ਪੰਜਾਬ ਦੇ ਮੁੱਖ ਸੰਸਦੀ ਸਕੱਤਰ ਸੰਤ ਬਲਵੀਰ ਸਿੰਘ ਘੁੰਨਸ ਨੇ ਪੰਜਾਬ ਦੇ ਕਿਸਾਨਾ ਲਈ 60 ਸਾਲ ਦੀ ਉਮਰ ਤੋ ਬਾਅਦ ਪੈਨਸ਼ਲ ਸਕੀਮ ਲਾਗੂ ਕਰਨ ਦੀ ਪ੍ਰਸਤਾਵਿਤ ਯੋਜਨਾ ਦੀ ਪ੍ਰਸੰਸ਼ਾ ਕਰਦੇ ਹੋਏ ਕਿਹਾ ਕਿ ਉਹ ਇਸ ਪੈਨਸ਼ਨ ਤਹਿਤ ਖੇਤ ਮਜਦੂਰਾਂ ਦਾ ਕੇਸ ਵੀ ਵਿਚਾਰ ਲਿਆ ਜਾਵੇ। ਅੱਜ ਇਥੇ ਜਾਰੀ ਇਕ ਬਿਆਨ ਵਿਚ ਉਨ੍ਹਾਂ ਕਿਹਾ ਕਿ ਭਵਿੱਖ ਵਿਚ ਹੋਂਦ ਵਿਚ ਲਿਆਂਦੀ ਜਾਣ ਵਾਲੀ ਇਹ ਸਕੀਮ ਪੰਜਾਬ ਦੇ ਕਿਸਾਨਾਂ ਲਈ ਸੰਜੀਵਨੀ ਬੂਟੀ ਸਾਬਤ ਹੋਵੇਗੀ ਅਤੇ ਉਹ ਖ਼ੁਦ ਚਾਹੁੰਦੇ ਹਨ ਕਿ ਇਸ ਦਾ ਲਾਭ ਖੇਤ ਮਜ਼ਦੂਰਾਂ ਨੂੰ ਵੀ ਮਿਲਣਾ ਚਾਹੀਦਾ ਹੈ। ਸੰਤ ਘੁੰਨਸ ਨੇ ਕਿਹਾ ਕਿ ਪੰਜਾਬ ਸਰਕਾਰ ਭਾਵੇਂ ਫਿਲਹਾਲ ਪੰਜਾਬ ਦੇ ਵਿਕਾਸ ਨੂੰ ਹੀ ਤਰਜੀਹ ਦੇ ਰਹੀ ਹੈ ਪਰ ਇਸ ਪੈਨਸ਼ਨ ਸਕੀਮ ਰਾਹੀਂ ਪੰਜਾਬ ਦਾ ਇਕ ਬੁਨਿਆਦੀ ਮਸਲਾ ਹੱਲ ਹੋਵੇਗਾ ਕਿਉਂਕਿ ਜਦੋਂ ਕਿਸਾਨ ਖੇਤੀ ਕਰਦਾ ਕਰਦਾ ਬੁਢਾਪੇ ਦੀ ਅਵੱਸਥਾ ਵਿਚ ਚਲਿਆ ਜਾਂਦਾ ਹੈ ਅਤੇ ਉਸਦੀ ਮਾਲਕੀ ਵਾਲੀ ਜਮੀਨ ਤੇ ਉਸ ਦੇ ਪੁੱਤਰ ਕਾਬਜ਼ ਹੋ ਜਾਂਦੇ ਹਨ ਤੇ ਉਹ ਆਪਣੇ ਆਪ ਨੂੰ ਨਿਆਸਰਾ ਮਹਿਸੂਸ ਕਰਨ ਲੱਗ ਪੈਂਦਾ ਹੈ। ਇਸੇ ਤਰ੍ਹਾਂ ਜਦੋਂ ਮਜ਼ਦੂਰ ਖੇਤਾਂ 'ਚ ਕੰਮ ਕਰਨ ਦੇ ਯੋਗ ਨਹੀਂ ਰਹਿੰਦਾ ਉਸਦਾ ਦਾ ਵੀ ਪਰਿਵਾਰ ਵਿਚ ਸਤਿਕਾਰ ਘਟ ਜਾਂਦਾ ਹੈ ਇਸ ਲਈ ਪੰਜਾਬ ਦੇ ਕਿਸਾਨਾਂ ਅਤੇ ਖੇਤ ਮਜ਼ਦੂਰਾਂ ਦੀਆਂ ਸਮੱਸਿਆਵਾਂ ਇਕੋ ਜਿਹੀਆਂ ਹਨ। ਸੰਤ ਘੁੰਨਸ ਨੇ ਕਿਹਾ ਕਿ ਉਕਤ ਯੋਜਨਾ ਲਾਗੂ ਹੋਣ ਦੀ ਸੂਰਤ ਵਿਚ ਇਸ ਨਾਲ ਸਬੰਧਤ ਵਿਅਕਤੀ ਖ਼ੁਸ਼ੀਆਂ ਭਰਿਆ ਬੁਢਾਪਾ ਬਤੀਤ ਕਰ ਸਕਣਗੇ। ਇਹ ਪੈਨਸ਼ਨ ਸਕੀਮ ਕਿਸ ਤਰ੍ਹਾਂ ਦੀ ਹੋਵੇਗੀ ਦੇ ਪੁੱਛੇ ਗਏ ਸਵਾਲ ਦੇ ਜਵਾਬ ਵਿਚ ਉਨ੍ਹਾਂ ਕਿਹਾ ਕਿ ਇਹ ਯੋਜਨਾ ਭਾਰਤ ਪੱਧਰ 'ਤੇ ਇਕ ਬੈਂਕ ਨਾਲ ਤਾਲਮੇਲ ਕਰਕੇ ਬਣਾਈ ਜਾ ਰਹੀ ਹੈ, ਜਿਸ ਤਹਿਤ 60 ਸਾਲ ਉਮਰ ਤੱਕ ਸਬੰਧਿਤ ਵਿਅਕਤੀ ਆਪਣੇ ਵਲੋਂ ਹਰ ਮਹੀਨੇ ਨਿਸ਼ਚਤ ਰਾਸ਼ੀ ਬੈਂਕ ਵਿਚ ਜਮ੍ਹਾਂ ਕਰਵਾਇਆ ਕਰੇਗਾ ਅਤੇ ਉਸ ਵਿਚ ਸਰਕਾਰ ਆਪਣੇ ਵਲੋਂ ਨਿਸ਼ਚਿਤ ਹਿੱਸਾ ਪਾਇਆ ਕਰੇਗੀ। ਜਦੋਂ ਉਮਰ ਦੀ ਹੱਦ ਪੂਰੀ ਹੋ ਜਾਇਆ ਕਰੇਗੀ, ਉਸ ਪਿਛੋਂ ਜਮ੍ਹਾਂ ਹੋਈ ਰਾਸ਼ੀ ਦੇ ਅਧਾਰ 'ਤੇ ਸਬੰਧਿਤ ਵਿਅਕਤੀ ਆਪਣੇ ਨੇੜਲੇ ਕਿਸੇ ਵੀ ਬੈਂਕ ਤੋਂ ਹੋਰਾਂ ਮੁਲਾਜ਼ਮਾਂ ਵਾਂਗ ਹਰ ਮਹੀਨੇ ਪੈਨਸ਼ਨ ਲੈ ਸਕਿਆ ਕਰੇਗਾ। ਸੰਤ ਘੁੰਨਸ ਨੇ ਕਿਹਾ ਕਿ ਪੰਜਾਬ ਦੇ ਇਤਿਹਾਸ ਵਿਚ ਇਹ ਪਹਿਲੀ ਵਾਰ ਹੋਇਆ ਹੈ ਕਿ ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਇਹ ਇਤਿਹਾਸਕ ਫੈਸਲਾ ਲੈਣ ਦਾ ਮਨ ਬਣਾਇਆ ਹੈ।