ਪੰਜਾਬੀ ਸੱਭਿਆਚਾਰ ਦੀਆਂ ਲੋਕ ਵੰਨਗੀਆਂ ਪੇਸ਼ ਕਰਦਾ ਸਰਕਾਰੀ ਕੰਨਿਆਂ ਹਾਈ ਸਕੂਲ ਪੱਤੀ ਸ਼ਾਮ ਸਿੰਘ ਕਾੳਂਕੇ ਕਲਾਂ ਦਾ ਸਲਾਨਾਂ ਸਮਾਗਮ ਉਸ ਵੇਲੇ ਗੂੰਜ ਉਠਿਆ, ਜਦੋਂ ਗਿੱਧ 'ਚ ਧਮਾਲਾਂ ਪਾਉਂਦੀਆਂ ਬਾਲੜੀਆਂ ਨੇ 'ਬੱਲੇ ਨੀ ਬੰਬੀਹਾ ਬੋਲੇ, ਤੇਰੇ ਜਿਹੇ ਨੂੰ ਵੇ ਮੈਂ ਟਿੱਚ ਨਾ ਜਾਣਦੀ, ਊਰੀ-ਊਰੀ-ਊਰੀ, ਅੱਜ ਦਿਨ ਸ਼ਗਨਾਂ ਦੇ, ਨੱਚ ਲਓ ਨੀ ਕੁੜੀਓ, ਖੇਡ ਲਓ ਨੀ ਕੁੜੀਓ.......! ਆਦਿ ਲੋਕ ਬੋਲੀਆਂ ਦਾ ਪਿੜ ਬੰਨ ਦਿੱਤਾ।
ਸਮਾਗਮ ਦੀ ਸ਼ੁਰੂਆਤ ਨਤਾਸ਼ਾ ਅਤੇ ਸਾਥਣਾ ਵੱਲੋਂ ਗਾਏ ਧਾਰਮਿਕ ਸ਼ਬਦ ਨਾਲ ਹੋਈ ਅਤੇ ਜਸਨਪ੍ਰੀਤ ਕੌਰ ਤੇ ਲਵਪ੍ਰੀਤ ਕੌਰ ਨੇ 'ਪੋਹ ਦਾ ਮਹੀਨਾ' ਕਵੀਸ਼ਰੀ ਦੇ ਰੂਪ ਵਿੱਚ ਗਾਇਆ। ਫਿਰ ਸਕੂਲ ਦੀਆਂ ਕੁੜੀਆਂ ਵੱਲੋਂ ਹਾਸ-ਰਸ ਸਕਿੱਟ 'ਵੈਣ ਪਾਉਣੇ' ਪੇਸ਼ ਕੀਤੀ ਗਈ ਅਤੇ 'ਹਾਏ ਮੇਰੀ ਸੱਸ ਮਰ ਗਈ' ਦਰਸ਼ਕਾਂ ਦੇ ਢਿੱਡੀਂ ਪੀੜਾਂ ਪਾ ਗਈ। ਸਿਮਰਨ ਕੌਰ ਵੱਲੋਂ ਕਵਿਤਾ ਪੇਸ਼ ਕੀਤੀ ਗਈ ਅਤੇ ਛੇਵੀਂ ਜਮਾਤ ਦੀਆਂ ਵਿਦਿਆਰਥਣਾ ਵੱਲੋਂ 'ਚਾਦਰਾਂ ਦੇ ਫੁੱਲ' ਗੀਤ ਉਪਰ ਡਾਂਸ ਪੇਸ਼ ਕੀਤਾ ਗਿਆ।
ਕੋਮਲਪ੍ਰੀਤ ਕੌਰ ਵੱਲੋਂ ਲੋਕ ਗੀਤ 'ਅੱਜ ਆਪ ਕਹਾਣੀ ਹੋਇਆ ਨੀ, ਅੰਮੀਆਂ ਦਾ ਵਿਹੜਾ' ਪੇਸ਼ ਕੀਤਾ ਗਿਆ ਅਤੇ ਜਸ਼ਨ ਤੇ ਲਵਪ੍ਰੀਤ ਨੇ 'ਪੇਕੇ ਸਹੁਰੇ' ਲੋਕ ਗੀਤ ਗਾ ਕੇ ਧੀਆਂ ਦੇ ਮਨ ਦੇ ਵਲ-ਵਲਿਆਂ ਨੂੰ ਬਿਆਨ ਕੀਤਾ। ਇਸ ਉਪਰੰਤ ਤਾਂ ਚੱਲ ਸੋ ਚੱਲ ! ਲਗਾਤਾਰ ਸਕੂਲ ਦੀਆਂ ਵਿਦਿਆਰਥਣਾ ਨੇ ਅਨੇਕਾਂ ਸੱਭਿਅਕ ਵੰਨਗੀਆਂ ਪੇਸ਼ ਕੀਤੀਆਂ ਅਤੇ ਵੱਖ ਵੱਖ ਗੀਤਾਂ ਉਪਰ ਡਾਂਸ ਵੀ ਕੀਤਾ।
ਅਖੀਰ ਵਿੱਚ ਸਕੂਲ ਦੀਆਂ ਵਿਦਿਆਰਥਣਾਂ ਵੱਲੋਂ ਪੰਜਾਬ ਦੇ ਲੋਕ ਨਾਚ ਗਿੱਧੇ ਵਿੱਚ ਧੁੰਮ ਮਚਾ ਦਿੱਤੀ ਅਤੇ ਭੰਗੜੇ 'ਚ ਧਮਾਲਾਂ ਪਾਉਂਦਿਆਂ ਸੱਭਿਆਰਚਾਰਕ ਸਮਾਗਮ ਨੂੰ ਪੂਰੇ ਜ਼ੋਬਨ 'ਤੇ ਪਹੁੰਚਾ ਦਿੱਤਾ ਅਤੇ ਸਕੂਲ ਦੇ ਵਿਹੜੇ ਵਿੱਚ ਮਹਿਕਾਂ ਬਿਖੇਰ ਦਿੱਤੀਆਂ। ਇਸ ਮੌਕੇ ਵੱਖ ਵੱਖ ਜਮਾਤਾਂ ਵਿੱਚੋਂ ਪਹਿਲੇ, ਦੂਜੇ ਅਤੇ ਤੀਜੇ ਨੰਬਰ ਤੇ ਰਹਿਣ ਵਾਲੀਆਂ ਸਕੂਲ ਦੀਆਂ ਵਿਦਿਆਰਥਣਾ ਨੂੰ ਇਨਾਮ ਵੰਡੇ ਗਏ ਅਤੇ ਸਕੂਲ ਦਾ ਨਾਮ ਜ਼ੋਨਲ ਲੈਵਲ, ਜ਼ਿਲ੍ਹਾ ਪੱਧਰ ਤੇ ਪੰਜਾਬ ਲੈਵਲ ਤੱਕ ਰੌਸ਼ਨ ਕਰਨ ਵਾਲੀਆਂ ਕੁੜੀਆਂ ਨੂੰ ਵਿਸ਼ੇਸ਼ ਤੌਰਤੇ ਸਨਮਾਨਿਤ ਵੀ ਕੀਤਾ ਗਿਆ।
ਬੋਲਦੇ ਹੋਏ ਸਕੂਲ ਦੇ ਮੁੱਖ ਅਧਿਆਪਕਾ ਮੈਡਮ ਪੂਜਾ ਵਰਮਾਂ ਨੇ ਵਿਦਿਅਰਥਣਾ ਦੀਆਂ ਪੇਸ਼ਕਾਰੀਆਂ ਦੀ ਸ਼ਲਾਘਾ ਕਰਦਿਆਂ ਸਕੂਲ ਦੇ ਸਮੁੱਚੇ ਸਟਾਫ਼ ਦੀ ਕਾਰਗੁਜ਼ਾਰੀ ਦੀ ਪ੍ਰਸੰਸਾ ਵੀ ਕੀਤੀ। ਉਹਨਾਂ ਆਖਿਆ ਕਿ ਅਜਿਹੇ ਸਮਾਗਮਾਂ ਵਿੱਚ ਜਿੱਥੇ ਧੀਆਂ-ਧਿਆਣੀਆਂ ਨੂੰ ਰਲ-ਮਿਲ ਬੈਠਣ ਅਤੇ ਲੋਕ ਰੰਗ ਪੇਸ਼ ਕਰਨ ਦਾ ਮੌਕਾ ਮਿਲਦਾ ਹੈ, ਉਥੇ ਹੀ ਜੇਤੂ ਬੱਚਿਆਂ ਦੀ ਹੁੰਦੀ ਹੌਸਲਾ ਅਫ਼ਜ਼ਾਈ ਵੇਖਕੇ ਬਾਕੀਆਂ ਨੂੰ ਵੀ ਅੱਗੇ ਵਧਣ ਲਈ ਪ੍ਰੇਰਣਾ ਮਿਲਦੀ ਹੈ।
