ਅੰਮ੍ਰਿਤਸਰ ਜ਼ਿਲ੍ਹੇ ਦੀ ਮਜੀਠਾ ਵਿਧਾਨ ਸਭਾ ਸੀਟ ਦੇ ਪਿੰਡ ਭੰਗਾਲੀ, ਧਾਰੀਵਾਲ ਅਤੇ ਮਾੜੀ ਕਲਾਂ ਵਿੱਚ ਜ਼ਹਿਰੀਲੀ ਅਤੇ ਨਾਜਾਇਜ਼ ਸ਼ਰਾਬ ਪੀਣ ਕਾਰਨ 14 ਮਾਸੂਮ ਲੋਕਾਂ ਦੀ ਦਰਦਨਾਕ ਮੌਤ ’ਤੇ ਗਹਿਰਾ ਦੁੱਖ ਪ੍ਰਗਟਾਉਂਦਿਆਂ ਭਾਜਪਾ ਕਿਸਾਨ ਮੋਰਚਾ ਦੇ ਰਾਸ਼ਟਰੀ ਆਗੂ ਸੁੱਖਮਿੰਦਰਪਾਲ ਸਿੰਘ ਗਰੇਵਾਲ ਨੇ ਭਗਵੰਤ ਮਾਨ ਦੀ ਅਗਵਾਈ ਵਾਲੀ ਆਮ ਆਦਮੀ ਪਾਰਟੀ ਦੀ ਪੰਜਾਬ ਸਰਕਾਰ ’ਤੇ ਤਿੱਖਾ ਹਮਲਾ ਕੀਤਾ ਹੈ।
ਗਰੇਵਾਲ ਨੇ ਕਿਹਾ, “ਇਹ ਕੇਵਲ ਇਕ ਤ੍ਰਾਸਦੀ ਨਹੀਂ—ਇਹ ਗਰੀਬ ਲੋਕਾਂ ਦਾ ਠੰਡੇ ਖੂਨ ਨਾਲ ਕੀਤਾ ਗਿਆ ਮਨੁੱਖੀ ਜਨ ਸੰਘਾਰ ਹੈ, ਜੋ ਕਿ ਪੰਜਾਬ ਸਰਕਾਰ ਦੀ ਪੂਰੀ ਨਾਕਾਮੀ, ਅਪਰਾਧਕ ਲਾਪਰਵਾਹੀ ਅਤੇ ਮਿਲੀਭੁਗਤ ਭੇਦ ਭਰੀ ਚੁੱਪ ਦਾ ਨਤੀਜਾ ਹੈ। ਉਨ੍ਹਾਂ ਕਿਹਾ ਕਿ ਹੋਰ ਕੀ ਕਹੀਏ ਜਦੋਂ ਰਾਜ ਦੀ ਨੱਕ ਹੇਠ ਖੁੱਲ੍ਹਿਆਮ ਜ਼ਹਿਰੀਲੀ ਸ਼ਰਾਬ ਵੇਚੀ ਜਾਂਦੀ ਹੈ ਤੇ ਪ੍ਰਸ਼ਾਸਨ ਜਾਂ ਤਾਂ ਸੌਂ ਰਿਹਾ ਹੁੰਦਾ ਹੈ ਜਾਂ ਮਾਫੀਆ ਨੂੰ ਸੁਰੱਖਿਆ ਦੇ ਰਿਹਾ ਹੁੰਦਾ ਹੈ?
ਇਹ 14 ਮੌਤਾਂ ਹਾਦਸੇ ਨਹੀਂ—ਹੱਤਿਆਵਾਂ ਹਨ। ਹੱਤਿਆਵਾਂ ਜੋ ਭਗਵੰਤ ਮਾਨ ਦੀ ਨਾਕਾਮੀ, ਬੇਪਰਵਾਹੀ ਅਤੇ ਬੇਸ਼ਰਮ ਸ਼ਾਸਨ ਕਾਰਨ ਹੋਈਆਂ ਹਨ।” ਉਹਨਾਂ ਅੱਗੇ ਕਿਹਾ, “ਮਜੀਠਾ ਵਿੱਚ ਜੋ ਹੋਇਆ ਉਹ ਆਮ ਆਦਮੀ ਪਾਰਟੀ ਦੀ ਸਰਕਾਰ ਦੌਰਾਨ ਦੀ ਓਹੀ ਪੁਰਾਣੀ ਕਹਾਣੀ ਹੈ—ਕੱਚੀ ਸ਼ਰਾਬ ਵੇਚਣ ਵਾਲਿਆਂ ਦੀ ਚਾਂਦੀ, ਮਾਫੀਆਂ ਦੀ ਤਾਕਤ ਵਿੱਚ ਵਾਧਾ ਤੇ ਮਾਸੂਮਾਂ ਦੀਆਂ ਜਿੰਦਗੀਆਂ ਤਬਾਹ ਹਨ।
ਇਹ ਸ਼ਰਮ ਦੀ ਗੱਲ ਹੈ ਕਿ ਮੁੱਖ ਮੰਤਰੀ ਭਗਵੰਤ ਮਾਨ ਪੂਰੀ ਜ਼ਿੰਮੇਵਾਰੀ ਲੈਣ ਦੀ ਥਾਂ ਝੂਠੀਆਂ ਸੰਵੇਦਨਾਵਾਂ ਅਤੇ ਖੋਖਲੇ ਦਾਅਵਿਆਂ ਪਿੱਛੇ ਲੁੱਕ ਰਹੇ ਹਨ ਪਰ ਸ਼ਬਦ ਮਰੇ ਹੋਏ ਲੋਕਾਂ ਨੂੰ ਵਾਪਸ ਨਹੀਂ ਲਿਆ ਸਕਦੇ।” ਗਰੇਵਾਲ ਨੇ ਮੁੱਖ ਮੰਤਰੀ ਦੇ ਬਿਆਨ ਨੂੰ ਸਿਰਫ਼ ਇਕ ਦਿਖਾਵਾ ਦੱਸਦਿਆਂ ਕਿਹਾ ਕਿ ਇਹ “ਮੀਡੀਆ ਲਈ ਰਚਿਆ ਗਿਆ ਇਕ ਨਾਟਕ ਹੈ।”
