮ ਕੈਂਪਸ ਉਪਯੋਗਤਾ) ਵਿੱਚ ਤੀਜਾ ਸਥਾਨ।
• ਅੰਤਰਰਾਸ਼ਟਰੀ ਮਾਨਤਾ: ਵਾਈਸ ਚਾਂਸਲਰ ਪ੍ਰੋ. ਤਿਵਾਰੀ ਨੇ ਤ੍ਰਿਭੁਵਨ ਯੂਨੀਵਰਸਿਟੀ, ਨੇਪਾਲ ਦੇ ਡਿਗਰੀ ਵੰਡ ਸਮਾਰੋਹ (2022) ਵਿੱਚ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ।