ਉੱਤਰੀ ਭਾਰਤ ਦੇ ਉੱਘੇ ਬੈਰਿਆਟਿ੍ਰਕ ਅਤੇ ਮੈਟਾਬੋਲਿਕ ਸਰਜਨ ਡਾ ਸਾਹਿਲ ਅਰੋੜਾ ਨੇ ਆਖਿਆ ਹੈ ਕਿ ਮੋਟਾਪੇ ਨੂੰ ਹਲਕੇਪਨ ਵਿੱਚ ਨਹੀਂ ਲੈਣਾ ਚਾਹੀਦਾ। ਪਟਿਆਲਾ ਵਿਖੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਉਨਾਂ ਕਿਹਾ ਕਿ ਮੋਟਾਪਾ ਇੱਕ ਜਟਿਲ ਬਿਮਾਰੀ ਹੈ, ਜੋ ਕਿ ਵਿਅਕਤੀ ਦੇ ਮਾਨਸਿਕ, ਸਰੀਰਕ, ਸਮਾਜਿਕ ਅਤੇ ਆਰਥਿਕ ਜੀਵਨ ਨੂੰ ਪ੍ਰਭਾਵਿਤ ਕਰਦੀ ਹੈ।
ਉਨਾਂ ਪ੍ਰਗਟਾਵਾ ਕੀਤਾ ਕਿ ਵਿਸ਼ਵ ਸਿਹਤ ਸੰਗਠਨ ਨੇ ਮੋਟਾਪਾ ਅਤੇ ਸ਼ੂਗਰ ਨੂੰ 21ਵੀਂ ਸਦੀ ਦੀ ਮਹਾਂਮਾਰੀ ਦੱਸਿਆ ਹੈ। ਉਨਾਂ ਕਿਹਾ ਕਿ ਮੋਟਾਪਾ ਅਤੇ ਟਾਈਪ-ਦੋ ਸ਼ੂਗਰ ਬਿਮਾਰੀ ਲਗਾਤਾਰ ਵੱਧ ਰਹੀ ਹੈ। ਉਨਾਂ ਦੱਸਿਆ ਕਿ ਪੂਰੀ ਦੁਨੀਆਂ ਵਿੱਚ ਮੋਟਾਪਾ ਸਭ ਤੋਂ ਵੱਧ ਮੈਟਾਬੌਲਿਕ ਬਿਮਾਰੀ ਦੇ ਰੂਪ ਵਿੱਚ ਉੱਭਰਕੇ ਸਾਹਮਣੇ ਆਇਆ ਹੈ। ਉਨਾਂ ਕਿਹਾ ਕਿ ਦੁਨੀਆਂ ਦੀ ਅੱਧੀ ਤੋਂ ਵੱਧ ਵਸੋਂ ਮੋਟਾਪਾ ਤੋਂ ਪ੍ਰਭਾਵਿਤ ਹੈ।
ਡਾ ਅਰੋੜਾ ਨੇ ਦੱਸਿਆ ਕਿ ਮੋਟੇ ਲੋਕਾਂ ਲਈ ਜਿਨਾਂ ਬਿਮਾਰੀਆਂ ਦਾ ਡਰ ਬਣਿਆ ਰਹਿੰਦਾ ਹੈ ਉਨਾਂ ਵਿੱਚ ਟਾਈਪ-ਦੋ ਸ਼ੂਗਰ, ਦਿਲ ਦੇ ਰੋਗ, ਗੁਰਦੇ ਦੇ ਰੋਗ, ਗਠੀਏ ਅਤੇ ਸਾਹ ਦੇ ਰੋਗਾਂ ਤੋਂ ਇਲਾਵਾ ਡਿਪਰੈਸ਼ਨ ਵੀ ਸ਼ਾਮਿਲ ਹੈ। ਉਨਾਂ ਕਿਹਾ ਕਿ ਜਿਨਾਂ ਲੋਕਾਂ ਦੀ ਬੀਐਮਆਈ 25 ਤੋਂ ਵੱਧ ਹੋਵੇ ਉਨਾਂ ਨੂੰ ਸ਼ੂਗਰ ਦਾ ਖਤਰਾ ਵਧੇਰੇ ਰਹਿੰਦਾ ਹੈ। ਡਾ ਅਰੋੜਾ ਨੇ ਆਖਿਆ ਕਿ ਮੋਟਾਪੇ ਦੇ ਪਿਛਲੇ ਦਸ ਸਾਲਾਂ ਤੋਂ ਚੱਲ ਰਹੇ ਸਰਜੀਕਲ ਇਲਾਜ, ਅਪਰੇਸ਼ਨ ਦੇ ਬਹੁਤ ਵਧੀਆ ਨਤੀਜੇ ਸਾਹਮਣੇ ਆ ਰਹੇ ਹਨ ਤੇ ਇਸ ਮਗਰੋਂ ਸ਼ੂਗਰ ਵੀ ਨਿਯਮਿਤ ਹੋ ਜਾਂਦਾ ਹੈ।
ਉਨਾਂ ਕਿਹਾ ਕਿ ਪੰਜਾਬ ਵਿੱਚ ਮੋਟਾਪਾ ਵੱਧਣ ਦਾ ਕਾਰਨ ਆਰਾਮਦਾਇਕ ਜੀਵਨ ਸ਼ੈਲੀ, ਜੰਕ ਫੂਡ, ਤਲੀਆਂ ਹੋਈਆਂ ਵਸਤਾਂ ਦਾ ਜ਼ਿਆਦਾ ਸੇਵਨ ਹੁੰਦਾ ਹੈ, ਜਿਸ ਦੀ ਸ਼ਰਾਬ ਨਾਲ ਜ਼ਿਆਦਾ ਵਰਤੋਂ ਹੁੰਦੀ ਹੈ। ਉਨਾਂ ਕਿਹਾ ਕਿ ਮੋਟਾਪਾ ਪੀਹੜੀ ਦਰ ਪੀਹੜੀ ਅਤੇ ਕੁੱਝ ਹੋਰ ਕਾਰਨਾਂ ਕਰਕੇ ਵੀ ਹੁੰਦਾ ਹੈ। ਡਾ ਸਾਹਿਲ ਅਰੋੜਾ ਨੇ ਦੱਸਿਆ ਕਿ ਤਾਜ਼ਾ ਖੋਜ਼ਾਂ ਨਾਲ ਸਾਬਿਤ ਹੋਇਆ ਹੈ ਕਿ ਜੇਕਰ ਕਿਸੇ ਵਿਅਕਤੀ ਨੂੰ ਮੋਟਾਪਾ ਤੇ ਹੋਰ ਕੋਈ ਬਿਮਾਰੀ ਨਹੀਂ ਹੈ, ਉਸ ਉੱਤੇ ਕੋਵਿਡ-19 ਦਾ ਖਤਰਾ ਬੇਹੱਦ ਘੱਟ ਹੈ।
ਉਨਾਂ ਕਿਹਾ ਕਿ ਮੋਟਾਪੇ ਨਾਲ ਕੋਵਿਡ-19 ਹੋਣ ਦਾ ਖਤਰਾ ਜ਼ਿਆਦਾ ਹੁੰਦਾ ਹੈ। ਉਨਾਂ ਕਿਹਾ ਮੋਟਾਪੇ ਕਾਰਨ ਬਿਮਾਰੀਆਂ ਰੋਕਣ ਦੀ ਸ਼ਕਤੀ ਘਟਦੀ ਹੈ। ਉਨਾਂ ਕਿਹਾ ਕਿ ਮੋਟਾਪੇ ਦਾ ਇਲਾਜ ਸਿਰਫ਼ ਅੋਬਿਸਿਟੀ ਮਾਹਿਰ ਤੋਂ ਹੀ ਕਰਾਉਣਾ ਚਾਹੀਦਾ ਹੈ। ਉਨਾਂ ਕਿਹਾ ਕਿ ਹੁਣ ਸਰਕਾਰ ਵੀ ਮੋਟਾਪੇ ਨੂੰ ਰੋਕਣ ਲਈ ਗੰਭੀਰ ਹੈ। ਉਨਾਂ ਕਿਹਾ ਕਿ ਬੀਮਾ ਕੰਪਨੀਆਂ ਨੇ ਵੀ ਹੁਣ ਵੱਖ-ਵੱਖ ਮੈਡੀਕਲ ਪਾਲਿਸੀਆਂ ਰਾਹੀਂ ਮੋਟਾਪੇ ਦਾ ਇਲਾਜ ਕਵਰ ਕਰ ਲਿਆ ਹੈ, ਜਿਸ ਤੋਂ ਮੋਟਾਪੇ ਦੇ ਗ੍ਰਸਤ ਪੀੜਤਾਂ ਨੂੰ ਲਾਭ ਉਠਾਉਣਾ ਚਾਹੀਦਾ ਹੈ।
ਉਨਾਂ ਕਿਹਾ ਕਿ ਮੋਟਾਪੇ ਦਾ ਵਿਗਿਆਨਕ ਇਲਾਜ ਬੇਹੱਦ ਜ਼ਰੂਰੀ ਹੈ। ਡਾ ਸਾਹਿਲ ਅਰੋੜਾ ਨੇ ਦਾਅਵਾ ਕੀਤਾ ਕਿ 35-40 ਤੋਂ ਜ਼ਿਆਦਾ ਬੀਐੱਮਆਈ ਮੋਟਾਪੇ ਵਾਲਿਆਂ ਲਈ ਸਰਜਰੀ ਸਭ ਤੋਂ ਢੁਕਵਾਂ ਇਲਾਜ ਹੈ। ਉਨਾਂ ਕਿਹਾ ਕਿ ਇਸ ਨਾਲ ਸਮੁੱਚੀਆਂ ਬਿਮਾਰੀਆਂ ਤੋਂ ਬਚਾਅ ਰਹਿੰਦਾ ਹੈ ਤੇ ਮਰੀਜ਼ ਸਮਾਜ ਵਿੱਚ ਸ਼ਾਨੋ ਸ਼ੌਕਤ ਨਾਲ ਵਿਚਰਦਾ ਹੈ ਤੇ ਸਿਹਤਮੰਦ ਰਹਿੰਦਾ ਹੈ।
ਡਾ ਅਰੋੜਾ ਨੇ ਕਿਹਾ ਕਿ ਮੈਟਾਬੌਲਿਕ ਸਰਜਰੀ ਨਾਲ ਬਿਮਾਰੀਆਂ ਤੋਂ ਨਿਜ਼ਾਤ ਹਾਸਿਲ ਹੁੰਦੀ ਹੈ। ਉਨਾਂ ਇਸ ਸਰਜਰੀ ਤੋਂ ਮੋਟਾਪੇ ਅਤੇ ਸ਼ੂਗਰ ਤੋਂ ਪੀੜਤ ਲੋਕਾਂ ਨੂੰ ਲਾਭ ਲੈਣ ਦਾ ਸੱਦਾ ਦਿੰਦਿਆਂ ਦਾਅਵਾ ਕੀਤਾ ਕਿ ਮੈਟਾਬੌਲਿਕ ਸਰਜਰੀ ਨਾਲ ਸਿਰਫ਼ ਕਲੱਸਟਰੋਲ ਹੀ ਕਾਬੂ ਨਹੀਂ ਹੁੰਦੇ ਬਲਕਿ ਸ਼ੂਗਰ ਵੀ ਕੰਟੋਰਲ ਰਹਿੰਦੀ ਹੈ।