ਉਨ੍ਹਾਂ ਨੇ ਕਿਹਾ, “ਜੇ ਭਗਵੰਤ ਮਾਨ ਨੂੰ ਸੱਚਮੁੱਚ ਚਿੰਤਾ ਹੁੰਦੀ, ਤਾਂ ਉਹ ਕਈ ਸਮੇਂ ਪਹਿਲਾਂ ਹੀ ਸ਼ਰਾਬ ਮਾਫੀਆ ਉੱਤੇ ਸਖ਼ਤ ਕਾਰਵਾਈ ਕਰ ਚੁੱਕੇ ਹੁੰਦੇ। ਪਰ ਇਸਦੇ ਉਲਟ, ਉਨ੍ਹਾਂ ਦੀ ਸਰਕਾਰ ਨੇ ਪੰਜਾਬ ਨੂੰ ਨਾਜਾਇਜ਼ ਸ਼ਰਾਬ, ਨਸ਼ਿਆਂ ਅਤੇ ਅਪਰਾਧ ਦਾ ਅੱਡਾ ਬਣਨ ਦਿੱਤਾ ਹੈ।”ਗਰੇਵਾਲ ਨੇ ਕਿਹਾ, “ਸਰਕਾਰ ਨੂੰ ਸਾਰੇ ਦੋਸ਼ੀਆਂ ਉੱਤੇ ਕਤਲ ਦੇ ਮਾਮਲੇ ਦਰਜ ਕਰਵਾਉਣੇ ਚਾਹੀਦੇ ਹਨ।
ਪੂਰੇ ਤੰਤਰ—ਜਿੱਥੋਂ ਇਹ ਸ਼ਰਾਬ ਬਣਦੀ ਹੈ, ਉਥੋਂ ਲੈ ਕੇ ਜਿੱਥੇ ਇਹ ਵੇਚੀ ਜਾਂਦੀ ਹੈ—ਨੂੰ ਬੇਨਕਾਬ ਕਰਕੇ ਪੂਰੀ ਤਰ੍ਹਾਂ ਨੇਸਤਨਾਬੂਦ ਕੀਤਾ ਜਾਣਾ ਚਾਹੀਦਾ ਹੈ। ਸਿਰਫ਼ ਗ੍ਰਿਫ਼ਤਾਰੀਆਂ ਕਾਫ਼ੀ ਨਹੀਂ ਹਨ। ਇਹਨਾਂ ਅਪਰਾਧੀਆਂ ਨੂੰ ਮਿਲੀ ਰਾਜਨੀਤਕ ਸੁਰੱਖਿਆ ਦੀ ਵੀ ਗਹਿਰਾਈ ਨਾਲ ਜਾਂਚ ਹੋਣੀ ਚਾਹੀਦੀ ਹੈ।”
ਉਨ੍ਹਾਂ ਨੇ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ ਤੁਰੰਤ ਮੁਆਵਜ਼ਾ, ਪੁਨਰਵਾਸ ਅਤੇ ਇਕ ਸੇਵਾ ਮੁਕਤ ਹਾਈ ਕੋਰਟ ਦੇ ਜੱਜ ਦੀ ਅਗਵਾਈ ਹੇਠ ਨਿਆਂਇਕ ਜਾਂਚ ਦੀ ਵੀ ਮੰਗ ਕੀਤੀ। “ਪੰਜਾਬ ਆਮ ਆਦਮੀ ਪਾਰਟੀ ਦੀ ਹਕੂਮਤ ਹੇਠ ਸੜ ਰਿਹਾ ਹੈ, ਤੇ ਭਗਵੰਤ ਮਾਨ ਨੀਰੋ ਵਾਂਗ ਬੰਸੀ ਵਜਾ ਰਹੇ ਹਨ।
ਇਹ 14 ਪੰਜਾਬੀਆਂ ਦੇ ਖ਼ੂਨ ਦੇ ਦਾਗ਼ ਭਗਵੰਤ ਮਾਨ ਦੇ ਹੱਥਾਂ ਉੱਤੇ ਹਨ,” ਗਰੇਵਾਲ ਨੇ ਪੰਜਾਬ ਦੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਇਸ ਅਪਰਾਧ ਅਤੇ ਭ੍ਰਿਸ਼ਟਾਚਾਰ ਦੀ ਘਾਤਕ ਮਿਲੀਭੁਗਤ ਵਿਰੁੱਧ ਜਾਗਣ ਦੀ ਅਪੀਲ ਕੀਤੀ ਹੈ।