ਉਹਨਾਂ ਸਲਾਨਾਂ ਸਮਾਗਮ ਨੂੰ ਸਫ਼ਲਤਾ ਪੂਰਵਕ ਨੇਪਰੇ ਚਾੜ੍ਹਨ ਵਿੱਚ ਸਹਿਯੋਗ ਦੇਣ ਵਾਲਿਆਂ, ਗਰਾਮ ਪੰਚਾਇਤ ਤੇ ਮੁੱਖ ਮਹਿਮਾਨਾਂ ਦਾ ਧੰਨਵਾਦ ਕਰਦਿਆਂ ਨਿੱਘਾ ਸਵਾਗਤ ਵੀ ਕੀਤਾ। ਇਸ ਮੌਕੇ ਸਕੂਲ ਦੀ ਸਲਾਨਾਂ ਰਿਪੋਰਟ ਪੜ੍ਹੀ ਗਈ ਅਤੇ ਸਕੂਲ ਦੇ ਮੈਗਜ਼ੀਨ ਦੀ ਵੀ ਘੁੰਡ-ਚੁਕਾਈ ਕੀਤੀ ਗਈ। ਇਸ ਸਮਾਗਮ ਦੌਰਾਨ ਹਰਪ੍ਰੀਤ ਕੌਰ ਚੀਮਾਂ ਅਤੇ ਜਸਪ੍ਰੀਤ ਕੌਰ ਜੱਸਲ ਨੇ ਆਪਣੀ ਕਲਾਤਮਿਕ ਸ਼ੈਲੀ ਰਾਹੀਂ ਸਟੇਜ਼ ਦਾ ਸੰਚਾਲਨ ਬਾਖੂਬੀ ਨਿਭਾਇਆ।
ਸਮਾਗਮ ਵਿੱਚ ਜਗਰਾਉਂ ਸਕੂਲ ਦੇ ਪ੍ਰਿੰਸੀਪਲ ਡਾ.ਗੁਰਬਿੰਦਰਜੀਤ ਸਿੰਘ, ਸਰਪੰਚ ਜਗਜੀਤ ਸਿੰਘ ਕਾਉਂਕੇ ਕਲਾਂ, ਸਮਾਜ ਸੇਵੀ ਜੈ ਰਾਮ ਸਿੰਘ, ਐਸ.ਐਮ.ਸੀ.ਕਮੇਟੀ ਦੇ ਚੇਅਰਮੈਨ ਸੁਖਵਿੰਦਰ ਸਿੰਘ, ਸੂਬੇਦਾਰ ਹਰਨੇਕ ਸਿੰਘ, ਸਾਬਕਾ ਸਰਪੰਚ ਮਨਜਿੰਦਰ ਸਿੰਘ ਮਨੀ ਆਦਿ ਮੁੱਖ ਮਹਿਮਾਨ ਵਜੋਂ ਹਾਜ਼ਰ ਹੋਏ ਅਤੇ ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਰਜਿੰਦਰ ਸਿੰਘ, ਚਰਨਪ੍ਰੀਤ ਸਿੰਘ ਬਰਿਆਰ, ਜਰਨੈਲ ਸਿੰਘ, ਹਰਭਿੰਦਰ ਕੌਰ, ਨਛੱਤਰ ਸਿੰਘ, ਕਰਮਜੀਤ ਸਿੰਘ ਸੀ.ਐਚ.ਡੀ., ਹਰਦਿਆਲ ਸਿੰਘ, ਵੀਨਾਂ ਰਾਣੀ, ਗੀਤਾ ਰਾਣੀ, ਅਮਨਦੀਪ ਕੌਰ, ਸੁਰਿੰਦਰ ਕੌਰ, ਕੋਮਲ ਅਰੋੜਾ, ਸ਼ਬਨਮ ਰਤਨ, ਰਾਧਾ ਰਾਣੀ, ਗੁਰਿੰਦਰ ਕੌਰ, ਚਰਨਜੀਤ ਕੌਰ, ਰਣਬੀਰ ਕੌਰ, ਏਕਮ ਸਿੰਘ, ਗੌਰਵ ਗੁਪਤਾ, ਕੁਲਦੀਪ ਸਿੰਘ, ਪ੍ਰਿਤਪਾਲ ਸਿੰਘ, ਕੁਲਦੀਪ ਸਿੰਘ ਢੋਲਣ, ਸਵਰਨ ਸਿੰਘ ਆਦਿ ਵੀ ਹਾਜ਼ਰ ਸਨ।