ਬੀਜੇਪੀ ਦੇ ਜਿਲ੍ਹਾ ਮੋਹਾਲੀ ਦੇ ਪ੍ਰਧਾਨ ਸੰਜੀਵ ਵਸਿਸਟ ਨੇ ਪੱਤਰਕਾਰਾਂ ਨਾਲ ਗੱਲ ਬਾਤ ਕਰਦੇ ਕਿਹਾ ਕਿ ਪੰਜਾਬ ਦੇ ਮੁੱਖ ਮੰਤਰੀ ਦੀ ਭਾਸ਼ਾ ਤੇ ਭਾਸਣ ਪੰਜਾਬ ਦੇ ਕਲਚਰ ਦੇ ਅਨੁਕੂਲ ਨਹੀਂ ਹੈ। ਉਹ ਅਕਾਲੀ ਨੇਤਾ ਬਿਕਰਮਜੀਤ ਸਿੰਘ ਮਜੀਠੀਆ ਨੂੰ ਕਹਿ ਰਹੇ ਹਨ ਕਿ ਉਹ ਪੰਜਾਬੀ ਦਾ ਟੈਸਟ ਪਾਸ ਕਰਕੇ ਦਿਖਾਉਣ।
ਪ੍ਰਧਾਨ ਵਸਿਸਟ ਨੇ ਕਿਹਾ ਕਿ ਕੀ ਮਜੀਠੀਏ ਵੱਲੋਂ ਪੰਜਾਬੀ ਦਾ ਟੈਸਟ ਪਾਸ ਕਰਨ ਤੁਹਾਡੇ ਚੋਣਾਂ ਮੌਕੇ ਕੀਤੇ ਵਾਅਦੇ,ਪੜ੍ਹੇ ਲਿਖੇ ਨੌਜੁਆਨਾਂ ਨੂੰ 3 ਹਜ਼ਾਰ ਬੇਰੁਜ਼ਗਾਰੀ ਭੱਤਾ, 6 ਲੱਖ ਨੌਕਰੀਆਂ ਤੇ ਹਰ ਮਹੀਨੇ ਹਜ਼ਾਰ ਰੁਪਿਆ ਸਭ ਔਰਤਾਂ ਨੂੰ ਮਿਲ ਜਾਵੇਗਾ ਤਾਂ ਅਸੀਂ ਮਜੀਠੀਆ ਸਹਿਬ ਦੀ ਪੰਜਾਬੀ ਟੈਸਟ ਪਾਸ ਕਰਨ ਲਈ ਮਿੰਨਤ ਕਰ ਲੈੰਦੇ ਹਾ। ਬੀਜੇਪੀ ਪ੍ਰਧਾਨ ਨੇ ਕਿਹਾ ਕਿ ਡੇੜ ਸਾਲ ਜਾਣੀ ਕੇ ਪਹਿਲਾ ਕਵਾਟਰ ਖਤਮ ਹੋ ਚੁੱਕਾ ਹੈ ‘ਆਪ’ ਵਲੋਂ ਚੋਣਾਂ ਮੌਕੇ ਦੇ ਵਾਅਦੇ ਤੇ ਪੰਜਾਬ ਦੇ ਵਿਕਾਸ ਵਾਲੇ ਟੈਸਟ ‘ਚ ਮਾਨ ਸਰਕਾਰ ਬੁਰੀ ਤਰ੍ਹਾਂ ਫੇਲ ਹੋ ਚੁੱਕੀ ਹੈ।
ਪ੍ਰਧਾਨ ਵਸਿਸਟ ਨੇ ਕਿਹਾ ਕਿ ਪੰਜਾਬ ਦੇ ਨੌਜੁਆਨਾਂ ਨੂੰ ਲੱਖਾਂ ਸਰਕਾਰੀ ਨੌਕਰੀਆਂ ਦੇਣ ਦਾ ਵਾਅਦਾ ਕਰਕੇ ਹੁਣ ਸਰਕਾਰ ਵੱਲੋਂ ਨੌਜੁਆਨਾਂ ਲਈ ਆਤਮ ਨਿਰਭਰ ਹੋਣ ਦੇ ਕੈਂਪ ਲਗਾਏ ਜਾ ਰਹੇ ਹਨ। ਜੋ ਸਰੇਆਮ ਪੰਜਾਬ ਦੇ ਨੌਜੁਆਨਾਂ ਨਾਲ ਧੋਖਾ ਹੈ। ਬੀਜੇਪੀ ਪ੍ਰਧਾਨ ਨੇ ਕਿਹਾ ਕਿ ਮੁੱਖ ਮੰਤਰੀ ਮਾਨ ਤੇ ਕੇਜਰੀਵਾਲ ਸਹਿਬ ਨੇ ਚੋਣਾਂ ਮੌਕੇ 18 ਸਾਲ ਤੋਂ ਉੱਪਰ ਹਰੇਕ ਔਰਤ ਨੂੰ 1000 ਰੁਪਿਆ ਪ੍ਰਤੀ ਮਹੀਨਾਂ ਦੇਣ ਦਾ ਵਾਅਦਾ ਕੀਤਾ ਸੀ ਇੱਥੇ ਵੀ ਯੂ-ਟਰਨ ਲੈ ਕੇ ਹੁਣ ਜੋ ਪਰਿਵਾਰ ਔਰਤਾਂ ਤੇ ਨਿਰਭਰ ਹਨ ਉਹਨਾਂ ਦੀਆਂ ਲਿਸਟਾਂ ਤਿਆਰ ਕੀਤੀਆਂ ਜਾ ਰਹੀਆਂ ਹਨ।
ਮਾਨ ਸਰਕਾਰ ਵੱਲੋਂ ਹੁਣ ਕਿਹਾ ਜਾ ਰਿਹਾ ਕਿ ਸਭ ਔਰਤਾਂ ਨੂੰ 1000 ਰੁਪਿਆ ਮਹੀਨਾ ਦੇਣਾ ਸੰਭਵ ਨਹੀਂ ਹੈ। ਇਸ ਨਾਲ ਹਰ ਮਹੀਨੇ 125 ਕਰੋੜ ਦਾ ਸਰਕਾਰ ਦੇ ਖਜਾਨੇ ਤੇ ਬੋਝ ਪਵੇਗਾ ਤੇ ਸਰਕਾਰ ਕੋਲ ਬਜਟ ਨਹੀਂ ਹੈ। ਆਪ ਸਰਕਾਰ ਨੇ ਸਭ ਬਿਨਾਂ ਯੋਜਨਾਂ ਦੇ ਵਾਅਦੇ ਕੀਤੇ ਹਨ ਜੋ ਹੁਣ ਲਾਗੂ ਕਰਨਾਂ ਇਹਨਾਂ ਦੇ ਵੱਸ ਦੀ ਗੱਲ ਨਹੀਂ ਹੈ। ਉਹਨਾਂ ਤੋਂ ਲੋਕਾਂ ਦਾ ਧਿਆਨ ਭਟਕਾਉਣ ਲਈ ਮੁੱਖ ਮੰਤਰੀ ਵੱਲੋਂ ਅਜਿਹੇ ਗੈਰ ਜ਼ਿੰਮੇਵਾਰ ਵਾਲੇ ਭਾਸ਼ਨ ਦਿੱਤੇ ਜਾ ਰਹੇ ਹਨ ਜਿਸ ਨਾਲ ਪੰਜਾਬ ਦੇ ਮਸਲੇ ਹੱਲ ਨਹੀਂ ਹੋਣੇ ਹਨ।
ਮਜੀਠੀਏ ਦੇ ਪੰਜਾਬੀ ਟੈਸਟ ਪਾਸ ਕਰਨ ਨਾਲ ਨਸ਼ਾ ਨਹੀਂ ਰੁਕੇਗਾ, ਉਸ ਨਾਲ ਰੋਜ਼ਾਨਾ ਹੋ ਰਹੀਆਂ ਵਾਰਦਾਤਾਂ ਨਹੀਂ ਰੁਕਣਗੀਆਂ, ਉਸ ਨਾਲ ਲਾਅ ਐਂਡ ਆਰਡਰ ਤੇ ਕੋਈ ਅਸਰ ਨਹੀਂ ਹੋਣਾ, ਉਸ ਨਾਲ ਰੁਜ਼ਗਾਰ ਨਹੀਂ ਮਿਲੇਗਾ, ਤੇ ਉਸ ਨਾਲ ਪੰਜਾਬ ਦੀ ਆਰਥਿਕ ਖ਼ੁਸ਼ਹਾਲੀ ਤੇ ਵਿਕਾਸ ਵਿੱਚ ਕੋਈ ਉੱਨਤੀ ਨਹੀਂ ਹੋਣੀ। ਉਹਨਾਂ ਕਿਹਾ ਮੁੱਖ ਮੰਤਰੀ ਦੇ ਰੁਤਬੇ ਤੇ ਮਰਿਆਦਾ ਤੋਂ ਬਾਹਰ ਨਾ ਜਾ ਕੇ ਸਗੋਂ ਪੰਜਾਬ ਦੇ ਲੋਕਾਂ ਨਾਲ ਕੀਤੇ ਵਾਅਦੇ ਤੇ ਲੋਕਾਂ ਦੀਆਂ ਸਮੱਸਿਆਵਾਂ ਨੂੰ ਹੱਲ ਕਰਾਉਣ ਵੱਲ ਧਿਆਨ ਦੇਣ ਦੀ ਲੋੜ ਹੈ।
ਉਹਨਾਂ ਕਿਹਾ ਕਿ ਪਹਿਲੇ ਡੇੜ ਸਾਲ ਵਿੱਚ ਕੋਈ ਵਾਅਦਾ ਪੂਰਾ ਨਹੀਂ ਹੋਇਆ ਤੇ ਮਾਨ ਸਰਕਾਰ ਦਾ ਟੈਸਟ ਵੀ ਨੇੜੇ ਆ ਰਿਹਾ ਹੈ ਜਿਸ ਕਰਕੇ ਮਾਨ ਸਰਕਾਰ ਨੂੰ ਆਪਣੇ ਟੈਸਟ ਵੱਲ ਧਿਆਨ ਦੇਣਾ ਚਾਹੀਦਾ ਹੈ। ਉਹਨਾਂ ਕਿਹਾ ਬਿਨ੍ਹਾਂ ਯੋਜਨਾਂ ਵਾਲੇ ਫੈਸਲੇ ਲੈ ਕਿ ਫਿਰ ਯੂ ਟਰਨ ਲੈਣ ਨਾਲ ਪੰਜਾਬ ਦਾ ਪੈਸਾ ਤੇ ਟਾਈਮ ਖਰਾਬ ਹੋ ਰਿਹਾ ਜਿਸ ਬਾਰੇ ਮਾਨ ਸਰਕਾਰ ਪੂਰੀ ਤਰ੍ਹਾਂ ਅਨਜਾਣ ਲੱਗਦੀ ਹੈ।
ਉਹਨਾਂ ਕਿਹਾ ਕੇ ਮਾਨ ਸਰਕਾਰ ਵੱਲੋਂ ਪਿਛਲੇ ਡੇੜ ਸਾਲ ‘ਚ ਬਿਨਾਂ ਯੋਜਨਾਂ ਵਾਲੀਆਂ ਨੀਤੀਆਂ ਲਾਗੂ ਕਰਨ ਨਾਲ ਬੇਰੁਜ਼ਗਾਰੀ ਤੇ ਭ੍ਰਿਸ਼ਟਾਚਾਰ ਵਿੱਚ ਭਾਰੀ ਵਾਧਾ ਹੋਇਆ। ਉਹਨਾਂ ਕਿਹਾ ਕਿ ਫਿਰ ਵੀ ਇੱਕ ਮੁੱਖ ਮੰਤਰੀ ਦੀ ਸੋਚ ਮਜੀਠੀਏ ਦੇ ਪੰਜਾਬੀ ਟੈਸਟ ਪਾਸ ਕਰਾਉਣ ‘ਚ ਹੈ ਤਾਂ ਫਿਰ ਪੰਜਾਬ ਦਾ ਰੱਬ ਹੀ ਰਾਖਾ ਹੈ