ਜਿਲ੍ਹਾ ਅੰਮ੍ਰਿਤਸਰ ਵਿੱਚ ਮਹਿਲਾਵਾਂ ਦੇ ਜੀਵਨਯਾਪਨ ਸਮਰੱਥਾ ਨੂੰ ਵਧਾਉਣ ਲਈ ਜ਼ਿਲਾ ਪ੍ਰਸ਼ਾਸਨ ਅੰਮ੍ਰਿਤਸਰ ਅਤੇ ਫੁਲਕਾਰੀ (ਵੂਮੈਨ ਆਫ਼ ਅੰਮ੍ਰਿਤਸਰ) ਵਿੱਚ ਇੱਕ ਸਾਂਝੇ ਤੌਰ ਤੇ ਸਮਝੌਤਾ ਕੀਤਾ ਗਿਆ। ਜਿਸਦੇ ਪਹਿਲੇ ਗੇੜ ਦੌਰਾਨ 20 ਸਵੈ ਸਹਾਇਤਾ ਸਮੂਹਾਂ ਨਾਲ ਜੁੜੀਆਂ ਹੋਈਆਂ ਮਹਿਲਾਵਾਂ ਨੂੰ ਡਿਜ਼ਿਟਲ ਲਿਟਰੇਸੀ, ਫਾਇਨੈਂਸ਼ਲ ਲਿਟਰੇਸੀ ਅਤੇ ਬੇਸਿਕ ਮਾਰਕੀਟਿੰਗ ਸਕਿਲਜ਼ ਦੀ ਟ੍ਰੇਨਿੰਗ ਦਿੱਤੀ ਜਾਵੇਗੀ ।
ਇਹ ਸਮਝੌਤਾ ਡਿਪਟੀ ਕਮਿਸ਼ਨਰ, ਅੰਮ੍ਰਿਤਸਰ ਸ਼੍ਰੀ ਮਤੀ ਸਾਕਸ਼ੀ ਸਾਹਨੀ ਅਤੇ ਫੁਲਕਾਰੀ (ਵੂਮੈਨ ਆਫ਼ ਅੰਮ੍ਰਿਤਸਰ) ਪ੍ਰਤੀਨਿਧੀ ਸ਼੍ਰੀਮਤੀ ਮੀਨਾਕਸ਼ੀ ਖੰਨਾ ਵਲੋ ਕੀਤਾ ਗਿਆ। ਜਿਸ ਦਾ ਉਦੇਸ਼ ਸਵੈ ਸਹਾਇਤਾ ਸਮੂਹਾਂ ਨਾਲ ਜੁੜੀਆਂ ਮਹਿਲਾਵਾਂ ਨੂੰ ਟਾਰਗੇਟਿਡ ਸਕਿਲ ਡਿਵੈਲਪਮੈਂਟ ਰਾਹੀਂ ਸਸ਼ਕਤ ਕਰਨਾ ਹੈ।
ਇਸ ਬਾਰੇ ਜਾਣਕਾਰੀ ਦਿੰਦਿਆ ਡਿਪਟੀ ਕਮਿਸ਼ਨਰ ਸਾਕਸ਼ੀ ਸਾਹਨੀ ਨੇ ਕਿਹਾ ਕਿ ਉਕਤ ਟ੍ਰੇਨਿੰਗ ਦੋ ਪੱਧਰਾਂ — ਬੇਸਿਕ ਕੰਪਿਊਟਰ ਲਿਟਰੇਸੀ ਅਤੇ ਐਡਵਾਂਸਡ ਟੈਲੀ — ਵਿੱਚ ਹੋਵੇਗੀ, ਨਾਲ ਹੀ ਪੈਸੇ ਦੇ ਪ੍ਰਬੰਧ ਅਤੇ ਮਾਰਕੀਟਿੰਗ ਓਰੀਏਂਟੇਸ਼ਨ 'ਤੇ ਵੱਖ-ਵੱਖ ਸੈਸ਼ਨ ਕਰਵਾਏ ਜਾਣਗੇ। ਉਦੇਸ਼ ਇਹ ਹੈ ਕਿ ਭਾਗੀਦਾਰ ਇਹਨਾਂ ਹੁਨਰਾਂ ਨੂੰ ਆਪਣੀ ਜੀਵਨਯਾਪਨ ਅਤੇ ਕਾਰੋਬਾਰਿਕ ਯਤਨਾਂ ਨੂੰ ਮਜ਼ਬੂਤ ਕਰਨ ਲਈ ਲਾਗੂ ਕਰ ਸਕਣ।
ਓਹਨਾਂ ਕਿਹਾ ਕਿ ਉਮੀਦਵਾਰਾਂ ਦੀ ਚੋਣ ਇੱਕ ਸਾਂਝੀ ਕਮੇਟੀ ਦੁਆਰਾ ਕੀਤੀ ਜਾਵੇਗੀ, ਜਿਸ ਵਿੱਚ ਜ਼ਿਲ੍ਹਾ ਪ੍ਰਸ਼ਾਸਨ ਅਤੇ ਫੁਲਕਾਰੀ (ਵੂਮੈਨ ਆਫ਼ ਅੰਮ੍ਰਿਤਸਰ) ਪ੍ਰਤੀਨਿਧੀ ਸ਼ਾਮਲ ਹੋਣਗੇ। ਇਹ ਪ੍ਰੋਗਰਾਮ ਇੱਕ ਸਾਲ ਤੱਕ ਚੱਲੇਗਾ ਅਤੇ ਪਾਇਲਟ ਦੀ ਸਫਲਤਾ ਦੇ ਆਧਾਰ 'ਤੇ ਇਸ ਦੇ ਵਿਸਤਾਰ 'ਤੇ ਵਿਚਾਰ ਕੀਤਾ ਜਾਵੇਗਾ।
ਇਸ ਮੌਕੇ 'ਤੇ ਡਿਪਟੀ ਕਮਿਸ਼ਨਰ, ਅੰਮ੍ਰਿਤਸਰ ਨੇ ਇਸ ਪਹਿਲ ਨੂੰ ਮਹਿਲਾਵਾਂ ਦੀ ਆਰਥਿਕ ਸਵਾਲੰਭਨਤਾ ਵੱਲ ਕਦਮ ਵਜੋਂ ਸਰਾਹਿਆ, ਜੋ ਸਰਕਾਰ ਦੇ ਸਮੁਦਾਇ-ਕੇਂਦਰਿਤ ਵਿਕਾਸ ਦੇ ਵੱਡੇ ਮਿਸ਼ਨ ਨਾਲ ਮੇਲ ਖਾਂਦਾ ਹੈ। ਸ਼੍ਰੀਮਤੀ ਮੀਨਾਕਸ਼ੀ ਖੰਨਾ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਦਾ ਧੰਨਵਾਦ ਕੀਤਾ ਅਤੇ ਫੁਲਕਾਰੀ (ਵੂਮੈਨ ਆਫ਼ ਅੰਮ੍ਰਿਤਸਰ) ਦੀ ਅੰਮ੍ਰਿਤਸਰ ਦੀਆਂ ਮਹਿਲਾਵਾਂ ਲਈ ਅਰਥਪੂਰਨ ਮੌਕੇ ਪੈਦਾ ਕਰਨ ਦੀ ਵਚਨਬੱਧਤਾ ਨੂੰ ਦੁਹਰਾਇਆ।
ਓਹਨਾਂ ਕਿਹਾ ਕਿ ਇਹ ਸਮਝੌਤਾ ਸਰਕਾਰੀ-ਸਿਵਲ ਸੋਸਾਇਟੀ ਸਾਂਝ ਦੇ ਖੇਤਰ ਵਿੱਚ ਇੱਕ ਮਹੱਤਵਪੂਰਨ ਮੋੜ ਹੈ, ਜੋ ਜ਼ਿਲ੍ਹੇ ਦੀਆਂ ਮਹਿਲਾਵਾਂ ਲਈ ਹੁਨਰ, ਭਰੋਸਾ ਅਤੇ ਨਵੇਂ ਮੌਕੇ ਪੈਦਾ ਕਰਨ ਦੇ ਸਾਂਝੇ ਵਿਜ਼ਨ ਨੂੰ ਮਜ਼ਬੂਤ ਕਰਦਾ ਹੈ। ਇਸ ਮੌਕੇ ਵਧੀਕ ਡਿਪਟੀ ਕਮਿਸ਼ਨਰ ਸ੍ਰੀਮਤੀ ਪਰਮਜੀਤ ਕੌਰ, ਜਿਲ੍ਹਾ ਨੋਡਲ ਅਫ਼ਸਰ ਅਮਿਕਾ ਵਰਮਾ ਤੋਂ ਇਲਾਵਾ ਵੱਡੀ ਗਿਣਤੀ ਵਿੱਚ ਫੁਲਕਾਰੀ ਦੀਆਂ ਮਹਿਲਾਵਾਂ ਹਾਜ਼ਰ ਸਨ।